Gikan sa Among mga Magbabasa
Tulobagon Salamat sa talagsaong serye nga “Kita ba Manubag sa Atong mga Lihok?” (Septiyembre 22, 1996) Nakaplagan nako kining mga artikuloha nga epektibo kaayo sa pagsugod ug maayong mga panaghisgot uban sa mga abogado, mga ahente sa insyurans, mga ehekutibo sa negosyo, mga magpapatik, lokal nga opisyales sa gobyerno, ug uban pang akong gikaestorya sa among dapit negosyohan sa siyudad. Akong gipakita sa usa ka opisyal sa parkingan sa siyudad ang artikulong “Dili Kana Akong Sayop.” Iyang gisakmit ang magasin gikan sa akong mga kamot, nga nag-ingon nga “diyutay na lang kaayoy mga tawo nga moangkon sa ilang kaugalingong mga sayop.” Siya miingon nga buot niya nga ang tanang kawani mobasa niana.
B. S., Tinipong Bansa
Paglipaylipay Salamat sa artikulong “Mga Batan-on Nangutana . . . Sa Unsang Paagi Makalipaylipay Ako?” (Septiyembre 22, 1996) Ako 15 anyos, ug adunay daghang batan-on sa among kongregasyon. Kanunay kaming magkauban sa pagbuhat sa mga butang. Pananglitan, mahimong mosangyaw kami sa buntag ug sa hapon mangaligo. Alegre kaayo! Usahay ang uban gikan sa among kongregasyon mokuyog. Ug makapahupay sa among mga ginikanan ang pagkahibalo nga among nabatonan ang hustong matang sa kaubanan.
I. W., Alemanya
“Sickle-Cell Anemia” Nabasa nako ug gibasa pag-usab ang artikulong “‘Sickle-Cell Anemia’—Kahibalo ang Labing-Maayong Depensa.” (Oktubre 8, 1996) Kana nagbatbat sa akong kahimtang! Nagkinabuhi ako uban niining sakita sulod sa 18 ka tuig na karon. Ang mga luha nanglugmaw sa akong mga mata samtang gibasa ko kana. Nalipay ako sa pagkakita nga kamo naghunahuna niadtong nag-antos gumikan niining sakita.
R. S., Italya
Ako adunay sickle-cell anemia. Wala ako masayod nga daghan kaayong uban pa ang nasakit usab niana. Ang artikulo nakatabang kanako sa pagsabot kon nganong akong nasinati ang kasakit ug kon unsa ka hinungdanon nga moinom ug daghang likido. Ang akong mama naghatag ug mga kopya sa artikulo ngadto sa akong mga magtutudlo aron sila makasabot sa akong sakit.
A. H., Tinipong Bansa
Namatay ang akong manghod nga lalaki tungod sa sickle-cell anemia. Sa Nigeria, 60,000 ka tawo ang nangamatay matag tuig gumikan niana. Busa ang artikulo naghisgot sa tinuod nga suliran. Ang matag pamilya sa Nigeria kinahanglang mobasa niining artikuloha. Kana tugob sa impormasyon ug gipresentar gikan sa bag-ong panglantaw.
F. A., Nigeria
Dili ako makapugong sa pagpahayag kon unsay akong gibati sa artikulo bahin sa sickle-cell anemia. Akong giantos ang sakit sulod sa 26 ka tuig karon nga walay impormasyon. Daghan kaayong salamat niana.
D. C., Zambia
Gugma nga Magpalig-on Buot ko kamong pasalamatan, mahal nga mga igsoon, tungod sa pag-imprenta sa artikulong “Ang Hunahuna sa Bibliya: Ang Gugma nga Magpalig-on.” (Oktubre 8, 1996) Nakasagubang ako ug daghang pagsulay sa akong pagtuo latas sa katuigan, nga naglakip sa kalit nga mga kamatayon sa akong mga ginikanan. Apan ang kinalisorang pagsulay nga nahitabo naggikan sa usa nga anaa sa sulod sa kongregasyon. Kining artikuloha naghatag kanako ug kalig-on ug kahupayan, sanglit akong nasabtan nga si Jehova nasayod ug nakasabot sa akong mga luha ug sa kahiubos ug kasakit nga akong gibati sa akong kasingkasing. Akong nahibaloan nga bisan si apostol Pablo nag-antos sa samang mga kahiubos. Ako nagasalig nga sa ngadtongadto si Jehova mag-alim sa akong mga samad.
S. B., Canada
Niining daotang sistema, dali rang mahanaw ang panglantaw sa usa sa espirituwal nga mga butang. Ang artikulo makapadasig kaayo ug nakapalihok kanako. Di pa dugay, napit-os kaayo ako sa adlaw-adlaw nga mga kabalaka sa kinabuhi. Kining artikuloha nagtabang kanako sa pag-apresyar sa kahinungdanon sa pagsalig sa gugma ni Jesus, inay sa atong kaugalingong dili-hingpit nga mga pagbati.
A. M., Tinipong Bansa
Ako nag-antos sa depresyon nga gipahinabo sa usa ka kemikal nga kadili-timbang. Ang artikulo nakatabang kanako sa paghimog laing lakang sa pagsagubang sa akong depresyon.
B. U., Tinipong Bansa