Mabangis nga mga Buhat—Unsa ang Solusyon sa Diyos?
SA UNSANG paagi mapugngan ang mabangis nga mga buhat? Unsa ang solusyon? Kon kita magtuon ug kasaysayan, madayag nga ang mga solusyon sa tawo nangapakyas. Gani, adunay dakong panagsumpaki, kon dili man dakong pagkasalingkapaw, sa paagi sa pag-atubang sa tawhanong mga pangulo sa ulohan.
Tagda, pananglitan, ang tuig 1995. Kini nagtimaan sa ika-50ng anibersaryo sa kataposan sa Nazi Holocaust, sa Gubat sa Kalibotan II, ug sa pagbuto sa bomba atomika. Niadtong tuiga, ang mga seremonyas sa pagsaulog nga gitambongan sa mga pangulo sa kalibotan gihimo diha sa daghang bahin sa kalibotan. Ngano? Aron sa pagpasa sa pagbati sa pagdumot niining mabangis nga mga buhat aron kini dili na gayod masubli pa. Bisan pa, ang ubang mga tigpaniid nakamatikod ug makuyawng kontradiksiyon sa maong mga seremonyas.
Pagkasalingkapaw
Niining maayong pagkabandilyong mga seremonyas, ang tanang hawas sa relihiyon ug kagamhanan buot magpalantaw nga mga buotan o labing menos aron dili malantaw nga mga daotan. Bisan pa niana, ang mga nasod nga nagtunglo sa mabangis nga mga buhat sa nangagi nakatukod ug daghang bodega sa mga hinagiban, naggahin ug dagkong kantidad nga salapi alang sa maong katuyoan. Sa samang higayon, sila wala makasulbad sa dagkong mga problema sama sa kakabos, pagkadaot sa moral, ug polusyon, nga kasagaran moingon nga kulang sila ug pondo.
Ang kalibotanong relihiyon naningkamot sa paghimog mga bersiyon sa kasaysayan nga nagatabontabon sa iyang dugayng pagpakahilom labot sa mabangis nga mga buhat sa diktatoryal nga mga pagmando ug nagpakahilom sa iyang pagpakigkunsabo kanila. Kining mga relihiyona walay gihimo sa pagpahunong sa mga tawo sa samang relihiyon sa pagpamatay sa usag usa. Pananglitan, sa Gubat sa Kalibotan II, gipamatay sa mga Katoliko ang Katoliko ug ang Protestante gipamatay ang Protestante tungod kay sila lahi ug mga nasyonalidad ug anaa sa kontrang mga kiliran. Ang duha ka kiliran nangangkong Kristohanon apan nagbuhat sa mga butang nga supak gayod sa mga pagtulon-an ni Jesus. (Mateo 26:52; Juan 13:34, 35; 1 Juan 3:10-12; 4:20, 21) Ang ubang mga relihiyon sama usab ug gihimo. Karong adlawa, sa nagkalainlaing bahin sa kalibotan, ang mabangis nga mga buhat ginahimo gihapon sa mga sakop niining mga relihiyona.
Sa panahon ni Jesus, ang mga pangulo sa relihiyon maoy mga salingkapaw. Gisaway sila ni Jesus, nga nag-ingon: “Alaot kamo, mga eskriba ug mga Fariseo, mga salingkapaw! tungod kay kamo nagatukod sa mga lubnganan sa mga propeta ug nagadayandayan sa handomanang mga lubnganan sa mga matarong, ug nagaingon kamo, ‘Kon kita didto sa mga adlaw sa atong mga katigulangan, dili kita mahimong mag-aambit uban kanila sa dugo sa mga propeta.’ Busa nagapanaksi kamo batok sa inyong kaugalingon nga mga anak diay kamo niadtong mga nagbuno sa mga propeta.” (Mateo 23:29-31) Kadtong relihiyosong mga pangulo nangangkon nga diyosnon apan mga salingkapaw nga naglutos kang Jesus ug sa iyang mga tinun-an.
Mga Leksiyon nga Gitudlo sa Bibliya
Adunay makuhang mga leksiyon gikan sa sekular nga kasaysayan, apan ang Bibliya mao ang tuboran sa labing maayong mga leksiyon. Wala isalig niini ang buluhaton sa pag-interpretar sa kasaysayan ngadto sa tawhanong paghukom o pagpihig. Ang Bibliya nagbatbat sa kasaysayan ug umaabot sumala sa kahayag sa panghunahuna sa Diyos.—Isaias 55:8, 9.
Ang Kasulatan naghisgot bahin sa maayo ug daotang mga hitabo maingon man sa maayo ug daotang mga tawo. Kasagaran ang usa ka hustong leksiyon, usa nga nahiuyon sa kabubut-on sa Diyos, makuha gikan niining mga asoya. Human naghisgot ug ubay-ubayng mga hitabo sa kasaysayan sa karaang mga Israelinhon, si apostol Pablo mihinapos: “Karon kining mga butanga nangahitabo kanila ingong mga panig-ingnan, ug sila gikasulat ingong pasidaan kanato.” (1 Corinto 10:11) Si Jesus mismo mikuha ug usa ka leksiyon sa kasaysayan sa dihang siya miingon ngadto sa iyang mga tinun-an: “Hinumdomi ninyo ang asawa ni Lot.”—Lucas 17:32.
Kon Unsay Hinumdoman sa Diyos ug Kon Unsay Iyang Kalimtan
Atong nahibaloan gikan sa Bibliya nga hinumdoman o kalimtan sa Diyos ang mga tawo sumala sa ilang mga buhat. Kadtong nakasala apan naghinulsol pasayloon sa Diyos “sa madagayaon gayod.” (Isaias 55:7) Kon ang usa ka daotan maghinulsol ug “mobiya sa iyang sala, ug magbuhat uyon sa hustisya ug pagkamatarong, . . . walay usa sa iyang mga sala . . . ang pagahinumdoman pa batok kaniya.”—Ezequiel 33:14-16.
Si Pablo nagsulat nga “ang Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Hebreohanon 6:10) Busa, paborableng gantihan ni Jehova kadtong iyang hinumdoman. Ang matinumanong Job nag-ampo: “Oh nga sa Sheol [ang komong lubnganan sa tanang katawhan] tagoan mo ako, . . . nga imo unta akong tagalan ug panahon ug hinumdoman ako!”—Job 14:13.
Sa bali, pakiglabotan sa Diyos ang dili-maghinulsol nga mamumuhat ug daotan sumala sa mga pulong nga Iyang gisulti ngadto kang Moises: “Papason ko siya gikan sa akong basahon.” (Exodo 32:33) Oo, kalimtan sa Diyos ang mga daotan sa walay kataposan.
Ang Kataposang Maghuhukom
Ang Diyos mao ang kataposang Maghuhukom sa kasaysayan. (Genesis 18:25; Isaias 14:24, 27; 46:9-11; 55:11) Sumala sa iyang kinatas-ang paghukom, dili niya kalimtan ang daghang mabangis nga mga buhat nga gihimo batok sa katawhan. Sa adlaw sa iyang matarong nga kasuko, iyang hukman ang tanang may-tulubagong mga tawo ug mga institusyon.—Pinadayag, mga kapitulo 18, 19.
Lakip niini mao ang tibuok sistema sa bakak nga relihiyon, nga gihatagan sa Kasulatan ug simbolikong ngalang “Dakong Babilonya.” Mahitungod kaniya kini ang nahisulat: “Ang iyang mga sala nagtipun-og sangko sa langit, ug nahinumdoman sa Diyos ang iyang inhustisya nga mga buhat.”—Pinadayag 18:2, 5.
Kining mga relihiyona gipakaingon nga nagtudlo sa ilang mga sumusunod sa pagbuhat sa hustong butang apan napakyas. Busa, ang Pulong sa Diyos nag-ingon bahin sa tanang kalibotanong relihiyon: “Diha kaniya nakaplagan ang dugo sa mga propeta ug sa mga balaan ug sa tanan kanila nga gipamatay ibabaw sa yuta.” (Pinadayag 18:24) Tungod kay napakyas sa pagtudlo sa ilang mga sakop sa paghigugma sa ilang isigkatawo ug sa isigkarelihiyonista, kining mga relihiyona gisumbong nga sad-an sa pag-ula ug dugo.
Usa ka Bag-ong Kalibotan Haduol Na!
Ang adlaw diin ang daotan pagalaglagon sa kataposan haduol na. (Sofonias 2:1-3; Mateo 24:3, 7-14) Human nianang adlawa, moabot ang panahon sa dihang ang ‘pagbangotan, pagtiyabaw, ug kasakit mawala na’ alang sa malipayong mga molupyo sa yuta. (Pinadayag 21:3-5) Ang mabangis nga mga buhat ug mga pagpamatay dili na gayod mahitabo pag-usab tungod kay ang pagmando niining yutaa pagakuhaon gikan sa mga tawo ug ihatag ngadto sa langitnong Gingharian sa Diyos diha sa mga kamot sa “Prinsipe sa Pakigdait,” si Jesu-Kristo.—Isaias 9:6, 7; Daniel 2:44; Mateo 6:9, 10.
Nianang panahona ang tagna sa Salmo 46:9 bug-os nga matuman: “Pahunongon [sa Diyos] ang gubat hangtod sa kinatumyan sa yuta.” Kana nga pakigdait molungtad sa walay kataposan tungod kay, ingon sa gitagna sa Isaias 2:4, “ang nasod dili na mobakyaw ug espada batok sa laing nasod, ni makakat-on pa sila mahitungod sa gubat.” Busa ang Salmo 37:11 nagtagna: “Ang mga maaghop magapanunod sa yuta, ug sila makakaplag sa ilang tumang kalipay diha sa kadagaya sa pakigdait.” Oo, ikaingon unya nga “ang tibuok nga yuta makapahulay, ug wala nay kasamok. Ang mga tawo manghugyaw sa kalipay.”—Isaias 14:7.
Kining tanan nagkahulogan nga ang usa ka matarong bag-ong kalibotan haduol na. Ug diha niana nga bag-ong kalibotan, ilalom sa pagmando sa langitnong Gingharian sa Diyos, laing katingalahang hitabo ang mahitabo—ang pagkabanhaw sa mga patay! Ang Pulong sa Diyos nagpasalig: “Aduna unyay pagkabanhaw sa mga matarong ug sa mga dili-matarong.”—Buhat 24:15.
Samtang dinhi sa yuta, gipasundayag ni Jesus kini pinaagi sa pagbanhaw sa mga tawo gikan sa mga patay. Pananglitan, sa dihang iyang gibanhaw ang usa ka dalagita, ang asoy nag-ingon: “Ang dalagita mibangon gilayon ug misugod paglakaw . . . Dihadiha [kadtong nagtan-aw] daw nawala sa ilang kaugalingon uban ang hilabihan nga kalipay.” (Marcos 5:42) Diha sa pagkabanhaw kadtong gipamatay sa mabangis nga mga buhat maingon man ang dugay nang nangamatay pagabanhawon gikan sa mga patay ug hatagan ug higayon nga mabuhing walay kataposan diha sa usa ka paraisong yuta. (Lucas 23:43) Ug ngadtongadto “ang nangaging mga butang dili na pagahinumdoman pa, ni motungha pa kini diha sa kasingkasing.”—Isaias 65:17.
Molihok kang maalamon sa pagbaton ug tukmang kahibalo sa Pulong sa Diyos, ang Bibliya, ug sa pagtuman sa iyang kabubut-on. Dayon hinumdoman ka sa Diyos nga may kahimuot sa dihang sa walay kataposan iyang sulbaron ang mga problema sa mabangis nga mga buhat ug ibalik ang kinabuhi ngadto sa mga biktima. Si Jesus nag-ingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.
[Mga hulagway sa panid 9]
Bag-ohon sa Diyos kining yutaa ngadto sa usa ka malinawon nga paraiso
[Mga hulagway sa panid 10]
Wagtangon sa Diyos ang mga epekto sa nangaging mabangis nga mga buhat pinaagi sa pagbanhaw sa mga patay