Gikan sa Among mga Magbabasa

Pagpaniid sa Kalibotan Usa ako ka peryodista, ug kadaghanan sa akong mga kauban nalingaw sa pagbasa sa bahin nga “Pagpaniid sa Kalibotan” aron mokuhag mga ideya para sa ilang kaugalingong trabaho. Dawaton ko nga nadasig ako mismo sa pipila sa mga artikulo. Nakadayeg ako ilabina sa inyong mga maghuhubad ug mga proofreader. Ang maong taas nga sukdanan sa pinulongan talagsa ra sa palaumagian sa balita.

J. B., Czechia

Mga tuig kanhi sa dihang misugod ako pagbasa sa Pagmata!, ang “Pagpaniid sa Kalibotan” maoy bahin nga dili kaayo ko malingaw. Karon giisip ko kini nga puno kaayo ug impormasyon. Sa pagkatinuod, daghang panghitabo sa kalibotan nga wala nako makita diha sa mga sibya sa balita sa TV ang gihisgotan sa “Pagpaniid sa Kalibotan.” Padayona ang maayo kaayong trabaho!

I. K. M. C., Brazil

Kamatay Ang seryeng “Kamatay​—Matapos Kaha Kini?” (Nobyembre 22, 1997) nag-ingon: “Ang mananakod nga sakit nagpabiling nag-unang hinungdan sa kamatayon sa kalibotan, nga mipatay ug kapin sa 50 ka milyong tawo sa 1996 lamang.” Apan, ang usa ka taho sa World Health Organization nag-ingon nga sa kapin sa 52 ka milyong kamatayon sa 1996, kapin sa 17 ka milyon ang tungod sa mga sakit nga mananakod o gumikan sa parasito.

B. B., Tinipong Bansa

Ang among tuboran niini nga mga komento mao ang mantalaan sa Alemanya nga “Nassauische Neue Presse.” Kini nga artikulo sa mantalaan tataw nga nasayop sa pagkutlo sa World Health Organization. Busa among gipabilhan kini nga katin-awan.​—ED.

Pagnganga Salamat sa artikulong “Pagsabot sa Kahadlok nga Monganga sa Pagsulti.” (Nobyembre 22, 1997) Sa among kongregasyon duna kamiy pipila ka batan-on nga duna niini nga suliran, ug kanunay akong dili ganahang makig-uban kanila. Busa nalipay akong makabasa sa praktikal nga mga sugyot nga inyong gihatag aron matabangan kami sa pagpakiglabot sa mga nagnganga sa pagsulti. Inyo kaming gidasig nga paluyohan ang mga sama nila, ug gitudloan ninyo kami kon unsaon paghimo sa ingon.

Y. N., Hapon

Sa akong klase sa eskuylahan, dunay duha ka tawo nga nagnganga sa pagsulti. Halos dili sila motubag sa klase, ug sama sa gihisgotan sa inyong artikulo, sa dihang hangyoon sila nga mobasag kusog, klaro kaayong kuyawan sila. Salamat sa inyong artikulo, mas masabtan na nako ang kahadlok nga kinahanglan nilang buntogon aron makasulti sa klase.

S. L., Alemanya

Desisayis anyos ako, ug nagnganga sa pagsulti. Buot ko kamong pasalamatan sa tibuok kong kasingkasing tungod sa pagdasig nga akong nadawat gikan sa pagbasa sa artikulo. Usahay masubo kami tungod kay dili namo mahimo ang tanan nga buot namong himoon. Busa nindot nga makita kon sa unsang paagi si Jehova naghunahuna kanamo ug nagdasig kanamo. Ako naglaom nga ang tanang makabasa sa artikulo matabangan nga pabilhan ang mga paningkamot nga gihimo sa mga nagnganga sa pagsulti.

S. D. A., Italya

Ang artikulo mibukas sa daghan kaayong masakit nga mga handomanan. Apan nagpaamgo usab kini kanako kon unsa ka dako ang pagtagad ni Jehova ug kon unsa ka daghan sa iyang panalangin kanako sa nanglabayng katuigan. Sa dihang gibawtismohan ako sa edad nga 11, akong tim-os nga tinguha nga dayegon si Jehova ingong usa ka publikong mamumulong. Abi nakog kinahanglan pa akong mohulat sa bag-ong kalibotan sa Diyos aron makab-ot kana nga tumong. Apan sa milabayng 37 ka tuig, nakapribilehiyo ako nga mohatag ug daghang pakigpulong publiko ingon man usab mga pakigpulong sa sirkito ug distritong mga kombensiyon.

R. F. D., Inglaterra

Tungod sa akong kahadlok nga monganga pagsulti, dili ako mokomento sa mga tigom sa kongregasyon. Nabalaka usab ako nga magnganga diha sa balay-balay nga buluhatong pagsangyaw, ilabina kon nagsangyaw uban sa usa nga larino. Kining artikuloha nagtabang kanako sa pagsabot nga si Jehova nakasabot sa akong mga suliran.

C. C. L., Brazil