Wala Siya Mohunong
NIADTONG Oktubre 5, 1995, ang 14-anyos nga si Matt Tapio gioperahan tungod sa tumor sa iyang utok. Ang tumor makamatay diay. Ang operasyon maoy una sa daghan nga iyang naagoman sa misunod nga duha ka tuig ug tunga. Misunod ang kemoterapiya ug mga pagtambal pinaagig radyasyon.
Si Matt nagpuyo sa Michigan, T.B.A., diin siya nagtungha sa publikong eskuylahan ug nagtambongan sa Kristohanong mga tigom. Iyang gipahimuslan ang mga kahigayonan sa pagpakigsulti sa mga magtutudlo ug mga klasmet mahitungod sa iyang mga tinuohan maingon man usab sa pagpakigbahin sa pagduaw sa uban diha sa publikong ministeryo. Panahon sa iyang subsob nga pag-estar sa ospital—siya migugol ug 18 ka bulan sa kataposang duha ka tuig ug tunga sa iyang kinabuhi diha sa mga ospital—siya nakapahimutang ug gatosan ka literatura sa Bibliya niadtong iyang nahibalag didto.
Daghang panahon nga morag si Matt dili na makalahutay, apan sa matag panahon siya naulian. Kausa, sa pagpaingon sa ospital, giatake siya ug mihunong sa pagginhawa. Ang cardiopulmonary resuscitation gisugdan, ug siya nabuhi. Sa dihang naulian siya sa panimuot, siya misugod paghilak ug misinggit: “Ako mapakigbisogon! Ako mapakigbisogon! Dili ako tigsurender!” Ang mga tawo miingon nga ang pagtuo ni Matt sa Diyos maoy nagpaposible nga nabuhi siya sa taas nga panahon.
Nakab-ot ni Matt ang usa ka gipakahamiling tinguha sa Enero 13, 1996, sa dihang nabawtismohan siya ingong simbolo sa iyang dedikasyon kang Jehova nga Diyos. Ang bawtismo gihimo sa usa ka pribadong pool tungod sa risgo sa impeksiyon. Pipila ka adlaw sa ulahi, nahibalik siya sa ospital alang sa dugang operasyon. Sa Agosto 1997, walay hunong ang pagsuka ni Matt sulod sa pipila ka semana, apan nabaskog siya human sa dugang operasyon.
Latas niining tanan, padayong nahuptan ni Matt ang hiyas nga maayong mopakatawa, nga makigkomedyahay sa mga doktor ug mga nars. Wala nila masabti kon nganong aduna siya nianang talagsaong hiyas nga maayong mopakatawa. Usa sa mga doktor miingon kaniya: “Matt, kon ako ang anaa sa imong kahimtang, gisirad-an ko na sa kortina ang akong katre, gitabonan ang akong ulo, ug gisultihan ang tanan nga mopahawa.”
Sa Pebrero 1998, mipauli si Matt sa balay gikan sa ospital nga usa sa kataposang mga higayon. Gikalipay kaayo niya nga nabuhi ug nakapauli nga sa pagsulod sa pultahan, siya miingon: “Malipayon kaayo ko! Mag-ampo ta.” Dayon iyang gipahayag kang Jehova ang iyang kalipay diha sa pag-ampo. Duha ka bulan sa ulahi, sa Abril 19, sa kataposan siya namatay sa kanser.
Sayosayo pa, ang narekord nga pag-interbiyo kang Matt gipatokar panahon sa usa ka tigom sa mga Saksi ni Jehova diha sa lokal nga Kingdom Hall. Gipangutana siya: “Unsay imong ikasulti kanamo nga adunay igong kahimsog may kalabotan sa atong ministeryo ug Kristohanong mga tigom?”
Mitubag si Matt: “Buhata kon unsay inyong mahimo karon. . . . Wala gayod kamo masayod kon unsay mahimong mahitabo. . . . Apan bisan unsa pay mahitabo, ayaw gayod paghunong sa pagpamatuod bahin kang Jehova.”