Sa Dihang ang Pagkaon Maoy Imong Kaaway

Nagpalandong sa katuigan sa iyang pagkatin-edyer, si Jean tatawng nahinumdom nga siya maoy gipuntirya sa mga sulogsulog ug mga biaybiay. Ang rason? Siya mao ang kinatas-an ug kinadak-ang babaye sa iyang klase sa tunghaan. Apan dili kay kana ra. “Mas grabe pa sa pagkahimong dako, ako maulawon ug bakikaw taliwala sa mga tawo,” matod ni Jean. “Kasagaran masulub-on ako, nga buot mopahiuyon sa usa ka pundok, apan kasagaran mibati akong walay labot.”

Si Jean nakombinsir nga ang iyang gidak-on mao ang hinungdan sa tanan niyang mga suliran ug nga ang niwang, gamayon nga pamayhon maoy mosulbad sa tanan. Dili tambok si Jean. Sa kasukwahi, sa gitas-on nga 180 sentimetros ug sa timbang nga 66 kilos, dili siya sobra sa timbang. Bisan pa niana, mibati si Jean nga tambok, ug sa edad nga 23 mihukom siya nga magpadaot. ‘Kon niwang ko,’ siya nangatarongan, ‘buot akong ikauban sa ubang mga tawo. Sa kataposan, mobati akong dinawat ug espesyal.’

“Kanang matanga sa binuang nga pangatarongan mitultol ngadto sa dose-ka-tuig nga laang nga ginganlag anorexia nervosa ug bulimia,” misaysay si Jean. “Miniwang tuod ko, niwang kaayo nga hapit akong mamatay, apan imbes magtukod ug usa ka malipayong kinabuhi, gidaot nako ang akong panglawas ug nagmugna ug kapin sa usa ka dekadang depresyon ug kasub-anan.”

SI Jean wala mag-inusara. Sumala sa usa ka banabana, hangtod sa 1 sa 100 ka Amerikana ang may anorexia nervosa sa tin-edyer o batan-on pa, ug tingali tulo ka pilo sa maong gidaghanon ang dunay bulimia. “Nagatrabaho ako diha sa mga tunghaan ug mga kolehiyo sulod sa katuigan,” matod ni Dr. Mary Pipher, “ug akong nakita mismo nga ang mga abnormalidad sa pagkaon sama ka kaylap sukad masukad.”

Kini usab nagkadaiya. Gihunahuna kanhi nga suliran sa mga adunahan, ang mga abnormalidad sa pagkaon sa pagkakaron giisip nga komon diha sa tanang rasanhon, katilingbanon, ug ekonomikanhong mga hut-ong. Bisan ang gidaghanon sa mga lalaki nga gidayagnos nagauswag, nga nagpahinabo sa magasing Newsweek sa pagtawag sa mga abnormalidad sa pagkaon nga “walay-pili nga nag-apektar sa mga lalaki ug babaye.”

Apan, ang ilabinang nakapabalaka mao nga ang aberids nga panuigon niadtong gitambalan tungod sa mga abnormalidad sa pagkaon morag nagaus-os. “Dunay mga batang babaye nga mas bata pa sa 10 anyos, bisan ingon ka bata sa 6 anyos, nga gidawat diha sa mga programa sa ospital,” matod ni Margaret Beck, temporaryong direktor sa usa ka sentro sa abnormalidad sa pagkaon sa Toronto. “Diyutay pa kini,” siya midugang, “apan nagakadaghan kini.”

Nga nahisgotan na ang tanan, ang mga abnormalidad sa pagkaon nag-apektar sa milyonmilyon—ilabina sa mga batang babaye ug mga batan-ong babaye.a “Wala sila maghunahuna bahin sa pagkaon o mogamit sa pagkaon sa paagi nga ginahimo sa kadaghanang katawhan,” matod sa social worker nga si Nancy Kolodny. “Imbes mokaon kon gutomon sila, mokaon alang sa sustansiya ug maayong panglawas, mokaon alang sa kalingawan, o mokaon aron maglipaylipay kauban sa ubang tawo, sila nalangkit sa pagkaon sa talagsaong paagi ug nagabuhat sa mga butang nga wala isipang ‘normal’—sama sa pagkabaton ug talagsaong mga rituwal una pa nila tugtan ang ilang kaugalingon nga mokaon, o sa panginahanglan nga ipagula dayon sa ilang lawas ang pagkaon nga ilang nakaon. Susihon nato pag-ayo ang duha ka kasagarang mga abnormalidad sa pagkaon: anorexia nervosa ug bulimia nervosa.

[Footnote]