Pagpaniid sa Kalibotan

Gipakita sa swab test nga ang mga keypad sa mga ATM sa mga siyudad sa England daghag peligrosong kagaw nga sama nianang sa publikong mga kasilyas.—THE TELEGRAPH, BRITAIN.

“Usahay, ang mga siyentista makurat sa mga linog [sama niadtong sa New Zealand niining tuiga ug sa Haiti sa miaging tuig] kay nahitabo kini sa wala madiskobrehing mga fault. . . . Nakapatungha kinig makapabalakang pangutana: Pila pa ka linog ang mahitabo diha sa wala mahibaloi nga mga fault?”—THE NEW YORK TIMES, U.S.A.

“Ang upat ka labing sapian sa kalibotan . . . mas daghan pag kuwarta kay sa 57 ka kinapobrehang nasod sa kalibotan.”—FOREIGN POLICY, January/ February 2011, U.S.A.

Ang mga tag-iya sa 90 porsiyento sa mga negosyo sa Poland nagtaho nga sila nangabiktima sa pangawat o panikas sa ilang mga empleyado sa miaging duha ka tuig.—GAZETA PRACA, POLAND.

Sa Brazil, usa ka simbahang Katoliko magpamulta karon sa mga pangasaw-onon ug $300 (U.S.) kon maulahi sila ug abot sa ilang kasal. Ang mga kaslonon kinahanglang moisyu ug tseke sa dili pa ang kasal, ug iuli lang kini kon moabot sila sa untop nga oras.—G1, BRAZIL.

Papa Dili na Makadonar ug Organo sa Lawas

Sa kardinal pa si Joseph Ratzinger sa Simbahang Romano Katoliko, madonar niya ang iyang organo, nag-ingon ang mantalaang La Repubblica sa Italy. Apan sa nahimo na siyang papa, dili na madonar ni Benedict XVI ang iyang organo. Ngano? “Ang lawas sa Papa iya sa tibuok Iglesya,” miingon ang arsobispo nga si Zygmunt Zimowski, usa sa kadagkoan sa Vatican. “Busa, kinahanglang kompleto ang lawas sa papa inigkamatay, kay basig sa ulahi himoon siyang santos.”

Kinabuhi Bugti sa Salapi?

Andam ba ang tawo sa pagbaligya sa iyang kinabuhi sulod sa usa ka tuig sa kantidad nga usa ka milyong euro? Sa Germany, kapin sa 1 sa matag 4 ka lalaki, ug 1 sa matag 6 ka babaye, andam sa pagbaligya sa ilang kinabuhi, sumala sa usa ka surbi nga gihimo sa Emnid alang sa Reader’s Digest Deutschland. Kadtong mas batan-on nga gisurbi mas andam mobaligya—29 porsiyento niadtong 14 ngadto sa 29 anyos, ug 25 porsiyento niadtong 30 ngadto sa 39 anyos. Apan alang sa mas edaran, bililhon kaayo kanila ang kinabuhi. Trese porsiyento lang sa 50 ngadto sa 59 anyos, ug 11 porsiyento niadtong kapin sa 60 anyos, ang andam sa pagbaligya sa ilang kinabuhi.