Ang Ipasabot sa mga Balita
Mga Pag-abuno sa Dugo—Luwas Gikan sa AIDS?
“Wala ako magtuo nga ang kabalaka sa AIDS madala sa atong desisyon may kalabotan sa pag-opera o sa bisan unsang katarongan sa pagdawat ug dugo,” miingon ang tigpamaba sa Centers for Disease Control sa Atlanta. Apan, tingali dili mouyon ang 60-anyos nga gioperahang pasyente nga nataptan ug kagaw sa AIDS human nakadawat ug hinatag nga dugo nga gisusi kon may AIDS.
Ang The New York Times mitaho nga ang pasyente nakadawat ug dugo gikan sa usa ka tighatag nga midonar niining dugoa “tapos gilayon sa iyang homoseksuwal nga buhat sa wala pa matugki ug antibodies nga nakapukaw sa mga pagsusi sa dugo.” Apan, sa milabay ang tulo ka bulan, ang tighatag midonar na usab ug dugo. Karong panahona kini “nagpakitag mga timaan nga dunay AIDS nga antibodies ug wala dawata,” mitaho ang Times.
Pinaagi sa paggamit ug bag-ong naugmad nga paagi sa pagsusi sa dugo, ang mga awtoridad sa medisina masaligon nga ang suplay sa dugo sa nasod malamposong nahinloan sa nataptag kagawng dugo. Apan, ang kapakyasan sa pag-ila sa may kagawng dugo nga wala pa makabaton ug antibodies sa pagpukaw ug tukmang mga resulta sa pagdukiduki nagpakita nga ang kapeligrohan sa mga tawo sa pagdawat ug mga pag-abuno sa dugo tinuod gayod. Kapin sa 21,000 ka kaso sa AIDS ang gitaho sa Tinipong Bansa sukad sa 1977, halos 2 porsiento niini maoy tungod sa mga pag-abunog may kagawng dugo.
Kadtong nagasunod sa balaod sa Diyos nagpabiling luwas sa makatakod nga mga epekto sa mga pag-abuno sa dugo. Ngano? Tungod kay ilang “gidumilian sa tanang panahon . . . ang dugo ug mga butang nga naluok,” nga wala kapatuloig dugo. Sanglit nagadumili kining mga tawhana tungod sa relihiyosong mga katarongan, ilang gitagamtam ang dugang mga kaayohan, kay ang nagamandong lawas sa unang Kristohanong kongregasyon midugang: “Kon ampingan ninyo ang inyong kaugalingon gikan niining mga butanga, mouswag kamo. Maayong panglawas kaninyo!”—Buhat 15:28, 29.
Gilabanan sa mga Katoliko ang Ebolusyon
Sa panahon sa pag-atubang sa katilingban nga gihimo sa Abril 1986, si Juan Papa Paulo II mipahayag: “Kon mahitungod sa doktrina sa pagtuo, kami walay nakitang kalisdanan sa pagpatin-aw sa sinugdanan sa lawas sa tawo pinaagi sa teoriya sa ebolusyonismo.” Nganong wala? Tungod kay ang maong Katolikong “doktrina sa pagtuo” nangangkon nga, gawas sa lawas, ang tawo adunay dili mamatayng kalag. Ang iglesya nagpatuo nga kining maong kalag, ug dili ang lawas, mao ang direktang gilalang sa Diyos.
Apan, sumala sa Genesis 2:7, dihang giumol sa Diyos ang tawo gikan sa abog ug gihuypan sa iyang ilong ug gininhawa sa kinabuhi, “ang tawo nahimong kalag nga may kinabuhi.” Ang tawo wala hatagi ug kalag kondili nahimong kalag, usa ka buhi nga tawo. (Itandi sa 1 Corinto 15:45.) Diha sa Ezekiel 18:4 kita gisultihan: “Ang kalag nga makasala—mamatay.” Kini nagpakita nga ang kalag mao ang tawo, dili usa ka dili-materyal nga bahin kaniya nga mabuhi tapos mamatay ang iyang lawas.
Sa atubangan, daw walay suliran sa pagdawat sa ebolusyonaryong sinugdanan sa lawas sa tawo. Apan sa pagbuhat niini, gisalikway sa Katolikong Iglesya ang asoy sa Genesis bahin sa paglalang, usa ka rekord nga gidawat mismo ni Jesu-Kristo nga tinuod. (Mateo 19:4-6) Kang kinsang kaisipan ang dawaton sa Kristohanon?
Dili Kasulatanhong Pagkompromiso
Ang pagduaw ni Papa Juan Paulo II sa sinagoga sa Roma sa Abril 13, 1986, gibatbat nga usa ka “makasaysayanhong hitabo” nga gitakdang ‘makabukas ug bag-ong panahon.’ Ngano? Tungod kay kadto mao ang unang higayon nga opisyal nga giduaw sa papa ang usa ka Hudiyohanong dapit sa pagsimba. Sumala sa La Repubblica, usa ka pamantalaan sa Roma, pinaagi niining buhata ang Iglesya Katolika nagsulay sa “pagtul-id sa mga kalapasan sa kasaysayan,” sanglit ang iglesya wala man gayod “nakasunod sa mga obligasyon sa pagmahal ni Kristo sa Hudiyohanong mga igsoon niini.”
Ang pagduaw sa papa gituyo sa pagpadako sa “komung espirituwal nga kabilin” nga giambitan sa mga Katoliko ug sa mga Hudiyo. Apan, kanang gihubit ni Juan Paulo nga “dakong kalainan” tali ning duha ka relihiyon nagpabilin gihapon, nga mao, ang kamatuoran sa dili pagdawat sa mga Hudiyo kang Kristo ingong Mesiyas. Unsa ang sulbad sa papa niining problemaha? Sa iyang pakigpulong, iyang gihisgotan ang pagpakitag “pagtahod sa usag-usang personal nga mga pagtuo” ug sa paglikay ug dugang pag-ipit pinaagi sa pagpugos sa pagtuo sa usa ka tawo ngadto sa lain. Ang maong mga pahayag, miingon ang La Repubblica, nagpamatuod sa “pagdili sa papa sa tanang porma sa pagpangabig” may kalabotan sa mga Hudiyo.
Apan, gisultihan ni apostol Pedro ang Hudiyong mga saserdote ug ubang mga tigulang nga lalaki sa Jerusalem nga “walay kaluwasan pinaagi kang bisan kinsa pa nga lain” kondili kang Jesu-Kristo. Dugang pa, dihang si Pedro ug Juan gipinahan sa paghunong sa pagsangyaw sa ngalan ni Jesus, sila mitubag: “Kami dili makapugong sa pagsulti mahitungod sa mga butang nga among nakita ug nadungog.” (Buhat 4:8, 12, 18-20) Dili ba mao man usab kanay angay buhaton sa mga sumusunod ni Kristo karon?