Mga Benepisyo sa Pagpugong sa Kaugalingon

UNSA ANG PAGPUGONG SA KAUGALINGON?

Apil niini ang katakos nga

• maghulat

• dili magdalidalig desisyon

• tiwason ang trabaho bisag dili ka ganahan

• unahon ang uban imbes ang kaugalingon

NGANONG IMPORTANTE ANG PAGPUGONG SA KAUGALINGON?

Ang mga bata nga mas makapugong sa kaugalingon makalikay sa tentasyon, bisan pag makalingaw kana. Pero ang mga bata nga kulag pagpugong sa kaugalingon lagmit

• mahimong agresibo

• mag-antos sa depresyon

• manigarilyo, magpalabig inom, o magdroga

• magpatuyang lag kaon

Nakita sa usa ka pagtuon nga ang mga hamtong nga may pagpugong sa kaugalingon sukad sa pagkabata wala kaayoy problema sa panglawas ug sa pinansiyal ug mas masinundanon sa balaod. Tungod niana, si Propesor Angela Duckworth sa University of Pennsylvania miingon: “Makaayo gyod pirme ang pagpugong sa kaugalingon.”

KON UNSAON PAGTUDLO ANG PAGPUGONG SA KAUGALINGON

Kon moingon kag dili, tinud-a kana.

PRINSIPYO SA BIBLIYA: “Himoa ang inyong ‘Oo’ nga oo, ang inyong ‘Dili,’ dili.”​—Mateo 5:37.

Usahay sulayan sa mga bata ang ilang ginikanan pinaagi sa pagmanya o pag-wild​—tingali sa lugar nga daghag tawo. Kon magpadala ang ginikanan, makaingon ang bata nga makuha ra niya ang iyang gusto kon magmanya siya.

Pero kon ang ginikanan moingog dili ug tinud-on kana, ang bata makakat-on ug leksiyon​—nga dili nato makuha ang tanan natong gusto. “Ang mga tawo nga nahibalo niana nga leksiyon mao hinuon ang mas malipayon,” misulat si Dr. David Walsh. “Dili gyod makaayo kon tudloan nato ang atong mga bata nga makuha nila ang bisan unsa nga gusto nila.”a

Ang pag-ingon nimog dili sa imong anak makatabang niya nga magpugong sa iyang kaugalingon inigkadako niya​—pananglitan, kon siya tentalon nga magdroga, makigsekso nga dili pa minyo, o moapil sa uban pang makadaot nga mga buhat.

Tabangi ang imong anak nga makasabot sa maayo ug daotang resulta sa iyang himoon.

PRINSIPYO SA BIBLIYA: “Kon unsay gipugas sa usa ka tawo, mao pod ang iyang anihon.”​—Galacia 6:7.

Kinahanglang makasabot ang imong anak nga dunay resulta ang iyang mga himoon ug ang kawalay-pagpugong sa kaugalingon moresultag dili maayo. Pananglitan, kon ang imong anak daling masuko, lagmit likayan siya sa uban. Pero kon makakat-on siya sa pagpugong sa kaugalingon dihang may magpalagot niya o makakat-on sa paghulat imbes mosagbat dayon, ang mga tawo ganahan niya. Pasabta ang imong anak nga dunay maayong mga resulta kon kanunay niyang ipakita ang pagpugong sa kaugalingon.

Tudloi ang imong anak kon unsay unahon.

PRINSIPYO SA BIBLIYA: ‘Seguroa ninyo ang mas importanteng mga butang.’​—Filipos 1:10.

Ang pagpugong o pagkontrol sa kaugalingon wala lang magpasabot nga magpugong ta sa pagbuhat ug daotan; apil niana ang pagbuhat kon unsay gikinahanglan, bisan pag dili ka ganahang mobuhat niana. Importante nga makakat-on ang imong anak kon unsay unahon ug himoon gyod kana. Pananglitan, kinahanglang unahon niya ang homwork ayha ang pagdula.

Ipakita ang maayong ehemplo.

PRINSIPYO SA BIBLIYA: “Naghatag kog sumbanan kaninyo, nga kon unsay akong gihimo kaninyo, angay usab ninyong himoon.”​—Juan 13:15.

Ang imong anak makamatikod sa imong reaksiyon dihang mag-atubang kag dili maayo o makalagot nga mga situwasyon. Ipakita pinaagi sa imong ehemplo nga ang pagpugong sa kaugalingon moresultag maayo. Pananglitan, dihang mohimog dili maayo ang imong anak, kalma ra ba ka o masuko dayon?