Gisuportahan sa Boluntaryong mga Amot
Ang tanang kalihokan nga gihisgotan sa sinugdan gisuportahan sa boluntaryong mga trabahante, busa nakamenos sa galastohan. Ang balay ug balay nga ministeryo ug ang pagpanagtag sa literatura gihimo sa boluntaryong paagi sa mga Saksi ni Jehova. Sila ang nagbayad sa ilang kaugalingong gasto. Ang mga ansiano nga nagadumala sa mga kongregasyon, giabagan sa mga ministeryal nga mga alagad, walay suweldong madawat sa ilang mga serbisyo. Sila ang nagbayad sa tanan nilang gasto.
Bisan ang mga membro sa Nagamandong Lawas ug ang ubang nagtrabaho sa bug-os panahon sa pagpangandam ug sa paghimog mga Bibliya ug literatura sa Bibliya makadawat lamang ug ilang libreng lawak ug pagkaon ug gamayng pasiuli sa ilang gasto. Tinuod usab kini sa bug-os panahong nagalakbayng mga magtatan-aw.
Ang among literatura gipatik aron sa pagtabang sa mga tawo nga nagpakitag tiunay nga interes sa Bibliya. Ang gastos sa materyales, produksiyon, ug pagpadala mabayran pinaagig kinabubut-ong mga donasyon sa mga tawong interesado ug giabagan sa mga amot, mga kabilin, ug uban pa, nga gihimo sa mga Saksi ni Jehova mismo.
Sa tanang mga tigom sa mga Saksi ni Jehova, sa lokal o sa mga asembliya, may mga kahon sa kontribusyon alang niadtong gustong moamot. Walay koleksiyong himoon. Walay buhis o ikapulo nga bayran. Sumala sa makita sa Kasulatan, ang matag usa makaamot sumala sa pagbuot sa iyang kasingkasing.—2 Corinto 8:12; 9:7.
● Sa unsang paagi ang tanang kalihokan sa mga Saksi ni Jehova gisuportahan sa pinansiyal nga paagi?