Pagsuportar sa Buluhaton sa Gingharian Diha sa Inyong Dapit ug sa Tibuok Kalibotan

INGONG katumanan sa tagna ni Jesus bahin sa kataposang mga adlaw, ang mga Saksi ni Jehova nagsangyaw sa maayong balita “hangtod sa kinalay-ang bahin sa yuta.” (Buh. 1:8; Mat. 24:14) Sa paghimo niini, kinabubut-on nilang gihatag ang ilang panahon ug kusog aron ipaambit ang espirituwal nga mga butang. Padayon nilang giuna ang Gingharian sa Diyos kay masaligon sila nga si Jehova motagana sa panginahanglan sa iyang mga isigkamagbubuhat. (Mat. 6:25-34; 1 Cor. 3:5-9) Ang mga resulta tin-awng nagpakita sa pag-uyon ug panalangin ni Jehova.

PAG-ATIMAN SA BULUHATON SA GINGHARIAN SA TIBUOK KALIBOTAN

² Dihang mamatikdan sa uban ang atong pamaagi sa pagsangyaw ug ilang mahibaloan nga libre ang atong mga Bibliya ug literatura, sila mangutana: “Giunsa man ninyo pagsuportar ang inyong buluhaton?” Tinuod, ang pag-imprenta ug paghimog mga Bibliya ug literatura nagkinahanglag kuwarta. Kinahanglan sab ug kuwarta ang pagtukod ug pagmentinar ug mga puy-anang Bethel para sa mga ministro nga nagtrabaho sa mga imprentahanan, nagdumala sa buluhatong pagsangyaw, ug nag-alagad sa ubang paagi aron mapakaylap ang maayong balita. Dugang pa, ang mga tigdumala sa sirkito, misyonaryo, espesyal payunir, ug ubang naa sa espesyal nga bug-os panahong pag-alagad gisuportahan sa materyal nga paagi aron tabangan silang makapadayon sa buluhaton. Dayag, ang pagsangyaw sa maayong balita sa atong panahon, sa ato mang dapit o sa tibuok kalibotan, nagkinahanglag dakong kantidad. Diin gikan ang kuwarta nga gigamit sa mga galastohan?

³ Daghan sa nagpabili sa buluhaton sa mga Saksi ni Jehova sa pagtudlog Bibliya ang malipay sa pagdonar alang sa tibuok kalibotang buluhaton. Pero ang atong buluhaton pangunang gisuportahan sa mga Saksi mismo, nga ang uban kanila nagpadalag boluntaryong mga kontribusyon sa sangang buhatan sa mga Saksi ni Jehova. Sila kinabubut-ong mohatag, sama sa karaang mga alagad sa Diyos nga misuportar gayod sa pagtukod sa dapit sa pagsimba kang Jehova. (Ex. 35:20-29; 1 Cron. 29:9) Ang ubang donasyon maoy mga kabtangan nga gihatag pinaagig testamento, samtang ang uban naggikan sa mga indibiduwal, kongregasyon, ug sirkito ug sagad ginagmay ra nga kantidad. Dihang usahon kini nga mga kontribusyon, kini padayong makasuportar sa ministeryo.

⁴ Giisip sa mga Saksi ni Jehova nga pribilehiyo ang paggamit sa ilang kuwarta ug ubang kahinguhaan aron makasuportar sa pagpauswag sa buluhatong pagsangyaw. Si Jesus ug ang iyang mga tinun-an dunay kahon sa kuwarta nga kakuhaan nilag panggasto. (Juan 13:29) Ang Bibliya naghisgot bahin sa mga babaye nga nag-alagad kang Jesus ug sa iyang mga tinun-an. (Mar. 15:40, 41; Luc. 8:3) Si apostol Pablo mapasalamatong midawat sa materyal nga tabang nga mahigugmaong gitagana niadtong interesado sa pagpakaylap sa maayong balita ug gustong mosuportar sa iyang ministeryo. (Filip. 4:14-16; 1 Tes. 2:9) Padayong gisunod sa mga Saksi ni Jehova kini nga mga panig-ingnan sa pagkamadasigon ug pagkamahinatagon. Pinaagi niini, mahatagan ug kahigayonan ang tanang matinud-anog kasingkasing nga mga tawo nga makadawat ug ‘walay bayad nga tubig sa kinabuhi.’​—Pin. 22:17.

PAG-ATIMAN SA PANGINAHANGLAN SA LOKAL NGA KONGREGASYON

⁵ Ang mga galastohan sa lokal nga kongregasyon gisuportahan sab sa boluntaryong mga kontribusyon. Walay pagpangolekta, pagpangayog tinong kantidad, o pag-solicit ug kuwarta. Dunay mga kahon sa kontribusyon diha sa mga tigomanan aron ang matag usa makahatag “kon unsay gihukom sa iyang kasingkasing.”​—2 Cor. 9:7.

⁶ Ang giamot nga kuwarta pangunang gamiton alang sa paggamit ug pagmentinar sa Kingdom Hall. Ang mga ansiyano mahimong modesisyon nga ang ubang donasyon ipadala ngadto sa sangang buhatan sa mga Saksi ni Jehova sa ilang lugar aron gamiton sa pagsuportar sa tibuok kalibotang buluhaton. Ang kongregasyon maghimog resolusyon bahin niini. Pinaagi niini, daghang kongregasyon ang regular nga nag-amot para sa tibuok kalibotang buluhaton. Kon ang tanan alisto sa lokal nga mga panginahanglan nga motungha matag karon ug unya, dili na kinahanglan nga kanunayng magpahibalo bahin sa kontribusyon.

PAGDUMALA SA MGA KONTRIBUSYON

⁷ Human sa matag tigom, duha ka brader ang magkuha sa kuwarta nga gihulog diha sa mga kahon sa kontribusyon ug irekord kana. (2 Hari 12:9, 10; 2 Cor. 8:20) Ang mga ansiyano maghimog haom nga mga kahikayan sa pagtipig niini nga kuwarta hangtod mapadala kini ngadto sa sangang buhatan o gamiton alang sa mga panginahanglan sa kongregasyon. Ang brader nga nag-atiman sa account sa kongregasyon mag-andam ug binulang report nga ipahibalo sa kongregasyon, ug hikayon sa koordinetor sa mga ansiyano nga maawdit ang account matag tulo ka bulan.

GALASTOHAN SA SIRKITO

⁸ Ang mga galastohan sa mga asembliya, ingon man ang ubang galastohan sa sirkito, suportahan sa mga kontribusyon sa mga Saksi nga sakop sa sirkito. Dunay mga kahon sa kontribusyon diha sa mga asembliyahanan aron ang sirkito makahulog sa ilang boluntaryong mga kontribusyon. Dugang pa, aron matagan-an ang nagpadayon nga galastohan, ang mga kongregasyon mahimong maghatag ug kontribusyon sa laing mga higayon.

⁹ Labing maayo nga ang mga sirkito makasuportar sa tanang gikinahanglang galastohan, ug dayon ang sobra nga donasyon idonar ngadto sa tibuok kalibotang buluhaton. Kon kulang ang pondo sa sirkito para sa galastohan sa asembliya o may pasiunang gastos para sa sunod nga asembliya, sama sa gikinahanglang deposito sa paggamit sa usa ka pasilidad, ang tigdumala sa sirkito makaawhag sa mga kongregasyon bahin sa ilang pribilehiyo sa pag-amot. Hisgotan kana sa mga ansiyano sa matag kongregasyon ug tinoon nila kon pilay ikadonar sa ilang kongregasyon para sa pondo sa sirkito. Dayon maghimo silag resolusyon bahin niini nga donasyon.

¹⁰ Dihang dunay motunghang galastohan nga kinahanglang hatagag pagtagad sa mga ansiyano sa sirkito, dunay himoong miting sa mga ansiyano sa sirkito sa adlaw sa sirkitong asembliya. Ang tanang desisyon gawas sa pipila ka galastohan sa sirkito ipaagig resolusyon nga uyonan sa mga ansiyano. Kini nga mga resolusyon kinahanglang isulat sa eksaktong kantidad ug ipresentar aron aprobahan sa matag higayong gamiton ang pondo sa sirkito.

¹¹ Dunay himoong mga kahikayan para sa regular nga pag-awdit sa account sa sirkito.

PAG-ATIMAN SA MGA KABOS

¹² Ang usa sa katuyoan sa kahon sa kuwarta nga gihuptan ni Jesus ug sa iyang mga tinun-an mao ang pagtabang sa mga kabos. (Mar. 14:3-5; Juan 13:29) Responsibilidad gihapon sa mga Kristohanon karon ang pagtabang kanila, kay si Jesus miingon: “Ang mga kabos kanunay ninyong makauban.” (Mar. 14:7) Giunsa pagtuman karon sa mga Saksi ni Jehova kini nga responsibilidad?

¹³ Usahay, dunay matinumanong mga igsoon sa kongregasyon nga nagkinahanglag materyal nga tabang tungod sa pagkatigulang, sakit, o ubang kalisdanan nga dili nila kontrolado. Ang mga membro sa pamilya, paryente, ug ang uban nga nahibalo niini tingali gustong motabang. Uyon kini sa mga pulong ni apostol Juan: “Si bisan kinsa nga dunay materyal nga mga butang niining kalibotana ug makita niya nga nanginahanglan ang iyang igsoon, apan dili siya magpakitag kaluoy kaniya, makaingon ba siya nga nahigugma siya sa Diyos? Mga anak, maghigugmaay kita, dili lang sa pulong, kondili pinaagi pod sa sinserong mga buhat.” (1 Juan 3:17, 18; 2 Tes. 3:6-12) Lakip sa matuod nga pagsimba ang pag-atiman sa matinumanong mga igsoon nga nanginahanglag materyal nga tabang.​—Sant. 1:27; 2:14-17.

¹⁴ Sa unang sulat ni apostol Pablo kang Timoteo, iyang gipatin-aw kon unsaon pagtaganag materyal nga tabang niadtong tinuod gyong nanginahanglan. Mabasa nimo ang iyang tambag sa 1 Timoteo 5:3-21. Pangunang responsibilidad sa matag Kristohanon ang pag-atiman sa mga panginahanglan sa iyang kaugalingong panimalay. Ang mga tigulang o masakiton angayng tabangan sa ilang mga anak, apo, o ubang suod nga paryente. Usahay, dunay materyal nga tabang pinaagi sa mga programa sa gobyerno o katilingban, busa ang mga paryente o ang uban makatabang sa nanginahanglan sa pag-aplay alang sa maong programa. Motungha tingali ang situwasyon nga ang tibuok kongregasyon kinahanglang motabang sa nanginahanglang mga igsoon nga dugay nang matinumanong nag-alagad. Kon walay membro sa pamilya o ubang paryente nga makatabang kanila ug wala poy igong tabang gikan sa mga ahensiya sa gobyerno, ang mga ansiyano makahimog haom nga mga rekomendasyon sa pagtabang sa maong mga igsoon. Giisip sa mga Kristohanon nga pribilehiyo ang pagtaganag materyal nga tabang niadtong nanginahanglan.

¹⁵ Daghang igsoon ang tingali magkinahanglag tabang tungod sa paglutos, gubat, linog, baha, gutom, o ubang katalagman nga kasagarang mahitabo niining lisod nga mga panahon. (Mat. 24:7-9) Ang lokal nga mga kongregasyon basin walay ikahatag nga bisan unsa sa pagtabang sa usag usa, busa ang Nagamandong Lawas maghimog kahikayan aron ang mga igsoon sa ubang lugar makatagana sa gikinahanglang tabang. Mao sab kini ang gihimo sa mga Kristohanon sa Asia Minor dihang nagtagana silag pagkaon alang sa mga igsoon sa Judea panahon sa gutom. (1 Cor. 16:1-4; 2 Cor. 9:1-5) Pinaagi sa pagsunod sa ilang panig-ingnan, atong gipakita nga atong gihigugma ang mga igsoon ug nga kita tinuod nga mga tinun-an ni Jesu-Kristo.​—Juan 13:35.

PAG-APOD-APOD UG LITERATURA

¹⁶ Ang mga Bibliya ug literatura sa Bibliya importante kaayo sa pagpakaylap sa mensahe sa Gingharian. Sagad ang mga ansiyano mag-asayn ug ministeryal nga alagad sa pag-atiman sa suplay sa literatura sa kongregasyon. Ang mga brader nga giasayn nga moatiman niini nga mga suplay nag-isip nga seryoso ang ilang responsibilidad. Maghupot silag organisadong rekord aron matino nga dunay igong suplay sa literatura alang sa kongregasyon.

¹⁷ Ingong dedikadong mga Kristohanon, kita nahibalo nga ang atong panahon, pisikal ug mental nga katakos, talento, ug materyal nga kabtangan, bisan ang atong kinabuhi mismo maoy regalo gikan sa Diyos ug angayng gamiton sa pag-alagad kaniya. (Luc. 17:10; 1 Cor. 4:7) Pinaagi sa paggamit sa tanan natong nabatonan sa hustong paagi, atong gipakita kon unsa ka lalom ang atong gugma kang Jehova. Gitinguha nato nga pasidunggan si Jehova pinaagi sa atong bililhong mga butang, kay nahibalo ta nga malipay siya sa bisan unsang regalo nga atong ihatag kaniya ingong kapahayagan sa atong tibuok kalag nga debosyon. (Prov. 3:9; Mar. 14:3-9; Luc. 21:1-4; Col. 3:23, 24) Si Jesus miingon: “Kamo nakadawat nga walay bayad, panghatag nga walay bayad.” (Mat. 10:8) Samtang gamiton nato ang atong kinabuhi ug mga nabatonan sa pag-alagad kang Jehova, kita mas magmalipayon.​—Buh. 20:35.