YUTANG-KULONON

Usa ka pinog-grano, kinaiyanhong yuta nga humok ug daling mahulma kon basa pa apan gahi kon uga, ilabina kon paughon pinaagig kalayo. Sa kinadak-ang bahin kini gilangkoban sa mga hydrous aluminum silicate. Ang Hebreohanong pulong nga choʹmer gigamit sa pagtumong sa “yutang-kulonon” sa usa ka magkukulon (Isa 41:25), sa “yutang-kulonon” sa ilalom sa usa ka igtitimbre (Job 38:14), sa “lapok [o, yutang-kulonon]” sa kadalanan (Isa 10:6), sa “argamasa” taliwala sa mga tisa (Gen 11:3), ug, sa mahulagwayong diwa, sa tawo ingong “yutang-kulonon” diha sa mga kamot sa iyang Mag-uumol, si Jehova nga Diyos (Isa 45:9; itandi ang Job 10:9). Diha sa Kristohanon Gregong Kasulatan ang pe·losʹ nagtumong sa “yutang-kulonon” sa magkukulon (Rom 9:21) ug sa basa nga “lapok [o, yutang-kulonon]” nga gigamit ni Jesus sa pag-ayo sa usa ka tawong buta (Ju 9:​6, 11, 14, 15; tan-awa usab ang PAGKABUTA), samtang ang ke·ra·mi·kosʹ naghubit sa mga sudlanan nga ginama sa ‘yutang-kulonon’ sa magkukulon.​—Pin 2:27.

Sa kapatagan sa Israel adunay daghang yutang-kulonon, ug sa kapanahonan sa Bibliya kini gigamit sa paghimog mga sudlanan nga yutang-kulonon ug mga tisa. (Jer 18:​4, 6; Ex 1:14; Nah 3:14; tan-awa ang MAGKUKULON.) Tungod kay kini mamarkahan kon basa pa ug magpabilin ang marka sa dihang kini mauga, kini mapuslanon sa paghimo ug mga papan nga yutang-kulonon ug sa mga marka sa timbre diha sa mga dokumento ug mga sulat. Ang yutang-kulonon gigamit ingong pangbulit sa mga kulon nga sudlanan sa bino o ingong tipiganan sa mahinungdanong mga rekord, sama sa sulat-kalig-onan alang sa propiedad ni Jeremias. (Jer 32:14) Ang Linukot nga mga Basahon sa Patayng Dagat ilabinang napreserbar tungod sa kulonong mga banga nga gisudlan niini.

Ang pagkagikan niini sa yuta mao ang gitumong sa mga ekspresyon sama sa “lapok [o, yutang-kulonon] sa kadalanan,” ang ‘tawo hinimo gikan sa yutang-kulonon,’ o ang tawo “giyudyod ngadto sa lapok [o, yutang-kulonon].” (Job 10:9; 30:19; 33:6; Isa 10:6) Ang laing mahulagwayong kahulogan nga nalangkit sa gipamulong nga ang tawo hinimo gikan sa yutang-kulonon mao ang kamatuoran nga si Jehova mao ang Magkukulon. (Isa 29:16; 45:9; 64:8; Rom 9:21) Ang yutang-kulonon, bisan pag pagbahon pag-ayo, dili usa ka lig-ong materyales, ug ang pagsagol sa puthaw ug yutang-kulonon walay pulos. (Dan 2:33-35, 41-43, 45) Diyutay lamang o walay ikahatag nga proteksiyon ang yutang-kulonon. (Job 4:19; 13:12; Isa 41:25) Kay komon kaayo nga baligya, ang bili niini barato ra kaayo.​—Job 27:16.