LENTIHAS

[Heb., ʽadha·shahʹ].

Usa ka tinuig nga tanom nga samag matang sa balatong nga dugay nang gitanom sa tawo ug sagad gitanom gihapon didto sa Ehipto ug sa Israel, ingon man usab sa ubang kayutaan. (2Sa 17:​27, 28; 23:11) Kining gamay nga tanom (Lens esculenta), nga may gitas-on nga 15 hangtod sa 46 sm (6 hangtod sa 18 pul.), molambo diha sa balason ug uga nga yuta. Ang nagparis nga mga dahon niini, nga sagad unom ka paris sa pormag-itlog, gagmayng mga dahon, adunay mga gaway sa tumoy. Ang tagsatagsa ka yagpis, gagmayng sangasanga niini adunay duha hangtod sa upat ka gagmayng samag-gisantes nga mga bulak. Ang gagmayng mga bunga nga ipatungha human sa pagpamulak maoy susama sa gisantes, ug sagad naundan kini sa duha ka gagmayng pormag-lente nga mga liso. Ang kolor sa mga liso ug sa mga bulak magkalahi depende sa klase sa tanom nga lentihas. Ang mga liso niini tingali maoy pulahon-kape, abohon, o itom, ug ang mga bulak, maoy puti o pughawon-asul. Sanglit puno sa protina ug mga carbohydrate, ang mga liso, sama sa miaging mga panahon, sagad isagol sa mga sabaw. (Gen 25:34) Kon isagol sa sebada, ang mga lentihas gigamit sa paghimog tinapay. (Itandi ang Eze 4:9.) Ang tanom mismo maayong ikompay sa binuhing mga hayop.