Gisilotan ang mga Mamumuhat ug Daotan

SA DIHANG ang mga taho sa pagpatay nakaabot sa Kinshasa, ang mga awtoridad sa gobyerno mihimog mga lakang sa pagtinong ipatuman ang hustisya. Tungod niini, ang mga awtoridad pagadayegon.

Gipaadto ang mga trak ug mga sundalo sa rehiyon. Sa kataposan, ang mga mamumuhat ug daotan gironda ug gihusay sa distritong korte sa Kindu, Kivu.

Dili sayon ang paghukom sa kaso, kay nasinati sa mga huwes ang kanunayng mga pagbahad ug pagpit-os nga tuison ang hustisya. Gitanyagan silag dagko kaayong mga hiphip. Sa gipakanaog ang hukom sa pagkasad-an, nadawat pa nila ang wala-pirmahing sulat nga nag-ingong si Kimbilikiti manimalos kanila.

Makaiikag, bisan panahon sa bista mipugos ang mga giakusar nga si Kimbilikiti maoy espiritu ug kining espirituha maoy nagtukmod kanila sa paglihok. Panahon sa bista, si Huwes Tumba maalamong mihikay nga patingogon ang mga instrumento ni Kimbilikiti nga madungog sulod sa hukmanan. Siya nangatarongan nga kon si Kimbilikiti maoy espiritu, ang tingog sa mga instrumento walay epekto sa katawhang Rega diha sa hukmanan. Ang sangpotanan? Sa nadungog ang makahahadlok nga mga tingog may kaguliyang sa hukmanan. Ang mga babaye nangalagiw sa kalisang, kay nahadlok nga basin makita nila si Kimbilikiti ug sila patyon. Ang mga lalaki nanagduko sa ilang mga ulo sa kaulaw ug nanggawas sa hukmanan, nga ang nahibilin mao na lamang ang mga akusado, mga tawo sa hukmanan, ug pila ka tumatan-aw nga dili sakop sa tribong Rega. Busa sa makausa pa si Kimbilikiti giyagyag ingong patuotuo nga nagaulipon sa katawhang Rega.

Ang unom niadtong laktud responsable sa pagpatay gisentensiyahan sa kamatayon sa hukmanan sa Kindu. Ang ubay-ubay pa nakadawat sa mga sentensiya sa bilanggoan ug mga multa. Dugang pa, ang bayad gimando alang sa nagbangotang mga biyuda. (Ang mga sentensiya giapelar ngadto sa hataas nga korte sa Bukavu, Kivu.)

Ang kasaligang aksiyon sa mga awtoridad mopahinumdom sa mga pulong ni apostol Pablo: “Ang namunoan maoy tumong sa kahadlok, dili sa maayong buhat, kondili sa daotan. . . . [Ang pagbulot-an] maoy alagad sa Diyos, nga tigpanimalos sa pagpahayag sa kapungot diha sa mamumuhat sa daotan.” (Roma 13:1-4) Busa ang mga Saksi ni Jehova nagapadayon sa paghimog “mga pangamuyo, mga pag-ampo, mga paghangyo, mga pasalamat . . . mahitungod sa tanang matang sa mga tawo, mahitungod sa mga hari ug sa tanang anaa sa hataas nga katungdanan; aron kita makapadayon sa pagkinabuhi nga malinawon ug mahilomon uban ang bug-os nga pagkadiyosnon ug kaugdang.” Midugang si Pablo: “Kini maayo ug dalawaton sa panan-aw sa atong Manluluwas, ang Diyos, kansang kabubut-on mao nga ang tanang matang sa mga tawo mamaluwas ug mahidangat sa tukma nga kahibalo sa kamatuoran.”—1 Timoteo 2:1-4.

Ingong sangpotanan niadtong mga hitabo sa Pangi, kami kombinsido nga daghang sinserong katawhang Rega “mahidangat sa tukma nga kahibalo sa kamatuoran” ug sa ingon mapahigawas sa kaulipnan sa matuotuohong panglimbong. Alang kanila ug sa ubang mabuot-ug-kasingkasing nga katawhan sa tibuok yuta, ang mga Saksi ni Jehova mopadayon sa pagpangita. Kami malipayon gayod sa pagbuhat nga may pagtuo ug pagpakig-ambit sa kamatuoran sa Gingharian sa tanang mahigugmaon sa pagkamatarong, bisan ngadto sa kinahilitang mga bahin sa Aprika.