Nagmadaogon ang Kamatuoran ug Pagtuo

ANG mga Saksi ni Jehova determinado sa pagsimba sa Diyos “uban sa espiritu ug sa kamatuoran.” (Juan 4:23, 24) Oo, ang mensahe sa Bibliya nga ilang ginapahayag nagayagyag sa kasaypanan, apan sama ni apostol Pablo sila nangutana: ‘Kami ba nahimong inyong mga kaaway tungod kay among ginasulti kaninyo ang kamatuoran?’ (Galacia 4:16) Siyempre dili! Ang maong mga Kristohanon nahigugma sa ilang mga silingan ug buot nilang sila makapahimulos sa espirituwal nga kagawasan nga maposible lamang pinaagi sa kamatuoran.—Juan 8:32.

Ang mga Saksi determinado usab sa paghupot ug lig-ong pagtuo bisan pag sila pagalutoson tungod sa pagsulti sa kamatuoran. Tinuod, ang pagtuo sa mapaubsanong mga Kristohanon sa Pangi mohatag ebidensiya nga sa tabang ni Jehova ang iyang mga alagad makahupot sa integridad ngadto kaniya hangtod sa kataposan. Kana mahimong ang kataposan niining daotang sistema sa mga butang o ang pagkamatay sa usa nga matinumanon, tingali atubangan sa mapintas, gibugna sa relihiyon nga paglutos.—Mateo 24:13.

Pagtuo nga Nagalihok

Kining mga mahigugmaon sa kamatuoran nga gipamatay sa probinsiyang Kivu dili mao lamang ang nagpakitag lig-ong pagtuo. Pananglitan, palandonga si Bingimeza Bunene, usa ka tigulang igsoong babaye. Ang duha sa iyang mga anak lalaki, si Malala Ramazani ug si Akilimali Walugaba, nahiapil niadtong gipatay sa Pangi. Dugang pa, ang mga tigulang sa tribo mihaylo sa iyang bana sa pagkuyog sa mga mamumuno sa iyang pag-umangkong lalaki, si Amisi Melende. Sa gipatay ang iyang duha ka anak lalaki ug iyang pag-umangkong lalaki, siya gibiyaan sa tibuok niyang pamilya, apil ang iyang bana. Bisan pa niana, siya gilipay sa mga pulong sa salmista: “Kon ugaling ako pagabiyaan sa akong amahan ug akong inahan, si Jehova mismo ang magadawat kanako.” (Salmo 27:10) Ang iyang mga igsoong lalaki ug babaye sa pagtuo nagdawat ug naglipay kaniya, uban ang mahigugmaong mga pahinumdom sa kahibulongang paglaom sa pagkabanhaw.

Ang bana sa maong igsoong babaye, si Ramazani Musombwa, nabilanggo tungod sa pagkalangkit sa pagkamatay sa pagkamatay sa iyang pag-umangkong lalaki, apan sa kadugayan nahigawas ra. Tapos niadto, iyang giangkong gidayeg niya ang maisogong pagbarog sa iyang asawa ug ang gugmang gipakita kaniya ug sa nagbangotang mga umagad nga babaye sa kaubang mga Saksi. Karon siya nagapahayag ug dakong pagbasol ug nagakuyog na sa iyang asawa sa pagtambong sa mga tigom sa mga Saksi ni Jehova. Tungod sa bug-os niyang pagkausab, siya nahimong tumong sa dakong pagsaway ug pagbiaybiay apan siya determinado sa pag-alagad kang Jehova sukad karon.

Ang tanang ubang nagbangotang batan-ong biyuda gisalikway sa ilang mga pamilya tungod sa kahadlok nga mamatay sa mga kamot ni Kimbilikiti. Kining batan-ong mga biyuda ngatanan nagbarog nga malig-on ug wala magsalikway sa ilang pagtuo kang Jehova. Gisagop sila sa ilang kaubang mga magtutuo ug nasinati sa kon unsay gitagna ni Jesus sa miingon siya: “Walay bisan usa nga nagbiyag balay o mga igsoong lalaki o mga igsoong babaye o inahan o amahan o mga anak o mga uma tungod kanako ug tungod sa maayong balita ang dili makabaton sa usa ka gatos ka pilo karon niining yugtoa sa panahon, sa mga balay ug mga igsoong lalaki ug mga igsoong babaye ug mga inahan ug mga anak ug mga uma, uban ang mga paglutos, ug sa umaabot nga sistema sa mga butang sa kinabuhing walay kataposan.”—Marcos 10:29, 30.

Nagmadaogon ang Pagtuo ug Kamatuoran

Karong adlawa, ang mga kahimtang sa mga Saksi ni Jehova sa dapit sa Pangi nahibalik na sa normal. Ang tanang nagbangotan ug mga tawong interesado nga napugos sa pagkalagiw ngadto sa ubang balangay ug mga lungsod namalik na sa ilang kabalayan. Sa makausa pa ang mga Saksi nagasangyaw sa mensahe sa Gingharian didto, uban ang bag-ong kadasig ug determinasyon. Bisan pa sa tanan nilang naagoman, sila nahisama sa ‘mga igsoong mibatig pagsalig tungod sa mga gapos ni Pablo ug nagpakitag labaw nga kaisog sa pagpahayag sa pulong sa Diyos.’—Filipos 1:14.

Siyempre, adunay kasubo tungod sa pagpatay sa tanang walo ka matinumanong Kristohanong lalaki sa Kongregasyon sa Pangi. Apan ang laing payunir nga ministro karon nagaalagad nga nagadumalang magtatan-aw, ug ang katawhan ni Jehova didto sa tunga sa Aprika adunay pagsalig sa gugma sa Diyos alang kanila pinaagi ni Kristo, sumala sa gipahayag sa mga pulong ni Pablo: “Kinsay magabulag kanato gikan sa gugma ni Kristo? Ang kasakitan ba o kagul-anan o paglutos o kagutmanan o kahubo o kapeligrohan o pinuti? . . . Sa kasukwahi, niining tanang butang kita magagula nga bug-os madaogon tungod kaniya nga nahigugma kanato.”—Roma 8:35-39.

Apan, nganong itugot ni Jehova ang pagpatay sa maong matinumanong mga saksi? Sa mapintasong kalibotan karong adlawa, may mga kaso diin dayag gipanalipdan ni Jehova ang iyang katawhan. Sa pagbuhat niana, iyang gipasundayag sa unsang paagi siya makaluwas kanila latas sa “dakong kasakitan.” (Mateo 24:21; Isaias 26:20) Apan, sumala sa gipahayag ni Jesus sa Juan 16:1-3, tingali may mga higayon dihang iyang tugotang ang mga magsusupak mahidangat sa puntong magapatay gayod sa mga indibiduwal taliwala sa mga Saksi ni Jehova. Ang paghupot nila sa integridad nianang mga kahimtanga, sama sa gibuhat sa atong matinumanong mga igsoon sa probinsiyang Kivu, nagasilbing usa ka pagsaksi ug pamatuod nga ang mga alagad sa Diyos determinado sa paghupot sa integridad bisan hangtod sa kamatayon.—Job 27:5; Proverbio 27:11.

Kita mapahinumdoman sa dakong pagsaksi nga misangpot sa pagkamatay sa unang-siglong martir si Esteban. (Buhat 8:1-8) Busa mahimong ang makalilisang nga pagpatay mopahinabo nga daghan pa sa tribong Rega ug uban pa sa Zaire ug sa laing dapit ang magpalandong nga ugdang sa kamatuoran sa Bibliya. Dako unya ang kalipay sa mga Saksi ni Jehova sa pagtabang nianang matinud-anon ug kasingkasing nga katawhan sa pagbulag sa kahadlok ug patuotuo nga nalangkit sa relihiyon sa Kimbilikiti! Pagkatalagsaon unya ang kagawasang mapahimuslan sa tanang modawat sa kahibulongang kamatuoran sa Diyos!