Ang Pinakamaayong Panaghigala Molahutay diha sa Dimahigalaong Kalibotan
“Pangita kamog mga higala sa inyong kaugalingon pinaagi sa dimatarong nga bahandi, aron nga, inigkahurot na niini, kamo ilang pagadawaton ngadto sa walay kataposang mga puloy-anan.”—LUCAS 16:9.
1. Nganong ang Proverbio 14:20 dili aplikado kang Jesus dinhi sa yuta?
“ANG kabus ginadumtan bisan sa iyang isigkatawo, apan ang mga dato daghan ug mga higala.” (Proverbio 14:20) Kining sambingay ni Haring Solomon sa Israel dili aplikado sa labing dakong tawo nga nabuhi sukad sa yuta, si Jesu-Kristo, ang usa nga mas dako kay kang Solomon. Wala dalha ni Jesus ang mga Israelitas sa pagbaton ug suod nga panag-uban kaniya pinaagi sa materyal nga mga bahandi; ni iyang giila ang yutan-ong manggad ingong basehanan sa tinuod, malahutayong panaghigala.
2. Unsang panaghigala ang gisugo ni Jesus nga himoon sa iyang mga disipulo, ug sa unsa nga katarongan?
2 Tinuod nga sa usa ka okasyon si Jesus miingon: “Pangita kamog mga higala sa inyong kaugalingon pinaagi sa dimatarong nga bahandi, aron nga, inigkahurot na niini, kamo ilang pagadawaton ngadto sa walay kataposang mga puloy-anan.” (Lucas 16:9) Apan ang “mga higala” nga anaa sa hunahuna ni Jesus mao si Jehova nga Diyos, ang Tuboran sa tanang bililhong kabtangan, ug siya mismo ingong Anak sa iyang hilabihan ka adunahang Amahan. Kon sundon nato kanang tambaga, maagak kita ngadto sa pinakamaayong panaghigala nga matagamtam sa yuta, nianang kang Jehova nga Diyos pinaagi sa iyang nagasakripisyo sa kaugalingong Anak, si Jesu-Kristo.
3. Ngadto sa unsang “mga puloy-anan” nga agakon kita niining langitnong mga Higala?
3 Tungod sa ilang walay kamatayong kinabuhi, kining mga langitnong Usa makapabiling atong malig-ong mga Higala ug makaagak kanato ngadto sa “walay kataposang mga puloy-anan.” Mahimong sa “walay kataposang mga puloy-anan” sa langit sa ibabaw uban sa balaang mga manulonda o dinhi niining yutaa sa napasig-uling Paraiso.—Lucas 23:43.
Ang Pagsulod Ngadto sa Pinakamaayong Panaghigala
4. (a) Unsang pananglitan sa Bibliya nga nagpakita kon mapalit ba ang panaghigala sa Diyos? (b) Unsa ang maayong paagi nga atong magamit ang atong materyal nga mga kabtangan?
4 Ang pagpakighigala sa Labing Hataas nga Diyos ug sa iyang bugtong Anak, si Jesu-Kristo, dili mapalit ug salapi. Gipamatud-an kining kamatuorana sa nahitabo kang Ananias ug Sapira sa unang siglong Kristohanong kongregasyon. Pinaagi sa dili pagpangitag kabantogan ug kadungganan sama sa ilang nahimo, atong magamit ang atong yutan-ong mga kabtangan sa usa ka paagi nga kahimut-an ni Jehova nga Diyos ug ni Jesu-Kristo. (Buhat 5:1-11) Kini mao ang gipasabot sa dihang miingon si Jesu-Kristo: “Gamita ang kalibotanong bahandi aron sa pagbaton ug mga higala alang sa inyong kaugalingon, aron inigkahurot niini, dawaton kamo ngadto sa dumalayong mga puloy-anan.”—Lucas 16:9, New International Version.
5. Unsang dalan ang gisubay ni Zaqueo, ug uban sa unsang resulta?
5 Sa gipamulong ni Jesus kadtong mga pulonga, wala siya mangitag pabor sa mga maniningil ug buhis sa Romanong Imperyo ug sa ubang mga makasasala. Dili siya interesado sa pagbaton ug materyal nga bahandi alang sa iyang kaugalingon dinhi sa yuta, kay iyang gisugo ang iyang mga disipulo sa pagtipig ug bahandi alang sa ilang kaugalingon sa langit sa itaas. Si Zaqueo, nga Hudiyohanong maniningil ug buhis sa Romanong kagamhanan, mihukom sa pagsunod sa tambag sa Mesiyas si Jesus ug dayag nga mipahayag sa iyang katuyoan sa paghimo niini. Tungod sa maong lihok sa pagpaluyo sa intereses sa Gingharian, ang labing hamiling bisita ni Zaqueo miingon: “Karong adlawa ang kaluwasan nahiabot niining balaya, sanglit siya usab anak man ni Abraham. Kay ang Anak sa tawo mianhi sa pagpangita ug sa pagluwas kon unsa ang nawala.” (Lucas 19:1-10) Nalakip “sa pagluwas kon unsa ang nawala” mao ang maniningil ug buhis si Zaqueo.
6. Ngadto sa unsa nga gidawat si Zaqueo, apan kang kinsang daotang dalan ang nahimong pasidaan?
6 Napasulod si Zaqueo sa pinakamaayong panaghigala sa tibuok uniberso, nga mao ang Diyos ug Amahan sa hamiling bisita nga iyang giabiabi. Kon nakakita ba si Zaqueo kang Jesus human sa Iyang pagkabanhaw gikan sa patay ug usa sa mga 120 ka disipulo nga nagtigom sa itaas nga lawak sa Jerusalem sa halandomong adlaw sa Pentekostes 33 K.P. walay gihisgotan ang Bibliya niini. Hinunoa, sa walay duhaduha, usa si Zaqueo sa 5,000 ka inanak-sa-espiritu, dinihogang mga disipulo nga gitaho sa ulahi niana. (Buhat, kapitulo 2 ug 4; 1 Corinto 15:1-6) Apan pagkadakong kalainan ang atong nabatonan diha kang Ananias ug Sapira, nga gihisgotan ganiha! Kadtong duha ka indibiduwal nga sakop sa kongregasyon sa Jerusalem misulay sa pagpadako sa ilang dungog taliwala sa mga disipulo pinaagi sa pagpalsipikar sa kantidad sa kontribusyon nga ilang gihatag. Ang silot nga midangat kanila tungod sa ilang pagkalimbongan nakapagan sa ilang pinakamaayong panaghigalaay ug nagsilbi kining pasidaan sa tanang mga Kristohanon karon.—Buhat 4:34–5:11.
7. Bisan pa sa pagkadimahigalaon ning kalibotana, unsang tagsaong butang ang gitagamtam sa mga Saksi ni Jehova?
7 Bisan pa sa pagkadimahigalaon ning ika-20ng siglo nga kalibotan, padayong ginatagamtam sa mga Saksi ni Jehova ang pinakamaayong panaghigala nga naglungtad sukad. Apan nganong ilang gitagamtam kining tagsaong butang samtang wala kini tagamtama sa libolibo nagkalainlaing relihiyosong mga sistema? Ang ebidensiya nagpakita nga tungod kini kay nakahimo ang mga saksi ni Jehova ug usa ka butang nga bililhon nga wala mahimo sa relihiyonista sa Kakristiyanohan. Una, mibulag ang mga Saksi sa bakak relihiyosong mga sistema, kay sila nahibalo nga kini ang naglangkob sa kalibotanong imperyo sa bakak nga relihiyon, nga ginganlan sa Bibliya nga Babilonyang Bantogan. Siempre, ang paggula gikan sa bakak nga relihiyon dili sa awtomatiko magpahimo kanilang sakop sa organisasyon ni Jehova, kay ang tawo mahimong makaanib sa ubang relihiyosong mga sistema sa kalibotanong imperyo sa bakak nga relihiyon.
8. Kinsay gihatagan sa sugo sa paggula sa Babilonyang Bantogan karon?
8 Maayong atong masayran nga ang balaang sugo sa paggula sa Babilonyang Bantogan gipahayag ngadto sa “akong katawhan.” (Pinadayag 18:4) Sumala sa Hebreohanong Kasulatan, kining balaang panawag sama ra sa sugo nga gihatag sa Diyos ngadto sa mga destiyero sa Israel sa yuta sa Babilonya. (Isaias 52:11) Busa, ang paghingalan “akong katawhan” aplikado direkta sa nanghibilin sa inanak-sa-espiritu, dinihogang mga disipulo ni Jesus nga ania pa sa yuta. Sa panahon sa Gubat sa Kalibotan I sa 1914-18, gipadakop sa Babilonyang Bantogan kining mga dinihogan pinaagi sa politikal, militar, ug hudisyal nga mga elemento ning kalibotana aron dili makalihok kining espirituwal nga nanghibilin. Sa malarawanong pagkasulti, ang nanghibilin nahimong dinakpan, nawad-ag kagawasan sa paglihok sa pag-alagad kang Jehova.
9. Unsay gihimo sa mga Saksi ni Jehova aron makagula sa Babilonyang Batongan?
9 Diha sa Pinadayag 17, gihulagwayan ang Babilonyang Bantogan ingong babayeng bigaon nga nagkabayo sa mapintas nga mananap nga adunay pito ka ulo ug napulo ka sungay. Kanang simbolikong mapintas nga mananap nga miadto sa bung-aw ug mitungha pag-usab naglarawan sa presenteng adlawng organisasyon sa pakigdait sa kalibotan, nga mao, ang Hiniusang Kanasoran, ang manununod sa Liga sa Kanasoran nga miadto sa bung-aw sa pagsugod sa Gubat sa Kalibotan II. Busa sa diha nga ang katawhan ni Jehova, nga iyang gitawag “akong katawhan,” mituman sa paggula sa Babilonyang Bantogan, unsay ilang gihimo? Sila migula dili lamang ilalom sa pagmando ug paggahom nianang kalibotanong imperyo sa bakak nga relihiyon kondili migula usab sila sa pagmando sa iyang politikal nga mga kauban, ang politikal nga mga elemento nga karon nausa diha sa HK.
10. Unsang internasyonal nga organisasyon karon nga wala magpalangkit ang mga Saksi ni Jehova, ug ngano?
10 Ang dinihogang nanghibilin misagop ug istriktong nagpabiling neyutral may kalabotan sa politikal ug militaryong mga butang niining sistema sa mga butang. (Juan 15:19) Sila nagkahiusang nagbarog alang sa Gingharian sa Diyos pinaagi ni Jesu-Kristo, nga natukod sa langit sa kataposan sa Panahon sa mga Hentil sa 1914. Agig hagit sa Gingharian, ang Liga sa Kanasoran gitukod ug giuyonan sa Babilonyang Bantogan sa kataposan sa Gubat sa Kalibotan I sa 1918. Busa, kining internasyonal hinimog-tawong organisasyon talamayon, makaluod kang Jehova nga Diyos ug sa matinumanong nanghibilin sa espirituwal nga mga Israelitas dinhi sa yuta. Ang ilang gisaligan mao ang Gingharian ni Jehova ug dili ang bisan unsang yutan-ong kapuli alang niana. (Mateo 24:15, 16) Ug maingon man sa modernong adlawng “dakong panon,” nga gisimbolohan sa Nethinimhanon ug sa “mga anak sa mga ulipon ni Solomon.”—Pinadayag 7:9-17; Esdras 2:43-58.
11. (a) Nganong daotan alang sa mga disipulo ni Jesus ang pagpakighigala niining kalibotana? (b) Unsay tinamdan ang gipakita niining kalibotana ngadto sa mga Saksi ni Jehova, apan unsa ang padayon nilang gitagamtam?
11 Sa nag-atubang si Jesus sa husay alang sa iyang kinabuhi atubangan sa Romanong gobernador nga si Poncio Pilato, siya miingon: “Ang akong gingharian dili bahin niining kalibotana. Kon ang akong gingharian bahin pa niining kalibotana, makig-away unta ang akong mga alagad aron dili ako ikatugyan ngadto sa mga Hudiyo. Apan, ang akong gingharian dili gikan niining tuborana.” (Juan 18:36) Busa daotan gayod alang sa “mga alagad,” o sa mga disipulo ni Jesus, ang pagpakighigala niining kalibotana. Sa sayo pa niana, gisultihan ni Jesus ang una niyang “mga alagad,” ang 11 ka matinumanong mga apostoles, nga sila “dili bahin sa kalibotan” nga niini si Satanas nga Yawa mao “ang magmamando.” (Juan 14:30; 15:19; itandi sa 2 Corinto 4:4.) Tungod niini gidumtan sila sa kalibotan o dimahigalaon kanila. Maingon man, nakita sa mga disipulo ni Jesus ning ika-20ng siglo ang ilang kaugalingon diha sa dimahigalaong kalibotan. Bisan pa niini, padayon nilang gitagamtam ang pinakamaayong panaghigalaay sa tibuok uniberso, nianang sa Diyos sa matarong nga kalibotan nga umalabot, uban sa “bag-ong mga langit ug usa ka bag-ong yuta.”—2 Pedro 3:13.
12. Kon mogula ang tawo sa Babilonyang Bantogan ug magpalayo gikan sa iyang kalibotanong mga hinigugma, sa kang kinsang kiliran lamang siya kinahanglang magbarog, ug unsay gikinahanglan niini?
12 Iniggula sa tawo sa Babilonyang Bantogan ug magpalayo gikan sa iyang kalibotanong mga sagabay, ang Dakong Negosyo ug Politika ug Militarismo, adunay usa lamang ka dapit nga kaadtoan. Kana mao ang kiliran sa unibersal nga organisasyon sa usa nga buhi ug tinuod nga Diyos, si Jehova. Walay tunga nga dapit. Kinahanglang antuson sa indibiduwal ang pagkadimahigalaon niining kalibotana, usa ka butang nga nakapalisod sa tawo sa pagdesider sa pagbulag sa Babilonyang Bantogan ug sa kalibotan nga kini maoy dakong bahin.
Usa ka “Bag-ong Ngalan” Gikan sa Pinakamaayong Higala
13. Sa unang siglo K.P., unsay balaang pagtawag sa mga disipulo ni Jesus?
13 Ang atong hamiling paghigalaay sa Diyos mohatag kanatog kalipay nga tawgong mga Saksi ni Jehova. Tinuod, ang mga disipulo ni Kristo sa unang siglo wala mosagop sa ngalang “Saksi ni Jehova.” Apan tagda palihog ang ilang relasyon uban sa pinakamaayong Higala sa tanan. Ang Buhat 11:26 nagtaho: “Ug sa Antioquia [Siria] sugdi nga gitawag ug mga Kristohanon ang mga disipulo pinaagi sa balaang pagtultol.” Imong mamatikdan nga ang New World Translation of the Holy Scriptures nag-ingon nga sila “gitawag ug mga Kristohanon pinaagi sa balaang pagtultol.” Ang Gregong pulong nga gihubad dinhi nga “gitawag pinaagi sa balaang pagtultol” nagpasabot ug labaw pa kay sa sinulagmang pagtawag. Ang pinakamaayong Higala sa uniberso miaprobar nianang ngalang “mga Kristohanon.”
14. Unsay ikaingon bahin sa terminong “Kakristiyanohan,” ug unsang mga pangutana ang nagkinahanglag pagtagad?
14 Gikan sa terminong “Kristohanon” mitungha ang ngalang Kakristiyanohan, nga aplikado sa tibuok gingharian sa nagaangkong mga Kristohanon uban sa nagkalainlaing mga sekta sa relihiyon ug mga denominasyon. Busa ang titulong “Kakristiyanohan” dili hinatag “pinaagi sa balaang pagtultol,” kun sa apostoles man o sa ‘paggiya’ sa kabubut-on sa Diyos. Busa ang situwasyon karon lahi kaayo nianang sa unang siglo. Ang tinuod nga mga Kristohanon lamang ang makatagamtam ug pinakamaayong relasyon ning dimahigalaong kalibotan. Busa ang dakong pangutana karon mao, Kinsa ang tinuod nga mga Kristohanon nga nagsunod sa dinasig nga Kasulatan? Laing hinungdanong pangutana mao, Tinuod bang mga Kristohanon ang mga Saksi ni Jehova nga nakabaton kang Jehova nga Diyos ug Jesu-Kristo ingong ilang mga Higala? Niining bahina ang pinili-sa-kaugalingon nga ngalan sa Diyos, si Jehova, ang nadahig.
15. Tungod sa unsang mga sirkumstansiya nga miabot ang panahon ni Jehova sa paghimog ngalan sa iyang kaugalingon, ug may kalabotan niini unsay bahin karon sa “katawhan alang sa iyang ngalan”?
15 Matagamtam ba sa Kakristiyanohan, lakip sa daghang relihiyon niini, ang panaghigalaay kang Jehova? Gipatugbabaw sa Kakristiyanohan ang ngalan ni Jesu-Kristo, ug nawala na lang hinoon ang ngalan sa iyang langitnong Amahan. Hinunoa, sa pagtuman sa mga tagna sa Bibliya, miabot na ang panahon alang kang Jehova sa paghimog ngalan alang sa iyang kaugalingon. Busa, ang iyang ngalan napatugbabaw. Alang niini, iyang gamiton ang iyang tinuod nga mga saksi, ang iyang piniling katawhan, sila nga nakatagamtam sa iyang panaghigala. Diha sa espesyal unang siglong tigom nga gihimo sa mga apostoles ug ubang pangunang mga sumusunod ni Jesu-Kristo, si disipulong Santiago miingon: “Gisugilon kanato ni Simeon ang pagbali sa Diyos sa unang higayon sa iyang pagtagad ngadto sa kanasoran aron sa pagkuha gikan kanila ug katawhan alang sa iyang ngalan.”—Buhat 15:14.
16, 17. Unsay gihimo sa mga paghubad sa Bibliya sa Kakristiyanohan bahin sa ngalan sa Diyos, apan unsay gihimo sa New World Translation niining bahina?
16 Malaoman nga ang ‘katawhan alang sa ngalan sa Diyos’ maoy iyang mga higala ug magpasidungog sa balaang ngalan. Apan unsay nahitabo diha sa Kakristiyanohan? Diha sa popular nga mga hubad sa Bibliya niini, nalandongan ang ngalan ni Jehova sa usa ka titulo. Ngani, upat lang ka beses makita ang iyang ngalan diha sa labing popular nga bersiyon sa Iningles karon! (Exodo 6:3; Salmo 83:18; Isaias 12:2; 26:4, King James Version) Dugang pa, bisan sa Hudiyohanong mga hubad sa Hebreohanong Kasulatan, gihubad ang ngalan sa Diyos nga “ang Ginoo.” Kining pagsulay sa pagwala sa ngalan ni Jehova dili buhat sa iyang mga higala.
17 Apan, sa tuig 1950, ang New World Translation of the Holy Scriptures misugod sa pagtungha sa relihiyosong eksena, ug gihulad niini ang balaang ngalan sa matag panahong makita ang orihinal nga Hebreohanong teksto sa Bibliya. Gipasig-uli usab sa New World Translation ang balaang ngalan sa iyang tukmang dapit sa pangunang teksto sa Kristohanon Gregong Kasulatan, ang gitawag nga Bag-ong Tugon—oo, 237 ka beses. Buhat kini sa mga higala ni Jehova.
18. Sumala sa kahayag sa Isaias 62:2, unsang lakang ang gihimo sa katawhan sa Diyos sa 1931, ug unsang kaakohan ang ilang gituman?
18 Makaikag alang sa mga higala ni Jehova mao ang mga pulong sa Isaias 62:2. Kining bersikuloha, nga gipamulong ngadto sa makitang organisasyon sa Diyos nga dedikado, bawtismado, inanak-sa-espiritu nga mga disipulo sa Mesiyas, mabasa: “Ug ang nasod makakita sa imong pagkamatarong, O babaye, ug ang tanang mga hari makakita sa imong himaya. Ug ikaw pagatawgon sa usa ka bag-ong ngalan, nga igangalan sa mismong baba ni Jehova.” Kanang maong “ngalan” nagpasabot sa binulahang kahimtang nga niini gitigom kining modernong adlawng dinihogang mga disipulo. Dugang pa, aron mahimong ‘usa ka katawhan alang sa ngalan sa Diyos,’ ang nanghibilin sa iyang makitang organisasyon tukma nga pagatawgon sa iyang ngalan, magdala nianang ngalana. Kining kamatuorana natuman sa tinakdang panahon. Busa, sumala sa kahayag sa Isaias 62:2, ang inanak-sa-espiritu nga organisasyon sa Diyos, nga nagtigom diha sa kombensiyon sa Columbus, Ohio, sa 1931, malipayong misagop sa ngalang “mga saksi ni Jehova.” Misunod nianang maong panig-ingnan, ang tanang kongregasyon sa dedikadong katawhan ni Jehova misagop nianang ngalana. Ug nagpabilin kanang ngalana bisan pa sa sukwahi nga mga panagna sa kalibotan. Diha sa Pinadayag 3:14 ang gihimayang Jesu-Kristo nagngalan sa iyang kaugalingon nga “ang kasaligan ug tinuod nga saksi.” Nan, tukma, gikan sa halandomong tuig sa 1931 paunahan, ang mga kongregasyon sa iyang mga disipulo dinhi sa yuta midawat nianang ngalana pinaagi sa pagtultol sa Diyos. Sukad niadto, naningkamot sila sa pagtuman sa ilang kaakohan sa pagkinabuhi sumala nianang ngalana ug ipahibalo kini. Busa, ang ngalan ni Jehova—ang dili hitupngang ngalan sa ilang pinakamaayong Higala—napatugbabaw sa bug-os nga yuta. Ug si Jehova naghatag ug tagsaong pamatuod nga ang iyang pagpakighigala sa iyang mga saksi nagpadayon hangtod karong panahona.
19. (a) Nganong wala mahadlok ang dedikadong mga saksi ni Jehova sa pagkadimahigalaon ning kalibotana, ug unsang pribilehiyo ang iganti sa mga maghuhupot sa integridad diha sa Har–Magedon? (b) Alang sa unsa nga atong ihatag ang atong pasalamat ug pagdayeg kang Jehova?
19 Sanglit dapig kanato si Jehova ingong iyang dedikadong mga saksi, kinsay makabatok kanato nga magmalamposon? (Roma 8:31-34) Busa dili kita mahadlok sa pagkadimahigalaon niining kaawayng kalibotan. Busa, magpadayon kita ingong mga embahador o mga pinadala sa Mesiyanikong Gingharian, magaduaw sa karnerohong mga tawo aron mapasig-uli diha kang Jehova nga Diyos pinaagi sa iyang maunongong Hataas nga Saserdote, si Jesu-Kristo. (2 Corinto 5:20) Tungod niini misamot ang kasuko niining kalibotana batok sa dinihogang nanghibilin ug sa ilang mga kauban, ang “dakong panon,” apan ang pinakamaayong panaghigala sa tibuok nga uniberso, kanang kang Jehova nga Diyos, maunongong nagpadayon sa paglahutay. (Pinadayag 7:9) Dili gayod kini maputol diha kanato ingong iyang maghuhupot sa integridad. Sa pagkatinuod, sa dili madugay, mapadayag kanang panaghigalaa sa panahon sa gubat sa tanang gubat, “ang gubat sa dakong adlaw sa Diyos nga Makagagahom,” sa Har–Magedon. (Pinadayag 16:14, 16) Didto, mag-inatubangay uban kang Satanas nga Yawa ug sa iyang panon sa mga demonyo ug sa tanan niyang makitang yutan-ong organisasyon, ibayaw ni Jehova ang Iyang unibersal nga pagkasoberano pinaagi sa Iyang dakong kadaogan sa tibuok nga panahon. Kita, nga nakalahutay hangtod karon sa maayong panaghigalaay uban kang Jehova, hatagag pabor nga maluwas ug makapribilehiyo nga mahimong mga saksi sa iyang dakong kadaogan pinaagi sa iyang mananaog nga Hari, si Jesu-Kristo. (Salmo 110:1, 2; Isaias 66:23, 24) Ang tanan natong kinasingkasing nga pasalamat ug pagdayeg iya ni Jehova nga Diyos alang sa iyang malahutayong pagpakighigala!—Salmo 136:1-26.
Unsaon Nimo sa Pagtubag?
◻ Giawhag ni Jesus ang iyang mga disipulo sa paghimog unsang panaghigala, ngadto sa unsang “dayong mga puloy-anan” nga sila giagak?
◻ Unsay tinamdan sa kalibotan diha sa mga Saksi ni Jehova, apan unsang panaghigala ang padayon nilang gitagamtam?
◻ Unsang responsabilidad ang gituman sa ‘katawhan alang sa ngalan sa Diyos’ bahin sa iyang ngalan?
◻ Nganong dili mahadlok ang dedikadong mga Saksi ni Jehova sa pagkadimahigalaon niining kalibotana?
[Hulagway sa panid 15]
Gidala si Zaqueo ngadto sa pinakamaayong panaghigalaay sa tibuok uniberso. Mao ba usab kanay nahitabo kanimo?
[Hulagway sa panid 18]
Nalipay nga nakabaton kang Jehova nga mao ang ilang pinakamaayong Higala, sa 1931 miuyon ang mga Saksi ni Jehova nga mailhan pinaagi sa iyang dihitupngang ngalan