Ang Kaayo ni Jehova sa “Ulahing Bahin sa mga Adlaw”

“Umari, kamo nga katawhan, manungas kita sa bukid ni Jehova.”—ISAIAS 2:3.

“ANG ULAHING BAHIN SA MGA ADLAW.” Nganong ang tagna sa Bibliya masubsob nga migamit niining ekspresyona? Nagpasabot ba kini nga ang mga adlaw sa katawhan maihap na lang ug nga sa kataposan ang atong yuta ug ang tanang kinabuhi diha niini mangawagtang sa usa ka globonhong kalaglagan? Ang mga lider sa kalibotan sa kasagaran mahadlok sa paghisgot niining posibilidara. Pananglitan, diha sa usa ka interbiyo sa telebisyon sa Enero 13, 1985, ang panglangyaw nga ministro sa Moscow si Andrei Gromyko mipasidaan sa mga tawo sa Unyon Sobyet nga adunay “usa ka dakong katalagman, usa ka dakong hulga nga nagapaibabaw sa tanang katawhan.” Siya midugang: “Kinahanglang buhaton ang tanang butang kutob sa maarangan aron mawala ang hulga, aron ang Armageddon nga gikahadlokan sa katawhan sa dugay nang kasiglohan dili mahitabo.”

² Sa daghang okasyon, si Presidente Ronald Reagan sa Tinipong Bansa mihisgot usab sa Armageddon. Ang Daily News sa New York sa Oktubre 30, 1983, mikutlo kaniya nga nag-ingon: “Mibalik ako sa inyong karaang mga propeta sa Daang Tugon ug sa mga ilhanan nga nagatimaan sa Armageddon, ug ako nahibulong kon—kon kita ba nga kaliwatan mao ang makakita nga mahitabo kini.” Sa miaging Pebrero 8, 1985, ang The Wall Street Journal mitaho: “Si Presidente Reagan nagtuo ug naghisgot bahin sa Armageddon, . . . apan wala siya magplano alang niana.”

³ Oo, ang mga lider sa kalibotan nanaghisgot bahin sa Armageddon. Apan nasayod ba sila kon unsay kahulogan nianang pulonga sa Bibliya? Dayag nga wala, kay ang Armageddon dili kay usa ka hinimog tawo nga pagsunog. Kini maoy unibersohanong gubat sa Diyos diin siya ug ang iyang kaubang Hari, si Jesu-Kristo, magpakanaog sa silot batok sa daotang kanasoran ug daotang mga tawo. Kini moabot ingong pangataposan sa “ulahing bahin sa mga adlaw.” (Daniel 10:14; Pinadayag 16:14, 16) Ug unsay atong pagsabot sa “ulahing bahin sa mga adlaw”? Ang ubang mga hubad naghubad niining ekspresyona nga “ang kinatumyang bahin sa mga adlaw,” “ang kataposang bahin sa mga adlaw.” (Rotherham, Young) Ang Hebreohanong pulong nga gihubad mao ang ’a·charithʹ hay·ya·mimʹ. Sumala sa Theological Dictionary of the Old Testament, usahay magkahulogan kinig “Ang Kataposan sa Panahon,” nga nagtimaan dili lamang sa umaabot kondili “sa kon unsang paagi matapos ang kasaysayan, busa ang dangatan niini.”

⁴ Duolan sa 70 ka tuig, nagakinabuhi ang katawhan sulod sa “konklusyon sa sistema sa mga butang,” nga gitagna ni Jesus sa Mateo 24:3-25:46. Kining yugtoa sa panahon, nga nagsugod sa 1914, mao ang “Panahon sa Kataposan” diin ang mga hitabo nagapadulong sa ilang kataposan. Mahitabo kana sa “dakong kasakitan” sa panahon diin ang tanang daotang organisasyon ni Satanas laglagon. (Mateo 24:21, 22) Ang dakong sangpotanan maoy sa kahimayaan sa balaang ngalan ni Jehova.—Ezekiel 38:16, 23.

Ang Kaayo ni Jehova

⁵ Si Jehova maoy Diyos sa pagdasig. Pagkakatingalahan sa makapalig-ong mga ekspresyon nga iyang gipadayag diha sa iyang Pulong, ang Balaang Bibliya! Ang usa niining ekspresyona makita sa Oseas 3:5, nga mabasa: “Human niana ang mga anak sa Israel mamalik ug mangita kang Jehova nga ilang Diyos, ug kang David nga ilang hari; ug sila mangadto kang Jehova nga magapangurog ug sa iyang kaayo sa ulahing bahin sa mga adlaw.”

⁶ Ang nanghibilin sa Israel namalik gikan sa pagkabihag sa Babilonya sa 537 W.K.P., sa pagpasig-uli sa pagsimba kang Jehova sa Jerusalem. Maingon man, sa modernong panahon, sa 1919 ang dinihogang nanghibilin sa espirituwal nga Israel ‘namalik’ gikan sa pagkabihag sa organisasyon ni Satanas, ug sinserong ‘nangita kang Jehova nga ilang Diyos.’ Pagkalahi gikan sa apostatang mga sekta sa Kakristiyanohan! Walay usa kanila nga modawat kang Jehova ingong “ilang Diyos.” Imbes “mangita kang Jehova,” naglikay sila sa paggamit sa iyang ngalan.

⁷ Sayo sa “ulahing bahin sa mga adlaw,” ang Enero 1, 1926, nga isyu sa The Watch Tower mipatik ug mahagitong artikulong “Kinsay Mopasidungog Kang Jehova?” Ang natigom pagbalik nga nanghibilin sa espirituwal nga Israel maunongong mitubag nianang panawag, ug sa 1931 nalipay sila sa pagdawat sa ngalang mga Saksi ni Jehova. (Isaias 43:10, 12) Hangtod karong adlawa sila nagapadayon sa pagbayaw nianang ngalana sa atubangan sa mga pomuluyo sa yuta. Ngani, sa 1984 sila mipatik, sa milyonmilyong kopya sa matahom ug kolor nga pulyetong nag-ulohang Ang Balaang Ngalan nga Magapadayon sa Walay Kataposan.

⁸ Apan, mitagna usab si Oseas nga kining espirituhanong mga anak “mamalik ug mangita kang . . . David nga ilang hari.” Nawad-an ug hari ang unodnong Israel sukad napukan ang kaliwatan ni David sa pagkahari sa 607 W.K.P. Dinhi nagsugod ang 2,520 ka tuig sa walay diyos nga pagmando—“ang tinudlong panahon sa kanasoran,” o Panahon sa mga Hentil. (Lucas 21:24; Daniel 4:16) Apan sa 1914, sa nagsugod ang “ulahing bahin sa mga adlaw,” gipalingkod sa Diyos ang Usa nga gihulagwayan ni David—si Jesu-Kristo—ingong Hari sa Sion, ang “langitnong Jerusalem.”—Hebreohanon 12:22; Salmo 2:6.

⁹ Wala dayon makasabot niini ang katawhan ni Jehova sa yuta. Apan, ang ilang pagpangita kang ‘David nga atong hari’ natapos sa dihang ang The Watch Tower sa Marso 1, 1925, mipatik sa artikulong “Paghimugso sa Nasod.” Usa kini ka malig-ong pamatuod, binase sa Pinadayag kapitulo 12, nga ang Mesiyanikong Gingharian ni Jehova natawo sa langit sa 1914 ug nga si Kristo karon ‘nagamando taliwala sa iyang mga kaaway.’—Salmo 110:1, 2, King James Version; 2:1-6.

¹⁰ Ang dinihogang nanghibilin, ug ang tanang nagpahinungod kang Jehova, nasayod sa ilang nangaging mga kasal-anan. Sa mapaubsanon, sila “nangadto kang Jehova nga nagapangurog,” nangayog pasaylo sa nangaging mga kasal-anan. Ug karon samtang ang “ulahing bahin sa mga adlaw” nagapadulong sa kinatayoktokan niini, nagaamping pag-ayo ang mahigugmaon kang Jehova nga dili sila makasala batok sa Diyos ug sa iyang matarong nga mga balaod. Kinahanglang magpadayon kita nga “mangadto kang Jehova nga magapangurog,” magapanton sa atong mga lawas, aron makabaton ug kaluwasan ngadto sa Bag-ong Kahikayan sa Diyos. (1 Corinto 9:27) Kinahanglang hinumdoman nato nga “ang pagkahadlok kang Jehova mao ang sinugdanan sa kaalam.”—Salmo 111:10.

¹¹ Apan, sa unsang paagi nga kita “mangadto nga magapangurog . . . sa iyang kaayo”? Hingpit nga maayo si Jehova. Siya maoy maayong panig-ingnan sa hamiling batasan. Hingpit siya sa pagtagana sa tanan natong panginahanglan. Busa, kita masaligong makapamulong sama kang David: “Si Jehova mao ang akong magbalantay. Walay makulang kanako. . . . Sa pagkamatuod ang kaayo ug ang mahigugmaong kalulot magasunod kanako sa tanang adlaw sa akong kinabuhi.” (Salmo 23:1-6) Karon, ug hangtod sa “ulahing bahin sa mga adlaw,” kita kinahanglang ‘mangadto nga magapangurog sa kaayo ni Jehova,’ masaligon nga mahinloan ang atong mga sala sa bililhong halad sa iyang Anak, si Jesus. (1 Juan 2:1, 2) Sa mapasalamaton, kita mopahayag: “O Jehova, . . . pagkadako sa imong kaayo, nga gitagana mo sa mga magakadlok kanimo!”—Salmo 31:17, 19.

¹² Sa nagkaunlod ang kalibotan ni Satanas sa kalapukan sa kadaotan, hinaot nga atong sundogon ang kaayo ni Jehova pinaagi sa pagpahibalo sa atong mga silingan sa maayong balita sa Gingharian ug sa pagpakita sa diyosnong mga hiyas sa atong mga kinabuhi. Hinaot nga atong ugmaron ang mga bunga sa espiritu, lakip sa kaayo, sa tanan natong mga relasyon—sa atong mga pamilya, sa atong mga kongregasyon, ug sa atong mga kontak uban sa mga tawo sa kalibotan. (Galacia 5:22, 23; Salmo 119:65-68) Hinungdanong buhaton nato kini kon nagatinguha kita nga maluwas sa “ulahing bahin sa mga adlaw.”

Tambag sa Patriarka

¹³ Duolan sa 3,700 ka tuig kanhi, ang patriarkang si Jacob (ginganlan usab ug Israel) mihatag ug tagna diha sa higdaan sa kamatayon. Gisultihan ang iyang 12 ka anak, nga mga ulo sa banay sa Israel, siya miingon: “Pagtigom kamo aron makapahayag ako kaninyo sa mahitabo kaninyo sa ulahing bahin sa mga adlaw.” Ang iyang mga pulong aplikado karon sa mga nanghibilin sa espirituwal nga Israel ug sa ilang mga kauban, ang “ubang mga karnero.” Walay bisan usa kanila ang makaikyas sa silot sa paglapas sa mga sukdanan ni Jehova sa pamatasan, sama sa gihimo ni Reuben, ni hatagan nilag higayon ang mapintas nga taras sama kang Simeon ug Levi. Hinunoa, kinahanglang ilang ugmaron ang mga hiyas sama sa kaisog, pagsalig kang Jehova, ug pagkamabungahon, sama sa gipakita sa ubang mga anak sa Israel.—Genesis 49:1, 3-7, 9, 18, 22; Juan 10:16; itandi sa 2 Pedro 1:8-11.a

¹⁴ Apan, adunay tambag alang sa “ubang mga karnero” nga may palaabuton sa pagkalabang-buhi sa “Kataposang Panahon.” Atong makita kini nga gipamulong, ingong pagpasiugda, sa duha ka nalangkit nga mga tagna sa Bibliya, diha sa Isaias 2:2-5 ug Miqueas 4:1-5.

Nagaganayan Ngadto sa Balay sa Diyos

¹⁵ Ang Isaias 2:2 mabasa: “Ug mahinabo sa ulahing bahin sa mga adlaw nga ang bukid sa balay ni Jehova pagatukoron sa ibabaw sa tumoy sa kabukiran, ug kini igatuboy sa ibabaw sa kabungtoran; ug ngadto niini magaganayan ang tanang kanasoran.” Kapin sa 50 ka tuig, sukad sa 1935, kining “tilinguhaong mga butang sa tanang kanasoran” nagatigom ngadto sa balay sa pagsimba ni Jehova, ‘nagapuno nianang balaya sa himaya.’ Kining ‘paganayan’ modaghan sa magkaduol na ang “ulahing bahin sa mga adlaw” sa kataposan niini. Ang simbolikong bukid ni Jehova sa putli nga pagsimba mas nagakadayag, busa ang mga mapainubsanon makakita sa kalainan niini batok sa sektaryanhong “kabungtoran” ug “kabukiran” sa matugotong kalibotan ni Satanas. Sila “migula” sa bakak nga relihiyon ug mikalagiw sa nagatubong gidaghanon ngadto bukid sa pagsimba ni Jehova.—Haggeo 2:7; Pinadayag 18:2, 4, 5; Salmo 37:10, 11.

¹⁶ Kining mga mapaubsanon misanong sa panawag sa Isaias 2:3: “‘Umari, kamo nga katawhan, ug manungas kita sa bukid ni Jehova, ngadto sa balay sa Diyos ni Jacob; ug kita pagatudloan niya sa iyang mga dalan, ug manlakat kita sa iyang mga alagianan.’ Kay gikan sa Sion mogula ang kasugoan, ug ang pulong ni Jehova gikan sa Jerusalem.” Sa karon, gituman ni Jehova ang iyang saad nga “magapadali niini sa iyang kaugalingong panahon.” (Isaias 60:22) Ang nagakadaghang “dakong panon . . . nga gikan sa tanang kanasoran” nagaganayan ngadto sa pagsimba ni Jehova. Taliwala kanila, 138,540 ang gibawtismohan sa 1982; 161,896 sa 1983; ug 179,421 sa 1984. Buot sila nga maluwas sa “ulahing bahin sa mga adlaw.”—Pinadayag 7:9, 14.

¹⁷ Kining bag-ong mga Saksi nagapabili sa kaayo ni Jehova sa pag-agak kanila sa kahayag sa kamatuoran, ug matinuoron sila sa pagpakitag kaayo diha sa uban. Ilang ginadawat ang instruksyon nga ginatagana ni Jehova pinaagi sa iyang Pulong ug sa iyang organisasyon. Naundan ang Kasugoan ni Moises ug daghang ‘kinahanglang dili,’ ug kinahanglang sundon kini sa Israel. (Tan-awa ang Exodo 20:3-17.) Apan ang duha ka dagkong sugo sa mga Kristohanon, sumala sa gipamulong ni Jesus, maoy positibong mga sugo sa ‘paghigugma kang Jehova nga atong Diyos sa atong bug-os nga kasingkasing, kalag, hunahuna, ug kusog, ug sa paghigugma sa atong silingan sama sa atong kaugalingon.’ (Marcos 12:29-31) Sa panaghiusa, ang mga Saksi ni Jehova karon nagasunod sa “kasugoan” nga gipadala ni Jehova gikan sa “langitnong Jerusalem,” nagapadapat sa matarong nga mga prinsipyo niini.

¹⁸ Apan, wala kini magpasabot nga wala nay laing balaod nga sundon sa katawhan ni Jehova. Si apostol Pablo nagpahinumdom kanato: “Ang tanang butang kinahanglang pagahimoon sa paagi nga maligdong ug mahusay.” (1 Corinto 14:40, NW Ref. Bi., potnot) Adunay pipila ka balaod nga gikinahanglan sa atong mga Kingdom Hall, pananglitan, ang pagdaginot sa paggamit sa koryente o sa pagbadlong sa mga bata sa paggamit sa balay sa Diyos sa pagsimba ingong dulaanan tapos sa mga tigom. Ang mga ulo sa pamilya kinahanglang maghimog mahusay nga kahikayan, sama sa pagtagana sa regular nga pagtagad sa adlaw-adlawng teksto sa Bibliya diha sa balay. Sa mga pamilyang Bethel adunay mga balaod, sama sa pagtagad sa mga sakop sa pamilya nga magadayandayan sa maayong balita pinaagi sa maligdong nga besti ug pamostura. (1 Timoteo 2:9) Ang “mga basahon” nga buksan sa panahon sa Usa ka Libo ka Tuig nga Pagmando ni Jesus sa walay duhaduha adunay mga balaod nga makahatag kaayohan sa katawhan. Maayong maanad na karon sa pagsunod sa makahimsog nga mga balaod nga gihimo alang sa kahusay ug sa pagpakitag konsiderasyon sa uban.—Pinadayag 20:12; 1 Corinto 10:24; Filipos 2:3, 4.

Niining Kalibotana sa Kabangisan

¹⁹ Tulin kitang nagapadulong sa panahon diin ang matag kamot sa tawo “igabakyaw batok sa kamot sa iyang kauban.” (Zacarias 14:13) Sa mosamot ang pagkamalapason ug kabangis sa kalibotan, unsay buhaton sa katawhan ni Jehova? Sila molihok kaharmoniya sa Miqueas 4:3, nga nagaingon: “Ang ilang mga pinuti himoon nila nga mga lipya sa daro ug ang ilang mga bangkaw himoon nga mga galab.” Gisalikway sa mga Saksi ni Jehova ang tanang matang sa kabangisan. “Ni makakat-on pa sila mahitungod sa gubat.” Sa walay duhaduha, magpadayon kini sa paglihok alang sa ilang kaayohan sulod sa “ulahing bahin sa mga adlaw.” Gihimo na kini.

²⁰ Pananglitan, sa gipatin-aw sa Enero 15, 1984, sa magasing Ang Bantayanang Torre nga dili alang sa mga Kristohanon ang mga pusil, wala na magtago ang mga Saksi ni Jehova sa New Caledonia ug mga armas-dipuygo. Human niana, sa girekisa ang lungsod sa usa ka lokal nga partido sa politika, ang mga balay nga ilang makit-ang may mga armas-dipuygo gipangsunog. Apan walay balay sa Saksi ang nasunog. Ang pagkainila sa pagkahimong neyutral sa katibuk-an mao ang labing maayong panalipod, sama sa napamatud-an sa Amihanang Irlandiya, Lebanon, Zimbabwe, ug ubang kayutaan.

²¹ Malipayon kita kon mosanong kita sa panawag sa Isaias 2:5: “Umari kamo ug manlakaw kita sa kahayag ni Jehova”! Malipayon usab kitang tanan nga moduyog sa malig-ong tinguha nga gipamulong ni propetang Miqueas kinsa, human gibatbat ang paraisonhong kasegurohan ug kalinaw nga naglungtad tali sa kaugalingong katawhan sa Diyos, mipadayon sa pag-ingon: “Ang tanang katawhan, sa ilang bahin, magalakaw ang tagsatagsa sa ngalan sa iyang diyos; apan kita, sa atong bahin, magalakaw sa ngalan ni Jehova nga atong Diyos sa tanang katuigan, sa walay kataposan.” Sa pagkatinuod ang kaayo ni Jehova ipakita kanatong tanan nga padayong nagakahiusa nga malinawon sa tinuod nga pagsimba, alang sa kaluwasan sa “ulahing bahin sa mga adlaw.”

[Mga footnote]

Mga Pangutana sa Pagsumariya

◻ Unsay imong pagsabot sa “ulahing bahin sa mga adlaw”?

◻ Sa unsang paagi ‘mangadto kita nga magapangurog kang Jehova ug sa iyang kaayo’?

◻ Unsang giya ang gitagana sa tagna sa higdaan sa kamatayon ni Jacob?

◻ Unsang positibong mga lakang ang atong buhaton kahamorniya sa Isaias 2:2-5 ug Miqueas 4:1-5?

[Mga Pangutana nga Pagatun-an]

1, 2. (a) Unsang dakong kapeligrohan ang nagahulga sa katawhan? (b) Unsay gipamulong sa mga lider sa kalibotan bahin sa Armageddon?

3. (a) Unsa gayod ang Armageddon? (b) Unsay kahulogan sa “ulahing bahin sa mga adlaw”?

4. Sa unsang paagi ang “Kataposang Panahon” nagapadulong sa kataposan, ug unsay sangpotanan?

5. Unsang makapadasig nga mga pulong ang makita sa Oseas 3:5?

6. Sa unsang paagi lahi ang espirituwal nga Israel sa mga sekta sa Kakristiyanohan?

7. Sa unsang paagi gipasidunggan sa katawhan ni Jehova ang iyang ngalan?

8, 9. (a) Unsay kahulogan sa ‘pagpangita kang David nga ilang hari’? (b) Kanus-a ug diin gipalingkod ang Hari? (c) Sa unsang paagi nasabtan kining mga butanga sa katawhan ni Jehova?

10. (a) Kinsa ang “nangadto kang Jehova nga nagapangurog,” ug sa unsang paagi? (b) Nganong hinungdanon kaayo karon “ang kahadlok kang Jehova”?

11. (a) Unsang bahin nga maayo si Jehova? (b) Nganong kita ‘mangadto nga magapangurog sa kaayo ni Jehova’?

12. (a) Sa unsang paagi atong masundog ang kaayo ni Jehova? (b) Nganong hinungdanon nga mosundog kita?

13. (a) Kinsa karon ang nakapahimulos pinaagi sa pagtagad sa tagna ni Jacob sa higdaan sa kamatayon? (b) Unsang tambag ang makita niadtong tagnaa?

14. Unsay tambag diha sa duha ka nalangkit nga mga tagna bahin sa “Kataposan sa Panahon” ang gihatag alang sa “ubang mga karnero”?

15. (a) Sa unsang paagi natuman ang Isaias 2:2? (b) Unsang kalainan ang makita karon sa mga maaghup, ug unsay ilang pagsanong?

16. (a) Unsang panawag ang gitubag karon sa mga maaghup? (b) Sa unsang paagi gituman ni Jehova ang iyang saad sa “pagpadali niini”?

17. (a) Sa unsang paagi ipasundayag sa bag-ong mga Saksi ang pagpabili sa kaayo ni Jehova? (b) Unsang positibong mga sugo ang kinahanglang sundon natong tanan karon?

18. (a) Unsang matang sa mga balaod nga kinahanglan natong sundon? (b) Alang sa unsang kaayohan ang pagsunod sa makahimsog nga mga balaod?

19, 20. (a) Unsay reaksiyon sa katawhan ni Jehova sa prinsipyo sa Miqueas 4:3? (b) Sa unsang paagi nakahatag kini kanilag kaayohan sa “ulahing bahin sa mga adlaw”?

21. (a) Unsang panawag nga kinahanglan natong tubagon, ug unsang tinguha ang kinahanglan natong buhaton kon buot kitang magmalipayon? (b) Sa unsang paagi ginapasaligan kita nga makabahin sa kaayo ni Jehova?

[Letrato sa panid 20]

Gidapit kita ni Isaias sa “paglakaw sa kahayag ni Jehova”