Gikan sa Among mga Magbabasa

Mga Batan-on ug Pag-inom

Salamat sa inyong duha ka artikulo nga gipatik diha sa inyong “Mga Batan-on Nangutana . . . ,” “Pag-inom​—Nganong Dili?” (Nobyembre 22, 1984) ug “Ang Pag-inom Tinuod Bang Makatabang Aron Ako Makasugakod?” (Disyembre 8, 1984) Tinuod gayod kamo. Kusog kaayo akong moinom kon may kagul-ang mga problema, apan inigmata nako, lain kaayo ang akong bation. Kinahanglang may buhaton ako bahin niini, ug kadtong duha ka artikulo miabot sa tukmang panahon. Sukad nga nakabasa kanila, mihunong na ako sa pag-inom. Bation gihapon nako ang gana sa pag-inom, apan uban sa tabang sa Diyos ug sa inyong tambag, nakasugakod ako niining dakong problema.

H. C., Brazil

Mga Iro​—Kanunay nga Labing Maayong Higala sa Tawo?

Dili pa dugay giatake ako sa dakong iro ug natarantar. Dayon akong nahinumdoman ang artikulong “Mga Iro​—Kanunay nga Labing Maayong Higala sa Tawo?” (Hulyo 8, 1985) ug ang tambag: “Ayaw pagkatarantar ug pagdalagan. . . . Tindog nga walay lihok ug pakigsulting kasuwal sa iro nga samag imong kaugalingon.” Akong gisunod kining instruksiyona, ug mihunong ang iro sa pagpaghot ug hinay nga milakaw. Salamat kaninyo niadtong artikuloha.

F. B., Nigeria

Santa sa Aksidente

Buot namong ipahayag ang among pasalamat sa mga kopya sa inyong magasing “Mga Aksidente​—Masanta ba Sila?” (Disyembre 8, 1985), nga giapod-apod sa mga membro sa CIPA (Internal Committee for Accident Prevention). Buot namong pahimuslan ang higayon sa pagpahayag sa among pagpahalipay kaninyo sa pagtagad niining ulohana nga kanunay apas sa panahon, walay giilang tinuohan, ug walay gipinig. Kini may igong pamahayag sa kasegurohan: sa balay, sa hotel, sa dalan​—kanunay nga nagapanan-aw sa unahan. Kini nagatudlo kanato sa pagkinabuhi ug hataas nga kinabuhi, sa paggamit sa atong labing maayong mga hinagiban: kaisog, pagpugong sa kaugalingon, pagpalabay sa mga kalapasan.

R. G. R., Presidente sa CIPA, Brazil

“Ako Niadto Usa ka Katolikong Madre”

Usa ako ka magtutuong Romano Katoliko, ug dili ako panatiko. Tigbasa ako sa inyong mga magasin, ug ang labing gikasupakan ko mao ang bahin sa artikulong “Ako Niadto Usa ka Katolikong Madre.” (Disyembre 8, 1985) Mibulag ako sa eskuyla sa 1948, ug gidasig kami sa pagbasag Bibliya. Nganong makaingon siya nga gisultihan siya nga mortal nga sala ang pagbasag Bibliya? Wala nako siya sawaya sa pagbiya sa Iglesya Katolika, apan walay nagpugos kaniya sa pagdawat sa iyang mga panumpa. Pinaagi sa paggamit sa inyong basahon, iyang gisupak ang pagtulon-an sa kasugoan pinaagi sa pagpasangil sa uban, ug akong kutloon: “Mao kini ang akong sugo nga maghigugmaay kamo sa usa ug usa sama sa akong paghigugma kaninyo.” Mas maayo pa untang miingon siya, akong gipasaylo ang Iglesya Katolika sa ilang wala pagtabang sa pagkaplag sa akong tinuod nga bokasyon.

R. H., Inglaterra

May kalabotan sa gidasig ba o wala ang mga Katoliko sa pagbasag Bibliya adunay dakong kalainan, depende kon hain kang dapita nagpuyo. Sa Katolikong lugar sa usa ka bahin sa Pransiya, hayan gisultihan siya nga usa ka mortal nga sala ang pagbasa ug Bibliya, samtang gitudloan ka ug lahi nga hunahuna didto sa Protestanteng Inglaterra. Dugang pa, kami walay nakita diha sa artikulo nga gibasol niining madre niadto ang uban sa iyang pagpanaad o nga iyang giakusar ang uban sa dili maayong pagtratar, nga maoy nakatukmod kaniya sa pagpangitag kagawasan gikan kanila. Among nabasa nga siya adunay malig-on espirituwal nga panginahanglan ug nga wala katagan-i kining panginahanglana sa Iglesya Katolika o sa kinabuhi sa kombento. Hinunoa, ang iyang espirituwal nga panginahanglan karon natagan-an pinaagi sa iyang pagtuon sa Bibliya ug sa pagmantala sa Pulong sa Diyos uban sa mga Saksi ni Jehova. Wala siyay gipahayag nga pagpanimalos sa Iglesya Katolika.​—ED.