Ang Ipasabot sa mga Balita
Usa ka “Talamayong” Ngalan?
Ang dili pagbungat sa ngalan sa Diyos, ug sulaton kini nga JHWH, ug litokon kini nga “Ginoo,” mao ang rekomendasyon nga kinahanglang dawaton, miingon ang Katolikong basahong Com-nouvi tempi. Mao kini ang reaksiyon sa petisyon nga gibangon sa “Kapunongan sa Hudiyo-Kristohanong Panaghigalaay” sa Roma ug dungang gipirmahan sa iladong mga teologo ug mga eskolar nga Katoliko ug Hudiyo. Ang petisyon mihangyo sa “magpapatik nga mga kompaniya ug sa mga magsusulat sa mga pamantalaan ug mga magasin” sa paghunong na sa paggamit sa ngalang “Jahweh” tungod kay “talamayon kini alang sa mga Hudiyo, nga naglantaw sa ngalan sa Diyos nga dili malitok.” Ang ilang hangyo, miingon ang Kapunongan, gipasukad sa “karaang Hudiyohanong tradisyon,” nga “nakapadayon nga walay nakaulang” hangtod karon.
Apan angay bang magpagiya ang mga Kristohanon sa Hudiyohanong mga tradisyon? Matarong ba alang kanila sa pagsalikway sa ngalan sa Diyos ug sa paglikay sa paglitok niini? Ang Bibliya nagpakita nga maoy tinguha sa Diyos nga ang tanan mahibalo nga siya, “kansang ngalan mao si Jehova,” mao ang Labing Hataas. (Salmo 83:18; Ezekiel 38:23; Malaquias 3:16) Mipakita si Jesus ug panig-ingnan niining bahina. Inay mosunod sa mga tradisyong Hudiyohanon nga “nagahimo sa ngalan sa Diyos nga walay pulos,” iyang gitudloan ang iyang mga sumusunod sa pag-ampo: “Pagabalaanon unta ang imong ngalan.” (Mateo 6:9; 15:6) Ug sa pipila na lamang ka gutlo dihang hapit na siyang mamatay, siya miingon diha sa pag-ampo: “Ang imong ngalan akong gipaila sa [mga disipulo] ug kini igapaila ko pa kanila.”—Juan 17:26.
Kasabotan sa Kasal: Usa ba ka Kontrata?
Ang batan-ong babayeng taga Brazil ug ang iyang pamanhonon bag-o lang nakatapos sa pagsangkap sa ilang bag-ong balay. Gipadala na ang mga imbitasyon, ug ang tanan daw nahikay na alang sa ilang kasal, ug tulo ka adlaw na lang ang gipaabot. Nangandam alang sa iyang bag-ong kinabuhi, mihunong ang babaye sa iyang trabaho. Dayon, sa kalit lamang, gibungkag sa pamanhonon ang kasabotan sa kasal. Nakurat ug naguol, ang gisalikway nga pangasaw-onon nangitag legal nga kasulbaran. Nangatarongan ang iyang abogado nga ang ‘kasabotan sa kaminyoon maoy usa ka pasiunang kontrata, ug kon bungkagon nga walay katarongan, ang walay sala nga hingtungdan kinahanglang bayran sa mga kadaot nga giantos.’ Miuyon ug hukmanan ug mimando nga bayran sa lalaki ang iyang pangasaw-onon kanhi ug ‘bugay nga katugbang sa suweldo nga gimbut-an sa balaod ug sa pagbayad sa mga gastos sa korte ug sa bayranan sa abogado.’ Mikomento sa desisyon, ang abogadong si Nereu Mello, misulat diha sa São Paulo nga pamantalaang Jornal da Lapa: “Ang kasabotan sa kaminyoon maoy usa ka seryoso kaayong kontrata ug ang pagbungkag niana kinahanglang dili isipong dili-mabug-at atubangan sa Balaod.”
Kining maong opinyon sa pagkaseryoso sa kasabotan sa kasal dili kay usa ka bag-ong butang. Ilalom sa Moisesnong Kasugoan ang kaslonong babaye nga nakapakighilawas makadawat ug samang silot sa mananapaw nga babayeng minyo. Busa tagdon siya sa lahi nga paagi gikan sa dalaga nga nakapakighilawas. (Deuteronomio 22:23, 24, 28, 29) Balik niadto gilantaw ang kasabotan sa kasal nga mabugkoson—sama nga minyo na. (Mateo 1:19) Ang mga Kristohanon karon miila usab nga usa ka seryosong lakang ang kasabotan sa kasal. Wala nila kini isipang dili-seryoso.—Itandi sa Mateo 5:37.
Gipaangay sa Modernong Teknolohiya
Tapos nga gisaway ni Martin Luther ang pagpamaligya ug mga indhulhensiya (pagpahigawas gikan sa mga porma sa silot alang sa sala), gidili sa Romano Katolikong Iglesya ang praktis sa 1562. Apan gipasiugda sa opisyal sa Batikano nga si Pedro Albellan dili pa dugay nga ang pagtulon-an mahitungod sa paghatag ug mga inhulhensiya nagpabiling “dili-masalikway ug dili-mailisan.” Ang rebisadong basahon sa Romano Katoliko bahin sa mga indulhensiya nagpakita nga gipaangay sa Batikano kining pagtuoha diha sa modernong teknolohiya. Sumala sa The Times sa London, ang mga obispo karon “makahatag ug bug-os nga indulhensiya sa ilang matinumanon pinaagi sa radyo ug telebisyon tulo ka beses sa usa ka tuig dihang ilang ihatag ang panalangin sa ngalan sa Papa.” Apan, adunay restriksiyon. “Kinahanglang buhi kini nga transmisyon,” miingon si Luigi De Magistris sa Vatican’s Sacred Apostolic Penitentiary, ang opisina nga nagaatiman sa mga indulhensiya. “Ang pagtan-aw ug replay kulang pa.”
Ibaligya man o ihatag mismo sa tawo o pinaagi sa TV, Kasulatanhon ba ang mga indulhensiya? May mga panahon nga si Jesus, libreng nagpasaylo sa mga kasal-anan, siya walay giingon bahin sa panginahanglan ug mga indulhensiya. Maingon man ang mga apostoles. “Ang dugo ni Jesus nga Anak [sa Diyos] nagahinlo kanato gikan sa tanang sala,” misulat si apostol Juan. “Kon isugid ta ang atong mga sala, siya kasaligan ug matarong nga tungod niana mopasaylo siya sa atong mga sala ug magahinlo kanato gikan sa tanang pagkadili-matarong.” (1 Juan 1:7, 9) Kon mapasaylo ang tanang mga sala, unsa pay mahabilin aron bayran ang silot o tabonan sa mga indulhensiya?—Juan 3:36; Roma 5:10.