Mga Magmamantala sa Gingharian Nagtaho

“Kinahanglan Kamo Magbalaan”

ANG sugo sa Diyos sa mga Kristohanon mao nga “hunong na kamo sa pagpahiuyon sa mga tinguha nga inyong nabatonan sa kawalay-alamag sa nangagi, kondili, nahiuyon sa Usa nga Balaan nga nagtawag kaninyo, magbalaan usab kamo sa tanan niyang kagawian, tungod kay kini nahisulat: ‘Kinahanglan kamo magbalaan, tungod kay ako balaan man.’” (1 Pedro 1:14-16) Ang maong balaan nga kagawian kasagaran maoy maayong pamatuod ngadto sa uban. (1 Pedro 2:12) Sa tibuok yuta, sumala sa gipadayag sa mosunod nga mga kasinatian, ang sinserong mga tawo nagahimo sa gikinahanglang kausaban aron ipahiuyon ang ilang kagawian sa maong tambag.

◻ Sa Ecuador ang usa ka lalaki mihunong sa iyang pagtuon sa Bibliya dihang ang Saksing nagtuon kaniya napalagpot tungod sa imoralidad. Ang iyang espirituwal nga panginahanglan mitultol kaniya sa pagsusi sa ubang relihiyon. Siya mipili sa Evangelist nga relihiyon ug miuswag hangtod sa punto nga nahimong pastor sa iyang kaugalingong simbahan. Bisan pa niana, gitulisok siya sa iyang konsensiya, kay siya wala makasal ngadto sa babaye nga iyang gikapuyopuyo. Sa mikonsulta siya sa mga pastor sa ubang mga simbahan, ilang gipasaligan siya nga kadto dili problema. Bisan pa niana, iyang gibati nga kadto dili matarong, kay ang Saksi mismo nga nagtuon kaniya napalagpot tungod sa imoralidad. Wala siya makasabot nganong siya wala badlonga sa iyang kaugalingong iglesya. Sa ulahi, ang iyang puyopuyo nakontak sa mga Saksi ni Jehova ug misugod sa pagtuon uban kanila. Ang lalaki misugod sa pagtuon uban kaniya. Silang duha karon nagatambong sa mga tigom, nga nagauswag sa kahibalo sa mga prinsipyo sa Bibliya, ug nagahimog mga lakang sa pagpakasal aron sila makaalagad kang Jehova sa mahinlo ug dalawatong paagi.

◻ Sa laing kasinatian gikan sa Ecuador, ang usa ka Saksi miasoy: “Niadtong Pebrero 1984, ang usa ka gulangong babaye mihangyo kanamo nga magtuon uban niya.” Unsay nakadasig niadtong hangyoa? Ang igsoong lalaki sa maong babaye nahimong usa sa mga Saksi ni Jehova, ug siya nakadayeg pag-ayo sa iyang maayong kagawian. Panahon sa ikaduhang pagtuon sa Bibliya, ilang nahisgotan ang bahin sa pagtabako, nga usa sa mga suliran sa babaye. Bisan pa niana, sa sunod nga pagtuon usa ka semana sa ulahi magarbohon niyang gipahibalo nga sukad sa pagkakat-on sa punto de vista sa Bibliya mahitungod sa pagtabako siya wala na makatandog ug usa ka sigarilyo! Siya may laing problema​—ang iyang balay punog relihiyosong mga imahen. Apan sa pagbasa sa Deuteronomio 7:26, nga nagaingon: “Dili ka magdala sa usa ka butang dulumtanan sa imong balay . . . kini gigahin sa kalaglagan,” siya nagsunog nianang tanan.

Sukad niadtong panahona, siya misugod sa pagtambong sa mga tigom ug wala makapalta bisan kas-a. Sa wala madugay iyang nabuntog ang iyang labing lisod nga babag​—iyang gibugto ang imoral nga relasyon uban sa usa ka lalaking minyo. Sa maong panahon, sa unang panahon sa iyang kinabuhi, iyang nasinati ang tiunay nga kalipay, kay siya nakaalagad na kang Jehova uban ang mahinlong konsensiya. Siya nabawtismohan niadtong Abril 1985 ug sa maong panahon nagdumalag upat ka pagtuon sa Bibliya sa uban. Ang sunod niyang tumong mao ang pagkahimong payunir, kay iyang gibating kini mao ang labing maayong paagi nga siya makapakitag pagpabili kang Jehova, kinsa nagpagawas kaniya gikan sa “kawang ug imoral nga kinabuhi.”

◻ Ang maayong sangpotanan sa diyosnong kagawian nakita sa tunghaan sa mga babaye sa Kenya, diin ang maayong kagawian sa usa ka Saksi namatikdan sa talagsaong paagi. Lima ka lalaking magtutudlo gipatrabaho sa tunghaan, apil ang usa sa mga Saksi ni Jehova. Apan nga tagsatagsa sila gipapahawa tungod sa seksuwal nga imoralidad uban sa babayeng mga estudyante. Sa wala madugay, usa lamang sa siyam ang nahibilin​—ang magtutudlo nga usa sa mga Saksi ni Jehova!

Tinuod, posibleng magbag-o ang mga tawong nagkinabuhing imoral. Kon kita mahimong ‘balaan sa tanan natong kagawian,’ dili lamang atong itagana ang maayong pamatuod ngadto sa uban kondili malipay usab nato ang kasingkasing ni Jehova. Sa ingon, atong ginabutang ang atong kaugalingon nga nahan-ay alang sa kinabuhing walay kataposan.​—Proverbio 27:11.

[Kahon sa panid 21]

“Kay ako mao si Jehova nga inyong Diyos; ug kinahanglang magbalaan kamo sa inyong kaugalingon ug magpamatuod nga balaan, tungod kay ako balaan man.”—Levitico 11:44.

[Kahon sa panid 21]

“Atong hinloan ang atong kaugalingon sa tanang kahugawan sa unod ug sa espiritu.”—2 Corinto 7:1.