Ang Ipasabot sa mga Balita

Pagsultihay sa Katoliko ug Marxismo

Didto sa Budapest, Hungariya, sa Oktubre 1986, 15 ka mga teologong Katoliko ug mga pilosopo nagtigom uban sa 15 ka makinaadmanong Marxista. Gihimo ang tigom sa Vatican Secretariat for Unbelievers ug sa Hungarian Academy of Science aron sa paghisgot sa ebolusyon sa moral nga mga prinsipyo.

Taliwala sa mga Katoliko nga presente mao si Kardinal Poupard sa Pransiya, nga mao ang tsirman sa Secretariat for Unbelievers, ug si Kardinal Koenig sa Austria, usa ka espesyalista bahin sa relasyon sa Iglesya Katolika tali sa mga nasod nga komunista. Lakip sa mga Marxista mao ang mga lider sa Hungarian Institute of Philosophy ug ang Soviet Institute of Scientific Atheism.

Ang mantalaang Pranses nga Le Monde mitaho: “Ang mga makinaadmanong Marxista nahibalo nga ginaatubang nila ang krisis sa moral nga mga prinsipyo, ang pagkaseryoso niini ilang gisukod pinaagi sa gidaghanon sa mga paghikog, sa paggamit sa mga droga, ug sa alkohol. Sumala sa delegadong Katoliko, diha sa ilang pagpangitag solusyon sila [ang mga Marxista] nagaagad sa kooperasyon sa mga simbahang Kristiyano. Diha sa Romano [Katoliko] nga kiliran, ang duha ka katuyoan mao ang pagtimbangtimbang sa labing maayo kon sa unsang paagi ang tawo ug moralidad mosibo sa Marxista nga katilingban ug sa ‘pagtuki sa moral nga basehanan sa malig-ong pag-agaray tali sa mga Kristohanon diha sa Sidlakan [komunista] nga mga nasod ug sa mga Marxista.’”

Ang tinuod nga solusyon sa moral nga mga problema karon dili makita diha sa mga komperensiya tali sa nagkasumpaking mga ideyolohiya. Hinunoa, kini makita sa dinha ang Gingharian ni Jehova diha sa mga kamot sa iyang Anak, si Jesus, molaglag niining presenteng sistema sa mga butang, nga magtukod sa dapit niini ug bag-ong kalibotan ilalom nianang langitnong Gingharian.​—Daniel 2:44; Pinadayag 21:4, 5.

Tinuod nga Kagawasan?

Ang teolohiya sa kagawasan​—usa ka kalihokan nga nagakunsinte sa kabangisan ingong paagi sa “paglibre sa kabus ug sa dinaogdaog,” ilabina sa Ikatulong Kalibotan, nagkapopular. Mao kini ang ulohan sa panaghisgot diha sa Ikaduhang Internasyonal nga Asembliya sa Ekumenikal nga Asosasyon sa mga Teologo sa Ikatulong Kalibotan nga gihimo sa Oaxtepec, Mexico, Disyembre 8-13, 1986. Nganong labi pang desidido kining mga eskolar sa relihiyon bahin sa ilang mga tumong alang sa kausaban sa katilingban sukad masukad?

Bisan pa nga nagluwat ug instruksiyon ang Batikano sa 1985 nga nagsaway sa teolohiya sa kagawasan, ang Instruction on Christian Freedom and Liberation nga gipagawas sa 1986 nag-ingon nga “may katarongan kadtong nag-antos sa pagdaogdaog sa bahandianon o sa gamhanan sa politika sa paghimog aksiyon.” “Ang armadong pagsukol” giaprobahan na karon ingong “kataposang dalangpan.”

Apan, samtang dinhi pa sa yuta, nalangkit ba si Jesu-Kristo sa sosyal nga mga kalihokan sa kalibotan? Wala, sa kasukwahi, sa dihang midangop si Pedro sa “espada” sa pagdepensa sa Anak sa Diyos, gibadlong siya ni Jesus nga nagaingon: “Iuli sa sakob ang imong espada, kay ang tanang magamit ug espada mamatay sa espada.” (Mateo 26:52) Ang Bibliya nagsaad nga ang tinuod nga kagawasan moabot pinaagi sa pagpangilabot sa Diyos sa dihang hinloan sa Diyos ang kalibotan dili lamang sa kakabus, internasyonal nga kabingkilan, pagpingi sa rasa, ug pagadaogdaog kondili mga luha, kasakit, kaguol, ug kamatayon usab. (Pinadayag 21:4) Siyempre, kini ang tinuod nga kagawasan!

Gidumilian ang Bawtismo sa Bata

Ang usa ka Alemang Protestanteng ministro sa Frankfurt dili pa dugay nagpahibalo sa mga awtoridad sa iglesya nga siya sukad karon dili na “mobawtismo ug walay-hibangkaagang mga masuso gikan sa iyang parokya.” Gipatin-aw kon nganong ang iyang kaugalingong bawtismo sa masuso pa dili takos sa ngalang bawtismo, ang 58 anyos nga si Klaus Hoffmann miingon: “Kini wala makakab-ot sa unang kinahanglanon sa bawtismo sa Bibliya, nga mao ang pagtuo, ni may tukmang simbolo kini, nga mao ang pagtuslob.” Sa paglaban sa iyang hunahuna, mihukom siya nga magpabawtismo pag-usab ug busa “nagpatuslob sa tubig sumala sa kahulogan sa Bibliya bahin sa bawtismo,” mitaho ang mantalaang Aleman nga Frankfurter Allgemeine Zeitung.

Sa sinugdan, gisuspende sa mga opisyales sa simbahan si Hoffmann gikan sa tanan niyang mga kaakohan, apan gipagaanan ang silot pinaagi sa “pagpabakasyon kaniyag tulo ka bulan aron sa paghimog mga pagdukiduki.” Unsa ang mga resulta? Ang mantalaan mitaho nga ang iyang dugang pagdukiduki niining mga butanga nakalig-on hinoon “nga walay makitang ebidensiya diha sa Bibliya bahin sa pagbawtismo ug masuso. Dugang pa, ang mga sinulat sa unang mga Kristohanon mahilom mahitungod sa pagpailaila niining buhata hangtod sa ikatulong siglo.”

Dili ikatingala, ang mga awtoridad sa relihiyon mokutlo sa tradisyon ingong basehanan niining buhata. Apan, bisan pa niining mga kamatuorana, ang pagbawtismo ug masuso padayong ginapraktis halos sa tanang Kakristiyanohan. Ang pagpaluyo ba sa mga klerigo nagpahimo niini nga matarong? Gisugo ni Jesus ang iyang mga sumusunod sa pagbawtismo, dili sa mga masuso, kondili sa mga magtutuo nga gitudloan sa pagsunod sa tanan niyang mga sugo. Siya dili masuso apan “katloan na ka tuig” sa dihang gituslob siya sa tubig sa Suba sa Jordan.​—Lucas 3:21-23; Mateo 28:19, 20.