“Insight on the Scriptures”—Usa ka Bag-ong Ensiklopedia sa Bibliya
DIHA sa “Balaang Hustisya” Distritong mga Kombensiyon sa mga Saksi ni Jehova, dihay gihimong pahibalo sa pagluwat sa bag-ong ensiklopedia sa Bibliya nga nag-ulohang Insight on the Scriptures. Kini maoy duha-ka-tomo nga publikasyon, nga may total nga 2,560 ka panid, ang tanan niini sa tin-aw, mabasa nga tipo. Sa pagkakaron kini mabatonan lamang sa Ingles, apan ginahubad pa kini diha sa uban pang mga pinulongan.
Ang naapil diha sa Insight on the Scriptures mas daghan pa kay sa libro niadto nga Aid to Bible Understanding. Sa unsang paagi kini lahi? Ang daghang seksiyon girebisar ug gibag-o. Dunay daghan usab nga bag-ong mga artikulo ug dugang mga bahin diha sa Insight on the Scriptures.
Ang mga Basahon sa Bibliya
Ang matag basahon sa Bibliya gihatagag linain nga pagtagad. Ang hinungdanong palibot nga materyal gipresentar. Dunay bag-ong mga laraw sa tanang mga basahon sa Bibliya, ang kada usa naghatag sa pagtagad sa linaing mga bahin sa basahon. Kini sila naghatag ug tino apan masangkarong hunahuna sa unod sa basahon sa paagi nga daling masabtan. Pananglitan, dunay upat ka asoy sa Ebanghelyo bahin sa kinabuhi ug ministeryo ni Jesus sa yuta, ang matag usa dunay lahi nga tumong. Sa dihang gipailaila ang mga Ebanghelyo, ang tagsatagsang mga laraw nagapresentar niadtong mga tumonga niining paagiha: ‘Ang asoy ni apostol Mateo bahin sa kinabuhi ni Jesus gisulat nga anaa sa hunahuna ang mga Hudiyo. Gipakita sa Ebanghelyo nga si Jesus mao ang gitagnang Mesiyanikong Hari.’ ‘Si Marcos naghimog lakbit, mabaskog nga asoy sa kinabuhi ni Jesus, nagpresentar kaniya ingong tighimog-milagrong Anak sa Diyos.’ ‘Ang asoy ni Lucas sa kinabuhi ni Jesus gisulat sa paglig-on sa pagkatino sa mga hitabo nga naglibot sa kinabuhi ni Kristo ug diha sa paagi nga kini makapaikag sa katawhan sa tanang kanasoran.’ ‘Ang asoy ni apostol Juan sa kinabuhi ni Jesus nagpasiugda sa tema nga si Jesu-Kristo mao ang Anak sa Diyos, diin pinaagi kaniya posible ang kinabuhing walay kataposan.’ Human niining pasiunang mga pulong, ang laraw nagpresentar sa mga unod sa mga basahon ubos sa limitadong gidaghanon sa pangunang mga ulohan. Kini makatabang kanimo sa paghinumdom sa pangunang mga ideya nga giugmad sa magsusulat sa Bibliya.
Mga Paghapsay
Ang mainampingong pag-usisa sa mga pulong niining publikasyona gihimo sumala sa kahayag sa kahulogan sa mga pulong nga gigamit diha sa orihinal nga mga pinulongan sa Bibliya. Ang mga detalye giapil usab aron makasabot ang magbabasa sa Biblikanhong sukod sa kahulogan sa orihinal-pinulongan nga mga pulong. Dugang pa, ang Biblikanhong kahulogan sa mga ngalan gilunsay sumala sa kahayag sa paagi sa paninugdang mga butang niadtong mga ngalana nga aktuwal nga gihubad diha sa New World Translation.
Ang kuging paningkamot gihimo usab aron sa paghimo sa materyal niining publikasyona nga nunot sa panahon uban nianang gipatik sa Bantayanang Torre sa dili pa dugayng mga katuigan. Pananglitan, daghan kitag nakat-onan bahin sa kasingkasing, sa basahon sa kinabuhi, sa pagkahimong tinawag nga matarong, ug daghan pa. Kining impormasyona nausa diha sa Insight on the Scriptures.
Ang mga detalye sa sekular nga kasaysayan gituki batok sa orihinal nga mga tuboran, kon mabatonan, inay sa yanong pagsalig sa gipamulong sa ubang mga magsusulat mahitungod sa sulod niadtong mga tuborana; ginatos ka mga reperensiya giapil usab sa pagpakita kon asa makita ang maong impormasyon. Ang siyentipikanhong mga bahin sa mga artikulo gipanunot sa panahon. Dunay bug-os nga pagtuki pag-usab sa geograpikanhong mga lugar pinasukad sa arkeolohikal nga gihimong pagdukiduki sa dili pa dugayng katuigan.
Usa ka Atlas sa Bibliya
Ang Insight on the Scriptures nag-apil ug duolan sa 70 ka mapa, nga nagpakita sa ginatos ka lugar nga gihisgotan sa Bibliya. Busa, apil niining publikasyona mao ang usa ka malukopong atlas sa Bibliya. Diha sa kadaghanang mga kahimtang, gisentro sa indibiduwal nga mapa ang limitadong bahin lamang sa Biblikanhon o sekular nga kasaysayan. Busa, kini nagkuha sa pagtagad sa mga dapit nga dunay linain nga kahulogan niana nga konteksto. Makakita kag mapa nga nagsubay sa mga panaw ni Abraham, ang usa naglatid sa paglaaglaag sa kamingawan sa Israel, dunay lain nga nagkobre sa pag-agaw sa Yutang Saad, usa bahin sa kinabuhi ni David ingong laag ug lain alang sa mga hitabo nga nalangkit sa iyang pagkahari, dunay seryal sa mga mapa nga naglatid sa mga dapit nga gipanawan ni Jesus sa panahon sa iyang yutan-ong ministeryo, ug ubay-ubayng mga mapa nga nagpakita sa mga detalye sa Jerusalem sa nagkalainlaing mga yugto sa kasaysayan. Ang mapa sa indese gitagana aron sa pagtabang nimo sa pagtultol sa espisipikong mga mapa nga naghatag labing makatabang nga impormasyon mahitungod sa mga dapit ug sa mga lugar.
Diha sa kadaghanang mga mapa, dunay mga listahan usab sa mga ngalan sa dapit, uban sa mga kasulatan nga nagpakita kon nganong ang mga dapit makahuloganon diha sa partikular nga kontekstong makasaysayanhon nga ginakonsiderar. Diha sa nagsunod nga mga panid sa libro mao ang de-kolor nga mga bahin sa mga lugar nga gipakita diha sa mapa. Kining mga bahina makatabang nimo aron dugang pang makapahimulos gikan sa mga asoy sa Bibliya, sa dihang imong makita ang relasyon sa usa ka lugar ngadto sa lain, basaha ang mga detalye kon unsay nahitabo didto, ug tan-awa kon unsay hitsura na karon niadtong dapita.
Linain nga mga Bahin nga Dunay Kolor
Sa pagpangandam niining publikasyona, ang mga museo sa Norte America, Uropa, ug Tungang Silangan gilatid aron makita ang bililhong mga butang nga nalangkit sa rekord sa Bibliya. Nakuha ang mga hulagway sa labing bililhong mga butang. Dugang pa, ubay-ubayng mga koleksiyon sa mga letrato sa mga dapit nga gihisgotan sa Bibliya gisobli, aron mapili ang mga hulagway nga labing makatabang. Ang mga resulta gihimong walo ka 16-panid dunay kolor nga mga sinal-ot nga dunay praktikal nga bili. Kini mao ang katingalahang mga pasiugda nga imong kawilihan ug magamit sa daghang paagi sa dihang magtudlo sa uban.
Pananglitan, dunay seksiyon nga nag-ulohang “How We Got the Bible.” Sa geograpikanhon, kini naglarawan sa mga ang-ang nga diin nakaabot kanato ang Bibliya—gikan sa orihinal nga mga sinulat hangtod sa modernong mga hubad. Kini nasudlan ug mga hulagway sa mga bahin sa pila ka karaang mga manuskrito ug makitang ebidensiya sa pagpamatuod sa pag-amping nga gihimo sa unang mga eskriba, bisan sa punto sa pag-ihap sa mga letra diha sa mga manuskrito nga ilang gikopya.
Laing seksiyon maoy bahin sa “Flood of Noah’s Day.” Gitagad niini ang mga isyu sama sa, “Could the ark have held all the animals?” ug, “Where did the flood waters go?” Gipresentar usab niini ang mga sugilanon sa Baha gikan sa unom ka kontinente ug sa mga isla sa dagat sa pagpakita nga ang mga panumdoman sa Lunop sa adlaw ni Noe makita taliwala sa nagkalainlaing mga kultura sa ibabaw sa tibuok yuta.
Ang ubang seksiyon maoy mahitungod sa geograpikanhong mga bahin sa Yutang Saad, karaang mga imperyo kansang mga kalihokan nakaapekto sa Israel, ug sa pagpanaw sa mga dapit pinaagig hulagway nga makita sa mga bisita diha sa sulod ug sa palibot sa Jerusalem, karong adlawa. Tanan-tanan, dunay 50 sa maong mga topiko nga de-kolor.
Kining tanang impormasyona gihimo aron daling mabatonan pinaagi sa malukpanong mga indese diha niining mga tomoha. Kining maong mga indese motultol kanimo sa piniling mga diskusyon sa kasulatan nga gikutlo ug sa mga ulohang gilista.
Sa pagkuha sa katibuk-ang pagtan-aw sa basahon, kining pasiunang mga komento makita sa unang tomo: “Ang tumong niining publikasyona mao ang pagtabang kanimo sa pagbaton ug salabotan bahin sa Kasulatan. Sa unsang paagi gihimo kini? Pinaagi sa pagtigom gikan sa tanang mga bahin sa Bibliya sa mga detalye nga nalangkit sa mga ulohang gihisgotan. Pinaagi sa pagkuha sa pagtagad sa mga pulong sa orihinal nga pinulongan ug sa ilang literal nga kahulogan. Pinaagi sa pagpalandong sa nalangkit nga impormasyon gikan sa sekular nga kasaysayan, arkeolohikal nga pagdukiduki, ug ubang natad sa siyensiya ug sa pagbanabana niini sa kahayag sa Bibliya. Pinaagi sa pagtaganag mga tabang nga makita sa mata. Pinaagi sa pagtabang kanimo sa pagsabot sa bili sa paglihok nga subay sa gipamulong sa Bibliya.” Busa sulod sa mga panid sa Insight on the Scriptures maoy bahandi sa tinuod hamiling impormasyon nga imong magamit aron ikaw makapahimulos ug ang uban.