Mga Pangutana Gikan sa mga Magbabasa

◼ Nganong ang Bantayanang Torre sa Septiyembre 15, 1988, nagpasabot nga ang Protestantismo labaw pang naghugaw sa iyang kaugalingon kay sa Romano Katolisismo?

Kadto gipamulong kay kini mohaom sa tagna ug sa matuod nga mga panghitabo. Sa basahong Ezekiel kapitulo 23, ang masambingayong si Ohola ug si Oholiba gibatbat ingong imoral nga managsoong babaye. Ang napulog-tribong gingharian sa Israel gihawasan ni Ohola, samtang si Oholiba nagpasabot sa duhag-tribong gingharian sa Juda. Sa paghisgot niining simbolikong mga babaye, ang Bantayanang Torre sa Septiyembre 15, 1988, miingon sa panid 21:

“Tungod sa pagsubay sa labaw pang makasasalang dalan kay sa iyang igsoon [si Ohola, o Israel], si Oholiba (Juda) nakaagom ug nasodnong katalagman diha sa mga kamot sa mga taga-Babilonya sa 607 W.K.P. Ang iyang mga anak nangapukan pinaagi sa espada o gidalang binihag, ug siya napakaulawan taliwala sa kanasoran. Sama kang Ohola ug Oholiba, ang Kakristiyanohan nagahimo sa espirituwal nga panapaw, usa ka sala sa panan-aw sa Diyos nga giangkon niyang ginasimba. Ang Protestantismo, uban sa daghan niyang denominasyon, naghugaw sa iyang kaugalingon sa komersiyal ug politikanhong mga gahom sa kalibotan nga labaw pa kay sa iyang magulang nga babaye, ang Romano Katolisismo. Busa, tinoon ni Jehova nga malaglag ang tibuok Kakristiyanohan.”

Sugod sa Konsilyo sa Nicaea sa 325 K.P., gisagol ni Emperador Constantino ang paganong kulto sa Romanhong estado sa apostatang Kristiyanidad ug nahimong ulo sa bag-ong Iglesya Katolika. Sa ingon ang Iglesya Romana Katolika makasubay sa paglungtad niini ngadto sa ikaupat nga siglo sa atong Komung Panahon. Ang Protestantismo nagsugod sa Repormasyon sa ika-16ng siglo. Busa, ingon nga si Ohola (Israel) mas magulang kay kang Oholiba (Juda), ang Bantayanang Torre haom nagtawag sa Romano Katolisismo nga magulang babaye sa Protestantismo.

Bisan pa niana, nganong ikaingon nga “ang Protestantismo . . . labaw nga naghugaw sa iyang kaugalingon sa komersiyal ug politikanhong mga gahom sa kalibotan kay sa iyang magulang nga babaye, ang Romano Katolisismo”? Kay ang matuod nga mga panghitabo motukma sa tagna, nga nagaingon, “Sa dihang ang iyang igsoong babaye si Oholiba nakakita niana, nan siya nahimong labaw nga madaoton sa iyang kaulag kay kaniya, ug ang iyang pagpakighilawas labaw pa kay sa pakighilawas sa iyang igsoon.”​—Ezekiel 23:11.

Ingong mga bahin sa Dakong Babilonya, ang tibuok-kalibotang imperyo sa bakak nga relihiyon, ang Katolisismo ug Protestantismo dulot nalangkit sa komersiyal ug politikanhong mga elemento niining kalibotana. (Pinadayag 17:1-6; 18:1-19) Matuod, ang tinagsa ka Protestanteng denominasyon tingali menos ug impluwensiya kay sa gamhanang Iglesya Romana Katolika. Apan ang pagkaipon sa daghang Protestanteng simbahan molabaw sa usa ka Iglesya Katolika sa gahom ug sa impluwensiya. Pananglitan, dakog impluwensiya ang Protestantismo diha sa pila ka iladong industriyal nga nasod, uban sa pila ka Protestanteng klerigo nga nagatinguhag taas politikanhong katungdanan. Busa kini usa ka paagi nga ang Protestantismo, uban sa daghang denominasyon niini, naghugaw sa iyang kaugalingon nga labaw pa kay sa Katolisismo.

Hinuon, sa lain pang paagi ang Protestantismo “labaw pang madaoton sa iyang kaulag” ug labawng salawayon kay sa Katolisismo. Sa unsang paagi? Aw, ang Repormasyon mihatag sa Protestantismo labing menos sa paglaom ug palaabotong mas dakong espirituwal nga kalamdagan. Ngani, ang pila ka repormador mihimog sinsero ug dagkong mga lakang niining bahina. Apan sa dihang ang tanan napamulong ug nabuhat na, ang dili-kasulatanhong mga doktrina sama sa Trinidad, imortalidad sa tawhanong kalag, ug impiyernong-kalayo nagpadayong wala mausab taliwala sa mga Protestante. Sama sa mga Katoliko, sila sad-an usab sa pag-apil sa pagsimba sa linalang ug pagpuli sa mga tradisyon sa mga tawo sa kamatuoran sa Bibliya.​—Mateo 15:1-9; 23:9, 10.

Makaiikag niining bahina mao ang gipamulong sa Vindication, Basahon Uno, sa tuig 1931. Sa panid 309, kining basahona sa Watch Tower (nga karon wala nay estak) miingon mahitungod sa Ezekiel 23:11-13: “Ang Protestanteng ‘organisadong relihiyon’ nakakita giunsa sa Romano Katolisismo paghugaw sa iyang kaugalingon sa komersiyal ug politikanhong mga gahom niining kalibotana, ug daghag gipamulong batok sa mga Katoliko tungod niana; apan unya ang Protestantismo mipadayon ug mihimo sa laktod sa susama, ug labi pang daotan. . . . Ang duruha nagsubay sa samang dalan: apan ang Protestantismo nagbaton sa labaw nga kalamdagan kay sa Romanismo, ug busa labaw nga salawayon.”

[Larawan sa panid 30]

Si Constantino nagsagol sa apostatang Kristiyanidad sa paganong kulto sa Romanhong estado, sa ingon nahimong pangulo sa bag-ong Iglesya Katolika

[Kapsiyon]

The Metropolitan Museum of Art, Bequest of Mrs. F. F. Thompson, 1926 (26.229)