Nahinumdom Ka Ba?

Gipabilhan ba nimo ang pagbasa sa dili pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

◻ Unsa ang basehanan sa espirituwal nga mga magbalantay sa paghimog unang tikang sa pakigkita sa mga napalagpot aron matino kon sila ba mapalihok sa paghinulsol?

Bisan sa nabihag pa ang mga Israelinhon ug wala maghinulsol, si Jehova, sama sa usa ka magbalantay, mihimog unang tikang sa pagpangita kanila, nagpadala siyag mga propeta alang kanila. Ang Kristohanong mga magbalantay interesado sa pagtabang sa tanang mga mahinulsolon nga tingalig sama sa usa ka nawalang karnero. (Itandi ang Lucas 15:4-7.)​—4/15, panid 21-3.

◻ Sa unsang paagi ang ilustrasyon ni Jesus mahitungod sa usikang anak nagpakita kon unsa ang angay natong pagbati ug lihok kon ang usa mapasig-uli sa Kristohanong kongregasyon? (Lucas 15:22-32)

Ang atong tumong mao ang pagsundog sa amahan, kinsa nalipay sa dihang mipauli ang iyang usikang anak. Busa, makigsulti kita sa napasig-uling igsoon ug dasigon siya karon sa pag-uswag sa kamatuoran.​—4/15, panid 25.

◻ Unsang praktikal nga mga panagana ang buhaton aron dili mahimong biktima sa krimen?

Kon mahimo, ayaw paglakaw sa delikadong lugar inigkagabii. Tagoa ang imong mga alahas, ug ibutang ang mga butang sama sa kamera diha sa shopping bag. Ayaw paglakaw duol sa daplin sa asiras, ilabina kon nagdala kag kartera o bag. (Tan-awa ang Proverbio 3:21-23.)​—5/1, panid 5-6.

◻ Nganong ang tagna sa Sofonias 2:3 nag-ingon: “Tingali ikaw pagatagoan sa adlaw sa kasuko ni Jehova”?

Ang kaluwasan sa kinabuhi nagadepende sa pagkamatinumanon ug pagkamalahutayon. (Mateo 24:13) Busa, kadto lamang nagasunod sa matarong nga mga sukdanan sa Diyos ug padayong nagasulti sa putli nga pinulongan ang pagatagoan sa adlaw sa kasuko ni Jehova. (Sofonias 2:1, 2)​—5/1, panid 14.

◻ Unsay nalangkit sa pagbutang pag-una sa Diyos diha sa panimalaynong kinabuhi?

Ang mga ginikanan ug mga anak kinahanglang mosimba kang Jehova ug kab-oton ang iyang mga sukdanan nga gilatid diha sa Bibliya.​—5/15, panid 5.

◻ Nganong wala dayon siloti ni Jehova ang mga makasasala?

Usa ka katarongan mao nga ang ngalan sa Diyos kinahanglang maila sa tibuok yuta. (Itandi ang Roma 9:17.) Lain mao ang paghatag panahon aron mahusay ang mga isyu sa pagkasoberano sa Diyos ug sa integridad sa tawo nga misangpot sa rebelyon sa Eden. Lain pa, ang hataas nga pailob sa Diyos naghatag sa mga nakasala ug higayon sa paghinulsol ug sa pagbag-o sa ilang mga dalan. (2 Pedro 3:9)​—5/15, panid 11-12.

◻ Unsang mga kamatuoran ang nagpamatuod nga ang Bibliya maoy gikan sa labaw-tawhanong gigikanan?

Ang Bibliya gisulat sa mga 40 ka lainlaing mga magsusulat, nga gikan sa tanang bahin sa kinabuhi ug nabuhi latas sa yugtong 1,600 ka tuig; apan kining tanang mga magsusulat nagsunod ug usa ka pangunang tema. Kining sulod nga panag-uyon sa Bibliya imposible unta kon itugyan sa sulagma o sa tawhanon lamang nga pagtultol.​—6/1, panid 5.

◻ Unsang katingalahang lihok ug tagsaong buhat, nga gitagna sa Isaias 28:21, ang himoon ni Jehova sa atong adlaw?

Ang pasidaan diha sa Pinadayag 17:16 nagpakita nga moabot ra ang panahon nga ang politikanhong hinigugma sa Babilonyang Bantogan mobali kaniya. Ingong sangpotanan, ang Kakristiyanohan bug-os malaglag uban ang tanang bakak nga mga relihiyon. Kini mao unyay katingalahang lihok ni Jehova ug iyang tagsaong buhat sa atong adlaw.​—6/1, panid 22-3.

◻ Unsa ang ibutang sa hunahuna sa Kristohanong babaye mahitungod sa paggamit sa mga alahas ug mek-ap?

Wala idili sa Bibliya ang paggamit sa maong mga tabang sa pagpatahom. (Exodo 32:2, 3; Ester 2:7, 12, 15) Apan ang pagkamakasaranganon angay mangibabaw. Masayon sa usa ka babaye ang pagsundog sa kalibotanong mga estilo, ang paggamit ug sobra sa kasarangan nga lipstik, kolorete sa aping, kolor sa tabontabon, sama kang Jezebel. (2 Hari 9:30) Kinahanglang mag-amping aron ang kosmetik dili mapasobrahan ug ang alahas nga gamiton dili maghinobra.​—6/1, panid 30-1.

◻ Sa unsang paagi ang mga Israelinhon nakalingkawas sa “tanang daotang sakit sa Ehipto” nga kaylap sa unang mga panahon? (Deuteronomio 7:15)

Tingali sila nakalingkawas sa maong mga balatian tungod sa pagsunod ug abanteng mga praktis sa kahindikan nga gisugo diha sa pakigtugon sa Kasugoan.​—6/15, panid 4.

◻ Nganong nagsugo ang Diyos nga kinahanglang dili kaonon sa tawo ang dugo? (Genesis 9:3, 4; Levitico 17:10, 11; Buhat 15:22-29)

Ang kinabuhi maoy usa ka gasa gikan sa Diyos ug ang kinabuhi sa tawo nagadepende sa nagahatag-kinabuhi nga likidong tisyu nga gitawag dugo. (Salmo 36:9) Pinaagi sa pagtahod sa dugo ingong linain, ginapakita sa mga tawo ang ilang pagsalig sa Diyos alang sa kinabuhi. Busa, ang pangunang rason sa sugo sa Diyos mahitungod sa dugo mao, dili tungod kay ang pagkaon ug dugo makadaot sa panglawas, kondili tungod kay ang dugo adunay linain nga kahulogan sa Diyos.​—6/15, panid 8-9.

◻ Sa unsang paagi mapalig-on sa Kristohanong mga ginikanan ug mga batan-on ang posibilidad nga tahuron ang dili-pagdawat sa minor de edad ug dugo?

Bisag dili pa hamtong sa legal nga paagi, ang usa ka Kristohanong batan-on angay makapatin-aw ug sa malig-ong paagi kon unsay iyang kusganong relihiyosong pagtutol sa pagdawat ug dugo. Ang mga ginikanan mahimong mohimog mga sesyon sa pagbansay-bansay uban sa ilang mga anak aron sila mahibalong mopatin-aw sa ilang kaugalingong pagtuo.​—6/15, panid 18.

◻ Sa unsang paagi ang mga babaye gipanalanginan ug dako sa panahon sa yutan-ong ministeryo ni Jesus?

Gisugdan ni Jesus ang usa ka buluhaton nga nakahatag paglipay, paglaom, ug usa ka bag-ong dignidad sa kababayen-an sa tanang rasa. Iyang gitudloan ang mga babaye ug lalom nga espirituwal nga mga kamatuoran. (Juan 4:7, 24-26) Sa panahon sa iyang ministeryo, iyang gidawat ang pagpang-alagad sa mga babaye samtang iyang gipanaw ang tibuok yuta. (Marcos 15:40, 41)​—7/1, panid ­14-15.

◻ Unsang mga paagi sa pagpanudlo ni Jesus ang nakita sa mga ginikanan nga epektibo diha sa ilang mga anak?

Maayong gamiton sa mga ginikanan ang mga ilustrasyon aron mahimong madanihon ang Kristohanong mga kamatuoran sa mga kasingkasing sa ilang gagmayng mga anak, ug maayong gamiton nila ang maayong pagkapalandong nga mga pangutana aron matino kon unsay panghunahuna sa ilang gulang-gulang nga mga anak. (Itandi ang Mateo 17:24-27.)​—7/1, panid 26.

◻ Nganong atong tinguhaon ang mahigugmaong-kalulot?

Ang kalidad sa mahigugmaong-kalulot mopasuod kanato sa Diyos ug sa uban. Kini mopalambo sa pagkamaabiabihon ug mopahimo kanatong ­labi pang mahunahunaon. Kini mopalig-on sa mga bugkos sulod sa ­panimalay ug sa Kristohanong kongregasyon. Labaw sa tanan, ang mahigugmaong-kalulot mohatag kahimayaan kang Jehova.​—7/15, panid 22.

◻ Nganong posible alang sa usa ka Kristohanon nga mahisalaag maylabot sa panag-uban? (1 Corinto 15:33)

Ang usa ka tawo tingali mahigalaon ug maayong tan-awon, apan kon dili managsama sa usa ka Kristohanon ang iyang mga kabalaka sa pag-alagad kang Jehova o kaha sa pagtuo sa Bibliya, siya maoy usa ka daotan nga kauban. Ngano? Tungod kay ang iyang kinabuhi gipasukad sa lahi nga mga prinsipyo, ug ang mga butang nga importante sa usa ka Kristohanon tingali walay bili kaniya.​—7/15, panid 23.

◻ Nganong ang Adlaw sa Paghukom maoy usa ka panahon sa paglaom?

Ang Adlaw sa Paghukom maoy usa ka yugto sa usa ka libo ka tuig. Kini pagadumalahon sa Diyos mismo uban sa iyang Anak, si Kristo Jesus, nga gitudlo sa Diyos sa paglihok ingong Maghuhukom. Kini maoy panahon unya nga ipasig-uli ngadto sa katawhan ang hingpit tawhanong kinabuhi nga giwala ni Adan alang sa iyang kaliwat. (1 Corinto 15:21, 22)​—8/1, panid 5-7.