Gipalig-on sa Diyos nga Dili Makabakak
SUMALA SA GIASOY NI MARY WILLIS
Ang mga epekto sa pag-unlod sa ekonomiya nakaabot sa hilit nga Kasadpang Australia pagka 1932. Nianang tuiga, sa dihang ako 19 anyos lamang, si Ellen Davies ug ako nakadawat ug asaynment sa pagsangyaw nga nagkobre ug mga 100,000 kilometro kuwadrado. Ang sinugdanan sa among panaw mao ang gamayng lungsod sa Wiluna, nga duolan sa 950 kilometros amihan-sidlakan sa among pinuy-anan sa Perth, ang kaulohan sa Kasadpang Australia.
SA AMONG pagpaingon didto, kauban nako ug ni Ellen sa bagon sa usa ka tren ang usa ka mahigalaong guwardiya sa riles. Samtang ang tren mihunong sa matag mubong tipasanan sa riles, ang guwardiya malulutong nagsulti kanamo kon unsa ka dugay ang among pagpondo. Kini naghatag kanamog kahigayonan nga manaog ug magsangyaw sa mga tawo nga nagpuyo niadtong nahilit nga mga balangay sa riles. Sa kataposan nahiabot kami sa usa ka lungsod nga minahan sa Wiluna panahon sa usa ka huros sa abog.
Hinunoa, ang tipasanan sa riles sa Wiluna maoy duolan sa tulo ka kilometros gikan sa lungsod. Walay usa kanamo ang dako ug lawas, ug kami may tulo ka bug-at nga mga karton sa literatura ug duha usab ka maleta. Unsay among buhaton? Among gibitay ang usa karton sa usa ka lipak, ug amo kanang giyayongan. Niining paagiha nadala namo ang mga karton, usa usa. Nagkinahanglag pito ka biyahe aron sa pagdala sa tulo ka karton ug sa among mga maleta sa tulo ka kilometros paingon sa lungsod. Kanunay kaming mohunong aron sa pagpahulay tungod kay nangapaslot pag-ayo ang among mga kamot.
Bisan pa sa abog, nangapaslot nga mga kamot, ug lapoy nga mga bitiis, nalipay kami sa makapadasig nga buluhaton ug sa paglakbay. Kami parehong mibati nga si Jehova uban kanamo, nga siya nagpalig-on kanamo aron makasagubang niining lisod nga sinugdanan sa pagsangyaw sa hilit nga mga dapit. Sa wala madugay nakita namo ang iyang panalangin sa among buluhaton, usab, tungod kay ang among mga paningkamot niadtong maong panaw misangpot sa pagdawat sa batan-ong si Bob Horn sa kamatuoran sa Bibliya. Kami nalipay nga si Bob nakagugol ug pipila ka tuig sa pag-alagad sa Bethel ug nga siya nagpadayon sa pag-alagad kang Jehova nga matinumanon sulod sa 50 ka tuig hangtod sa iyang kamatayon sa 1982.
Gikan sa Wiluna kami nagsangyaw sa mga balangay sulod sa among panaw nga kapin sa 725 kilometros paingon sa Geraldton sa baybayon. Gikan didto mibiyahe kami pabalik sa Perth. Dihay pipila ka gabii nga kami natulog sa walay-sulod nga mga lawak-hulatanan sa riles ug kas-a bisan sa usa ka tapok sa uhot sa daplin sa riles.
Nagdala kami ug usa ka ponda nga nasudlan ug hinimo-sa-balay nga mga biskwit nga ginama sa harina gikan sa trigo. Kini mao ang among pangunang pagkaon sulod sa unang katunga sa among panaw. Usahay makakaon kami pinaagi sa pagpanghugas ug mga plato ug pagpanglampaso sa mga salog sa mga balay-sak-anan ug mga kan-anan. Sa ubang mga panahon motrabaho kami sa mainit nga adlaw nga mamupo ug gisantes o mga batong. Ang mga amot gikan sa mga interesado nga modawat ug literatura sa Bibliya nakatabang sa among mga galastohan.
Ang nakapalig-on kanako nga maghupot sa pagtuo kang Jehova ug malipayong nagsagubang sa daghang malisod nga mga kahimtang niadtong mga adlawa mao ang panig-ingnan ug sayong pagbansay nga nadawat gikan sa akong inahan.
Usa ka Kristohanong Kabilin
Ang akong inahan may lig-ong pagtuo sa Maglalalang, ug kutob sa akong mahinumdoman sultihan niya kaming mga bata mahitungod kaniya. Hinuon, nasulayan pag-ayo ang iyang pagtuo tungod sa kamatayon sa among siyete-anyos nga igsoong lalaki diha sa usa ka makapasubong aksidente sa tunghaan. Apan inay nga mayugot sa Diyos, si Mama misugod ug tiunayng pagtuon sa Bibliya. Buot siyang mokat-on, kon mahimo, sa hinungdan sa maong mga trahedya. Ang iyang pagpangita sa kamatuoran sa Bibliya gigantihan, ug iyang gipasimbolohan ang iyang pahinungod ngadto sa matuod nga Diyos, si Jehova, pinaagi sa bawtismo sa tubig sa sayong katuigan sa 1920.
Gikan niadto, ang iyang mga panaghisgot kanamo kanunayng nagpasiugda kon unsa ka tino nga matuman ang mga saad sa Diyos. Iya kaming aghaton sa pagbutang kanunay sa hunahuna nga bisan unsay mahitabo, ‘ang Diyos dili makabakak.’ (Tito 1:2) Ingong sangpotanan, ang akong igsoong babaye ug ako ug duha namo ka magulang nga lalaki, duyog sa among mga pamilya ug mga apo, sa pagkakaron maoy mga magdadayeg kang Jehova nga Diyos. Duha sa akong mga pag-umangkong lalaki, si Alan ug Paul Mason, nag-alagad ingong nagapanawng mga magtatan-aw.
Unang Tinguha sa Pag-ebanghelyo
Ako dili maayong estudyante ug miundang pagtungha niadtong 1926, sa dihang ako 13 anyos. Bisan pa niana, naugmad nako ang lig-ong tinguha nga ipakig-ambit ang akong nakat-onan mahitungod sa Bibliya sa uban. Si Papa naghunahuna nga wala ako maedukar pag-ayo aron makatabang kang bisan kinsa, apan si Mama miingon: “Bisan ug sultihan lang niya ang mga tawo bahin sa nagakaduol nga Armageddon ug nga ang mga maaghop makapanunod sa yuta, kana magmantala na sa Gingharian sa Diyos.” Busa misugod ako pagpakig-ambit sa pultahan-sa-pultahan nga pagsangyawng buluhaton sa sayong bahin sa akong pagkatin-edyer, bisan tuod wala ako mabawtismohi hangtod sa 1930. Wala madugay human niadto, misugod ako sa bug-os-panahong pag-ebanghelyong buluhaton sa dapit nga palibot sa Perth.
Sa misunod nga tuig, 1931, gisugdan namo paggamit ang among bag-ong ngalan nga mga Saksi ni Jehova. Apan, daghang tagbalay ang misupak sa among paggamit niining balaang ngalan sa Diyos ug misanong nga maharason. Bisan pa niana mipadayon ako sa ministeryo bisan pa sa dili-maayong mga panagharong. Ako masaligon nga ang Diyos dili magbakak sa dihang siya misaad nga ang iyang mga alagad ‘makasalig sa kusog nga iyang itagana.’—1 Pedro 4:11; Filipos 4:13.
Pag-ila sa “Dakong Panon”
Sa 1935, nakadawat akog asaynment ngadto sa laing bahin sa dakong kontinente sa Australia. Busa, sulod sa katuigan human niadto nag-alagad ako ingong payunir nga ministro palibot sa New England nga distrito sa estado sa New South Wales, mga 4,000 kilometros gikan sa akong kanhing pinuy-anan sa Perth.
Hangtod niadtong panahona miambit ako sa mga emblema nga walay-lebadurang tinapay ug mapula nga bino panahon sa tinuig nga Memoryal sa kamatayon ni Jesus. Bisan tuod kini giisip nga hustong butang nga buhaton, ilabina alang sa madasigong bug-os-panahong mga ministro, wala gayod ako makombinsir nga ako may langitnong paglaom. Unya, sa 1935, gitin-aw kanamo nga gitigom ang dakong panon nga may paglaom nga mabuhi sa walay kataposan sa yuta. Daghan kanamo ang nalipay nga nakasabot nga kami bahin sa dakong panon, ug kami mihunong sa pag-ambit sa mga emblema. (Juan 10:16; Pinadayag 7:9) Ang kamatuoran sa Bibliya nagakasanag, sumala sa gisaad ni Jehova.—Proverbio 4:18.
Bag-ong mga Paagi sa Pagsangyaw
Sa tungatunga sa katuigang 1930, misugod kami sa paggamit ug ponograpo diha sa among pagsangyaw. Busa, ang among lig-ong mga bisikleta kinahanglang taoran sa atubang ug sa likod ug mga kargahanan dili lamang alang sa bug-at nga mga ponograpo kondili alang usab sa mga plaka ug sa among mga bag sa literatura. Kinahanglang mag-amping ako pag-ayo dihang puno kaayo ang akong bisikleta tungod kay kon kana matumba, bug-at kaayo alang kanako ang pagpatindog pag-usab niana!
Nianang panahona gisugdan usab namo ang gitawag nga mga martsa sa impormasyon. Samtang kami magalakaw subay sa dagkong mga karsada sa lungsod, magsul-ob kamig mga plakard, o mga karatula nga gihigot sa among mga lawas, nga nagpasundayag ug makapadani sa panan-aw nga mga eslogan. Giisip nako kining buluhatona ingong linaing pagsulay sa akong pagtuo, ilabina sa dihang gidakop ako ug gibilanggo sa tibuok gabii sa usa ka gamayng selda sa lungsod sa Lismore. Makauulaw kaayo nga taralon sa korte sa misunod nga adlaw nga wala gani tugti sa pagsudlay sa akong buhok! Apan sa makausa pa si Jehova nagpaluyo kanako sumala sa iyang gisaad. Giurong ang kaso tungod kay ang sumbong lamang sa polis nga nagdakop mao nga ang akong plakard supak sa iyang relihiyon.
Balik sa Kasadpan
Sa sayong katuigan sa 1940, ang akong payunir nga pagsangyaw nagdala kanako pagbalik sa banikang kalungsoran sa Kasadpang Australia. Didto mipadayon ako sa pagpahimulos ug halandumong mga kasinatian ug espirituwal nga mga panalangin. Samtang didto sa akong asaynment sa Northam, nakahibalag ako ug puliki nga asawa, si Flo Timmins, mga 11 kilometros gawas sa lungsod. Gidawat niya ang librong Reconciliation, ug sa wala madugay nahimo siyang dedikadong Saksi ni Jehova nga Diyos. Siya aktibo pa gihapon sa pag-alagad sa Gingharian, ug ang iyang anak babaye, nga niadtong panahona upat ka tuig ang pangedaron, nahimong espesyal payunir nga ministro pagdako.
Apan dihay ubang dili-malimtang mga kasinatian. Kas-a, ang akong kauban ug ako mitabok sa usa ka taytayan sa Northam sakay sa among karwahe, sa dihang ang kabayo mikalit pagdagan ug kusog kaayo, nga naghatag kanamo ug makahahadlok nga biyahe latas sa naglilo nga katubigan sa Subang Avon sa ubos. Human sa kapin sa usa ka kilometro, ang kabayo mihinay pagdagan.
Kaminyoon ug Usa ka Pamilya
Niadtong 1950, naminyo ako kang Arthur Willis, nga usa usab ka payunir sulod sa daghang katuigan. Mipuyo kami sa banikang lungsod sa Pingelly sa Kasadpang Australia, diin kami gipanalanginan ug usa ka anak lalaki, si Bentley, ug usa ka anak babaye, si Eunice. Sa dihang ang mga bata hapit nang mahuman pagtungha, si Arthur mihukom sa pagpalista na usab ingong payunir. Ang maayong panig-ingnan sa ilang amahan nagdasig sa among duha ka anak sa pagsugod pagregular payunir sa dihang sila nakuwalipikado na.
Sagad dalhon ni Arthur ang kabataan ngadto sa halayong banikang mga dapit aron mosangyaw. Usahay, mobiya siya sa balay uban kanila sulod sa usa ka semana o labaw pa sa usa ka panahon, nga matulog sa tolda matag gabii. Sa mga panahong wala sila, ako nagpabilin sa balay aron sa pag-atiman sa negosyo sa pamilya nga mga muwebles, nga naghimong posible nga silang tulo nakapayunir.
Pagministeryo Taliwala sa mga Aborigine
Usa ka buntag human ang pamilya mibalik gikan sa usa sa ilang mga biyahe sa banika, diha kamiy wala damhang bisita. Ang bisita usa ka Aborigine, nga nangutana: “Unsay akong buhaton aron makabalik?” Sa sinugdan naglibog kami. Unya si Arthur nakahimawong kaniya ingong usa ka tawo nga sulod sa daghang katuigan kanhi napalagpot gikan sa Kristohanong kongregasyon tungod sa pagkahubog. Sukad niadto naugmad niya ang dili-maayong nga dungog tungod sa grabeng pag-inom ug sa mga utang.
Si Arthur mipatin-aw kon unsay kinahanglan niyang buhaton aron makabalik ngadto sa mahinlong organisasyon ni Jehova. Mibiya siya sa hilom nga wala kaayoy gisulti, ug kaming tanan nahibulong kon unsay iyang buhaton. Natingala kaayo kaming tanan sa nahitabo sulod sa misunod nga pipila ka bulan. Ang mga kausaban nga gihimo sa tawo halos dili katuohan! Wala lang siya maulii sa iyang suliran sa pag-inom kondili giduaw niya ang mga tawo sa distrito, nga nagpahinumdom kanila sa iyang mga utang, ug unya gibayran ang iyang nautang! Karon siya usa na usab ka igsoon sa pagtuo, ug siya dugaydugayng nag-alagad ingong payunir nga ministro.
Dihay daghang mga Aborigine sa Pingelly, ug kami nakapahimulos ug makapatagbaw kaayong ministeryo, nga nagtabang niining mapainubsanong mga tawo sa pagkat-on ug pagdawat sa kamatuoran sa Pulong sa Diyos. Pagkamakapalig-on sa pagtuo nga ako may bahin sa pagtabang sa daghan sa mga Aborigine sa Australia sa pagkat-on sa kamatuoran!
Usa ka kongregasyon ang nasugdan sa Pingelly, ug sa sinugdan, kadaghanan sa mga membro niini maoy mga Aborigine. Kinahanglang tudloan namo ang daghan kanila sa pagbasa ug pagsulat. Dihay labihang pagpihig batok kanila niadtong sayong katuigan, apan ang mga tawo sa lungsod sa hinayhinay nakadangat sa pagtahod sa mga Saksing Aborigine tungod sa ilang mahinlo nga pagkinabuhi ug sa ilang pagkakasaligang mga molupyo.
Ang Dili-Mapakyas nga Tabang ni Jehova
Ang akong minahal nga bana, si Arthur, kinsa nag-alagad sa Diyos nga matinumanon sulod sa 57 ka tuig, namatay sayo sa 1986. Siya tinamod kaayo sa tanang negosyante sa Pingelly ug sa mga tawo sa distrito. Sa makausa pa, si Jehova naglig-on kanako, nga naghatag kanako ug kusog sa pag-antos niining kalit nga pagkawala sa minahal.
Ang akong anak lalaki, si Bentley, nag-alagad ingong ansiano sa amihanang bahin sa Kasadpang Australia, diin siya ug ang iyang asawa, si Lorna, nagmatuto sa ilang pamilya diha sa kamatuoran. Ang laing tuboran sa dakong kalipay alang kanako mao nga ang akong anak babaye, si Eunice, nga nagpadayon sa bug-os-panahong pag-alagad hangtod karon. Siya ug ang iyang bana, si Jeff, nag-alagad ingong mga payunir. Nagpuyo ako uban kanila karon ug ako gipanalanginan nga makahimo sa padayong pag-oksilyare payunir.
Sulod sa kapin sa 60 ka tuig, nakasinati ako sa katumanan sa mahigugmaong saad ni Jehova sa paglig-on sa iyang mga alagad ug pagtabang kanila nga makasagubang sa bisan unsang mga sirkumstansiya nga ila tingaling atubangon. Siya magtagana sa atong tanang panginahanglan kon kita dili magduhaduha kaniya o dili mapakyas sa pagpasalamat kaniya. Ang akong pagtuo napalig-on ug nabati nako ang kamot sa Diyos nga nagalihok, ug nakita nako kon sa unsang paagi siya magapanalangin saylo sa atong masabtan. (Malakias 3:10) Sa pagkatinuod, ang Diyos dili makabakak!
[Hulagway sa panid 27]
Si Mary sa 1933
[Hulagway sa Panid 29]
Si Mary ug Arthur sa ulahing katuigan