Nahinumdom Ka Ba?

Nakaplagan mo bang ang dili pa dugayng mga isyu sa Ang Bantayanang Torre may mapuslanong bili alang kanimo? Nan nganong dili sulayan ang imong panumdoman sa mosunod nga mga pangutana:

◻ Unsang leksiyon ang atong makat-onan gikan sa kalaglagan sa mga Ammonihanon? (Sofonias 2:9, 10) Wala ibale-wala ni Jehova ang pagbalos sa iyang kalulot pinaagig pagkamabatokon, ug sa iyang tinakdang panahon, siya molihok pag-usab, sama sa iyang gibuhat sa karaang mga panahon. (Itandi ang Salmo 2:6-12.)​—12/15, panid 10.

◻ Diha sa unsang mga paagi nga nabatonan sa mga Kristohanon ang pakigdait?

Una, sila adunay “pakigdait uban sa Diyos pinaagi sa [ilang] Ginoong Jesu-Kristo.” (Roma 5:1) Ikaduha, sila adunay pakigdait taliwala sa ilang kaugalingon pinaagi sa pag-ugmad sa “kaalam gikan sa itaas,” nga maoy “una sa tanan putli, unya makigdaiton.” (Santiago 3:17)​—1/1, panid 11.

◻ Unsa ang pipila ka butang nga gipakasama sa Pulong sa Diyos, ug sa unsang paagi kini makatabang kanato? Ang Pulong sa Diyos gipakasama sa masustansiyang gatas, gahing pagkaon, makarepresko ug makahinlong tubig, usa ka salamin, ug usa ka mahait nga espada. Ang pagsabot sa kahulogan niining mga terminoha motabang sa usa ka ministro sa paggamit nga mahanason sa Bibliya.​—1/1, panid 29.

◻ Ang usa ka timbang nga edukasyon motabang kanato sa pagbuhat sa unsa?

Sa pagbasag maayo, sa pagsulat ug maayo, sa pag-ugmad ug maayong panghunahuna ug pamatasan, ug sa pagpakabaton sa mapuslanong pagbansay nga gikinahanglan sa inadlaw-adlawng pagkinabuhi ug epektibong sagradong pag-alagad.​—2/1, panid 10.

◻ Unsang mapuslanong leksiyon bahin sa edukasyon ang atong makat-onan bahin kang Jesus?

Ang edukasyon angayng gamiton, dili sa paghimaya sa atong kaugalingon, kondili sa pagdayeg sa labing dakong Edukador, si Jehova nga Diyos. (Juan 7:18)​—2/1, panid 10.

◻ Unsa ang Gingharian sa Diyos?

Ang Gingharian maoy langitnong kagamhanan nga hinimo sa Diyos sa pagtuman sa kabubut-on Diyos sa pagwagtang sa mga epekto sa sala ug kamatayon ug sa pagpasig-uli sa matarong nga mga kahimtang sa yuta. (Daniel 2:44; Pinadayag 11:15; 12:10)​—2/1, panid 16.

◻ Sa unsang paagi gitagana sa Bibliya ang gikinahanglang edukasyon sa pagtapos nga permanente sa kapintasan?

Pinaagi sa iyang Pulong, ang Bibliya, si Jehova nagatudlo sa mga tawo nga mahimong mahigugmaon sa kalinaw ug matarong. (Isaias 48:17, 18) Ang Pulong sa Diyos may gahom sa pag-abot ug sa pagtandog sa kasingkasing sa usa ka tawo, nga mag-usab sa iyang hunahuna ug pamatasan. (Hebreohanon 4:12)​—2/15, panid 6.

◻ Sa unsang paagi ang tagna sa Isaias kapitulo 35 ikaingon nga adunay tulo ka katumanan?

Ang tagna ni Isaias may unang katumanan sa dihang ang mga Hudiyo mibalik gikan sa pagkaulipon sa Babilonya niadtong 537 W.K.P. Kini adunay nagpadayong espirituwal nga katumanan karong adlawa sukad sa paggawas sa espirituwal nga Israel gikan sa pagkaulipon sa Bantogang Babilonya. Ug kini adunay ikatulong katumanan maylabot sa pasalig sa Bibliya sa literal nga paraisong mga kahimtang sa yuta. (Salmo 37:10, 11; Pinadayag 21:4, 5)​—2/15, panid 17.

◻ Sa unsang paagi gipasundayag ang personal nga interes sa Diyos sa katawhan diha sa milagro nga gibuhat sa iyang Anak, si Jesus?

Sanglit si Jesus “dili makahimo ug usa ka butang sa iyang kaugalingong pagbuot, apan kon unsa lamang ang iyang nakita nga ginahimo sa Amahan,” ang iyang kahangawa nagpakita sa kabalaka ni Jehova alang sa matag usa sa iyang mga alagad. (Juan 5:19)​—3/1, panid 5.

◻ Unsay ginapasabot sa pulong ni Jesus nga “handumanang mga lubnganan” nga gigamit sa Juan 5:28, 29?

Ang Gregong pulong nga mne·mei’on (handumanang lubnganan) nga gigamit dinhi nagpasabot nga si Jehova nahinumdom sa rekord sa tawo nga namatay, lakip ang iyang kinaiyanhong mga batasan ug bug-os nga panumdoman. Kini naghatag ug malig-ong pamatuod nga ang Diyos nagatagad bahin sa katawhan sa tinagsatagsa!​—3/1, panid 6.

◻ Unsang mensaheng pasidaan diha sa tagna ni Sofonias ang adunay mapuslanong tabang kanato?

Karon maoy dili panahon nga tugotan ang mga pagduhaduha nga mogamot sa atong mga kasingkasing ug sa pagpalangan sa atong mga hunahuna sa umaabot nga adlaw ni Jehova. Lain pa, kita angayng magbantay batok sa makapaluyang mga epekto sa di-pagpakabana. (Sofonias 1:12, 13; 3:8)​—3/1, panid 17.

◻ Nganong ang pagkamaunongon sa Diyos nagtaganag usa ka hagit? Tungod kay ang pagkamaunongon kasumpaki sa hakog nga mga hilig nga atong napanunod gikan sa atong mga ginikanan. (Genesis 8:21; Roma 7:19) Labing hinungdanon, si Satanas ug ang iyang mga demonyo determinado sa paghimo kanatong di-maunongon ngadto sa Diyos. (Efeso 6:12; 1 Pedro 5:8)​—3/15, panid 10.

◻Diha sa unsang upat ka natad nga kinahanglang atubangon nato ang hagit sa pagkamaunongon, ug unsay motabang kanato sa pagbuhat niana?

Ang upat ka natad mao ang pagkamaunongon kang Jehova, sa iyang organisasyon, sa kongregasyon, ug sa atong mga kapikas sa kaminyoon. Usa ka tabang sa pag-atubang niining mga hagita mao ang pagpabili nga ang hagit sa pagkamaunongon nalambigit sa pagbindikar sa pagkasoberano ni Jehova.​—3/15, panid 20.

◻Unsang leksiyon ang atong makat-onan gikan sa kasinatian ni David sa pagpaningkamot sa pagdala sa arka sa tugon sa Jerusalem? (2 Samuel 6:2-7)

Wala sunda ni David ang mga instruksiyon nga gihatag ni Jehova labot sa pagdala sa Arka, ug kini nagdalag kalamidad. Ang leksiyon mao nga dili gayod nato angayng basolon si Jehova sa mga problema nga resulta sa dili nato pagsunod sa iyang tin-awng mga instruksiyon. (Proverbio 19:3)​—4/1, mga panid 28, 29.