Mga Tigom sa Pag-alagad Alang sa Mayo
Semana sa Mayo 3
8 min: Lokal nga mga pahibalo. Piniling Mga Pahibalo gikan sa Atong Ministeryo sa Gingharian. Teokratikanhong mga Balita.
17 min: “Tudloi ang Uban sa Pagkuhag Kaayohan sa Ilang Kaugalingon.” Limitahe ang pasiunang mga komento nga dili moabot ug usa ka minuto, ug sundan sa pangutanag tubag nga panaghisgot. Ginamit ang kapitulo 13 sa librong Kahibalo, iilustrar kon sa unsang paagi ang mga tawo makabenepisyo sa praktikal nga paagi pinaagi sa pagtuon, pagsabot, ug pagpadapat sa mga prinsipyo sa Bibliya.
20 min: “Mga Paagi sa Pagpalapad sa Imong Ministeryo.” Duha ka ansiyano maghisgot sa artikulo sa pagtubag sa mga pangutana nga gisukna sa lainlaing mga mamiminaw. Mangutana maylabot sa mga paagi nga tingali ilang mapalapad ang ilang ministeryo ang usa ka tin-edyer nga magmamantala, usa ka magtiayon, ug usa ka igsoong lalaki nga anaa na sa pangedaron sa pagretiro sa sekular nga trabaho. Praktikal nga mga sugyot ang itanyag gikan sa artikulo ug sa kapitulo 9 sa Atong Ministeryo nga libro, nga nagsentro sa “Unsa man ang Imong Espirituwal nga mga Tumong sa Umaabot?,” mga panid 116-18. Ang mga magmamantala magpahayag ug apresasyon tungod sa makatabang nga impormasyon nga gitagana sa Sosyedad nga nagpakita kon unsaon sa pagplano alang sa gipalapad nga kalihokan sa pag-alagad sa labing daling umaabot.
Awit 11 ug paniklop nga pag-ampo.
Semana sa Mayo 10
10 min: Lokal nga mga pahibalo. Taho sa kuwenta.
20 min: Pangagpasa ang Tumong sa Bug-os-Panahong Pag-alagad. Panaghisgot tali sa usa ka ansiyano ug usa o duha ka batan-on, nga gipasukad sa Disyembre 15, 1988, Bantayanang Torre, mga panid 25-7. Ang mga batan-on misulay sa paghukom kon unsang mga tumong ang ilang tinguhaon sa pagkatapos sa ilang sekular nga edukasyon. Sila nagpakitag interes sa materyal nga mga kaayohan nga gitanyag sa kalibotanong mga karera. Ang ansiyano magpunting sa maayong mga rason kon nganong mas maayo kaayo ang pagpangab-ot sa payunir nga pag-alagad. Ang mga batan-on mouyon apan nagaduhaduha nga sila makapayunir ug makatagana sa ilang kaugalingon sa materyal nga paagi. Ibutyag sa ansiyano kon sa unsang paagi ang mga ginikanan nabalaka usab maylabot sa paagi nga sila makasuportar sa ilang kaugalingon ug sa walay duhaduha makahatag ug mapuslanong tambag bahin niini, ginamit ang mga puntos gikan sa parapo 13 sa panid 21 sa Agosto 15, 1997, Bantayanang Torre. Dayon iyang ipakig-ambit ang mga kasinatian gikan sa Disyembre 15, 1988 nga artikulo sa Bantayanang Torre, nga nagpakita nga ang payunir nga pag-alagad maoy makataronganon, makab-ot nga tumong nga magdalag kangaya ngadto sa daghan. Ang panaghisgot matapos uban sa mga batan-on nga mopahayag ug apresasyon sa mga komento sa ansiyano ug sa ilang determinasyon sa paghatag ug seryosong paghunahuna sa pagpangagpas sa tumong sa pagbaton ug bug-os nga pakig-ambit sa pag-alagad sa Gingharian.
15 min: Pakigpulong bahin sa “Sa Unsang Paagi Imong Ikapasundayag ang Tinuod nga Pagkamapaubsanon?” Gipasukad kini sa artikulo diha sa Pebrero 1, 1999, Bantayanang Torre, mga panid 6 ug 7.
Awit 19 ug paniklop nga pag-ampo.
Semana sa Mayo 17
10 min: Lokal nga mga pahibalo.
15 min: “Pagplano nga Abante!” Pangutanag tubag nga panaghisgot sa artikulo. Repasoha ang tanang teokratikanhong kalihokan nga giplano sa lokal alang sa mosunod nga pipila ka bulan. Dasiga ang tanan nga markahan ang mga petsa diha sa ilang kalendaryo ug dili tugotan nga ang ubang mga butang mobalda.
20 min: Pagbansay sa mga Anak Diha sa mga Tigom ug sa Pag-alagad sa Kanataran. Pakigpulong sa usa ka ansiyano. Gikan sa sayong edad, ang atong mga anak kinahanglang magtambongan sa mga tigom ug magpakig-ambit sa pagsangyaw uban kanato. Ang pagbansay ug kasinatian nga ilang mahuptan motaganag lig-ong pasukaranan sa ilang pagtuo ug kasibot sa ulahing katuigan. Diha sa mga tigom, ang mga bata kinahanglang molingkod uban sa ilang mga ginikanan ug kinahanglang dili tugotan sa pagtugaw sa uban. Kinahanglang likayan usab nila ang pagdagandagan sa sulod o sa gawas sa Kingdom Hall sa dili pa ug human sa mga tigom. (Tan-awa ang om-CV, mga panid 63 ug 64.) Sa dihang mokuyog sa pagsangyaw, hinungdanon nga isipon sa mga bata ang ministeryo nga seryoso ug mogawi sa ilang kaugalingon sa hustong paagi. Kinahanglan nilang likayan ang gawing pinilyo; ang pagsangyaw dili panahon sa pagdula. Labing maayo kanila nga iuban sa mga hamtong. Sila angayng tabangan nga makig-ambit sa paghatag ug mga presentasyon sumala sa ilang mga katakos. (Tan-awa ang Agosto 1, 1988, Bantayanang Torre, panid 15, parapo 20.) Ang mga ginikanan mao ang responsable sa pag-atiman; dili nila gayod ipadala ang mga bata ngadto sa mga tigom sa dayon na nga pagsangyaw nga wala ing usa ka hamtong nga magdumala kanila. Dayega ang kabataan sa dihang sila magbinuotan.
Awit 29 ug paniklop nga pag-ampo.
Semana sa Mayo 24
15 min: Lokal nga mga pahibalo. Repasoha ang sulat sa Sosyedad sa Abril 15, 1999, nga naghisgot sa pormang Please Follow Up (S-43). Isaysay kon sa unsang paagi kini makatabang sa pagpaloap sa interes nga makaplagan sa dihang maghimo sa impormal nga pagsangyaw o sa dihang ang pagduaw gihimo sa mga tawo nga nagsultig laing pinulongan. Dasiga ang mga magmamantala nga gamitog maayo kining mga pormaha.
12 min: Pakigpulong sa usa ka ansiyano bahin sa mga puntos sa “Pangutana” sa panid 3.
18 min: Kita ba Nagapakig-ambit sa Pagbulagbulag nga Buluhaton? Makapadasig nga pakigpulong sa magtatan-aw sa pag-alagad, nga gipasukad sa Hulyo 1, 1997, Bantayanang Torre, mga panid 30-1.
Awit 32 ug paniklop nga pag-ampo.
Semana sa Mayo 31
15 min: Lokal nga mga pahibalo. Pahinumdomi ang tanan sa pagtunol sa mga taho sa pag-alagad sa kanataran alang sa Mayo. Repasoha ang tanyag nga literatura alang sa Hunyo. Sa dihang magtanyag ug librong Kahibalo, mahimong ilakip ang usa ka kopya sa daandaang 192-panid nga libro nga ubay-ubay ang suplay diha sa kongregasyon. Ipasundayag ang sumbanang presentasyon.
15 min: Lokal nga mga panginahanglan.
15 min: Unsay Daotan sa Akong Relihiyon? Panaghisgot tali sa duha ka ministeryal nga mga alagad. Atong ikahinabi ang daghang tawo nga mauyonon bahin sa kamatuoran ug modayeg sa mga Saksi ni Jehova. Ugaling, ang mga kalangkitan nga padayon nilang gihuptan sa ilang iglesya nagbabag kanila. Nalisdan sila sa pagtuo nga kita lamang ang naghupot sa tinuod nga relihiyon ug nga ang ilang porma sa pagsimba maoy bakak. Nahimo kining pangunang babag sa ilang espirituwal nga pag-uswag. Repasohon sa mga igsoong lalaki ang unom ka puntos nga gihisgotan sa panid 378 sa librong Nangatarongan, nga tin-awng nagpakita nga ang ubang mga relihiyon wala magsunod sa Bibliya. Dasiga ang mamiminaw sa paggamit niini nga mga puntos sa pagtabang nga mataktikanhon sa sinserong mga tawo nga timbangtimbangon ang ilang relihiyosong mga pagtulon-an.
Awit 50 ug paniklop nga pag-ampo.