Pangayog Tabang
1 Ang dinasig nga mga pulong nga “lisod sagubangon” haom nga naghubit sa atong makuyaw nga mga panahon. (2 Tim. 3:1) Busa, unsay imong mahimo sa dihang makasugamak ka ug malisod espirituwal nga mga suliran nga mahimong bation mong di-andam sa pag-atubang?
2 Ikaw ba andam sa pagpakigsulti sa usa ka hamtong sa espirituwal nga membro sa kongregasyon? Ang pipila tingali magpanuko sa pagbuhat sa ingon tungod sa pagkaulaw, dili buot mopahimulos, o magduhaduha nga adunay si bisan kinsa nga makatabang gayod. Tinuod, kita angayng manlimbasog sa pag-atiman sa atong personal nga mga responsabilidad sa labing maayong atong mahimo, apan kita angay kanunayng mobating gawasnon sa pagpangayog tabang sa mga butang nga naglangkit sa atong espirituwal nga kaayohan.—Gal. 6:2, 5.
3 Kon Asa Magsugod: Ikaw hayan buot moduol sa imong tagdumala sa pagtuon sa libro ug mangutana kon ikaw makaduyog ba kaniya sa pag-alagad sa kanataran. Mohatag kini kanimog kahigayonan sa pagsulti kaniya bahin sa imong tinguha nga motubo sa espirituwal. Kon siya ministeryal nga alagad, pahibaloa siya sa imong panginahanglan alang sa espirituwal nga tabang ug siya mohangyo sa mga ansiyano sa pag-abag kanimo. O mahimo nimong duolon ang bisan kinsa sa mga ansiyano bahin sa mga butang nga nakapabalaka kanimo.
4 Unsang matang sa tabang ang imong gikinahanglan? Aduna bay nagpaluya sa imong kasibot? Ikaw ba nag-inusarang ginikanan nga naningkamot nga magpabiling suod ang imong mga anak sa kongregasyon? Ikaw ba tigulang nga nagkinahanglag tabang? O aduna bay pipila ka problema nga nagpaluya kanimo? Ang pagsagubang sa atong makuyaw nga mga panahon tingali malisod—apan dili imposible. Ang tabang mabatonan man.
5 Kon sa Unsang Paagi ang mga Ansiyano Makatabang: Ang mga ansiyano tiunay nga nagatagad. Sila maminaw sa imong mga kabalaka. Kon ang ubang mga magmamantala makasugamak ug susamang mga babag, ang mga ansiyano mokonsiderar niini sa dihang sila magbantay ug magtudlo sa kongregasyon. Ingong mga “panig-ingnan nganha sa panon,” sila magpabiling andam sa pagbuhat duyog kanimo uban ang kangaya. (1 Ped. 5:3) Ang pagpaminaw niining may-kasinatiang mga igsoong lalaki samtang sila mangatarongan bahin sa mga prinsipyo sa Bibliya magpauswag sa imong ministeryo ug makatabang kanimo sa imong personal nga kinabuhi.—2 Tim. 3:16, 17.
6 Si Jesus mihatag kanato ug daghang “gasa nga gilangkoban ug mga tawo.” (Efe. 4:8, ptn.) Kini nagkahulogan nga ang mga ansiyano andam sa pag-alagad kanimo. Sila mabatonan sa pagtabang kanimo. Sila, sa ato pa, “inyo.” Busa inay kay magpanuko, ipahayag ang imong gibati. (1 Cor. 3:21-23) Pangayog tabang nga imong gikinahanglan.