Pasidunggan Natong Tanan si Jehova ug ang Iyang Anak
Kon sa Unsang Paagi ang Tanang Motambong sa Memoryal sa Abril 8 Makabaton ug Mas Bug-os nga Kaayohan
1 Kinsa karon ang gihatagag linaing pasidungog? Kadtong kansang mga kahimoan gitamod pag-ayo sa kalibotan. Bisan pa niana, sa kadaghanang kaso, ang ilang mga buhat sa wala madugay nahikalimtan. Apan komosta ang mga buhat nga naghatag gayod ug kaayohan sa tanang tawo? Hatagan natog suod kaayong pagtagad ang kinadak-an niining mga buhata samtang atong saulogon ang Panihapon sa Ginoo human sa pagsalop sa adlaw sa Abril 8, 2001.
2 Kinsa ang takos sa kinatas-ang pasidungog? Ang Bibliya nagtubag: “Takos ikaw, Jehova, . . . nga modawat sa himaya ug sa dungog ug sa gahom, tungod kay imong gilalang ang tanang butang.” (Pin. 4:11) Ingong Maglalalang, si Jehova mao ang Soberanong Magmamando sa uniberso. Ang iyang pagkatakos nga pasidunggan dili gayod matapos!—1 Tim. 1:17.
3 Si Jesu-Kristo, ang Anak sa Diyos, naghimog takos nga mga buhat nga magpahinabog walay kataposang mga panalangin sa katawhan. Hingpit niyang gisundog ang iyang Amahan. (Juan 5:19) Ang iyang walay ikasaway nga pagkamasinugtanon ug matinumanong pag-alagad naghimo kaniyang “takos sa pagdawat sa gahom ug mga bahandi ug kaalam ug kusog ug dungog ug himaya ug pagdayeg.” (Pin. 5:12) Ang iyang Amahan nagpasidungog kaniya pinaagi sa pag-entrono kaniya ingong Hari. (Sal. 2:6-8) Alang kanato, kita adunay kahigayonan sa pagpasidungog sa Amahan ug sa Anak samtang atong saulogon ang Panihapon sa Ginoo sa Abril 8, 2001.
4 Ikasubo, sa kasaysayan sa tawo diyutay lang ang naghatag ug nahiangayng pasidungog kang Jehova ug sa iyang Anak. Usahay, bisan ang karaang katawhan sa Diyos, ang mga Israelinhon, naghatag ug basta na lamang nga pag-alagad kang Jehova. Kini maoy dayag nga pagkadili-matinahuron. (Mal. 1:6) Ang angayng pagtahod nagkinahanglag matinumanong pagsugot pinasukad sa gugma ug sa pagpabili sa tanang nahimo ni Jehova ug sa iyang Anak alang kanato. Ang paghatag sa maong pasidungog ug pagtahod nagkahulogan nga kita magpakita ug diyosnong kahadlok ug pagtahod, nga nagaila kang Jehova ug Jesus sa tanan natong mga dalan. Ang Kristohanong kongregasyon naningkamot sa pagtudlo ug pagtabang sa uban sa pagbuhat sa ingon.
5 Usa ka Linaing Okasyon Aron Ipakita ang Pasidungog: Ang pagsaulog sa Memoryal mao ang labing hinungdanong panagkatigom sa katawhan ni Jehova matag tuig. Ang tanan nga adunay tinguha sa pag-alagad ug pagpasidungog kang Jehova kinahanglang presente. (Luc. 22:19) Atong gidahom nga dugang pa sa 6 ka milyong aktibong mga Saksi, ang interesadong mga tawo maoy magpadaghan sa tumatambong ngadto sa kapin sa 14 ka milyon. Pagkamaayong kahigayonan sa pagpasidungog sa atong langitnong Amahan! Samtang ang pagsaulog nagsentro kang Jesus, ang pasidungog ug pagtahod nga gipakita tungod sa iyang napalampos maghimaya sa Amahan, nga nagpadala kaniya.—Juan 5:23.
6 Unsay atong mahimo sa pagpaluyo niining linaing okasyon? Kita makatabang sa bag-ong interesadong mga tawo sa pagbatog bug-os nga kaayohan. Awhaga sila nga motambong, ug kon gikinahanglan, tanyagi ug mabinationg pag-abag aron tabangan sila sa pagtambong. Isaysay ang katuyoan sa pakigpulong. Ipailaila sila sa uban. Ang ilang makita ug madungog makapalihok kanila sa pagtinguha nga makighiusa kanato sa pagpasidungog kang Jehova.
7 Ayaw pakamenosa ang dakong epekto sa programa. Usa ka estudyante sa unibersidad misanong ug ingon niini: “Makadaghan na akong nakatambong sa Kalawat diha sa akong simbahan, apan kini maoy lahi gayod. Akong nakita nga kini maoy ingon gayod sa kon unsay gisulti sa Bibliya, ug sa akong hunahuna anaa kaninyo ang kamatuoran.” Misugod siya sa pagtambong sa mga tigom nga regular ug wala madugay nabawtismohan.
8 Tabangi ang mga Bag-ohan nga Mouswag: Matikdi ang mga bag-ohan nga motambong sa Memoryal, ug duawa sila dayon aron sublion ang makapalagsik nga mga butang nga ilang nakat-onan ug nakita. Ipahibalo kanila ang ubang mga tigom, diin madugangan nila ang ilang kahibalo sa Bibliya. Ang paghisgot sa kapitulo 17 sa librong Kahibalo, “Pagkaplag ug Seguridad Taliwala sa Katawhan sa Diyos,” magpakita kanila sa daghang nagkalainlaing espirituwal nga mga tagana nga gitanyag sa kongregasyon, nga dali nilang mabatonan. Paghikay nga matan-aw nila ang bag-ong video nga Our Whole Association of Brothers aron personal nilang makita ang panaghiusa, kalipay, ug kasibot sa katawhan ni Jehova!
9 Hinungdanon nga ang interesadong mga tawo makakat-on kon sa unsang paagi sila personal nga makapakitag pasidungog ug pagtahod kang Jehova. Isaysay nga ang kinasingkasing nga pag-ampo makapahimuot kang Jehova ug maoy usa ka tuboran kanunay sa espirituwal nga kahayahay. (1 Juan 5:14) Ginamit ang leksiyon 8 hangtod sa 12 diha sa brosyur nga Gikinahanglan, hubita ang matang sa panggawi nga magpasidungog kang Jehova. Pinaagi sa paghisgot sa gisaysay diha sa bag-ong brosyur nga Jehovah’s Witnesses, mga panid 30-1, dasiga ang mga bag-ohan sa paghunahuna bahin sa mga posibilidad sa pagpasidungog kang Jehova pinaagig personal nga pagpakig-ambit sa buluhatong pagsangyaw.
10 Ang pagpabili sa halad ni Jesus ug sa atong pribilehiyo sa pag-alagad ingong iyang mga tinun-an magpasidungog sa Amahan ug magpatunghag mga panalangin ngadto sa uban. Si Jesus misaad: “Kon si bisan kinsa moalagad kanako, ang Amahan magpasidungog kaniya.”—Juan 12:26.