Ang Imong Tabang Gikinahanglan
1 “Salamat sa tanan ninyong gibuhat alang kanamong tanan. Dako kinig epekto nganhi kanamo.” Kanang maong komento nagpahayag gayod sa kamapasalamaton nga atong gibati alang sa atong mga ansiyano ug ministeryal nga mga alagad. Samtang ang organisasyon sa Diyos nagpadayon sa pag-uswag, adunay padayong panginahanglan sa hamtong nga mga lalaki sa pag-alagad diha sa duolag 100,000 ka kongregasyon sa tibuok kalibotan. Kon ikaw usa ka bawtismadong igsoong lalaki, ang imong tabang gikinahanglan.
2 “Magapangab-ot”: Sa unsang paagi ikaw makapangab-ot alang sa dugang mga pribilehiyo sa pag-alagad? (1 Tim. 3:1) Sa panguna, pinaagi sa paghatag ug maayong panig-ingnan sa tanang bahin sa imong kinabuhi. (1 Tim. 4:12; Tito 2:6-8; 1 Ped. 5:3) Pakig-ambit sa bug-os diha sa buluhatong pagwali, ug tabangi ang uban sa paghimo usab niana. (2 Tim. 4:5) Ipakita ang sinserong interes alang sa kaayohan sa mga isigkamagtutuo. (Roma 12:13) Magmakugihong estudyante sa Pulong sa Diyos, ug ugmara ang “arte sa pagpanudlo.” (Tito 1:9; 1 Tim. 4:13) Makugihong atimana ang mga buluhaton nga gipiyal kanimo sa mga ansiyano. (1 Tim. 3:10) Kon ikaw usa ka ulo sa pamilya, ‘dumalaha ang imong panimalay sa maayong paagi.’—1 Tim. 3:4, 5, 12.
3 Ang pag-alagad diha sa tinudlong katungdanan nanginahanglag kakugi ug espiritu sa pagsakripisyo sa kaugalingon. (1 Tim. 5:17) Busa, sa pagpangab-ot, isentro ang pagtagad sa mapainubsanong pag-alagad sa uban. (Mat. 20:25-28; Juan 13:3-5, 12-17) Pamalandonga ang tinamdan ni Timoteo, ug paningkamoting masundog kana. (Filip. 2:20-22) Sama kaniya, tugoti nga ang imong maayong panggawi maoy morekomendar kanimo. (Buh. 16:1, 2) Samtang imong ugmaron ang espirituwal nga mga hiyas nga gikinahanglan sa pagdumala sa dugang mga pribilehiyo ug sa pagpadapat sa bisan unsang tambag nga imong madawat aron mouswag, “ang imong pag-uswag madayag sa tanan nga mga tawo.”—1 Tim. 4:15.
4 Mga Ginikanan, Bansaya ang mga Bata sa Pagtabang: Ang mga bata makasugod sa pagkakat-on sa pagtabang sukad sa sayong pangedaron. Bansaya sila sa pagpatalinghog panahon sa mga tigom, pagsangyaw, ug mahimong panig-ingnan sa panggawi diha sa Kingdom Hall ug sa eskuylahan. Tudloi sila nga moduyog sa pag-alagad sa uban, sama sa pagtabang sa pagpanghinlo sa Kingdom Hall, pagtabang sa mga tigulang, ug uban pa. Tugoti sila sa pagtagamtam sa kalipay nga magagikan sa paghatag. (Buh. 20:35) Ang maong pagbansay makatabang kanila nga mahimong mga payunir, ministeryal nga mga alagad, ug mga ansiyano sa umaabot.