Ang Pait nga Resulta sa Gubat
Ang gubat ug panag-away grabe gyod ug epekto sa mga tawo. Nahibalo kaayo ang mga sundalo ug sibilyan kon unsa ni ka pait.
MGA SUNDALO
“Pirme kang makakitag mga tawo nga nangamatay o nangaangol. Wala gyoy kasegurohan ang imong kinabuhi.”—Gary, Britain.
“Naigo kog mga bala sa akong likod ug nawong, ug daghan kog nakitang namatay, apil ang mga bata ug tigulang. Tungod sa gubat, maanad na ka aning mga butanga, ug morag wala na lang ni nimo.”—Wilmar, Colombia.
“Kon naay tawo nga pusilon sa imong atubangan, dili na mawala sa imong hunahuna ang imong makita. Morag pirme nimong madunggan ug makita ang iyang pag-antos. Ug di gyod nimo malimtan nang tawhana bisag unsaon pa nimo.”—Zafirah, United States.
MGA SIBILYAN
“Morag dili na gyod ko magmalipayon pag-usab. Nahadlok ko nga basig ako nay sunod nga mamatay. Pero mas nahadlok ko nga basig ang akong pamilya ug mga higala ang mamatay.”—Oleksandra, Ukraine.
“Hadlok kaayo nang maglinya ka gikan alas dos sa kadlawon hangtod alas onse sa gabii aron makakuhag pagkaon, kay naay purohan nga maigo kag bala.”—Daler, Tajikistan.
“Namatay ang akong mga ginikanan tungod sa gubat. Ug kay nag-inusara na man lang ko, wala nay mohupay o moatiman nako.”—Marie, Rwanda.
Bisan pag kini nga mga tawo pait kaayog naeksperyensiyahan tungod sa gubat, nakakaplag gihapon silag kalinaw. Kombinsido sila nga sa dili madugay, mawala na ang mga gubat ug panag-away. Sa unsang paagi na mahimong posible? Ipatin-aw niini nga isyu sa Bantayanang Torre kon unsay giingon sa Bibliya bahin ana.