Unsaon Nimo Pagpakita nga Giapresyar Nimo ang Lukat?

1-2. Unsang mga panalangin ang atong nadawat kay gilukat ta ni Jesus, ug unsay gusto natong himoon tungod ana? (2 Corinto 5:​14, 15) (Tan-awa sab ang hulagway.)

KON naluwas ka gikan sa nahugno nga bilding, seguradong mobati kag utang kabubut-on sa tawo nga mitabang nimo. Bisag naa pay ubang tawo nga naluwas ug nagpasalamat na sila, gusto nimong ipakita mismo nga mapasalamaton kaayo ka niya.

² Sumala sa gipatin-aw sa miaging artikulo, dili gyod nato kayang luwason ang atong kaugalingon gikan sa mga epekto sa atong napanunod nga sala. Pero ang halad lukat ni Jesus makaluwas nato kay pinaagi ani (1) mapasaylo ang atong mga sala, (2) mahimo na tang hingpit sa umaabot, (3) ug mabalik ang atong maayong relasyon sa Diyos. Tungod ana, naa tay paglaom nga mabuhi hangtod sa hangtod sa bag-ong kalibotan ni Jehova. Ang lukat nagpakita kon unsa ka dako ang gugma ni Jesus para sa mga tawo—nga gimahal niya sila bisan sa wala pa siya moanhi sa yuta. (Prov. 8:​30, 31) Si apostol Pablo misulat nga ‘ang gugma nga gipakita sa Kristo nagpalihok kanato.’ (Basaha ang 2 Corinto 5:​14, 15.) Nagpasabot ni nga kinahanglang naa tay himoon aron ipakita nga giapresyar nato ang halad lukat ni Jesus ug nga wala nato ni balewalaa.

3. Ngano tingaling lahilahi tag paagi sa pagpakitag apresasyon sa lukat?

³ Unsaon nimo pagpakita nga mapasalamaton kaayo ka sa mahigugmaong tagana nga lukat? Ang imong paagi sa pagpakitag apresasyon lahi tingali sa paagi sa uban. Aron mahibaloan kon ngano, imadyina ang tulo ka tawo nga nagbiyahe padulong sa usa ka lugar. Kay naggikan man sila sa lainlaing siyudad, lahilahi pod silag ruta nga agian. Sa susama, ang “ruta” nga imong agian, o ang imong paagi sa pagpakitag apresasyon sa lukat, magdepende kon asa ka karon—sa ato pa, kon unsay imong kahimtang sa pag-alagad. Busa niini nga artikulo, hisgotan nato ang tulo ka grupo sa mga tawo: (1) mga Bible study, (2) mga bawtismadong Kristohanon, ug (3) kadtong naluya o mihunong na sa pag-alagad kang Jehova.

MGA BIBLE STUDY

4. Unsay nakita ni Jehova sa mga Bible study?

⁴ Kon nagtuon ka karon sa Bibliya, hunahunaa ni: Ang imong pagdawat sa maayong balita nagpakita nga usa ka sa ginakabig ni Jehova aron mahimong iyang higala. (Juan 6:44; Buh. 13:48) “Si Jehova ang tigsusi sa mga kasingkasing.” Nagpasabot ni nga nakita niya ang imong mga paningkamot nga mokat-on bahin niya, ug nalipay siya nga naghimo kag mga kausaban aron masunod ang iyang mga sugo. (Prov. 17:3; 27:11) Tungod sa lukat, naa kay kahigayonan nga masuod kang Jehova. (Roma 5:​10, 11) Ayaw gyod nag balewalaa.

5. Unsaon pagpadapat sa mga Bible study ang tambag sa Filipos 3:16?

⁵ Ingong Bible study, unsaon nimo pagpakita nga mapasalamaton kaayo ka sa lukat? Ang usa ka paagi mao ang pagsunod sa tambag ni Pablo ngadto sa mga taga-Filipos: “Bisan unsang pag-uswag ang atong nahimo, ipadayon nato kini.” (Filip. 3:16) Ang laing hubad niini nga bersikulo nag-ingon: “Bisan unsay mahitabo magpadayon gayod kita sa unahan.” Base ana nga tambag, ayawg tugoti nga naay makapugong nimo sa imong padayong paglakaw paingon sa dalan sa kinabuhi.—Mat. 7:14; Luc. 9:62.

6. Unsay makatabang sa mga Bible study kon malisdan sila sa paghimog mga kausaban? (Deuteronomio 30:​11-14) (Tan-awa sab ang hulagway.)

⁶ Naa bay pagtulon-an sa Bibliya nga bag-o lang nimong nakat-onan ug nalisdan ka sa pagdawat? Unsay makatabang nimo? Pag-research bahin ani, ug hangyoa si Jehova nga tabangan ka nga mas masabtan ni. (Sal. 86:11) Kon naglisod gihapon kag sabot sa usa ka pagtulon-an, baliki na lang ni sa sunod nga higayon—pero ayawg undang sa pagpa-Bible study. Sa laing bahin, nalisdan pod ba ka sa paghunong sa usa ka buhat nga gidumtan ni Jehova? Hinumdomi nga dili ka hangyoon ni Jehova nga himoon ang usa ka butang kon dili nimo ni kaya. Bisag dili ka hingpit, kaya nimong sundon ang iyang mga sugo. (Basaha ang Deuteronomio 30:​11-14.) Ug si Jehova nagsaad nga tabangan ka niya. (Isa. 41:​10, 13; 1 Cor. 10:13) Maong ayawg undang. Padayon lang bisag nalisdan ka, ug pagpokus sa maayong mga butang nga gihimo ni Jehova para nimo, apil na ang paghatag niya sa iyang Anak ingong lukat. Samtang mas magkalalom ang imong gugma kang Jehova, makita nimo nga “dili [diay] bug-at ang iyang mga sugo.”—1 Juan 5:3.a

7. Unsay angayng hinumdoman niadtong mga nagdako sa kamatuoran?

⁷ Saksi ba ang imong mga ginikanan ug ginatudloan ka nila bahin sa Bibliya? Kon mao, Bible study pod ka. Gani, ikaw ang pinakaimportanteng Bible study sa imong mga ginikanan. Ang Bibliya nag-ingon: “Duol sa Diyos, ug siya moduol kaninyo.” (Sant. 4:8; 1 Cron. 28:9) Kon mohimo kag mga paagi aron masuod kang Jehova, makigsuod pod siya nimo. Si Jehova makigsuod nimo dili tungod kay Saksi ang imong mga ginikanan, kondili kay nakita niya ang imong personal nga mga paningkamot. Hinumdomi nga siya ang nagkabig sa matag usa—apil na niadtong nagdako sa Saksi nga pamilya. Unsa may gihimo ni Jehova para nimo aron masuod ka niya? Iyang gihatag ang lukat, nga dili gyod nimo angayng balewalaon. (Roma 5:​1, 2) Maong sa dili pa ka motambong sa Memoryal niining tuiga, pamalandonga kon unsay kaayohan sa lukat para nimo mismo. Makatabang na nimo nga mas maningkamot nga makab-ot ang imong espirituwal nga tumong, bisag unsa pa na, aron ipakita ang imong apresasyon sa lukat nga gitagana ni Jehova pinaagi sa iyang Anak.b

BAWTISMADONG MGA KRISTOHANON

8. Giunsa pagpakita sa bawtismadong mga Kristohanon ang ilang pagtuo sa lukat?

⁸ Kon bawtismado na ka, napakita na nimo sa daghang paagi nga naa kay pagtuo sa lukat. Pananglitan, mihimo kag mga paagi aron masuod kang Jehova ug makab-ot ang iyang mga sukdanan. Gisunod nimo ang sugo ni Jesus nga maghimog mga tinun-an pinaagi sa pagsangyaw. Nanaad ka nga moalagad kang Jehova ug midesisyon nga magpabawtismo. Tingali nakaeksperyensiya kag pagsupak kay nag-alagad ka niya. (2 Tim. 3:12) Ang imong pagkamatinumanon ug paglahutay nagpakita nga gimahal nimo si Jehova ug giapresyar nimo ang lukat nga iyang gitagana pinaagi sa iyang Anak.—Heb. 12:​2, 3.

9. Sa unsa angayng mag-amping ang mga bawtismadong Kristohanon?

⁹ Ingong mga bawtismadong Kristohanon, kinahanglan tang mag-amping nga dili mawala ang atong apresasyon sa lukat. Matikdi ang nahitabo sa mga Kristohanon sa Efeso. Gikomendahan sila ni Jesus sa ilang paglahutay. Pero iya pod silang giingnan: “Duna koy butang nga batok kanimo, nga imong gibiyaan ang gugma nga imong nabatonan sa sinugdan.” (Pin. 2:​3, 4) Base sa giingon ni Jesus, ang atong pagsimba puwedeng mahimong rutina na lang. Posible nga ang usa moampo gihapon, motambong sa mga tigom, ug mosangyaw, pero tungod na lang kay naanad siya, dili na tungod sa gugma. Unsay puwede nimong himoon kon nakita nimo nga dili na ingon ana ka lawom ang imong gugma kang Jehova?

10. Unsaon nimo pagpadapat ang tambag nga ‘pamalandongon’ ug ‘hatagag bug-os nga pagtagad’ ang imong pag-alagad? (1 Timoteo 4:​13, 15)

¹⁰ Gitambagan ni Pablo si Timoteo nga ‘pamalandongon’ ug ‘hatagag bug-os nga pagtagad’ ang iyang pag-alagad kang Jehova. (Basaha ang 1 Timoteo 4:​13, 15.) Base niini nga tambag, hunahunaa kon unsay puwede nimong buhaton aron mahimong mas kinasingkasing ang imong pag-alagad ug magpabilin ang imong kadasig “pinaagi sa balaang espiritu.” (Roma 12:11; tan-awa ang study note nga “Be aglow with the spirit.”) Pananglitan, basin puwede nimong dugangan ang imong panahon sa pagtuon aron mas makapokus ka sa mga tigom. Mas makabenepisyo pod ka sa imong personal nga pagtuon kon mangita kag hilom nga lugar diin puwede kang makapamalandong sa imong natun-an. Samag kalayo nga kinahanglang sugnoran aron padayong magsiga, kinahanglan pod kang mangitag mga paagi aron masugnoran ang imong kadasig ug apresasyon sa tanang gitagana ni Jehova, apil na sa lukat. Ug sa mga semana sa dili pa ang Memoryal, puwede nimong pamalandongon ang mga panalangin nga atong nadawat kay nag-alagad ta kang Jehova. Seguradong makapalig-on ni sa imong apresasyon sa lukat nga gitagana ni Jehova aron masuod ka niya.

11-12. Kon naay mga panahon nga wala kay gana nga mohimo sa espirituwal nga mga kalihokan, nagpasabot ba ni nga wala na ka hatagi ni Jehova sa iyang balaang espiritu? Ipatin-aw. (Tan-awa sab ang hulagway.)

¹¹ Naa bay panahon nga wala kay gana nga mohimo sa espirituwal nga mga kalihokan? Kon mao, ayawg kaluya o ayaw paghunahuna nga wala na ka hatagi ni Jehova ug balaang espiritu. Matikdi ang giingon ni Pablo ngadto sa mga taga-Corinto bahin sa iyang ministeryo: “Bisan kon ginabuhat nako kini nga supak sa akong kabubut-on, gitugyanan gihapon kog buluhaton.” (1 Cor. 9:17) Unsay atong makat-onan ani?

¹² Naay mga panahon nga maguol si Pablo, ug tungod ana wala siyay gana nga mosangyaw. Pero bisan pa sa iyang gibati nianang panahona, naningkamot gihapon siya nga tumanon ang iyang ministeryo. Sama kang Pablo, himoa kon unsay angay nimong buhaton bisag wala kay gana. Hangyoa si Jehova nga ‘palig-onon ang imong tinguha sa pagbuhat sa mga butang nga gusto niya.’ (Filip. 2:13) Ipadayon ang imong espirituwal nga rutina. Kon maningkamot ka nga padayong buhaton ang espirituwal nga mga kalihokan bisag wala kay gana, sa ngadtongadto mabalik ra ang imong kadasig ug molig-on pag-usab ang imong gugma kang Jehova.

13. Unsay atong himoon aron padayon natong masusi kon ‘naa ba ta sa pagtuo’?

¹³ Maayo nga regular natong susihon ang atong kaugalingon base sa giingon sa 2 Corinto 13:5: “Padayong sulayi kon naa ba mo sa pagtuo; padayong pamatud-i kon unsa mo sa inyong kaugalingon.” Puwede natong pangutan-on ang atong kaugalingon: ‘Ginauna ba nako sa akong kinabuhi ang mga buluhaton sa Gingharian?’ (Mat. 6:33) ‘Makita ba sa akong gipili nga kalingawan nga gidumtan nako ang daotan?’ (Sal. 97:10) ‘Naningkamot ba ko nga magpabilin ang kalinaw ug panaghiusa diha sa kongregasyon?’ (Efe. 4:​2, 3) Ang Memoryal mao ang usa sa pinakamaayong panahon nga masusi nato ang atong kaugalingon. Kon atong hunahunaon ang tanang gihimo ni Jehova ug Jesus para nato, mapalihok ta nga ipakita ang atong apresasyon ug magkinabuhi para sa Kristo, dili na para sa atong kaugalingon.c

KADTONG NALUYA O MIHUNONG NA SA PAG-ALAGAD

14. Nganong ang uban naluya o mihunong na sa pag-alagad kang Jehova?

¹⁴ Naay mga igsoon nga mihunong na sa pagpakig-uban sa kongregasyon human sa pipila ka bulan o daghang tuig pa gani nga matinumanong pag-alagad. Ngano? Kay ang uban nila nabug-atan sa “mga kabalaka sa kinabuhi.” (Luc. 21:34) Ang uban pod napandol sa gisulti o gihimo sa usa ka igsoon. (Sant. 3:2) Naa poy uban nga nakahimog seryosong sala ug maulaw silang mangayog tabang sa mga ansiyano. Parehas ba ka nilag situwasyon? Bisan asa pa ani ang imong kahimtang, unsay imong mahimo aron makabalik ka sa kongregasyon? Sa unsang paagi ang mahigugmaong tagana nga lukat makatabang nimo?

15. Giunsa pagpakita ni Jehova nga gimahal gihapon niya ang iyang nawalang mga karnero? (Ezequiel 34:​11, 12, 16)

¹⁵ Hunahunaa kon unsay pagbati ni Jehova bahin sa iyang mga karnero nga nawala. Wala niya sila kalimti o pasagdi. Hinuon, iya silang gipangita. Iya gihapon silang gipakaon ug gitabangan nga mobalik niya. (Basaha ang Ezequiel 34:​11, 12, 16.) Mao pod ba nay ginahimo ni Jehova para nimo karon? Oo! Gani ang imong pagbasa niini nga artikulo nagpakita nga gusto gihapon nimong mapalipay si Jehova. Sama nga nakita ni Jehova sa una ang imong kasingkasing ug gikabig ka niya sa kamatuoran, nakita gihapon niya kon unsay naa sa imong kasingkasing karon ug ginakabig ka niyag balik ngadto kaniya.

16. Unsay makatabang sa nawalang mga karnero ni Jehova nga mobalik kaniya? (Tan-awa sab ang hulagway.)

¹⁶ Makapadasig kaayo ang giingon sa brosyur nga Balik Kang Jehova: “Makaseguro ka nga dawaton ka ni Jehova dihang mobalik ka niya. Tabangan ka niyang masagubang ang mga kabalaka ug kahiubos, ug tabangan pod ka niya nga makabatog kalinaw sa hunahuna ug kasingkasing nga maoy resulta sa hinlong konsensiya. Sa ingon, madasig kang moalagad pag-usab kang Jehova uban sa mga igsoon.” Hinumdomi pod nga gusto kaayo kang tabangan sa mga ansiyano. Sama silag “tagoanan gikan sa hangin, usa ka salipdanan gikan sa bagyo.” (Isa. 32:2) Aron mapakita nimo ang imong apresasyon sa lukat, pangutan-a ang imong kaugalingon, ‘Unsay puwede nakong himoon aron “mahusay ang mga butang” uban kang Jehova?’ (Isa. 1:18; 1 Ped. 2:25) Pananglitan, basin puwede kang motambong ug tigom sa Kingdom Hall. O kaha moduol ka sa usa sa mga ansiyano ug sultihi siya nga gusto na kang mobalik kang Jehova. Puwedeng hikayon sa mga ansiyano nga dumalahan kag pagtuon sa Bibliya aron matabangan ka sa espirituwal. Makasalig gyod ka nga panalanginan ni Jehova ang imong mga paningkamot sa pagpakitag apresasyon sa lukat ni Jesus.

IPAKITA ANG IMONG APRESASYON SA LUKAT

17-18. Unsay gidasig nga atong buhaton sa dili pa ang Memoryal?

¹⁷ Si Jesus miingon nga ang lukat gitagana “aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.” (Juan 3:16) Gitagana ni Jehova ang lukat aron luwason ta gikan sa mga epekto sa sala ug kamatayon. Dili gyod ni nato angayng balewalaon. (Roma 3:​23, 24; 2 Cor. 6:1) Maong sa mga adlaw una pa ang Memoryal, pamalandonga kon unsa ka dako ang gugma ni Jehova ug Jesus para nato, kay kini nga gugma mopalihok nato nga ipakita ang atong apresasyon sa lukat.

¹⁸ Unsaon nimo pagpakita nga mapasalamaton ka sa lukat? Ang imong paagi sa pagpakitag apresasyon lahi tingali sa paagi sa uban. Pero makaseguro ka nga si Jehova magpanalangin nimo ug sa minilyon niyang mga alagad tungod sa inyong paningkamot nga “dili na magkinabuhi alang sa [inyong] kaugalingon, kondili alang kaniya nga namatay alang [kaninyo] ug gibanhaw.”—2 Cor. 5:15.