Kon Nganong Gikinahanglan Gyod Nato ang Lukat

1-2. Nganong nagkinahanglan gyod tag tabang? (Roma 7:​22-24) (Tan-awa sab ang hulagway.)

IMADYINA ang usa ka tawo nga natanggong sulod sa bilding nga nahagsa. Buhi ra tuod siya, pero dili siya kagawas kay nadat-ogan man siya. Igo ra gyod intawon siyang mosinggit ug maglaom nga naay moluwas niya.

² Kitang tanan samag naa niana nga kahimtang. Ngano? Kay dihang mirebelde si Adan kang Jehova, nahimo siyang makasasala, ug iyang napasa ngadto sa iyang mga anak ang iyang makasasalang kahimtang. Tungod ana, kitang tanan samag natanggong pod sa napanunod nga sala, ug dili nato kayang luwason ang atong kaugalingon gikan sa mga epekto niini. Sa sulat ni apostol Pablo ngadto sa mga taga-Roma, iyang gihisgotan kon unsa ta ka makaluluoy tungod sa atong makasasalang kahimtang. (Basaha ang Roma 7:​22-24.) Nagpakiluoy siya nga unta maluwas siya gikan sa iyang ‘lawas nga maoy hinungdan sa iyang kamatayon.’ Natanggong gyod siya sa iyang napanunod nga sala, nga kamatayon ray paingnan. (Roma 6:23) Ingon ana pod ang atong kahimtang, maong nagkinahanglan gyod tag tabang.

3. Sa unsang paagi ang lukat makaluwas nato?

³ Pero dili negatibog panghunahuna si Pablo. Human siya makapangutana: “Kinsay moluwas nako?” iya ra pong gitubag ang iyang pangutana pinaagi sa pag-ingon: “Salamat sa Diyos pinaagi kang Jesu-Kristo nga atong Ginoo!” (Roma 7:25) Ang gipasabot ni Pablo mao ang halad lukata ni Jesus. Kini nga lukat makaluwas nato kay pinaagi ani (1) mapasaylo ang atong mga sala, (2) mahimo tang hingpit, ug (3) mabalik ang atong maayong relasyon sa Diyos. Samtang ato ning hisgotan, mas molalom ang atong gugma kang Jehova, “ang Diyos nga nagahatag ug paglaom.” (Roma 15:13) Mas molalom pod ang atong apresasyon kang Jesus, “nga pinaagi kaniya nabatonan nato ang kagawasan pinaagi sa lukat.”—Col. 1:14.

PINAAGI SA LUKAT, MAPASAYLO TA

4-5. Nganong kitang tanan nagkinahanglag lukat? (Ecclesiastes 7:20)

⁴ Gikinahanglan nato ang lukat aron mapasaylo ang atong mga sala. Kay kitang tanan dili man hingpit, makasala gyod ta—sa pulong man o sa buhat. (Basaha ang Ecclesiastes 7:20.) Ang ubang sala seryoso kaayo. Pananglitan, sa unang panahon, kon ang usa manapaw o mopatay, ang Moisesnong Balaod nag-ingon nga angay siyang silotan ug kamatayon. (Lev. 20:10; Num. 35:​30, 31) Kadaghanan sa mga sala nga atong mahimo dili ra ingon ana ka seryoso, pero siyempre sala gihapon na. Pananglitan, si salmistang David miingon: “Bantayan nako ang akong lakang aron dili ko makasala pinaagi sa akong dila.” (Sal. 39:1) Kini nagpakita nga makasala ta bisan diha sa atong mga isulti.

⁵ Hunahunaa ang imong mga nasulti o nahimo sa miagi. Naa ba kay nasulti sa uban nga imong gimahayan sa ulahi? Naa ba kay nahimo nga imong gibasolan? Seguradong oo ang imong tubag ana. Ang Bibliya nag-ingon: “Kon kita moingon, ‘Kita walay sala,’ atong gilimbongan ang atong kaugalingon ug ang kamatuoran wala kanato.”—1 Juan 1:8.

6-7. Unsa ang legal nga basehanan ni Jehova aron pasayloon ang atong mga sala? (Tan-awa sab ang hulagway.)

⁶ Ang lukat naghatag ug basehanan aron pasayloon ni Jehova ang atong mga sala. (Efe. 1:7) Pero wala ni magpasabot nga balewalaon lang ni Jehova ang atong mga sala, nga mora bag okey ra ni niya. Ang tinuod, gidumtan ni Jehova ang sala. (Isa. 59:2) Kay hingpit ang iyang hustisya, kinahanglang naay basehanan aron pasayloon ta niya.

⁷ Sa panahon sa mga Israelinhon, ang Moisesnong Balaod nagsugo nga kinahanglang maghalad silag mga hayop aron mapasaylo ang ilang mga sala. (Lev. 4:​27-31; 17:11) Ang maong mga halad nagrepresentar sa halad lukat ni Jesus ug sa mga panalangin nga resulta niana. Ang iyang halad maghatag ug legal nga basehanan aron pasayloon ta ni Jehova. Nasabtan ni Pablo ang mga kaayohan sa paghalad ni Jesus sa iyang kinabuhi. Makita nato na sa iyang gisulat ngadto sa mga Kristohanon sa Corinto. Human niya hisgoti ang ilang dili maayong mga binuhatan sa una, iya silang giingnan: “Kamo nahugasan na; kamo nabalaan na; kamo napahayag na nga matarong sa ngalan ni Ginoong Jesu-Kristo ug sa espiritu sa atong Diyos.”—1 Cor. 6:​9-11.

8. Unsay puwede nimong hunahunaon samtang mangandam ka sa pagtambong sa Memoryal niining tuiga?

⁸ Samtang mangandam ka sa pagtambong sa Memoryal niining tuiga, hunahunaa ang mga panalangin nga imong naeksperyensiyahan kay gipasaylo na ka ni Jehova. Pananglitan, tungod sa lukat, dili na ka kinahanglang magsigeg kakonsensiya sa imong mga sala kaniadto nga gipasaylo na ni Jehova. Pero naa bay mga panahon nga magduhaduha gihapon ka ana? Tingali nakaingon ka, ‘Kabalo ko nga gipasaylo na ko ni Jehova, pero dili nako mapasaylo ang akong kaugalingon.’ Kon mobati ka ana, hinumdomi ni: Si Jehova ang naay katungod nga mopasaylo, ug si Jesus ang iyang gihatagag responsibilidad nga mohukom nato, dili kita o si bisan kinsang tawo. Wala ta hatagi ni Jehova ug katungod sa pagdesisyon kon kinsay angayng makadawat sa iyang kaluoy ug pagpasaylo. Ang Bibliya nag-ingon: “Kon naglakaw ta sa kahayag sama nga [si Jehova] naa sa kahayag, . . . ang dugo ni Jesus nga iyang Anak maghinlo kanato gikan sa tanang sala.” (1 Juan 1:​6, 7) Makasalig ka nga tinuod gyod ni, kay usa ni sa mga pagtulon-an sa Bibliya. Ang lukat naghatag kang Jehova ug legal nga basehanan aron pakitaan tag kaluoy, ug ang Bibliya nag-ingon nga siya “andam sa pagpasaylo.”—Sal. 86:5.

PINAAGI SA LUKAT, MAHIMO TANG HINGPIT

9. Gawas pa sa sayop nga mga buhat, unsa pay gipasabot sa sala? (Salmo 51:5 ug footnote)

⁹ Sa Bibliya, ang pulong “sala” wala lang magpasabot ug sayop nga buhat, kondili sa ato pong makasasalang kahimtang nga napanunod nato bisan sa wala pa ta matawo. (Basaha ang Salmo 51:5 ug footnote.) Tungod ani, naa tay tendensiya nga mohimog dili maayo. Ug kay dili na man ta hingpit sukad pa sa sinugdan, masakit ta, matigulang, ug mamatay. Mao nay hinungdan kon nganong naay mga bata nga, bisag wala pay nahimong sala, masakit gihapon ug mamatay pa gani. Mao pod nay rason kon nganong ang mga tawo, buotan man o dili, mag-antos ug sa ngadtongadto mamatay. Ang matag usa sa mga kaliwat ni Adan nakapanunod gyod ug pagkadili-hingpit.

10. Unsay gibati ni Adan ug Eva human sila makasala?

¹⁰ Hunahunaa kon unsay gibati ni Adan ug Eva human sila makasala. Dihadiha, naeksperyensiyahan dayon nila ang dili maayong epekto kay gisupak nila ang balaod sa Diyos—balaod nga “nasulat sa ilang kasingkasing.” (Roma 2:15) Gibati dayon nila nga naay nausab, nga lahi na sila kon itandi niadtong wala pa sila makasala. Sa unang higayon sa ilang kinabuhi, mibati silag kakonsensiya, kabalaka, kawalay-kasegurohan, kasakit, ug kaulaw. Gani, nakahunahuna sila nga tabonan ang ilang lawas ug manago gikan sa ilang Maglalalang, nga mora bag mga kriminal sila. (Gen. 3:​7, 8) Ilang gidaladala ni nga mga pagbati hangtod sa ilang kamatayon.—Gen. 3:​16-19.

11. Sa unsang paagi pod ta naapektohan sa atong makasasalang kahimtang?

¹¹ Sama ni Adan ug Eva, naapektohan pod kaayo ta sa atong makasasalang kahimtang. Miresulta nig grabeng kasakit ug pag-antos para nato. Bisag unsaon pa natog paningkamot nga moarang-arang ang atong situwasyon, dili gihapon nato masulbad ang tanan natong problema. Ngano? Kay ang Bibliya nag-ingon nga “gipailalom [ta] sa pagkawalay-pulos.” (Roma 8:20) Ingon ana pod kon bahin sa paningkamot sa mga tawo sa pagsulbad sa mga problema sa kalibotan. Pananglitan, naningkamot sila nga masulbad ang krimen, mawala ang kapobrehon, ug mahunong ang mga giyera sa mga nasod. Bisag nakatabangtabang ang ilang mga paningkamot, wala gyod ni nila masulbad nga mga problema. Pero tungod sa lukat, naa tay tinuod nga paglaom. Kini maoy makaluwas nato gikan sa atong makaluluoy nga kahimtang.

12. Unsang paglaom ang gihatag sa lukat?

¹² Ang lukat naghatag ug paglaom nga “ang kalalangan ipagawas . . . gikan sa pagkaulipon sa pagkadunot.” (Roma 8:21) Dihang madawat na nato ang tanang panalangin niini sa umaabot, dili na gyod ta mobatig kasakit ug pag-antos, sa pisikal man, mental, o emosyonal. Dili na pod ta mobatig kakonsensiya, kabalaka, kawalay-kasegurohan, kasakit, o kaulaw. Masulbad na pod ang mga problema sa kalibotan ug magpuyo na ta nga malinawon, kay ang magmando nato mao ang “Prinsipe sa Pakigdait,” si Jesu-Kristo, kinsa maoy naglukat nato.—Isa. 9:​6, 7.

13. Unsa pay puwede nimong hunahunaon samtang mangandam ka sa pagtambong sa Memoryal niining tuiga?

¹³ Hunahunaa kon unsa unyay imong kinabuhi kon mahingpit na ka. Kada adlaw momata ka nga nindot kaayog pamati ug walay bisan unsang kabalaka. Makita nimo ang imong pamilya nga naa sa maayong kahimtang. Dili na ka mabalaka nga basig wala moy kaonon, masakit mo, o mamatay. Pero bisan karon pa lang, naa na kay kalinaw kay ang imong ‘gipanguptan pag-ayo nga paglaom samag angkla sa imong kinabuhi, nga segurado ug lig-on.’ (Heb. 6:​18, 19) Ang angkla makatabang aron dili maanod palayo ang barko bisag kusog kaayo ang bagyo. Sa susama, ang imong paglaom sa umaabot makapalig-on sa imong pagtuo ug makatabang nimo nga dili maanod palayo, bisag unsa pang problema ang imong ginaatubang. Oo, makasalig gyod ka nga si Jehova ang “tigganti sa mga sinserong nangita kaniya.” (Heb. 11:6) Ang paghupay nga imong nadawat karon ug ang imong paglaom sa umaabot naposible lang tungod sa lukat.

PINAAGI SA LUKAT, MABALIK ANG ATONG MAAYONG RELASYON SA DIYOS

14. Kay nakasala si Adan ug Eva, unsay epekto niana sa atong relasyon sa Diyos? Ipatin-aw.

¹⁴ Sukad nga nakasala si Adan ug Eva, ang mga tawo napahilayo gikan sa Diyos. Ang Bibliya nag-ingon pa gani nga nahimulag na ta gikan sa atong Maglalalang. (Roma 8:​7, 8; Col. 1:21) Ngano? Kay hingpit ang mga sukdanan ni Jehova, ug dili niya kaya nga konsentihon lang ang sala. Ang Bibliya nag-ingon bahin kang Jehova: “Putli kaayo ang imong mga mata nga dili nimo maantos nga motan-aw sa daotan, ug dili nimo konsentihon ang pagkadaotan.” (Hab. 1:13) Oo, tungod sa sala, naputol ang atong maayong relasyon sa Diyos. Pero tungod sa lukat, napasig-uli ta ngadto sa Diyos. Sa ato pa, nabalik ang atong maayong relasyon kaniya.

15. Nganong nalukmay si Jehova tungod sa lukat, ug unsay resulta ana?

¹⁵ Ang Bibliya nag-ingon nga si Jesus maoy “halad pasig-uli para sa atong mga sala.” (1 Juan 2:2) Ang Gregong pulong nga gihubad ug “halad pasig-uli” puwedeng magtumong sa usa ka “paagi sa paglukmay.” Sa unsang paagi man nalukmay si Jehova sa lukat? Aw, wala ni magpasabot nga nalukmay o nahupay siya kay namatay ang iyang Anak. Hinuon, nalukmay si Jehova kay nakab-ot sa lukat ang iyang sukdanan sa hustisya. Tungod sa lukat, naa na siyay basehanan nga ibalik ang iyang maayong relasyon sa tawo. (Roma 3:​23-26) Giisip pa gani niya nga matarong kadtong matinumanong nag-alagad niya bisag wala pa mamatay ang Kristo. (Gen. 15:​1, 6) Ngano? Kay segurado kaayo siya nga ihatag sa iyang Anak nga si Jesus ang lukat. (Isa. 46:10) Mapasalamaton gyod ta sa lukat nga maoy nagpaposible nga mabalik ang atong maayong relasyon kang Jehova.

16. Unsa pay puwede nimong pamalandongon samtang mangandam ka sa pagtambong sa Memoryal niining tuiga? (Tan-awa sab ang hulagway.)

¹⁶ Pamalandonga kon sa unsang paagi ka nakabenepisyo kay nabalik ang imong maayong relasyon sa Diyos. Pananglitan, imong gitawag si Jehova nga imong “Amahan” nga maoy gitudlo ni Jesus. (Mat. 6:9) Usahay, imo pa ganing ginatawag si Jehova nga imong “Higala.” Dihang tawgon nato si Jehova ingong atong “Amahan” o “Higala,” angay nato nang himoon nga may dakong pagtahod ug pagpaubos. Ngano? Kay ang kasuod nga atong gibati kang Jehova naposible lang, dili tungod sa atong kaugalingong paningkamot, kondili tungod sa lukat. Kon wala ang lukat, wala gyod tay maayong relasyon kang Jehova. Pero pinaagi kang Jesus, ‘gipasig-uli sa Diyos sa iyang kaugalingon ang tanang ubang butang.’ Naposible ni kay ‘nakigdait siya pinaagi sa dugo sa Kristo nga gipatulo diha sa estaka sa pagsakit.’ (Col. 1:​19, 20) Tungod ana, naa tay maayong relasyon kang Jehova, bisan karon nga dili pa ta hingpit.

ANG LUKAT NAGPAKITA KON UNSA KA MALULUY-ON SI JEHOVA

17. Giunsa pagpakita sa lukat nga maluluy-on kaayo si Jehova? (Efeso 2:​4, 5)

¹⁷ Klarong gipakita sa lukat nga si Jehova “maluluy-on kaayo.” Siya “naghatag kanatog kinabuhi . . . niadtong kita mga patay pa tungod sa kalapasan.” (Basaha ang Efeso 2:​4, 5.) Sama niadtong tawo nga nagpakiluoy aron makagawas sa nahugno nga bilding, ang mapainubsanong mga tawo, sa ato pa kadtong “nakiling sa pagdawat sa kamatuoran,” nagpakiluoy pod aron makalingkawas sila sa sala. (Buh. 13:48) Gitubag ni Jehova ang ilang hangyo alang sa tabang pinaagi sa mensahe sa Gingharian, aron nga makaila sila kaniya ug sa iyang Anak, si Jesus. (Juan 17:3) Tingali nagtuo si Satanas nga kon matental niya si Adan ug Eva sa pagpakasala, mapugngan na niya ang katuyoan sa Diyos. Pero sayop gyod siya.

18. Dihang mamalandong ta sa lukat, unsay angay natong hinumdoman?

¹⁸ Dihang mamalandong ta sa mga panalangin tungod sa lukat, angay natong hinumdoman ang pangunang katuyoan niini. Gihatag kini ni Jehova dili lang para sa atong kaayohan, kondili aron matubag ang akusasyon nga gipatungha ni Satanas didto sa tanaman sa Eden. (Gen. 3:​1-5, 15) Pinaagi sa lukat, gibalaan ni Jehova ang iyang ngalan ug gihinloan kini sa tanang pasipala. Giluwas pod ta niya gikan sa sala ug kamatayon, nga nagpakita nga mahigugmaon kaayo siya nga Diyos. Ug kay dili hitupngan ang pagkamaayo ni Jehova, gihatagan ta niyag kahigayonan, bisag dili ta hingpit, nga pamatud-an nga sayop ang akusasyon ni Satanas. (Prov. 27:11) Unsaon nimo pagpakita nga mapasalamaton kaayo ka sa lukat? Hisgotan nato na sa sunod nga artikulo.