Kon Unsaon Nimo Pagsulti ang Kamatuoran sa Maayong Paagi

1. Unsay kinahanglan natong buhaton aron mahimong bahin sa pamilya ni Jehova?

“GIUNSA nimo pagkahibalo sa kamatuoran?” Mao nay sagad natong ipangutana sa mga igsoon nga atong mailaila sa unang higayon. Ang uban nila moingon nga “nagdako sila sa kamatuoran.” Ug mosulti pod tingali ang uban nga bag-o lang silang “nakakat-on sa kamatuoran.” Sagad ingon ana ang atong tubag kay ang kamatuoran sa Pulong sa Diyos dako kaayog epekto sa atong pagkinabuhi. Ngano? Kay nahibalo ta nga mahimo lang tang bahin sa pamilya ni Jehova kon atong higugmaon ang kamatuoran ug ipadapat ang atong nakat-onan. Apil ani ang pagkahimong matinud-anon diha sa atong mga ginasulti ug ginahimo.—Sal. 15:​1-3.

2. (a) Unsay hunahuna sa mga tawo bahin kang Jesus? (b) Unsay reaksiyon sa mga tawo bahin sa mga kamatuoran nga gitudlo ni Jesus?

² Matinud-anon gyod si Jesus. Gani ang iyang mga kaaway miingon nga mosulti gyod siyag tinuod bisag nahibalo siya nga daghan ang dili ganahan sa iyang isulti. (Mat. 22:16) Nahibalo si Jesus nga lainlaig reaksiyon ang mga tawo sa kamatuoran. Siya miingon: “Mianhi ko sa pagpahinabog panagkabahin: anak nga lalaki batok sa iyang amahan, anak nga babaye batok sa iyang inahan, ug binalaye batok sa iyang ugangang babaye.” (Mat. 10:35) Siyempre, dili gusto ni Jesus nga masuko ang mga tawo sa mensahe nga gisangyaw niya ug sa iyang mga sumusunod, pero realistiko pod siya. (Mat. 23:37) Nahibalo siya nga ang iyang mensahe moresultag pagkabahinbahin—nga ang uban mahigugma sa kamatuoran ug ang uban magdumot ani.—2 Tes. 2:​9-11.

3. Unsay atong hisgotan niini nga artikulo?

³ Sama kang Jesus, naningkamot ta nga mosultig tinuod sa tanang higayon, bisag dili kanunayng sayon ang paghimo ana. Ato pong gisangyaw ug gitudlo ang mga kamatuoran sa Bibliya bisag nahibalo ta nga ang uban masuko sa atong isulti. Pero nagpasabot ba ni nga dili na lang gyod nato hunahunaon kon unsaon o kon kanus-a nato isulti ang kamatuoran? Wala. Niining artikuloha, atong hisgotan kini nga mga pangutana: Asa nato makita ang kamatuoran? Ngano, sa unsang paagi, ug kanus-a nato isulti ang kamatuoran? Ang tubag niini nga mga pangutana makatabang nato nga masulti ang kamatuoran sa maayong paagi ug sa hustong panahon.

KON ASA NATO MAKITA ANG KAMATUORAN

4. Nganong makaingon ta nga kang Jehova naggikan ang kamatuoran?

⁴ Ang kamatuoran naggikan kang Jehova. Ang tanan niyang isulti tinuod. Pananglitan, tinuod ang iyang giingon bahin sa kon unsay husto ug sayop. (Sal. 19:9; 119:​142, 151) Tinuod pod ang tanan niyang giingon bahin sa umaabot. (Isa. 55:​10, 11) Tumanon gyod niya ang iyang mga saad. (Num. 23:19) Gani, dili gyod mamakak si Jehova. (Heb. 6:18) Siya gyod “ang Diyos sa kamatuoran.”—Sal. 31:5.

5. Nganong dili lisod pangitaon “ang Diyos sa kamatuoran”? Ipatin-aw. (Buhat 17:27)

⁵ Daghan ang moingon nga lisod pangitaon si Jehova, “ang Diyos sa kamatuoran.” Pero dili na tinuod, kay daghan tag makitang ebidensiya sa atong palibot nga naa gyoy Diyos. (Roma 1:20) Konsideraha ang giingon ni apostol Pablo sa edukadong mga Grego didto sa Atenas. Si Pablo miingon nga gusto sa Diyos nga pangitaon nato siya ug nga siya “dili layo sa matag usa kanato.” (Basaha ang Buhat 17:27.) Gani, si Jehova mismo ang nagkabig sa mapainubsanong mga tawo nga nangita sa kamatuoran.—Juan 6:44.

6. Unsa ang pipila sa mga kamatuoran nga naa sa Bibliya, ug nganong nalipay ka nga nahibalo ka ani?

⁶ Ang usa ka paagi nga mailhan nato si Jehova mao ang pagtuon sa Bibliya. Ang mga magsusulat niini nga basahon gigiyahan sa balaang espiritu sa Diyos. (2 Ped. 1:​20, 21) Maong tinuod ug kasaligan gyod ang tanang nasulat sa Bibliya. Pananglitan, makasalig ta sa giingon sa Bibliya bahin sa sinugdanan sa uniberso ug sa kinabuhi dinhi sa yuta. (Gen. 1:​1, 26) Makasalig pod ta sa giingon niini bahin sa kon nganong kitang tanan makasala ug kon nganong naay pag-antos ug kamatayon. (Roma 5:12; 6:23) Segurado pong matuman ang giingon ni Jehova nga pinaagi sa iyang Anak, iyang wad-on ang tanang kadaot nga gihimo ni Satanas, “ang amahan sa bakak.” (Juan 8:44; Roma 16:20) Ug makatuo gyod ta sa saad sa Bibliya nga laglagon ni Jesus ang mga daotan, banhawon ang mga patay, himoong paraiso ang yuta, ug tabangan ta niya nga mahimong hingpit sa umaabot. (Juan 11:​25, 26; 1 Juan 3:8) Dako gyod kaayong pribilehiyo nga gitudloan ta ni Jehova sa kamatuoran, ug gihatagan pod ta niyag kahigayonan nga itudlo ni sa uban.—Mat. 28:​19, 20.

KON NGANONG ISULTI NATO ANG KAMATUORAN

7-8. Importante ba kang Jehova ang atong motibo sa pagsulti sa kamatuoran? Paghatag ug pananglitan. (Marcos 3:​11, 12) (Tan-awa sab ang mga hulagway.)

⁷ Sa ato nang nahisgotan, kinahanglang magmatinud-anon ta aron mahimo tang bahin sa pamilya ni Jehova. Pero aron ato siyang mapalipay, dili lang igo nga mosulti ta sa tinuod. Importante pod kang Jehova kon nganong ato ning isulti. Konsideraha ang nahitabo panahon sa ministeryo ni Jesus dinhi sa yuta. (Basaha ang Marcos 3:​11, 12.) Samtang nagsangyaw siya duol sa Dagat sa Galilea, gitapok-an siya sa daghang tawo. Apil sa miduol niya ang nademonyohan nga mga tawo nga mihapa sa iyang atubangan ug misinggit: “Ikaw ang Anak sa Diyos.” Nganong misulti man ang mga demonyo sa tinuod bahin kang Jesus? Tingali kay gusto nila nga makuha ang pagsalig sa mga tawo, ug sa ngadtongadto madani nila ang mga tawo nga dili simbahon si Jehova. Maong kon buot hunahunaon, gisulti sa mga demonyo ang tinuod, pero daotan ang ilang motibo. Wala gyod magpailad si Jesus nila. Wala siya malipay sa gihimo sa mga demonyo, ug iya pa gani silang gidid-an nga mosulti bahin niya.

⁸ Naa tay makat-onan niini nga asoy. Importante kaayo kang Jehova ang atong mga motibo. Busa dihang magtudlo ta sa kamatuoran, kinahanglang husto ang atong motibo. Ug kon makadawat tag pagdayeg tungod sa mensahe nga atong gisangyaw, atong ihatag ang kadayeganan kang Jehova.—Mat. 5:16; itandi ang Buhat 14:​12-15.

9. Unsay angay natong likayan, ug ngano?

⁹ Konsideraha ang laing situwasyon diin kinahanglan natong likayan nga magpadayeg sa uban. Pananglitan, gisultihan ta sa usa ka ansiyano ug kompidensiyal nga butang pero ato ning gisulti sa uban. Kon ang atong mga gisultihan mahibalo sa ulahi nga tinuod ang atong gisulti nila, mobilib tingali sila ug maghunahuna nga gisaligan ta ug daghang kompidensiyal nga butang. Kon ato nang himoon, motaas tingali ang panglantaw sa uban nato, pero dili gyod na makapalipay kang Jehova. (Prov. 11:13) Ngano? Kay gawas nga gisulti nato sa uban ang kompidensiyal nga mga butang, sayop pod ang atong motibo.

KON UNSAON NATO PAGSULTI ANG KAMATUORAN

10. Unsay gipasabot sa sinultihan nga “kanunayng maayo”? (Colosas 4:6)

¹⁰ Basaha ang Colosas 4:6. Gipahinumdoman ni apostol Pablo ang mga Kristohanon sa Colosas nga ang ilang sinultihan kinahanglan nga “kanunayng maayo.” Unsay iyang gipasabot? Ang orihinal nga Gregong pinulongan nga gigamit dinhi naghatag ug ideya nga ang atong sinultihan kinahanglang dili lang basta makahatag ug kaayohan sa atong kaestorya, kondili buotan pod pagkasulti.

11-12. Nganong kinahanglan tang mag-amping dihang magtudlo sa kamatuoran? Paghatag ug pananglitan. (Tan-awa sab ang mga hulagway.)

¹¹ Kinahanglan natong ipadapat ang tambag ni Pablo nga mag-amping sa atong sinultihan dihang magtudlo sa kamatuoran ngadto sa uban. Ang mga kamatuoran sa Bibliya gipakasamag hait nga espada, nga makapabahin sa kalag ug espiritu. Sa ato pa, mapadayag niini kon unsay tinuod nga pagbati ug motibo sa usa ka tawo. (Heb. 4:12) Pero kon dili ta mag-amping sa atong paagi sa pagtudlo, basig masakitan ang uban sa atong isulti, o masuko pa gani. Sa unsang paagi ni posibleng mahitabo?

¹² Imadyina nga pagsangyaw nimo, naa kay nailaila nga relihiyosong tawo, nga moampo sa mga imahen ug mag-Pasko uban sa iyang pamilya. Tingali gamiton nimo ang Bibliya aron ipatin-aw niya nga ang Diyos dili mouyon nga moampo ta sa mga imahen, ug nga pagano ug sinugdanan ang pagsaulog sa Pasko. (Isa. 44:​14-20; 2 Cor. 6:​14-17) Nagsulti tuod ka sa kamatuoran, pero kon mao dayon to ang imong isulti sa una ninyong panag-estorya, masakitan tingali siya sa imong kaprangka.

13. Sa unsang paagi nato matimplahag asin ang atong sinultihan?

¹³ Si Pablo miingon pod nga kinahanglan natong timplahag asin ang atong sinultihan. Wala na magpasabot nga angay natong usbon o itago ang kamatuoran. Hinuon, gidasig ta niya nga “timplahan” ang atong sinultihan aron ang atong gisangyawan ganahang maminaw sa kamatuoran. (Job 12:11) Pero dili ni kanunayng sayon. Ngano? Hunahunaa ni: Kon naa kay lutoag pagkaon, maghunahuna tingali ka nga kon unsay lami para nimo, lami pod para sa uban. Ingon ana pod kon bahin sa atong sinultihan. Maghunahuna tingali ta nga madawat ra sa tanan ang atong paagi sa pagsulti. Pero ang tinuod, lainlain tag panglantaw. Pananglitan, okey ra sa ubang kultura nga ang usa mosulti gyod sa iyang opinyon bisan pag mas magulang niya ang iyang kaestorya. Pero para sa ubang kultura, wala na magpakitag pagtahod ug makainsulto pa gani. Maong miingon si Pablo nga kinahanglang mahibalo ta “kon unsaon pagtubag ang matag tawo.” Sa ato pa, kinahanglang mag-amping ta sa atong sinultihan aron ang mga tawo ganahang maminaw sa atong gisangyaw nga kamatuoran.

KON KANUS-A NATO ISULTI ANG KAMATUORAN

14. Samtang dinhi si Jesus sa yuta, gitudlo ba niya sa iyang mga tinun-an ang tanan niyang nahibaloan? Ipatin-aw.

¹⁴ Maayo kaayog pagtratar si Jesus sa iyang mga tinun-an, ug gitudloan niya silag daghang butang. (Mar. 6:34) Bisan pa ana, daghan pa silag angayng makat-onan. Gihurot bag tudlo ni Jesus ang tanan niyang nahibaloan? Wala. Nakasabot siya sa limitasyon sa iyang mga tinun-an. Nahibalo pod siya nga dili pa to ang hustong panahon nga ilang mahibaloan ang ubang kamatuoran. Gani, miingon si Jesus nga dili pa nila masabtan ang maong mga kamatuoran niadtong panahona. (Juan 16:12) Unsay atong makat-onan niini?

15. Kinahanglan ba dayon natong itudlo sa atong mga ginatun-an sa Bibliya ang tanan natong nahibaloan? Ipatin-aw. (Proverbio 25:11) (Tan-awa sab ang hulagway.)

¹⁵ Atong nakat-onan sa ehemplo ni Jesus nga dili nato kinahanglang itudlo dayon ang tanan natong nahibaloan. Unsaon nato siya pagsundog? Kinahanglang magpakita tag konsiderasyon sa kahimtang sa atong kaestorya. Konsideraha pananglitan kadtong tawo nga nagasaulog ug Pasko uban sa iyang pamilya. Nahibalo ta nga kini nga selebrasyon wala uyoni sa Diyos kay pagano nig sinugdanan. Karon ibutang ta nga nagsugod mog Bible study mga duha ka semana sa dili pa mag-Pasko. Nagpakita kaha kag konsiderasyon kon isulti dayon nimo ang giingon sa Bibliya bahin sa paganong mga selebrasyon ug magdahom nga dili na dayon siya mag-Pasko? Aw, naa tingali tay mga ginatun-an sa Bibliya nga dali ra makapadapat sa ilang mga nakat-onan. Pero ang uban nagkinahanglag dugang panahon aron mohimog mga kausaban. Matabangan nato sila nga mouswag kon itudlo nato nila ang ubang kamatuoran sa hustong panahon, dihang kaya na nila ning dawaton.—Basaha ang Proverbio 25:11.

16. Unsaon nato pagtabang ang atong mga ginatun-an sa Bibliya nga ‘padayong maglakaw sa kamatuoran’?

¹⁶ Wala nay mas makapalipay pa kay sa pagtabang sa mga tawo nga makakat-on sa kamatuoran bahin kang Jehova. Matabangan nato sila nga ‘padayong maglakaw sa kamatuoran’ kon himoon nato kining mga butanga: Padayon natong ipakita ang atong maayong ehemplo. (3 Juan 3, 4) Paneguroon nato nga ang atong paagi sa pagkinabuhi nagpamatuod nga nagtuo ta sa mga saad diha sa Pulong sa Diyos. Kinahanglang maayo ang atong motibo dihang magsulti sa kamatuoran. Mag-amping ta sa atong isulti dihang magtudlo sa Bibliya, ug ihatag nato ang tanang pagdayeg ngadto kang Jehova. Kon ato ning himoon, mapamatud-an gyod nato nga alagad ta ni Jehova, ang Diyos sa kamatuoran.