Mga Batan-on Nangutana . . .
Ang Pagkahimong Higala sa Diyos Makatabang ba Kanako?
DAGHANG batan-on karon nagdako ubos sa mga pagpit-os nga dili katuohan sa kaliwatang miagi. Ang mga awtor sa usa ka nasodnong surbi bahin sa 160,000 ka batan-on nagbatbat: “Ang mga tin-edyer nag-ingon kanamo nga ang kadaghanan sa ilang suliran maoy tungod sa mga pagpit-os nga sila mobating dili makaarang sa pagsagubang; tungod sa kaluya sa buut ug kaguol nga nagdaog sa ilang pagsalig; ug tungod sa mga ginikanan nga walay pagtagad sa ilang mga problema.” Ikaw tingali sa ingon mobating ang uban dili lang gayod makasabot kon unsa ka sakit ang kinabuhi usahay alang sa usa ka batan-on.
Tinuod, ikaw tingali adunay suod nga higala nga imong kadangpan alang sa emosyonal nga pagpaluyo, ug kini mahimong mohatag ug diyutayng kahupay. Apan dili ba tinuod nga adunay mapait kaayong mga kalisod nga ikaw ray moatubang? Pagkatinuod gayod niini nga usahay ang imong kaugalingong “kasingkasing [lamang] ang nahibalo sa kapaitan sa [imong] kalag.” (Proverbio 14:10) Apan adunay Usa nga bug-os nakasabot kanimo, ug iyang gitanyag ang iyang pagpakighigala. Daghang batan-on ang nakakaplag nga ang pagpakighigala kaniya maoy usa ka dakong tabang bisan sa labing mapait nga mga panahon.
Pagpakighigala sa Diyos
Usa ka batan-on ang gipangutana kon unsa gayoy gipasalamatan niya kang Jehova nga Diyos ug dako. Iyang tubag: “Nga kita makadangat sa pagkaila kaniya ug mahimong iyang suod nga mga higala.” Oo, posible ang pagbaton sa kinamaayohang panaghigalaay sa uniberso! Ang salmista misulat: “Ang pakigsuod ni Jehova anaa kanila nga nahadlok kaniya.”—Salmo 25:14.
“Pakigsuod ni Jehova”—pagkahamili nga higayon! Ang orihinal nga Hebreohanong pulong nagpasabot sa ideya nga bukas, kompidensiyal nga pagpakigsulti sa usa kinsa maoy usa ka linain nga higala. Busa, kini maoy usa ka suod nga relasyong gipasukad sa gugma, usa ka pribilehiyo nga kasuod gumikan sa pagsalig sa usag usa. Ingong usa ka higala sa Diyos, bation nimo nga ang imong tinuod nga bili ingong usa ka tawo ginapabilhan niining usa kinsa tinuod gayod nga nakasabot kanimo. Apan unsa ang mga kaayohan niini nga panaghigalaay?
“Akong Pagsalig Sukad sa Akong Pagkabatan-on”
Daghang batan-on, bisan ug isog nga tan-awon, kulang ug pagsalig sa kinailadman. “Ipahayag nako ang akong mga hunahuna ug adunay laing mopahayag sa ilang mga hunahuna ug bug-os nga mag-usab sa akong mga hunahuna,” mimulo ang 13-anyos nga Judy. “Kulang akog pagsalig sa akong kaugalingon.” Apan, ang atong langitnong Higala nagtagana diha sa iyang sinulat nga Pulong, ang Bibliya, ug espesipikong giya alang sa malamposong pagkinabuhi. Ngani, ang tambag nga gihatag sa basahon sa Bibliya nga Proverbio gidesinyo aron sa paghatag “sa usa ka batan-on ug kahibalo ug katakos sa panghunahuna,” nga magpaarang kaniya sa paghimo sa iyang dalan nga matul-id. (Proverbio 1:1-4; 3:1-6) Kini makahatag kanimog pagsalig! Mahimo nimong mahibaloan ang labing maayong paagi sa pagkinabuhi.
Ang Bibliya, uban sa mga tabang sa Bibliya sama niining magasina, nagtaganag tambag sa halos tanang bahin sa kinabuhi—gikan sa kon unsaon sa pagpilig mga higala ngadto sa hustong tinamdan ngadto sa imong mga ginikanan. (Proverbio 1:8, 9; 13:20) Busa kadtong mamati niining maong pagtultol makahimo sa “paglikay gikan sa mga lit-ag sa kamatayon.” (Proverbio 14:27) Pananglitan, usa ka batan-ong babayeng ginganlag Mae nakakita nga gitiawtiawan lang sa iyang igsoong babaye sa unod ang mga prinsipyo sa Bibliya. Ang maong igsoong babaye gikasubo nga namatay sa usa ka kalit nga kamatayon tungod sa iyang mapatuyangon nga estilo-sa-kinabuhi. Gibatbat ni Mae kon nganong nakasukol siya sa ingon niana nga imoralidad: “Gipalandong nakog maayo ang mga prinsipyo ni Jehova bahin sa moralidad, ug kini nagpalig-on kanako. Kini nga mga prinsipyoha nakatabang kanako sa pagkakita kon unsa ka tinuod si Jehova ug nga ang iyang dalan mao ang labing maayo.”
Apan, ang pagbaton kang Jehova ingong higala naglangkit ug labaw pa kay sa pagkakat-on lamang sa iyang mga sukdanan. Masinati nimo ang iyang personal nga interes sa imong kinabuhi. Ang Bibliya naghisgot bahin kang Haring David, kinsa gitudloan sa Diyos sukad sa iyang pagkabatan-on. Si David nahimong higala sa Diyos, ug bisag nasinati niya ang “daghang kalisod,” nakita mismo niya ang Diyos nga nakiglabot sa iyang kinabuhi. Gihisgotan ni David ang bahin sa “katingalahang mga buhat” sa Diyos alang kaniya ug bahin sa “bukton,” o kusog, ni Jehova nga gipakita diha sa iyang kinabuhi. Tungod nianang maong personal nga mga kasinatian, si David misulat: “Ikaw ang akong paglaom, Oh Soberanong Ginoong Jehova, akong pagsalig sukad sa akong pagkabatan-on.” (Salmo 71:5, 17, 18, 20) Ikaw makabaton niining samang pagsalig sa mabati nimo ang panalangin ni Jehova diha sa imong kinabuhi. Samtang maningkamot ka sa pagsunod sa iyang paggiya—bisan pa sa mga hagit—ikaw tinuod nga nagalakaw uban sa Diyos diha sa gipakahamili nga relasyon.—Itandi ang Genesis 6:9.
Ang Diyos Motabang Kanato sa Pagsunod sa Matarong nga Dalan
Uban ang tanang pagsulay ug mga pagpit-os nga maatubang sa kinabuhi, dili masayon ang pagsunod sa paggiya sa Diyos. Kini ilabinang tinuod kang Peggy, kinsa ingong usa ka batan-on maoy usa ka giyanon sa droga ug usa ka pampam. Nabuntog niya ang iyang pagkagiyanon ug mihimog mga kausaban sa moral pinaagi sa pagtuon sa Bibliya, ug busa naugmad niya ang pakighigala sa Diyos. Apan nagpadayon si Peggy sa pag-atubang sa samang mga pagpit-os nga nagpahinabo kaniya sa pagpangitag kaikyasan pinaagi sa paggamit ug mga droga. Sa gipangutana kon nganong siya nakapadayon sa pagsukol, siya mitubag: “Ako makaingon lamang nga kini maoy tungod sa espiritu ni Jehova.”
Nasayod si Peggy nga ang Diyos naghatag sa iyang balaang espiritu, o aktibong gahom, sa iyang mga higala ug nga kini mohatag kanila ug gahom sa pagkinabuhi sumala sa iyang mga sukdanan. (Buhat 5:32; 1 Corinto 6:9-11) “Karon may mga panahong bation nako ang mga gibati ko niadto, ilabina kon ako mag-inusara,” miadmiter si Peggy, “apan ako nagsugod dayon sa pag-ampo. Ang katakos sa pagbuntog niining mga problemaha maoy labaw nga nakapalipay kanako kay sa bisan unsang butang nga sukad nahimo nako sa akong kinabuhi.” Pagkamakapadasig nga masayod nga ingong usa ka higala, ang Diyos makatabang kanato “sumala sa iyang gahom nga nagalihok sulod kanato [ug] makahimo sa pagbuhat ug labaw pa sa labihan kamadagayaon nga lapaw sa tanang butang nga atong ginapangayo o ginahunahuna.”—Efeso 3:20.
Ang espiritu sa Diyos motabang kanato sa pag-ugmad sa mga hiyas sama sa taas-nga-pailob, kalumo, ug pagpugong-sa-kaugalingon. (Galacia 5:22, 23) Lain pa, diha sa mga kongregasyon sa mga Saksi ni Jehova, ang mga ansiano, o mga magbalantay, nga gitudlo sa balaang espiritu, gitagana sa Diyos aron sa paghatag ug praktikal nga tabang. Si Peggy midugang: “Nabatonan nako ang daghang pagpaluyo gikan sa kongregasyon, ilabina sa mga ansiano. Kadto maoy usa ka dakong tabang.”
“Ang Bato sa Akong Kasingkasing”
“Ang usa ka higala nahigugma sa tanang panahon, ug mahimong usa ka igsoon sa mga panahon sa kasamok.” Matod pa sa Proverbio 17:17 diha sa The Basic Bible. Ilabinang gikinahanglan ang usa ka higala “sa mga panahon sa kasamok.” Ang salmistang si Asap nakaagom ug tumang emosyonal nga kalisod, bisan pa siya miduol sa Diyos ingong usa ka higala. Busa, bisan tuod nga ang iyang “kasingkasing mibatig kangutngot” tungod sa kasakit sa galamhan, siya miingon: “Ang Diyos mao ang bato sa akong kasingkasing.” (Salmo 73:21, 26, 28) Si Jehova, nga nakasabot gayod sa gibati ni Asap, naghatag kaniyag emosyonal nga pagpaluyo. Si Jehova maoy usa ka nagpalig-ong impluwensiya kang Asap aron siya dili mawad-ag paglaom ug kaisog.
Ang atong langitnong Higala sa ingon usab mahimong samag-bato nga haligi alang kanimo sa panahon sa kalisdanan. Napamatud-an kini sa usa ka tin-edyer pinaagi sa personal nga kasinatian. Sa dihang nag-13 anyos si Bonnie, ang ubang mga dalagita sa iyang gamayng tunghaan sa nasod nagsugod sa usa ka mapintas, mabutangbutangong tabi bahin kaniya. Alang kang Bonnie daw ang tanan mituo niini nga kabakakan. Daghan sa iyang klasmet bugnaw ug pagtagad kaniya, gianggaan pa gani siya sa makauulaw nga mga ngalan. “Daghang gabii nga mopauli ako sa balay ug mohilak,” miingon si Bonnie. “Gibati gani nako nga gustong magtubok sa akong kaugalingon tungod kay ako gisakitan pag-ayo sa sulod.” Siya midangop sa pipila sa iyang mga higala alang sa pagpaluyo. “Naningkamot ako sa pagpakigsulti sa mga tawo, apan sila daw dili makasabot. Giisip nila ang akong problema nga dili angayng kabalak-an. Usahay ako mibating nag-inusara pag-ayo.” Unsay nakatabang kaniya nga dili mawad-ag paglaom sa tunga niining maong kasamok? Siya nagpadayon: “Kon dili pa unta kang Jehova, naghikog na unta ako. Gihigugma ko siya pag-ayo. Siya mao ang akong labing suod nga higala.” Karon siya nasayod nga ang iyang pagpakighigala sa Diyos ang nakatabang kaniya sa paglahutay nianang makapagun-ob nga kasinatian sa emosyon.
Ang pagkasayod nga nakasabot si Jehova sa atong mga kahimtang ug nasayod pag-ayo sa nahitabo maoy usa ka dakong paghupay kon ang uban dili magpakita kanatog pagkasensitibo nga gidahom nato. Lain pa, ang pagkasayod nga ang atong Higala mao “ang Amahan sa malumong mga kaluoy” maoy usa ka dakong tabang kon kita gitratar nga dili maluloton o gani giabusohan. Usahay mahimong hukman kita sa atong kaugalingong mga kasingkasing, apan “ang Diyos mas labaw kay sa atong mga kasingkasing ug nahibalo sa tanang butang.” (2 Corinto 1:3, 4; 1 Juan 3:20) Ang pagbaton sa panghunahuna ni Jehova sa usa ka butang mahimong tinuod nga makapahupay. Pananglitan, usa ka 13-anyos nga batang lalaki grabeng giabusohan sa tulo ka lalaki. “Human niadto, ako naulaw pag-ayo ug gibasol ko ang akong kaugalingon sa nahitabo kanako,” siya miadmiter. “Ako nasubo pag-ayo.” Dayon siya misugod sa pagpanukiduki diha sa gipasukad sa Bibliya nga mga publikasyon sa Watch Tower Society bahin sa ulohan sa panglugos. “Sa dihang nabasa ko kining impormasyona, wala ako makapugong sa akong emosyon ug ako mihilak. Gibati nako nga daw usa ka bug-at nga luwan ang gikuha sa akong mga abaga. Ako usa ka biktima. Pinaagi sa pagsalig kang Jehova, sa pamilya, ug sa mga higala, ako nakasugakod ra niining masamok nga panahon.” Pagkadakong pagpaluyo ang gitagana niadtong mga pulong nga gipasukad sa Bibliya!
Ang pagpakighigala sa Diyos makatabang sa daghang paagi! Kita makabaton ug tinuod nga pagsalig sa kinabuhi, makaugmad ug kalig-on sa sulod sa pagsunod sa dalan sa Diyos, ug adunay samag-bato nga pagpaluyo panahon sa kalisdanan. Apan sa unsang paagi matukod nato ang maong panaghigalaay? Ang umaabot nga artikulo niini nga seryal ang mobatbat.
[Hulagway sa panid 13]
Ang Diyos mahimong ‘bato sa imong kasingkasing’