Pito ka Panultihon

ANG mga panultihon sa ubos mabasa diha sa usa ka karaang basahon nga punog mga panultihon nga praktikal ug aplikado karon. Tagda kon sa unsang paagi kini makatabang nimo sa hustong paggamit sa kuwarta.

1. “Ang mahigugmaon lamang sa salapi dili matagbaw sa salapi, ni sa kinitaan si bisan kinsa nga mahigugmaon sa bahandi.” (Ecclesiastes 5:10) Ang nagsulti niini dili usa ka tawong masinahon ug kabos. Si Haring Solomon sa Israel, nga usa sa kinadatoang tawo nga nabuhi sukad, maoy nagsulat niini base sa iyang kaugalingong kasinatian ug obserbasyon. Ingon usab niana ang gipamulong sa adunahang mga tawo niining modernong panahon.

2. “Kon kita adunay makaon ug ikabesti, kita magmakontento na niining mga butanga. Hinunoa, sila nga determinadong madato mangahulog sa tentasyon.” (1 Timoteo 6:8, 9) Kanang mga pulonga gisulat ni apostol Pablo, kinsa mibiya sa iyang dungganong karera ug nahimong sumusunod ni Jesu-Kristo. Lahi sa ubang lider sa relihiyon karon, si Pablo wala manapi sa iyang mga gitudloan o mga kauban. Hinunoa, siya matinud-anong nakaingon: “Wala ko kaibgi sa hinakog ang plata o bulawan o sapot ni bisan kinsa. Kamo nahibalo nga kining mga kamota nag-atiman sa akong mga panginahanglan ug sa akong mga kauban.”—Buhat 20:33, 34.

3. “Kinsa kaninyo nga buot magtukod ug torre nga dili una molingkod ug kuwentahon ang gasto, aron tan-awon kon siya aduna bay igo aron sa paghuman niini?” (Lucas 14:28) Ang ilustrasyon ni Jesus ikapadapat sa usa ka situwasyon nga imong maatubang: Sa dihang mamalit, ilabinag credit card ang gamiton, mopalit ka ba dayon o maghunahuna usa kon makaarang ka ba sa pagbayad niana? Gikinahanglan ba gayod nimo kana?

4. “Ang manghulam ulipon sa nagpahulam.” (Proverbio 22:7, Contemporary English Version) Nakita sa di pa dugayng pinansiyal nga krisis sa kalibotan nga dili maalamon ang pagpangutang gamit ang credit card ug ang uban pang matang sa pagpangutang. “Sa aberids, sagad ang usa ka tawo utangan ug kapin sa $9,000 sa upat o kapin pang mga credit card,” miingon si Michael Wagner sa iyang librong Your Money, Day One nga giimprenta niadtong 2009.

5. “Ang daotan nagapangutang ug dili mobayad, apan ang matarong nagapakitag kaluoy ug nagahatag ug mga gasa.” (Salmo 37:21) Para sa uban, ang pagdeklarar ug pagkabangkarota maoy kinadaliang paagi sa paglingkawas sa utang. Apan kadtong buot makabaton ug maayong relasyon sa Diyos dili lang matinud-anong mobayad sa ilang utang, kon makaarang sila, kondili mopaambit usab sa ilang nabatonan ngadto sa uban.

6. “Batan-on ako kaniadto, ako natigulang na usab, apan wala ako makakita ug matarong nga gibiyaan sa bug-os, ni sa iyang kaliwat nga nagapangita ug tinapay.” (Salmo 37:25) Kining mga pulonga gisulat sa usa ka tawong nakasinatig dili-makataronganong pagtratar. Siya nagtago-tago sa daghang tuig, nga mopuyo usahay sa mga langob ug modangop sa laing nasod. Kining maong tawo, si David, nahimong hari sa Israel. Napamatud-an niya sa iyang kinabuhi nga tinuod ang mga pulong sa ibabaw.

7. “Adunay labaw nga kalipay sa paghatag kay sa pagdawat.” (Buhat 20:35) Gisulti kana sa labing bantogang tawo nga nabuhi sukad. “Tungod sa kalipay nga gibutang sa iyang atubangan,” gigamit ni Jesus ang iyang kinabuhi dinhi sa yuta sa pag-alagad sa uban. Karon nagkinabuhi na siya sa langit ingong imortal nga espiritung persona ug anaa sa tuong kamot sa “malipayong Diyos,” si Jehova.—Hebreohanon 12:2; 1 Timoteo 1:11.

Ang labing maayong paagi sa paggamit sa atong kinabuhi mao ang pagsundog sa panig-ingnan ni Jesus sa paghimo kutob sa maarangan sa pagtabang sa uban. Segurado nga mouyon ka nga mas maayong magdaginot aron dunay ikahatag, kay sa magpaturagas ug gasto.