Mga Linaing Hitabo sa Bibliya Salmo 42 ngadto sa 72

Paghulat Kang Jehova

Makaatubang ang mga alagad ni Jehova ug mga pagsulay sa pagtuo uban ang pailob tungod kay ang ilang Diyos mao ang ilang Dalangpanan ug Manluluwas. Unsa ka maayo sa pagkapadayag niini diha sa Ikaduhang Basahon sa mga Salmo! Oo, ang Salmo 42 ngadto sa 72 nagpamatuod nga kita makalahutay kon mainampoon kitang maghulat kang Jehova nga molihok alang kanato.

“Paghulat sa Diyos”

Palihog basaha ang Salmo 42 ngadto sa 45. Nasubo ang usa ka bihag nga Levihanon nga dili siya makaadto sa sangtuwaryo ni Jehova, apan ang kontento siya sa “paghulat sa Diyos” sa paglihok ingong iyang Manluluwas. (Salmo 42, 43) Dayon miabot ang pangaliyopo alang sa usa ka nameligrong nasod, tingali nagpunting sa pagsulong sa Asiria diha sa Juda sa mga adlaw ni Haring Hezekias. (Salmo 44) Sunod, usa ka awit sa harianong kasal nagpunting sa Mesiyas, si Jesu-Kristo.—Salmo 45.

◆ 42:1—Sa unsang paagi ang salmista kaamgid sa ‘lagsaw nga nangita sa tubig’?

Sa usa ka katarongan, nabihag kining maong Levihanon. Dako kaayo ang iyang paghandom nga makasimba sa sangtuwaryo ni Jehova nga gibati niyang sama siya sa gigukod, giuhawng lagsaw, o baye nga usa, nga nangandoyg tubig diha sa awaaw, walay tubig nga nasod. Siya ‘giuhaw,’ o naghandom, kang Jehova ug sa pribilehiyo sa pagsimba sa Diyos diha sa Iyang sangtuwaryo.​—Bersikulo 2.

◆45:1—Unsang “maayong butang” ang nakapukaw sa kasingkasing sa salmista?

Ang bahin niini nga salmo giaplikar kang Jesu-Kristo. (Salmo 45:6, 7; Hebreohanon 1:8, 9) Busa ang kasingkasing sa salmista napukaw sa umaabot nga hitabo​—ang pagtukod sa Mesiyanikong Gingharian sa 1914. Ang mga Saksi ni Jehova, usab, napukaw sa pagwali niining “maayong butang.”

Pagtulon-an Alang Kanato: Ang eksperyensiya sa salmista nga nabihag angay nga mopalihok kanato sa pagpakitag lalom nga pagpabili sa pag-ubanay nga atong gitagamtam karon uban sa katawhan ni Jehova. Kon mabilanggo kita tungod sa paglutos nga temporaryong makapugong kanato nga makauban sila, kita makapalandong sa nangaging mga kalipay sa balaang pag-alagad ug mag-ampo nga makaantos samtang kita “maghulat sa Diyos” sa pagpabalik kanato sa aktibong pag-ubanay uban sa iyang mga magsisimba.​—Salmo 42:4, 5, 11; 43:3-5.

Atong Maluloy-ong Dalangpanan

Basaha ang Salmo 46 ngadto sa 51. Si Jehova, nga atong Dalangpanan, mopahunong sa mga gubat. (Salmo 46) Siya mao ang “Hari sa tibuok yuta,” ug kining dili mabuntog nga Tigpanalipod mao ang atong Diyos sa walay kataposan. (Salmo 47, 48) Kinahanglang maghulat ang mga dinaogdaog kang Jehova, apan ang tanan nga ‘mohatag ug pasalamat ingong ilang halad’ sa ulahi “makakita sa kaluwasan sa Diyos.” (Salmo 49, 50) Kon kita makasala apan mahinulsolon, sama kang David sa iyang pagpakasala uban kang Bathseba, luwason kita sa Diyos gikan sa pagkasad-an sa dugo tungod kay ang ‘usa ka nadugmok ug naguol nga kasingkasing siya dili magatamay.’​—Salmo 51.

◆ 46:2—Sa unsang paagi “ang yuta makaagi ug kausaban”?

Bisan ug mangawagtang ang mga bukid ngadto sa dagat tungod sa kinaiyanhong pag-uyog sa yuta, kadtong may pagsalig sa Diyos walay angay nga kalisangan. Bisan unsa pay mahitabo, sila makabaton ug dili matarog nga pagsalig kang Jehova ingong ilang Dalangpanan.

◆ 51:5—Unsang salaa ang gipasabot ni David?

Wala siya magpasabot nga ang mga relasyon sa kaminyoon, pagsamkon, ug pagpanganak makasasala; ni nagpunting siya sa usa ka espisipikong sala sa iyang inahan. Hinunoa, midawat siya sa iyang kaugalingong pagkamakasasala ingong kaliwat ni Adan. (Job 14:4; Roma 5:12) Gipakitaan ni Jehova si David ug kaluoy dili tungod lamang sa pakigtugon sa Gingharian kondili sa iyang paghinulsol usab.​—2 Samuel 7:12-16.

Pagtulon-an Alang Kanato: Takdo ang Salmo 46 sa panahon dihang ang Jerusalem gihulga sa mga Asiryanhon. Nahibalo nga ‘ang Diyos mao ang atong Dalangpanan, ang madali nga katabang sa panahon sa kalisdanan,’ miampo si Haring Hezekias kang Jehova, ug milagrosong giluwas ang siyudad. (2 Hari, kapitulo 19) Dihang mahiagom sa kalisdanan, kinahanglang atong himoon usab ang Diyos nga atong Dalangpanan. Sa unsang paagi? Pinaagi sa pagsalig kaniya, sa pagsunod sa iyang Pulong, ug sa pagpabilin sa iyang organisasyon.

Gipasalig ang Kaluwasan

Palihog basaha ang Salmo 52 ngadto sa 57. Lukahon sa Diyos ang daotan ‘gikan sa yuta sa mga buhi’ ug “isabwag ang mga bukog” sa tanang magabatok sa Iyang katawhan. (Salmo 52, 53) Dihang gipangita ni Saul, masaligon si David sa balaang kaluwasan, ug ingong biktima sa pagbudhi, iyang gisangon ang iyang palas-anon diha kang Jehova. (Salmo 54, 55) Kontento ang salmista sa paghulat sa Diyos nga motapos sa mga kalisod.​—Salmo 56, 57.

◆ 52:8—Sa unsang paagi sama sa kahoyng olibo ang usa nga matarong?

Ang kahoyng olibo mahimong maglarawan sa pagkamabungahon, katahom, ug kahalangdon. (Jeremias 11:16; Oseas 14:6) Niini nga salmo, ang daotang tiglaraw nga modangat sa daotang kataposan gitandi sa tawong matarong nga panalipdan ug pauswagon sama sa lanubong kahoyng olibo.

◆ 54:1—Nganong miingon si David, “Pinaagi sa imong ngalan luwasa ako”?

Ang balaang ngalan walay mistikanhong gahom apan makahawas sa Diyos mismo. Busa, pinaagi niini nga pangaliyopo, midawat si David nga may katakos si Jehova sa pagluwas sa Iyang katawhan. (Exodo 6:1-8) Bisag gitug-an sa mga Sipihanon kang Haring Saul ang nahimutangan ni David, naundang ang pagpangita ni Saul kang David tungod sa pagsulong sa mga Pilistihanon sa Israel. (1 Samuel 23:13-29; Salmo 54, superscription) Busa giluwas ni Jehova si David.

Pagtulon-an Alang Kanato: Ang mga kaaway ni David nangalot ug gahong sa iyang atubangan. (Salmo 57:6) Kining maong gahong sa pagbitik ug tawo nagkahulogang peligrosong mga kahimtang kun mga paglipot nga nakahatag kapeligrohan sa mga alagad ni Jehova. Apan ang mga kaaway sa katawhan sa Diyos mabitik sa ilang kaugalingong daotang mga laraw. Busa kon mosalig kita kang Jehova ug mag-amping, piho ang atong kaluwasan.​—Proverbio 11:21; 26:27.

“Paghulat Diha sa Kahilom”

Basaha ang Salmo 58 ngadto sa 64. Tungod sa kabalaka sa inhustisya, miampo si David ug balaang panimalos batok sa daotan. (Salmo 58, 59) Dihang hapit nang mapildi, nangaliyopo siyag kaluwasan ug masaligon nga yatakan sa Diyos ang mga kaaway. (Salmo 60) Si Jehova nahimo nang dalangpanan ni David; busa hilom siyang naghulat sa kaluwasan. (Salmo 61, 62) Napugos sa pag-adto sa kamingawan, tingali dihang mialsa si Absalom, nakakaplag kalipay si David sa ‘landong sa mga pako sa Diyos.’ (Salmo 63) Miampo usab ang salmista ug panalipod gikan sa “mga mamumuhat ug daotan” ug masaligon nga makakaplag salipod ang matarong diha kang Jehova.​—Salmo 64.

◆ 58:3-5—Sa unsang paagi samag bitin ang daotan?

Ang pagpamakak, mapasipalahong mga pulong sa daotan makapukan sa dungog sa biktima, sama nga makapatay ang lala sa bitin. (Salmo 140:3; Roma 3:13; Santiago 3:8) Dugang pa, ang mga daotan “bungol sama sa kobra nga nagasungsong sa ilang igdulungog,” kay modumili sila sa pagpaminaw ug sa pagdawat sa pagtultol.

◆ 63:3​—Sa unsang paagi ang mahigugmaong kalulot sa Diyos “mas maayo kay sa kinabuhi”?

Ang kinabuhi nga bulag gikan sa Diyos kulang ug tinuod nga katuyoan. Apan ang maunongong gugma ni Jehova nga gipakita diha kang David naghatag tinuod nga kahulogan sa iyang kinabuhi. Ang pagkasuod uban sa Diyos makahatag sa tanang panahon ug makahuloganong kinabuhi alang sa iyang gikahimut-ang mga alagad, nagapasalig kanila sa balaang tabang ug pagtultol, ug nakahimo kanila sa pagtan-aw sa unahan sa usa ka walay kataposan malipayong pagkinabuhi.

Pagtulon-an Alang Kanato: Kontento si David sa “paghulat sa hilom” nga molihok ang Diyos alang kaniya. (Salmo 62:1-7) Sanglit nagpailalom sa kabubut-on ni Jehova, mibati siya nga may kasegurohan ug masaligon sa Diyos. Kon kita may ingon nga pagsalig kang Jehova, “ang kalinaw sa Diyos” mobantay sa atong mga kasingkasing ug kaisipan samtang nagahulat kita sa balaang kaluwasan gikan sa mga kaaway ug mga kasakitan.​—Filipos 4:6, 7; Salmo 33:20.

Himayaa ang Atong Manluluwas

Basaha ang Salmo 65 ngadto sa 72. Gihimaya si Jehova ingong Tuboran sa dagayang ani, ulan, labong nga mga sibsibanan, ug sa mga panon sa kahayopan. (Salmo 65) Angay nga maghimog mga awit “sa paghimaya sa iyang ngalan.” (Salmo 66) Kinahanglang dayegon siya, ug himayaon siya ingong “Diyos sa mga buhat sa pagluwas.” (Salmo 67, 68) Ang mga pag-antos sa Mesiyas gitagna, ug gibayaw si Jehova ingong “Manluluwas” kansang tabang mao ang gihulat sa salmista. (Salmo 69-71) Ang maong pagsalig balosan, kay ang tibuok-yutang kauswagan ug kaluwasan gikan sa panglupig piho diha sa mahimayaong pagmando sa Mesiyas.​—Salmo 72.

◆ 68:11—Kinsa ang naglangkob sa “dakong panon” sa mga babaye?

Human nga gigamit sa Israel ang mga sundalo sa pagpukan sa kaaway, giwali sa mga babayeng Israelinhon ang kadaogan pinaagi sa musika, awit, ug pagsayaw. (1 Samuel 18:6, 7; itandi sa Exodo 15:20, 21.) Sa pagtuman sa “mga pahayag” kun sugo sa Diyos, ang mga lalaki sa Israel nakiggubat sa kaawayng mga nasod sa Yutang Saad ug gipukan sila. Maayong balita kini nga iwali sa kababayen-an sa Israel ingong kasaulogan sa kadaogan. Karon, ang mga babayeng ministro nagadula ug dakong bahin ingong mga magwawali sa Gingharian nga nagapahibalo sa mga nasod nga sila sa dili madugay pukanon sa Mesiyanikong Hari, si Jesu-Kristo.

◆ 69:23—Nganong gihangyo ang Diyos sa pagpakurog sa mga hawak sa kaaway?

Kon manghugot ang malig-ong kaunoran sa hawak, mohatag kinig dakong kusog. Apan ang pagkawala sa kusog moresulta dihang mangurog ang hawak, tingali tungod sa kalisang. Niini nga pagpangaliyopog kaluwasan, mihangyo si David sa Diyos nga kuhaan ang iyang mga kaaway sa ilang kusog nga wala gamita sa maayo.

◆ 72:16—Unsay kahulogan niini nga pagkamabungahon?

‘Ang bunga sama sa Lebanon’ tingali nagpasabot sa mga uhay nga lanubong nanubo ug tag-as nga kadto nahisama sa lunhaw, tag-as nga mga punoan sa Lebanon. Tingali nanglipang diha sa mga lagwerta hangtod ngadto sa tuktok sa mga bukid, ang tag-as, bus-ok nga mga lindog nga nagdala sa mabug-at nga mga lusok sa uhay mahimong itandi sa nangibabaw, dagkong mga sidro sa Lebanon. Nagpunting kini sa tagsaon dagayang ani sa panahon sa pagmando sa Mesiyas. Ug ang kamatuoran nga ‘sila nga anaa sa siyudad mamutot sama sa mga talamnon sa yuta’ nagpasabot nga ang mga sakop ni Jesus sa yuta daghan kaayo.

Pagtulon-an Alang Kanato: Ang salmista miampo: “Tungod kay imong gipakita kanako ang daghang mga kasakit ug mga kaguol, hinaot nga buhion mo [Jehova] ako pag-usab.” (Salmo 71:20) Bisan ug dili mohatag ang Diyos ug mga kalisdanan, gitugotan kita niya nga masulayan aron makahatag tubag sa iyang Tigbiaybiay, ang Yawa. (Santiago 1:13; Proverbio 27:11) Dili gayod kita sulayan ni Jehova nga labaw sa atong maarangan ug motabang kanato nga makalabang sa atong mga pagsulay pinaagi sa malig-ong pagtuo. (1 Corinto 10:13; 1 Pedro 1:6, 7) Nakaagi ang dinihogang mga Kristohanon ug “daghang mga kasakit ug kagul-anan” dihang gilutos sila sa kinatayuktokan sa Gubat sa Kalibotan I. Apan ‘gibuhi sila’ pag-usab ni Jehova sa 1919, ug sila nagpadayon sa pag-alagad sa Gingharian, sa ulahi giduyogan sa “dakong panon.” (Pinadayag 7:9) Tungod niini, angay gayod nga dayegon ang Dakong Manluluwas.

Ang pagtuo gikinahanglan aron kita makahulat sa Diyos nga molihok alang kanato. Hinaot nga maghulat kita sa hilom tungod kay kita walay mahimo sa pagbag-o sa atong malisod nga mga kahimtang. Bisan pa, kita makaantos, sama sa salmista, kon kontento kita sa paghulat kang Jehova.