Komosta ang Umaabot?
Nganong ang pakigdait tali sa tawo ug mananap makapadani kaayo? Tungod kay ang mga tawo sa sinugdan gilalang aron may pakigdait uban sa mga hayop, bisan kadtong giklasipikar nga ihalas.
Sa gibuhat sa Diyos ang unang lalaki ug babaye, iyang gibutang sila sa usa ka dapit nga paraiso sa yuta aron sa pagkalipay sa kinabuhi. Maoy iyang katuyoan nga sila magbaton ug mga anak ug magpauswag sa mga utlanan niadtong orihinal nga Paraiso hangtod nga malukop niana ang tibuok nga yuta. Nianang tibuok nga dominyo, ang mga hayop makigdaitong magpasakop sa katawhan.
Ang asoy sa Genesis nag-ingon: “Magabuot sila sa mga isda sa dagat ug sa naglupad nga mga linalang sa mga langit ug sa aghop nga kahayopan ug sa tibuok yuta ug sa tanang naglihok nga hayop nga nagakamang sa yuta. . . . Human niana nakita sa Diyos ang tanang butang iyang gibuhat ug, tan-awa! kadto maayo kaayo.”—Genesis 1:26-31; 2:9.
Kining pagsakop sa kahayopan maoy dili pinaagi sa pagpamintas. Ang mga tawo ug mga hayop gituyo nga magpuyong magkauban diha sa pakigdait. Kini masabot sa kamatuoran nga sa dihang ang mga hayop miagi sa atubangan sa tawo aron manganlan, siya dili armado. Ug walay paghisgot sa kahadlok nga gipadayag sa tawo kaha o sa mananap.—Genesis 2:19, 20.
Orihinal nga Katuyoan Pagatumanon
Ikalipay, kanang orihinal nga katuyoan sa Diyos sa dili madugay pagatumanon, sa dihang ang tanang ginama-sa-tawong mga kagamhanan pulihan sa Gingharian sa Diyos, nga magamando gikan sa langit. (Daniel 2:44; Mateo 6:9, 10) Tungod kay bug-os matukod pag-usab ang pagmando sa Diyos ibabaw sa tibuok yuta, mamatuman ang orihinal nga katuyoan sa Diyos alang sa yuta ug sa mga tawo ug mga hayop nga nagpuyo niini.
Ang makapabag-ong mga epekto sa matarong nga pagmando sa Diyos maayong pagkabatbat diha sa daghang tagna sa Bibliya. Pananglitan, matikdi kon unsay gisulat ni Isaias ubos sa inspirasyon: “Ang lobo mopuyo sa makadiyut uban sa laking karnero, ug ang leopardo mohigda uban sa nating kanding, ug ang nating baka ug ang balhiboong nating leyon ug ang pinatambok nga hayop mag-ipon; ug ang usa lang ka gamayng bata ang magamando kanila. Ug ang baka ug ang uso magkauban sa pagsibsib; ang ilang mga nati magkauban sa paglubog. Ug bisan ang leyon mokaon sa kompay sama sa torong baka. Dili nila pagadaoton o pagalaglagon ang tibuok ko nga bukid nga balaan; tungod kay ang yuta mapuno gayod sa kahibalo ni Jehova ingon sa katubigan nga nagatabon sa dagat mismo.”—Isaias 11:6, 7, 9.
Ang ubang mga tagna nagpakita usab sa dakong pakigdait nga maglungtad diha sa bag-ong kalibotan sa Diyos. Niining bahina si Miqueas mitagna: “Ilang pagasalsalon ang ilang mga espada ngadto sa mga punta sa daro ug ang ilang mga bangkaw ngadto sa mga galab. Sila dili mobakyaw ug espada, ang nasod batok nasod, ni sila makakat-on pa sa gubat. Ug sila magalingkod, ang matag usa ilalom sa iyang parras ug ilalom sa iyang kahoy nga igira, ug walay magapakurog kanila.”—Miqueas 4:3, 4.
Walay mausa sa ihalas nga mga hayop ang magtugaw unya sa pakigdait sa katawhan, kay ang matagnaong pulong sa Diyos nag-ingon: “Ako magbuhat uban kanila sa usa ka tugon sa pakigdait, ug pagawagtangon ko ang madinaotong mapintas nga mananap gikan sa yuta, ug sila magapuyo sa kamingawan sa kasegurohan ug matulog sa kalasangan. . . . Ug sila maanaa sa ilang yuta sa kasegurohan.”—Ezekiel 34:25, 27.
Busa ang pakigdait ug panag-uyon nianang tibuok nga Paraiso makompleto na. Kana ang hinungdan ang mga kahimtang didto mabatbat diha sa kataposang basahon sa Bibliya niining paagiha: “[Ang Diyos] magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.’ Ug ang Usang naglingkod sa trono miingon: ‘Tan-awa! Ginabag-o Ko ang tanang butang.’ Usab, siya nag-ingon: ‘Isulat mo, kay kining mga pulonga kasaligan ug matuod.’”—Pinadayag 21:4, 5.
Oo, kasaligan ug matuod. Kini nagkahulogan nga kita makasalig sa mga saad sa Diyos, kay lahi sa mga tawong dili hingpit, siya may gahom, kaalam, ug determinasyon sa pagtuman sa iyang mga katuyoan. Sumala sa giingon sa usa sa matinumanong mga alagad sa Diyos sa karaang mga panahon: “Walay usa ka pulong gikan sa tanang maayong pulong nga gisulti kaninyo ni Jehova nga inyong Diyos ang napakyas. Silang tanan nangatuman alang kaninyo. Walay usa ka pulong niana ang napakyas.”—Josue 23:14; tan-awa usab ang Isaias 55:11.
Kita makabaton sa samang pagsalig nga sa dili madugay, sa bag-ong kalibotan sa Diyos, ang iyang orihinal nga katuyoan alang niining yutaa, alang sa mga tawo, ug alang sa mga hayop mamatuman. Ang hinatag-sa-Diyos nga pakigdait mahimong kamatuoran sa tibuok yuta. Ug dili lamang ang maong pakigdait maghari taliwala sa mga tawo kondili kini ipasibaw usab diha sa mga kahayopan.