LIRIO

Ang Hebreohanong termino nga shu·shanʹ ug ang katumbas niini nga Gregong termino nga kriʹnon, nga parehong gihubad nga “lirio,” lagmit naglakip sa daghan kaayong matang sa mga bulak, sama sa mga tulip, anemone, hasinto, iris, ug gladioli. Matod ni Koehler ug Baumgartner, ang Hebreohanong ngalan naggikan sa usa ka Ehiptohanong pulong nga nagkahulogang “dakong bulak.” (Lexicon in Veteris Testamenti Libros, Leiden, 1958, p. 958) Ang Gregong historyador nga si Herodotus (II, 92) naghisgot bahin sa Ehiptohanong lotus ingong “lirio,” ug daghan ang nagtuo nga ang mga paghisgot diha sa Kasulatan maylabot sa “lirio” o “samag lirio ang pagkagama” nga dayandayan, nagtumong sa Ehiptohanong lotus, nga usa ka lirio sa tubig. (1Ha 7:​19, 22, 26; 2Cr 4:5) Bisan pa niana, tungod kay ang lotus gigamit pag-ayo diha sa bakak nga relihiyosong simbolismo sa Ehipto, ang pag-isip sa lirio nga mao ang lotus maoy kuwestiyonable.

Ang mga lirio sa rekord sa Bibliya makaplagan diha sa ubos nga kapatagan, taliwala sa tunokong mga bunglayon, ug sa mga sibsibanan diin manibsib ang mga panon sa mga hayop ug mga gasela. (Aw 2:​1, 2, 16; 4:5) Kini tingali gitanom usab diha sa mga tanaman (Aw 6:​2, 3), ug gihisgotan ang humot nga alimyon niini. (Aw 5:13) Lagmit maylabot sa katahom sa lirio nga si Oseas, sa dihang mitagna sa pagpasig-uli sa Israel, naghisgot sa panahon sa dihang ang katawhan sa Diyos mamulak sama sa usa ka lirio.​—Os 14:5.

Aron ipakita nga dili angayng hatagag dakong pagtagad ang materyal nga mga butang, si Jesu-Kristo nagpunting nga si Solomon bisan sa tanan niyang kahimayaan wala masul-obig ingon katahom sa mga lirio sa kapatagan. Gituohan nga lagmit diha sa hunahuna ni Jesus ang anemone. Apan, lagmit siya naghisgot lamang sa samag-lirio nga mga bulak sa kinatibuk-an, ingon sa makita sa kamatuoran nga ang “mga lirio sa kapatagan” gigamit kauban sa “mga tanom sa kapatagan.”​—Mat 6:28-30; Luc 12:​27, 28.

Ang kahulogan sa mga ekspresyong “Lirio,” “Mga Lirio,” nga makita diha sa mga superskripsiyon sa Salmo 45, 60, 69, ug 80, wala mahibaloi.