Siya Mao ang Mag-uuna sa Mesiyas
USA ka lapad nga bakos nga panit nagpalutaw sa iyang naitom-sa-adlaw nga panit. Nagsul-ob ug bisti nga gama sa balhibo sa kamelyo, siya usa gayod ka manalagna nga tan-awon. Daghan ang nanuol kaniya sa suba sa Jordan. Didto kining madanihong tawo maisogong mipahayag nga siya andam na sa pagbawtismo sa mahinulsolong mga makasasala.
Ang mga tawo natingala! Kinsa kining tawhana? Unsay iyang katuyoan?
Si Jesu-Kristo miingon bahin niining tawhana: “Nganong nanggula man kamo? Sa pagtan-aw ug propeta? Oo, ako magasulti kaninyo, ug labaw pa kaayo kay sa usa ka propeta. . . . Taliwala kanilang natawo sa mga babaye wala pay gibangon nga labaw kay kang Juan nga Bawtista.” (Mateo 11:9-11) Nganong ingon ka talagsaon kaayo nga tawo si Juan? Tungod kay siya mao ang mag-uuna sa Mesiyas.
Gitagna ang Iyang Buluhaton
Kapin sa 700 ka tuig una pa matawo si Juan, gipahibalo ni Jehova nga kining tawhana nanawag sa kamingawan: “Andama ninyo ang dalan ni Jehova! Tul-ira ang halapad nga dalan alang sa atong Diyos diha sa patag nga kamingawan.” (Isaias 40:3; Mateo 3:3) Kapin sa 400 ka tuig una pa matawo si Juan, ang Labing Gamhanang Diyos miingon: “Tan-awa, akong ipadala kaninyo si Elias ang manalagna sa dili pa moabot ang dako ug makapukawg-kahadlok nga adlaw ni Jehova.” (Malakias 4:5) Ang kamatuoran nga si Juan nga Bawtista gipanganak nga mga unom ka bulan nga una kay kang Jesus dili sulagma lamang, ni nahitabo lamang kini tungod sa kinaiyanhong mga paagi. Sama sa pagkatawo sa gisaad nga batang si Isaac, ang pagkatawo ni Juan maoy usa ka milagro, kay ang iyang mga ginikanan, si Zacarias ug Elisabet, lapas na sa normal nga edad nga makapanganak.—Lucas 1:18.
Bisan sa wala pa ipanamkon si Juan, ang iyang tinudlong buluhaton, trabaho, ug estilo-sa-kinabuhi gibutyag na pinaagi sa manulondang si Gabriel. Uban sa kalagsik ug espiritu ni Elias, gipabiya ni Juan ang mga masupilon gikan sa dalan sa kamatayon ug giandam sila sa pagdawat kang Jesus ingong Mesiyas. Sukad sa pagkahimugso, si Juan nahimong usa ka Nasareo, bug-os nga gipahinungod ngadto sa Diyos, ug dili paimnon ug bino o sa maisog nga ilimnon. Sa pagkatinuod, ang iyang pagkaon sa kamingawan maoy “mga insektong dulon ug dugos nga ihalas.” (Marcos 1:6; Numeros 6:2, 3; Lucas 1:13-17) Sama kang Samuel, sukad sa pagkabata si Juan gitudlo na alang sa mahimayaong pag-alagad sa Labing Hataas nga Diyos.—1 Samuel 1:11, 24-28.
Bisan ang ngalang Juan gipili sa Diyos. Ang Hebreohanong ngalan nga gihubad nga “Juan” nagkahulogang “Si Jehova Nagpakitag Pag-uyon; Si Jehova Mapuangoron.”
Sa dihang ang bata gituli sa ikawalong adlaw, ang iyang amahan, si Zacarias, gidasig sa Diyos sa pag-ingon: “Bahin kanimo, bata, ikaw pagatawgon nga propeta sa Labing Hataas, kay ikaw magauna sa atubangan ni Jehova aron andamon ang iyang mga dalan, aron ihatag ang kahibalo sa kaluwasan ngadto sa iyang katawhan pinaagi sa kapasayloan sa ilang mga sala, tungod sa malumong pagkamabination sa atong Diyos. Uban niini nga pagkamabination usa ka banagbanag moduaw kanato gikan sa itaas.” (Lucas 1:76-78) Ang publikong ministeryo ni Juan mao ang pagahatagag importansiya sa iyang kinabuhi. Kon itandi niana, ang tanang ubang butang dili importante. Busa, gihisgotan sa Kasulatan ang unang 30 ka tuig sa kinabuhi ni Juan sa usa lamang ka bersikulo: “Ang bata padayong nagtubo ug nagakakusgan sa espiritu, ug siya nagpabilin diha sa awaawng kamad-an hangtod sa adlaw sa iyang dayag nga pagpakita ngadto sa Israel.”—Lucas 1:80.
Tingog sa Kamingawan
Sa ika-15ng siglo sa pagmando ni Tiberio Cesar, sa dihang si Poncio Pilato mao ang gobernador sa Judea, si Juan Bawtista mitungha sa kamingawan uban niining makapakurat nga mensahe: “Paghinulsol kamo, kay haduol na ang gingharian sa mga langit.” (Mateo 3:2; Marcos 1:4; Lucas 3:1, 2) Ang katawhan sa tibuok rehiyon napukaw. Ang maong prangkang pahayag nakatandog sa mga kasingkasing sa mga tawong nangandoy sa usa ka seguradong paglaom. Ang pahayag ni Juan nagsulay usab sa kamapaubsanon sa tawo tungod kay kini nagkinahanglag kinasingkasing nga paghinulsol. Ang iyang katim-os ug pagtuo nagpalihok sa kadaghanang matinud-anon ug sinserong katawhan sa pag-isip kaniya ingong usa ka tawong gipadala sa Diyos.
Ang kabantog ni Juan dali nga mikaylap. Ingong manalagna ni Jehova, sayon siyang nailhan sa iyang pamisti ug debosyon. (Marcos 1:6) Bisan ang mga saserdote ug mga Levihanon mipanaw gikan sa Jerusalem aron usisaon kon unsay hinungdan niining tanang interes. Maghinulsol? Ngano, ug sa unsa? Kinsa kining tawhana? Sila buot nga masayod. Si Juan nagpatin-aw: “‘Ako dili mao ang Kristo.’ Ug sila nangutana kaniya: ‘Nan, unsa man? Ikaw ba si Elias?’ Ug siya miingon: ‘Dili ako.’ ‘Ikaw ba Ang Propeta?’ Ug siya mitubag: ‘Dili!’ Busa sila miingon kaniya: ‘Kinsa ka man diay? aron makahatag kami ug tubag kanilang nagpadala kanamo. Unsay imong isulti bahin sa imong kaugalingon?’ Siya miingon: ‘Ako maoy tingog sa usa nga nagasinggit sa kamingawan, “Himoa ninyong tul-id ang dalan ni Jehova,” maingon sa gisulti ni Isaias nga propeta.’ Karon silang gipadala maoy gikan sa mga Fariseo. Busa ilang gipangutana siya ug miingon kaniya: ‘Nan, nganong nagabawtismo ka man kon ikaw mismo dili mao ang Kristo o si Elias o Ang Propeta?’”—Juan 1:20-25.
Ang paghinulsol ug bawtismo maoy kinahanglanong mga lakang alang niadtong mosulod sa Gingharian. Busa, si Juan mitubag: ‘Ako nagabawtismo sa mahinulsolong mga makasasala pinaagi sa tubig, apan human kanako ang usa nga mas kusganon kay kanako magbawtismo kaninyo pinaagi sa balaang espiritu ug sa kalayo. Aw, ako dili gani angayan nga mobadbad sa liston sa iyang mga sandalyas. Ug pagbantay! Siya magdalag igpapalid nga pala sa iyang kamot ug magtigom sa trigo ngadto sa iyang balay-tipiganan apan magsunog ug mag-ut-ot sa tahop.’ (Lucas 3:15-17; Buhat 1:5) Sa pagkatinuod, ang balaang espiritu ituga diha sa mga sumusunod sa Mesiyas, apan ang iyang mga kaaway makasinatig kalayo sa kalaglagan.
“Tanang Matang sa Katawhan” Gipasidan-an
Daghang matinud-anon ug kasingkasing nga mga Hudiyo natandog pag-ayo sa mga pulong ni Juan ug dayag nga nagsugid sa ilang mga sala sa pagkadili-matinumanon sa pakigtugon sa Kasugoan. Dayag nilang gipasundayag ang ilang paghinulsol pinaagi sa pagtugot kang Juan sa pagbawtismo kanila diha sa Subang Jordan. (Mateo 3:5, 6) Tungod niana, ang ilang mga kasingkasing anaa sa maayong kahimtang sa pagdawat sa Mesiyas. Sa pagtagbaw sa ilang kauhaw alang sa kahibalo sa matarong nga mga kinahanglanon sa Diyos, malipayong gitudloan sila ni Juan ingong iyang mga tinun-an, nga nagtudlo gani kanila kon unsaon sa pag-ampo.—Lucas 11:1.
Mahitungod niining mag-uuna sa Mesiyas, si apostol Juan misulat: “Kining tawhana mianhi sa pagpanaksi, aron magapanaksi bahin sa kahayag, aron ang tanang matang sa katawhan motuo pinaagi kaniya.” (Juan 1:7) Busa ang tanang matang sa katawhan miabot sa pagpamati kang Juan Bawtista samtang siya “publikong miwali sa tanang katawhan sa Israel ug bawtismo nga simbolo sa paghinulsol.” (Buhat 13:24) Iyang gipasidan-an ang mga maniningil ug buhis batok sa pagpanikas. Iyang gipasidan-an ang mga sundalo batok sa pagpanghasi kang bisan kinsa o sa pagpasakag bakak nga mga sumbong. Ug iyang gisultihan ang relihiyoso, salingkapaw nga mga Pariseo ug Saduceo: “Kamong kaliwat sa mga bitin, kinsay nagpahibalo kaninyo sa pagkalagiw gikan sa umaabot nga kapungot? Busa pagpatunghag bunga nga nahiangay sa paghinulsol; ug ayaw pagsalig sa pag-ingon sa inyong kaugalingon, ‘Kami nagabaton kang Abraham ingong amahan.’ Kay ako magaingon kaninyo nga makahimo ang Diyos sa pagpatunghag mga anak kang Abraham gikan niini nga mga bato.”—Mateo 3:7-9; Lucas 3:7-14.
Ingong usa ka grupo, ang relihiyosong mga lider sa adlaw ni Juan midumili sa pagtuo kaniya ug bakak nga gisumbong siya nga gidemonyohan. Gisalikway nila ang dalan sa pagkamatarong nga motultol sa kinabuhing walay kataposan. Sa laing bahin, ang makasasalang mga maniningil ug buhis ug mga bigaon nga mituo sa mga pamatuod ni Juan naghinulsol ug gibawtismohan. Sa ulahi, gidawat nila si Jesu-Kristo ingong ang Mesiyas.—Mateo 21:25-32; Lucas 7:31-33.
Gipailaila ang Mesiyas
Sulod sa unom ka bulan—gikan sa tingpamulak ngadto sa hinapos sa 29 K.P.—ang matinumanong saksi sa Diyos nga si Juan nagpunting sa pagtagad sa mga Hudiyo ngadto sa umaabot nga Mesiyas. Panahon na sa pagtungha sa Mesiyanikong Hari. Apan sa dihang siya miabot, siya nanaog sa samang tubig sa Jordan ug mihangyo nga magpabawtismo. Sa sinugdan si Juan mibalibad, apan unya siya misugot. Hunahunaa ang iyang kalipay sa dihang ang balaang espiritu mikunsad diha kang Jesus ug ang tingog ni Jehova nadungog nga nagpahayag ug pag-uyon sa Iyang Anak.—Mateo 3:13-17; Marcos 1:9-11.
Si Juan ang unang miila kang Jesus ingong ang Mesiyas, ug iyang gipailaila ang iyang kaugalingong mga tinun-an ngadto niining Dinihogang Usa. “Tan-awa,” matud ni Juan, “ang Kordero sa Diyos nga nagakuha sa sala sa kalibotan!” Siya usab miingon: “Mao kini siya nga mahitungod kaniya ako nag-ingon, Sa akong luyo moabot ang usa ka tawo kinsa nahiuna na sa akong atubangan, tungod kay siya mitungha nga una kanako. Bisan ako wala makaila kaniya, apan ang hinungdan kon nganong ako mianhi nga nagabawtismo sa tubig maoy aron nga siya mapadayag sa Israel.”—Juan 1:29-37.
Ang buluhaton ni Juan nagpadayon dungan sa ministeryo ni Jesus sa mga unom ka bulan. Ang matag usa kanila nakasabot sa buluhaton nga gibuhat sa matag usa kanila. Gilantaw ni Juan ang iyang kaugalingon ingon nga higala sa Pamanhonon ug nalipay nga makita nga si Kristo nag-uswag samtang siya ug ang iyang buluhaton nagkunhod.—Juan 3:22-30.
Giila ni Jesus si Juan ingong iyang mag-uuna, nga naglarawan kang Elias. (Mateo 11:12-15; 17:12) Sa usa ka okasyon, si Jesus miingon: “Ang Balaod ug ang mga Propeta maoy hangtod kang Juan. Sukad niadto ang gingharian sa Diyos ginapahayag ingon nga maayong balita, ug ang tanang matang sa tawo nagapakigbisog ngadto niana.”—Lucas 16:16.
Matinumanon Hangtod sa Kamatayon
Si Juan gidakop ug gibalhog sa bilanggoan tungod kay siya maisogong nagpahayag sa kamatuoran. Wala siya molikay sa iyang kaakohan sa pagyagyag bisan sa sala ni Haring Herodes. Sa paglapas sa balaod sa Diyos, ang maong hari nagkinabuhi sa pagpanapaw uban sa asawa sa iyang kaugalingong igsoong lalaki, si Herodias. Si Juan maisogong nagpahayag sa iyang kaugalingon aron ang hari mahimong maghinulsol ug makabatog kaluoy sa Diyos.
Pagkamaayong panig-ingnan si Juan sa pagtuo ug gugma! Sa kadaot sa iyang kaugalingong kagawasan, iyang gipamatud-an ang iyang pagkamatinumanon ngadto kang Jehova nga Diyos ug ang iyang gugma alang sa isigkatawo. Human sa usa ka tuig nga pagkabilanggo, si Juan giputlan ug ulo ingong sangpotanan sa dinasig-sa-Yawa nga laraw nga gimaneobra sa tuman-ka-daotang si Herodias, nga “naghambin ug kayugot” batok kaniya. (Marcos 6:16-19; Mateo 14:3-12) Apan ang mag-uuna sa Mesiyas naghupot sa iyang integridad kang Jehova ug sa dili madugay pagabanhawon gikan sa mga patay aron sa pagpahimulos sa kinabuhi diha sa bag-ong kalibotan sa Diyos sa pagkamatarong.—Juan 5:28, 29; 2 Pedro 3:13.