Ang Hunahuna sa Bibliya

Kinsa ang “Gianak Pag-usab”?

SI Nicodemo usa ka membro sa Hudiyonhong hataas nga hukmanan, usa ka eskolar sa relihiyosong balaod, ug siya nakakitag igong ebidensiya sa mga milagro ni Jesus sa pagkombinsir sa iyang kaugalingon nga si Jesus mao ang Mesiyas. Bisan pa niana, wala siya makasabot kon unsay gipasabot ni Jesus sa pahayag: “Gawas kon ang tawo igaanak pag-usab, dili siya makakita sa gingharian sa Diyos.”—Juan 3:1-3, 10.

“Unsaon pagkahimo nga igaanak ang tawo sa dihang tigulang na siya?” nangutana si Nicodemo. “Dili siya makasulod pag-usab sa tagoangkan sa iyang inahan ug mahimugso, makahimo ba siya?”—Juan 3:4.

Milyonmilyong tawo karong adlawa nagaangkong “gianak pag-usab” ug nagaangkong nakasabot sa tin-aw kon unsay kahulogan niini. Ang uban, sama kang Nicodemo, nalibog sa tibuok ideya nga igaanak pag-usab. Sanglit gipasabot ni Jesus ang punto nga kadto usa ka pangunang kinahanglanon aron sa pagsulod sa Gingharian sa Diyos, hinungdanong atong masabtan kon unsay iyang gipasabot sa pagka “igaanak pag-usab.”

Ingong tubag sa pangutana ni Nicodemo, si Jesus dugang miingon: “Sa pagkamatuod ako magaingon kanimo, Gawas kon ang tawo igaanak sa tubig ug espiritu, siya dili makasulod sa gingharian sa Diyos. Ang gianak sa unod maoy unod, ug ang gianak sa espiritu maoy espiritu. Ayaw ikahibulong ang akong pag-ingon kanimo, Kinahanglan nga kamo igaanak pag-usab.”—Juan 3:5-7.

Lisod sabton? Nasayod si Jesus nga ang pagsabot sa espirituwal nga mga kamatuoran dili sayon. Busa aron mas matin-aw ang mga butang, gigamit niya ang usa ka ilustrasyon bahin sa hangin. “Ang hangin bitaw mohuros sa dapit nga gusto niini, ug madungog mo ang dahunog niini, apan dili nimo mahibaloan diin kini gikan ug asa kini padulong. Mao usab ang tanan nga gianak sa espiritu.” (Juan 3:8) Nadungog, nabati, ug nakita ni Nicodemo ang mga epekto sa hangin, apan wala siya makasabot kon gikan diin kadto ni ang kataposang dulnganan niadto. Bisan pa niana, ang pagkatinuod sa hangin dili kaduhaduhaan. Sa susama, kadtong walay espirituwal nga salabotan lisdan sa pagsabot sa unsang paagi si Jehova, pinaagi sa iyang espiritu, makapahimo nga ang usa ka tawo igaanak pag-usab ug kon unsa ang kataposang dulnganan niya. Bisan pa niana, sa tabang sa inspiradong mga magsusulat sa Bibliya, kita makasabot nianang mga butanga.—Juan 16:13.

Pagtin-aw sa Gumonhap

Unsay diha sa hunahuna ni Jesus sa naghisgot siya bahin sa pagka “igaanak sa tubig ug sa espiritu”? Ang pagkagianak nagkahulogang sinugdanan. Ang bag-ong pagkagianak nagkahulogang bag-ong sinugdanan. Sa kahimtang sa mga disipulo ni Jesus, ang ilang unang lakang ngadto sa pagkagianak pag-usab nagsugod sa dihang sila naghinulsol sa ilang mga sala, mitalikod sa daotang dalan, ug nabawtismohan sa tubig. Sugod sa Pentekostes sa 33 K.P., ingong balos sa maong buhat, gihatag kanila ni Jesus ang gitawag ni Pedro nga “usa ka bag-ong pagkaanak ngadto sa buhing paglaom . . . nga gitagana sa mga langit.” (1 Pedro 1:3, 4; 3:21) Ang balaang espiritu ni Jehova nagtisok diha kanila sa usa ka kombiksiyon nga sila sa kataposan magkinabuhi uban kang Jesu-Kristo sa langit. Kadto mihatag kanilag bug-os bag-ong panglantaw sa kinabuhi—usa ka bag-ong sinugdanan.

Kadto ba emosyonal relihiyosong kasinatian? Dili. Ang balaang espiritu sa Diyos naghimo kanila nga bug-os bag-o, “usa ka bag-ong linalang.” (2 Corinto 5:17) Sa dihang sila unang gianak ingong mga tawo, sila maoy makasasalang mga anak ni Adan, nga nakapanunod sa tanang pagkadili-hingpit nga iyang gipasa ngadto sa iyang mga anak. Karon, sa pagka “gianak pag-usab,” ang maong mga disipulo nakabatog mahinlong pagbarog atubangan sa Diyos. Sa unsang paagi? Ang mga merito sa halad ni Jesus gipadapat sa ilang kaayohan. Tungod niana, giisip sila sa Diyos nga matarong bisan pag sila dili pa hingpit nga mga tawo. (Roma 3:25, 26; 5:12-21; 1 Corinto 6:11) Labaw pa niana, giila sila karon ni Jehova ingong iyang mga anak. Gipakita kini ni apostol Pablo kon sa unsang paagi: “Kay ang tanan nga giagak sa espiritu sa Diyos, kini sila maoy mga anak lalaki sa Diyos . . . mga anak sa Diyos.” (Roma 8:14, 16) Sila karon gidawat ingong bahin sa langitnong pamilya sa Diyos.

Ug may labaw pa. Si Pablo nagsaysay pag-usab: “Nan, kon kita mga anak, kita usab mga manununod: mga manununod gayod sa Diyos, apan kaubang mga manununod ni Kristo.” (Roma 8:17) Kining espirituwal nga mga anak sa Diyos sa maong panahon may kalaomang makapanunod sa gipanunod ni Kristo Jesus—ang harianong gahom sa langit. Gipadayag ni Jesus ngadto kang apostol Juan ang gidaghanon sa mga tawo nga mahimong kaubang mga magmamando niya ibabaw sa yuta—144,000. (Pinadayag 7:4; 14:1-3) Unya iyang gipadayon ang pagpakita kang Juan nga kining pinaborang mga disipulo “mahimong mga saserdote sa Diyos ug ni Kristo, ug magamando ingong mga hari uban kaniya sa usa ka libo ka tuig.”—Pinadayag 20:6.

Mga Kaayohan Alang sa Uban

Nagkahulogan ba diay kining aron maangkon ang pag-uyon sa Diyos ang tanan kinahanglang “igaanak pag-usab”? Wala gayod. Ang halad ni Jesus nagakobre dili lamang sa 144,000 ka tawo nga gipiling linain nga mahauban kaniya sa mga langit. Sa misulat si apostol Juan ngadto sa “gianak pag-usab” nga mga Kristohanon sa hinapos ang unang siglo, siya miingon mahitungod sa halad ni Jesus: “Siya usa ka halad nga pasig-uli sa atong mga sala, apan dili lamang alang sa atoa kondili alang usab sa iya sa tibuok kalibotan.” (1 Juan 2:2) Sa unsang paagi naingon kini?

Niining paagiha. Kadtong “gianak pag-usab” magamando uban kang Jesu-Kristo sa langitnong Gingharian ni Jehova aron sa paghatag ug mga kaayohan sa uban sa katawhan nga magkinabuhi sa yuta. Kini gitagna sa usa ka talagsaong saad nga gihimo ngadto sa katigulangan ni Jesus si Abraham sa halos 4,000 ka tuig kanhi. “Pinaagi sa imong binhi ang tanang nasod sa yuta magapanalangin gayod sa ilang kaugalingon,” giingnan ni Jehova si Abraham. (Genesis 22:18) Oo, ang talagsaong mga panalangin mabatonan sa tanang nasod pinaagi sa “binhi” ni Abraham!

Kinsa ba ang maong “binhi”? Si Jesu-Kristo, nga giduyogan sa iyang tinuod nga “gianak pag-usab” nga mga sumusunod. Si apostol Pablo nagpatin-aw: “Dugang pa, kon kamo iya ni Kristo, kamo sa pagkamatuod maoy binhi ni Abraham.” (Galacia 3:16, 29) Ug unsa ang mga panalangin nga moabot sa katawhan sa tanang nasod pinaagi kang Jesu-Kristo ug niining “gianak pag-usab” nga mga disipulo? Ang pribilehiyo sa pagkapasig-uli sa pabor sa Diyos ug pagpahimulos sa tanan niyang tagana alang sa paraisong yuta.—Genesis 1:27, 28; Salmo 37:29; Proverbio 2:21, 22; Isaias 45:18.

Busa ang 144,000 “gianak pag-usab” nga mga disipulo “mosulod sa [langitnong] gingharian sa Diyos” aron ipadapat ang kahibulongang mga panalangin nga ipatungha sa Gingharian sa Diyos alang sa dimaihap nga minilyon dinhi mismo sa yuta. (Mateo 6:10; Roma 8:19-21; Pinadayag 21:1-5) Kon kaha si Nicodemo nakasabot sa mga pulong ni Jesus ug “gianak pag-usab” aron mahimong bahin sa maong nagamandong lawas, kita wala masayod. Ang atong nasayran mao nga ang higayong makadawat sa mga kaayohan sa ilang langitnong pagmando anaa alang kang bisan kinsang buot mopahimulos niana. Mopahimulos ka ba?

[Blurb sa panid 27]

Kinahanglan bang ang tanan “igaanak pag-usab” aron makaangkon sa pag-uyon sa Diyos?