Nag-alagad Ingong mga Mensahero sa Diyosnong Pakigdait
“Sa kabukiran pagkatahom sa mga tiil . . . sa usa nga nagamantala sa pakigdait.”—ISAIAS 52:7.
1, 2. (a) Ingon sa gitagna sa Isaias 52:7, unsang maayong balita ang kinahanglang imantala? (b) Unsay kahulogan sa matagnaong mga pulong ni Isaias labot sa karaang Israel?
ADUNAY maayong balita nga igamantala! Kini ang balita sa pakigdait—matuod nga pakigdait. Usa kini ka mensahe sa kaluwasan labot sa Gingharian sa Diyos. Dugay na kanhi ang propetang si Isaias misulat labot niini, ug ang iyang mga pulong natipigan alang kanato sa Isaias 52:7, diin atong mabasa: “Sa kabukiran pagkatahom sa mga tiil nga nanagdala sa maayong balita, sa usa nga nagamantala sa pakigdait, sa usa nga nagadala sa maayong balita sa butang mas maayo, sa usa nga nagamantala sa kaluwasan, sa usa nga nagaingon sa Sion: ‘Ang imong Diyos nahimong hari!’”
2 Gidasig ni Jehova ang iyang propetang si Isaias sa pagsulat nianang mensahea alang sa kaayohan sa karaang Israel ug sa atong kaayohan karon. Unsay ipasabot niana? Sa panahon nga gisulat ni Isaias kanang mga pulonga, ang amihanang gingharian sa Israel mahimong nabihag na sa mga Asiryano. Sa ulahi, ang mga lumolupyo sa habagatang gingharian sa Juda pagabihagon sa Babilonya. Mga adlaw kadto sa kaguol ug kaguliyang sa nasod tungod kay ang katawhan dili masinugtanon kang Jehova ug busa walay pakigdait uban sa Diyos. Ingon sa gisulti ni Jehova kanila, ang ilang makasasalang paggawi nagpahinabog dibisyon tali kanila ug sa ilang Diyos. (Isaias 42:24; 59:2-4) Pinaagi kang Isaias, hinunoa, gitagna ni Jehova nga sa tukmang panahon ang mga ganghaan sa Babilonya mabuksan. Ang katawhan sa Diyos makagawas aron mahibalik sa ilang yutang natawhan, sa pagtukod didto pag-usab sa templo ni Jehova. Ang Sion ipasig-uli, ug ang pagsimba sa matuod nga Diyos pagahimoon pag-usab sa Jerusalem.—Isaias 44:28; 52:1, 2.
3. Sa unsang paagi ang saad sa pagpasig-uli sa Israel usa usab ka saad sa pakigdait?
3 Kini nga saad sa pagpasig-uli maoy usa ka tagna usab sa pakigdait. Ang pagkanapasig-uli sa yuta nga gihatag ni Jehova sa mga Israelinhon maoy ebidensiya sa kaluoy sa Diyos ug sa ilang paghinulsol. Magpaila kini nga sila may pakigdait sa Diyos.—Isaias 14:1; 48:17, 18.
“Ang Imong Diyos Nahimong Hari!”
4. (a) Sa unsang diwa ikaingon nga si ‘Jehova nahimong hari’ niadtong 537 W.K.P.? (b) Sa unsang paagi gimaniobra ni Jehova ang mga butang alang sa kaayohan sa iyang katawhan sa ulahing katuigan?
4 Sa dihang gihimo ni Jehova kini nga kaluwasan niadtong 537 W.K.P., ang pahibalo tukmang ikapahayag sa Sion: “Ang imong Diyos nahimong hari!” Sa pagkatinuod, si Jehova mao ang “Hari sa Kahangtoran.” (Pinadayag 15:3) Apan kini nga kaluwasan sa iyang katawhan maoy bag-ong pagpasundayag sa iyang pagkasoberano. Sa kahibulongang paagi, gipasundayag niini ang pagkalabaw sa iyang gahom ibabaw sa labing gamhanan tawhanong imperyo hangtod nianang panahona. (Jeremias 51:56, 57) Ingong resulta sa paglihok sa espiritu ni Jehova, ang ubang mga panagsabot batok sa iyang katawhan napakyas. (Ester 9:24, 25) Sa subsob si Jehova nangilabot sa daghang paagi aron ipahinabong makigtambayayong ang mga hari sa Medo-Persia sa pagtuman sa iya mismong soberanong kabubut-on. (Zacarias 4:6) Ang kahibulongang mga hitabo nga nahitabo niadtong mga adlawa narekord alang kanato sa mga basahon sa Bibliya sa Esdras, Nehemias, Ester, Hageo, ug Zacarias. Ug pagkamakapalig-on sa pagtuo ang pagsubli niini nila!
5. Unsang talagsaong mga hitabo ang gipunting sa Isaias 52:13–53:12?
5 Apan, kon unsay nahitabo niadtong 537 W.K.P. ug tapos niana maoy sinugdanan lamang. Dihadiha human sa tagna sa pagpasig-uli sa kapitulo 52, si Isaias misulat bahin sa pag-abot sa Mesiyas. (Isaias 52:13–53:12) Pinaagi sa Mesiyas, nga napamatud-ang si Jesu-Kristo, itagana ni Jehova ang mensahe sa kaluwasan ug pakigdait nga mas makahuloganon pa kay sa nahitabo niadtong 537 W.K.P.
Ang Labing Bantogang Mensahero ni Jehova sa Pakigdait
6. Kinsa ang labing bantogang mensahero ni Jehova sa pakigdait, ug unsang komisyon ang gipadapat niya sa iyang kaugalingon?
6 Si Jesu-Kristo mao ang labing bantogang mensahero ni Jehova sa pakigdait. Siya ang Pulong sa Diyos, ang kaugalingong personal nga Tigpamaba ni Jehova. (Juan 1:14) Uyon niini, pipila ka panahon human mabawtismohi sa Subang Jordan, mibarog si Jesus sa sinagoga sa Nazaret ug mibasag kusog sa iyang komisyon gikan sa Isaias kapitulo 61. Gipatin-aw niana nga komisyon nga siya gipadala aron sa pagsangyaw nga naglakip sa “kagawasan” ug “pagpasig-uli,” ingon man sa kahigayonan nga makabaton ug pag-uyon ni Jehova. Apan, labaw pa ang gibuhat ni Jesus kay sa pagmantala sa mensahe sa pakigdait. Ang Diyos nagpadala usab kaniya sa pagtagana ug pasukaranan sa dumalayong pakigdait.—Lucas 4:16-21.
7. Unsay mga sangpotanan gikan sa pakigdait nga gipaposible sa Diyos pinaagi ni Jesu-Kristo?
7 Sa panahon sa pagkatawo ni Jesus, ang mga manulonda nagpakita sa mga magbalantay sa karnero duol sa Betlehem, nga nanagdayeg sa Diyos ug nag-ingon: “Himaya ngadto sa Diyos sa kahitas-an, ug nganha sa yuta pakigdait taliwala sa mga tawong maayog kabubut-on.” (Lucas 2:8, 13, 14) Oo, adunay pakigdait alang niadtong kinsa gipakitaan sa Diyos ug maayong kabubut-on tungod kay sila nagpakitag pagtuo sa tagana nga iyang gihimo pinaagi sa iyang Anak. Unsay kahulogan niana? Kini magkahulogan nga bisag ang mga tawo natawo sa sala, sila makabaton ug hinlong baroganan atubangan sa Diyos, usa ka inuyonang relasyon uban kaniya. (Roma 5:1) Matagamtam nila ang kalinaw sa kahiladman, ang pakigdait, nga imposible sa ubang paagi. Sa tinudlong panahon sa Diyos, aduna unyay kagawasan gikan sa tanang epekto sa napanunod nga sala ni Adan, lakip ang sakit ug kamatayon. Wala na unyay mga tawong buta o bungol o bakol. Ang makapahigawad nga kaluyahon ug makapaguol nga mga sakit sa hunahuna sa bug-os mawagtang na. Posible na unya ang pagtagamtam sa kinabuhi sa kahingpitan nga walay kataposan.—Isaias 33:24; Mateo 9:35; Juan 3:16.
8. Ngadto kang kinsa gitanyag ang diyosnong pakigdait?
8 Ngadto kang kinsa gitanyag ang diyosnong pakigdait? Gitanyag kini ngadto sa tanang magpakitag pagtuo kang Jesu-Kristo. Si apostol Pablo nagsulat nga ‘nakitang maayo sa Diyos nga pinaagi kang Kristo ipahiuli pag-usab nganha sa iyang kaugalingon ang tanang ubang butang pinaagi sa pagpakigdait pinaagi sa dugo nga giula ni Jesus sa sakitanang estaka.’ Gidugang sa apostol nga kining kapasig-ulian maglakip sa “mga butang sa kalangitan”—sa ato pa, kadtong mahimong kaubang manununod ni Kristo sa langit. Kini maglakip usab ‘sa mga butang diha sa yuta’—sa ato pa, kadtong hatagan ug higayon nga mabuhing walay kataposan niining yutaa sa dihang himoon na kining bug-os Paraiso nga kahimtang. (Colosas 1:19, 20) Tungod sa ilang pagpahimulos sa bili sa halad ni Jesus ug tungod sa ilang pagkamasinugtanon sa Diyos gikan sa kasingkasing, silang tanan makapahimulos sa mainitong panaghigalaay sa Diyos.—Itandi ang Santiago 2:22, 23.
9. (a) Ang pakigdait sa Diyos nagaimpluwensiya sa unsang ubang mga relasyon? (b) Sa pagpatunghag dumalayong pakigdait bisan asa, unsang awtoridad ang gisalig ni Jehova sa iyang Anak?
9 Pagkabililhon niana nga pakigdait sa Diyos! Kon walay pakigdait sa Diyos, walay dumalayon o makahuloganong pakigdait usab sa bisan haing ubang relasyon. Ang pakigdait kang Jehova maoy pundasyon sa matuod nga pakigdait sa yuta. (Isaias 57:19-21) Pagkahaom, si Jesu-Kristo mao ang Prinsipe sa Pakigdait. (Isaias 9:6) Ngadto niining usa nga ang mga tawo mapasig-uli sa Diyos, gisalig usab ni Jehova ang awtoridad sa pagmando. (Daniel 7:13, 14) Ug labot sa mga resulta sa prinsipenhong pagmando ni Jesus ibabaw sa katawhan, si Jehova nagasaad: “Sa pakigdait wala unyay kataposan.”—Isaias 9:7; Salmo 72:7.
10. Sa unsang paagi nagpakitag panig-ingnan si Jesus sa pagmantala sa mensahe sa Diyos sa pakigdait?
10 Ang mensahe Diyos sa pakigdait gikinahanglan sa tanang katawhan. Personal nga gipakita ni Jesus ang masibotong panig-ingnan sa pagsangyaw niana. Gihimo niya kana sa hawanan sa templo sa Jerusalem, sa kilid sa bukid, diha sa dalan, ngadto sa usa ka Samarianhong babaye sa atabay, ug sa mga balay sa mga tawo. Bisan diin nga adunay mga tawo, gipahimuslan ni Jesus ang mga higayon sa pagsangyaw bahin sa pakigdait ug sa Gingharian sa Diyos.—Mateo 4:18, 19; 5:1, 2; 9:9; 26:55; Marcos 6:34; Lucas 19:1-10; Juan 4:5-26.
Gibansay sa Pagsunod sa mga Lakang ni Kristo
11. Sa unsang buluhatona gibansay ni Jesus ang iyang mga tinun-an?
11 Gitudloan ni Jesus ang iyang mga tinun-an sa pagsangyaw sa mensahe sa Diyos sa pakigdait. Ingon nga si Jesus mao ang “kasaligan ug matuod nga saksi” ni Jehova, giila nila nga sila usab may responsabilidad sa pagpanaksi. (Pinadayag 3:14; Isaias 43:10-12) Sila naglantaw kang Kristo ingong ilang Pangulo.
12. Giunsa pagpakita ni Pablo ang kahinungdanon sa buluhatong pagsangyaw?
12 Si apostol Pablo nangatarongan sa kahinungdanon sa buluhatong pagsangyaw, nga nag-ingon: “Ang Kasulatan nagaingon: ‘Walay magabutang sa iyang pagtuo kaniya ang mahigawad.’” Sa ato pa, walay magpakitag pagtuo kang Jesu-Kristo ingong Pangulong Ahente ni Jehova sa kaluwasan ang mahigawad. Ug ang rasanhong kagikan dili makadiskuwalipikar kang bisan kinsa, kay si Pablo midugang: “Walay pagpalahi tali sa Judio ug sa Griego, kay adunay sama rang Ginoo ibabaw sa tanan, kinsa adunahan ngadto kanilang tanan nga nanagtawag kaniya. Kay ‘ang tanang nanagtawag sa ngalan ni Jehova mamaluwas.’” (Roma 10:11-13) Apan unsaon sa katawhan sa pagkakat-on niana nga kahigayonan?
13. Unsay gikinahanglan aron ang mga tawo makadungog sa maayong balita, ug sa unsang paagi misanong ang unang-siglong mga Kristohanon niana nga panginahanglan?
13 Gidumala ni Pablo kana nga panginahanglan pinaagig pagsukna ug mga pangutana nga angay palandongon sa matag alagad ni Jehova. Ang apostol nangutana: “Unsaon nila pagtawag kaniya kang kinsa wala sila magbutang ug pagtuo? Unsaon, sa baylo, pagbutang nila ug pagtuo kaniyang kinsa wala nila madunggi? Unsaon, sa baylo, nila pagkadungog kon walay magwali? Unsaon, sa baylo, nila pagwali gawas kon sila gipadala?” (Roma 10:14, 15) Ang rekord sa unang Kristiyanidad naghatag ug gamhanang pamatuod nga ang mga lalaki ug babaye, batan-on ug tigulang, misanong sa panig-ingnan nga gipakita ni Kristo ug sa iyang mga apostol. Sila nahimong masibotong mga magwawali sa maayong balita. Sa pagsundog kang Jesus, sila nagsangyaw sa mga tawo bisan asa nila sila makita. Uban ang tinguhang walay usa ang masayloan, sila nagpadayon sa ilang ministeryo diha sa publikong mga dapit ug gikan sa balay ug balay.—Buhat 17:17; 20:20.
14. Sa unsang paagi napamatud-ang tinuod nga ‘matahom ang mga tiil’ niadtong nagmantala sa maayong balita?
14 Siyempre, dili tanan ang midawat nga maluloton sa Kristohanong mga magsasangyaw. Bisan pa niana, napamatud-ang tinuod ang gikutlo ni Pablo gikan sa Isaias 52:7. Human isukna ang pangutana, ‘Unsaon nila pagwali gawas kon sila gipadala?’ siya midugang: “Ingon sa nahisulat: ‘Pagkatahom sa mga tiil niadtong nagapahayag sa maayong balita sa maayong mga butang!’” Dili isipon sa kadaghanan kanato ang atong mga tiil nga matahom, o maanyag. Busa, nan, unsay ipasabot niini? Ang mga tiil sa naandan maoy magpalakaw sa usa ka tawo sa dihang siya mogawas sa pagsangyaw sa uban. Ang maong mga tiil sa pagkatinuod naghawas sa tawo. Ug kita makaseguro nga alang sa daghan nga nakadungog sa maayong balita gikan sa mga apostol ug gikan sa ubang unang-siglong mga tinun-an ni Jesu-Kristo, kining unang mga Kristohanon matahom gayod nga talan-awon. (Buhat 16:13-15) Labaw pa niana, sila bililhon sa panan-aw sa Diyos.
15, 16. (a) Sa unsang paagi gipakita sa unang mga Kristohanon nga sila sa pagkatinuod mga mensahero sa pakigdait? (b) Unsay motabang kanato sa pagtuman sa atong ministeryo sa samang paagi sa pagtuman sa unang-siglong mga Kristohanon?
15 Ang mga sumusunod ni Jesus may usa ka mensahe sa pakigdait, ug gipaambit nila kini sa makigdaitong paagi. Si Jesus naghatag sa iyang mga tinun-an niini nga mga instruksiyon: “Bisan diin kamo mosulod ug balay umingon una, ‘Hinaot kining balaya adunay kalinaw.’ Ug kon adunay higala sa kalinaw, ang inyong kalinaw mahiluna diha kaniya. Apan kon wala, kini magabalik nganha kaninyo.” (Lucas 10:5, 6) Ang Sha·lohmʹ, o “pakigdait,” maoy usa ka naandang pangomosta sa mga Hudiyo. Apan, ang mga instruksiyon ni Jesus naglangkit ug labaw pa niini. Ingong “mga embahador kapuli kang Kristo,” ang iyang dinihogang mga tinun-an nag-awhag sa mga tawo: “Magpahiuli kamo ngadto sa Diyos.” (2 Corinto 5:20) Nahiuyon sa mga instruksiyon ni Jesus, sila nakigsulti sa mga tawo bahin sa Gingharian sa Diyos ug kon unsay kahulogan niana alang kanila ingong mga indibiduwal. Kadtong nagpatalinghog nakadawat ug panalangin; kadtong nagsalikway sa mensahe walay panalangin nga nadawat.
16 Karong adlawa ang mga Saksi ni Jehova nagabuhat sa ilang ministeryo sa samang paagi. Ang maayong balita nga gidala nila sa katawhan dili ilaha; iya kini sa Usa nga nagpadala kanila. Ang ilang komisyon mao ang pagpaambit niini. Kon dawaton kini sa mga tawo, nagpahimutang sila sa ilang kaugalingon sa pagdawat sa kahibulongang mga panalangin. Kon isalikway nila kini, ginasalikway nila ang pakigdait ni Jehova nga Diyos ug sa iyang Anak, si Jesu-Kristo.—Lucas 10:16.
Makigdaiton sa Gubot nga Kalibotan
17. Bisan sa dihang giatubang sa maabusohong mga tawo, unsay angay natong paggawi, ug ngano?
17 Bisag unsa pay reaksiyon sa mga tawo, hinungdanon sa mga alagad ni Jehova nga mahinumdom kanunay nga sila maoy mga mensahero sa diyosnong pakigdait. Ang katawhan sa kalibotan tingali mainitong makiglantugi ug magpahungaw sa ilang kasuko pinaagig mainsultohong mga pulong o pinaagig pagsinggit nga maabusohon niadtong nakapalagot kanila. Tingali ang pipila kanato nagbuhat niana sa nangagi. Apan, kon kita nakasul-ob na sa bag-ong pagkatawo ug karon dili na bahin sa kalibotan, dili nato sundogon ang ilang mga paagi. (Efeso 4:23, 24, 31; Santiago 1:19, 20) Bisag unsa pay buhaton sa uban, atong ipadapat ang tambag: “Kon posible, kutob sa nagaagad kaninyo, magmadaiton sa tanang tawo.”—Roma 12:18.
18. Unsay atong pagsanong kon manghasi kanato ang usa ka opisyal sa publiko, ug ngano?
18 Ang atong ministeryo usahay magdala kanato atubangan sa publikong mga opisyal. Nga mobarog sa ilang awtoridad, sila tingali ‘mangayo kanato’ ug katin-awan kon nganong gibuhat nato ang pipila ka butang o kon nganong midumili kita sa pagpakigbahin sa pipila ka partikular nga kalihokan. Sila tingali buot masayod kon nganong ginasangyaw nato ang mensahe nga atong ginasangyaw—usa nga nagladlad sa bakak nga relihiyon ug naghisgot sa kataposan sa presenteng sistema sa mga butang. Ang atong pagtahod sa panig-ingnan nga gipakita ni Kristo mopalihok kanato sa pagpakitag kalumo ug halalom nga pagtahod. (1 Pedro 2:23; 3:15) Sa subsob, ang maong mga opisyal nailalom sa pagpit-os sa mga klero o kaha sa ilang mga labaw. Ang tubag nga malumo mahimong motabang kanila sa pag-apresyar nga ang atong kalihokan dili hulga alang kanila o sa pakigdait sa komunidad. Ang maong tubag magpalambo sa espiritu sa pagtahod, pagtinabangay, ug pakigdait niadtong modawat niana.—Tito 3:1, 2.
19. Unsang mga kalihokana nga wala gayod mag-apil-apil ang mga Saksi ni Jehova?
19 Ang mga Saksi ni Jehova nailhan sa tibuok yuta ingong katawhan nga wala mag-apil-apil sa kagubot sa kalibotan. Wala sila malangkit sa mga panag-away sa kalibotan gumikan sa rasa, relihiyon, o sa politika. (Juan 17:14) Sanglit ang Pulong sa Diyos nagtudlo kanato sa ‘pagpasakop sa labaw nga mga awtoridad,’ dili gani kita maghunahuna nga moapil sa mga buhat sa sibil nga pagkadili-masinugtanon aron moprotesta sa mga polisa sa kagamhanan. (Roma 13:1) Ang mga Saksi ni Jehova wala gayod moapil sa bisan unsang kalihokan nga gituyo sa paglumpag sa kagamhanan. Tungod sa mga sukdanan nga gipahimutang ni Jehova sa iyang Kristohanong mga alagad, ang ilang pagpakigbahin sa pag-ula ug dugo o sa kapintasan sa bisan unsang matang dili gayod makataronganon! Dili lang kay nagahisgot bahin sa pakigdait ang matuod nga mga Kristohanon; sila nagkinabuhi uyon sa ilang ginasangyaw.
20. Labot sa pakigdait, unsang matang sa rekord ang nahimo sa Dakong Babilonya?
20 Sukwahi sa matuod nga mga Kristohanon, kadtong nagahawas sa relihiyosong mga organisasyon sa Kakristiyanohan wala magpamatuod nga mga mensahero sa pakigdait. Ang mga relihiyon sa Dakong Babilonya—mga iglesya sa Kakristiyanohan ug dili-Kristohanong mga relihiyon—nagkonsentir, nagpaluyo, ug aktuwal nga nanguna sa mga gubat sa mga nasod. Naghulhog usab sila sa paglutos ug bisan pagpatay sa matinumanong mga alagad ni Jehova. Busa, labot sa Dakong Babilonya, ang Pinadayag 18:24 mipahayag: “Diha kaniya nakaplagan ang dugo sa mga propeta ug sa mga balaan ug sa tanan kanila nga gipamatay ibabaw sa yuta.”
21. Unsay pagsanong sa daghang matinud-anon ug kasingkasing sa dihang nakita nila ang kalainan sa paggawi sa katawhan ni Jehova ug niadtong nagbatasan sa bakak nga relihiyon?
21 Dili sama sa mga relihiyon sa Kakristiyanohan ug uban pa sa Dakong Babilonya, ang matuod nga relihiyon usa ka positibo, nagapahiusang puwersa. Sa iyang matuod nga mga sumusunod, si Jesu-Kristo miingon: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:35) Mao kana ang gugma nga motabok sa nasodnon, sosyal, ekonomikanhon, ug rasanhong mga utlanan nga karon nagbahin sa ubang katawhan. Kay nakamatikod niini, minilyong katawhan sa tibuok yuta nagaingon sa dinihogang mga alagad ni Jehova: “Kami mouban kaninyo, kay kami nakadungog nga ang Diyos nagauban kaninyo.”—Zacarias 8:23.
22. Unsay atong panglantaw sa buluhatong pagpanaksi nga kinahanglan pang matapos?
22 Ingong katawhan ni Jehova, dako ang atong kalipay sa kon unsay nalampos, apan ang buluhaton wala pa matapos. Human makapugas ug makultibar ang iyang umahan, ang usa ka mag-uuma dili mohunong. Siya magpadayon sa pagtrabaho, ilabina sa kinapungkayan sa panahon sa pagpangani. Ang ting-ani nagkinahanglan ug padayon, kusganong paningkamot. Ug karon mismo adunay mas dakong pagpangani sa mga magsisimba sa matuod nga Diyos kay sukad masukad. Kini ang panahon sa pagmaya. (Isaias 9:3) Tinuod, makaatubang kita ug pagsupak ug kawalay pagtagad. Ingong mga indibiduwal, kita tingali nagapakigbisog sa pag-atubang sa seryosong sakit, malisod nga mga kahimtang sa pamilya, o kalisod sa ekonomiya. Apan ang gugma kang Jehova magtukmod kanato sa paglahutay. Ang mensahe nga gisalig kanato sa Diyos maoy mensahe nga kinahanglang madunggan sa mga tawo. Kini maoy usa ka mensahe sa pakigdait. Sa pagkatinuod, kini mao ang mensahe nga gisangyaw mismo ni Jesus—ang maayong balita sa Gingharian sa Diyos.
Unsay Imong Tubag
◻ Unsay katumanan sa Isaias 52:7 diha sa karaang Israel?
◻ Sa unsang paagi napamatud-an nga si Jesus ang labing bantogang mensahero sa pakigdait?
◻ Giunsa paglangkit ni apostol Pablo ang Isaias 52:7 uban sa buluhaton nga gipakig-ambitan sa mga Kristohanon?
◻ Unsay nalangkit sa pagkahimong mga mensahero sa pakigdait sa atong adlaw?
[Kapsiyon sa panid 13]
Sama kang Jesus, ang mga Saksi ni Jehova maoy mga mensahero sa diyosnong pakigdait
[Kapsiyon sa panid 15]
Ang mga Saksi ni Jehova nagpabiling makigdaiton bisag unsa pay reaksiyon sa mga tawo sa mensahe sa Gingharian