Magpakitag Empatiya
Ang Problema
Kon magpokus tag maayo sa mga butang nga nakapalahi sa uban kanato, lagmit maghunahuna ta nga wala silay pulos ug ubos kay kanato. Ug kon negatibo na tag panglantaw sa uban, lisod na ang pagpakitag empatiya. Ang atong kawalay-empatiya mahimong magpaila sa mas lawom nga problema—ang pagkamapihigon.
Prinsipyo sa Bibliya
“Paglipay uban sa mga naglipay; hilak uban sa mga naghilak.”—ROMA 12:15.
Unsay gitudlo niini? Kini nga prinsipyo nagtudlo nato sa pagpakitag empatiya. Ang empatiya mao ang pagbutang sa atong kaugalingon sa kahimtang sa uban ug bation ang ilang gibati.
Makatabang ang Empatiya
Dihang magpakita tag empatiya sa usa ka tawo, atong mamatikdan nga parehas kaayo ta sa maong tawo. Ang iyang gibati ug reaksiyon parehas pod sa atoa. Ang empatiya makatabang nato sa pag-isip nga ang tanang tawo bahin sa usa ka pamilya, bisag unsa pay ilang rasa. Dihang mas magpokus ta kon unsa sila ka parehas nato, malikayan nato ang paghunahunag negatibo kanila.
Ang empatiya makatabang sab nato nga tahoron ang uban. Si Anne-Marie, nga gikan sa Senegal, nakamenos kaniadto sa mga grupo sa mga tawo nga giisip sa kadaghanan nga ubos. Iyang gipatin-aw kon sa unsang paagi nakatabang niya ang pagpakitag empatiya: “Dihang nakita nako ang grabeng pag-antos sa maong mga tawo, nakahunahuna ko kon unsa poy akong bation kon naa ko sa ilang kahimtang. Tungod niini, akong naamgohan nga dili ko labaw nila, kay wala man koy nahimo nga nakapalabaw nako kanila.” Busa kon maningkamot ta nga sabton ang kalisdanan sa uban, mas makapakita tag empatiya imbes nga manaway nila.
Ang Imong Mahimo
Kon negatibo kag opinyon sa usa ka grupo sa mga tawo, pagpokus sa mga butang nga parehas mo. Pananglitan, imadyina kon unsay ilang bation dihang
Ang empatiya makatabang nato sa pag-isip nga ang tanang tawo bahin sa usa ka pamilya
mangaon sila kauban sa ilang pamilya
mahuman sa hago nga trabaho
maglingawlingaw uban sa mga higala
maminaw sa ilang paboritong musika
Dayon imadyina nga naa ka sa ilang situwasyon. Pangutan-a ang kaugalingon:
‘Unsay akong reaksiyon kon naay mopabati nakong walay pulos?’
‘Unsay akong bation kon hukman ko sa uban bisag wala pa sila makaila nako?’
‘Kon apil ko sa ilang grupo, unsay gusto nako nga pagtratar sa uban kanako?’