“Ipakita nga Kamo Mapasalamaton”
“Himoa nga ang kalinaw ni Kristo mohari sa inyong kasingkasing . . . Ug ipakita nga kamo mapasalamaton.”—COLOSAS 3:15.
1. Batok sa unsa ang mga Kristohanon magbantay niining dili-mapasalamatong kalibotan?
KINING gubot nga ika-20ng siglo nahidangat sa kahimtang diin daghang tawo nahikalimot na sa unsang paagi magmapasalamaton. Ang mapabilhong mga pulong “palihog” ug “salamat” dili na kaayo madungog sa paglabay sa matag tuig. Ang pagkadili-mapasalamaton nahimong bahin sa “hangin,” ang hakog nga espiritu nga nagagahom sa mga tawo niining kalibotana. (Efeso 2:1, 2) Bisan tuod ang mga Kristohanon “dili bahin sa kalibotan,” kinahanglang sila magpuyo niini samtang nagalungtad ang presenteng sistema sa mga butang. (Juan 17:11, 16) Busa, kinahanglang magbantay sila nga kining dili-mapasalamatong espiritu dili motakod kanila, nga makapamenos sa ilang pagkamapasalamaton.
2. (a) Unsa ang pila ka paagi nga ang mga alagad ni Jehova makapahayag ug pagkamapasalamaton kaniya? (b) Unsay gikinahanglan gawas sa binabang mga pahayag sa pasalamat?
2 Ang pagpabili sa pagkamaayo sa Diyos ikapahayag kadaghanan sa pagpakigsulti nato sa isigkamagtutuo. Ang kadaghanang dedikadong mga Kristohanon lagmit nagapasalamat sa ilang langitnong Amahan, si Jehova, tungod sa iyang pagkamaayo sa daghang beses sa usa ka adlaw, nga magabuhat niana diha sa personal nga pag-ampo. Ang pagkamapasalamaton gipahayag usab diha sa mga pag-ampo sa kongregasyon ug samtang nagaawit sa mga awit sa Gingharian panahon sa Kristohanong mga tigom. Hinuon, sayon ang pagpahayag sa pagkamapasalamaton diha sa mga pulong. Bisan pa niana, gidasig ni apostol Pablo ang iyang mga igsoon sa Colosas dili lamang sa pagsulti nga sila mapasalamaton kondili sa pagpakita o pagpasundayag usab sa pagkamapasalamaton diha sa matag adlaw nilang mga kinabuhi. Siya misulat: “Himoa nga ang kalinaw ni Kristo mohari sa inyong mga kasingkasing, kay kamo, sa pagkamatuod, gitawag alang niini sa usa ka lawas. Ug ipakita nga kamo mapasalamaton.”—Colosas 3:15.
Daghang Hinungdan sa Pagkamapasalamaton
3. Nganong kitang tanan angay magmapasalamaton sa Diyos?
3 Ang tanan nga buhi may dakong hinungdan sa pagkamapasalamaton. Ang labawng hinungdan mao ang pagpahimulos sa kinabuhi mismo, kay ang tanang butang atong nabatonan o tingali planohon kalit mawalay bili kon kita mawad-an sa aton kinabuhi. Giawhag ni salmistang David ang tanang tawo sa paghinumdom nga “ikaw [Jehova nga Diyos] mao ang tinubdan sa kinabuhi.” (Salmo 39:9) Ug si apostol Pablo nagpahinumdom sa mga tawo sa Atenas sa samang dumalayong kamatuoran sa namulong sa Areopago. (Buhat 17:28) Oo, ang pagkabuhi lamang maoy dakong hinungdan sa pagkamapasalamaton. Ug molalom ang atong apresasyon inighinumdom nato sa mga katakos nga gihatag sa Diyos kanato—ang mga sentido sa panilaw, paghikap, panimaho, panan-aw, ug pandungog—aron kita mahimuot sa kinabuhi ug sa mga katahom sa kalalangan alirong nato.
4. Unsay manalipod kanato batok sa pagpakawaybili sa mga panalangin sa kinabuhi?
4 Bisan pa niana, daghan ang nagapakaway-bili niining maayong mga butang. Sa panahon lamang nga mahikawan sa usa ka katakos, sama sa panan-aw o pandungog, nga ang daghang tawo makaamgo sa mga panalangin nga wala nila pabilhi sa dihang maayo ang lawas. Ang dedikadong mga Kristohanon kinahanglang magbantay kanunay nga dili mahianod ngadto sa susamang kakulang sa apresasyon. Kinahanglang sila maningkamot sa paghupot padayon sa samang mapasalamatong tinamdan sama sa gipasundayag sa salmista nga miingon: “Daghan ang imong nahimo, Oh Jehova nga Diyos ko, bisan ang imong katingalahang mga buhat ug imong mga hunahuna nganhi kanamo; walay mausa ang ikatandi kanimo. Kong ako magapahayag ug magasulti kanila, sila daghan kaayo kay sa akong ikaasoy.”—Salmo 40:5.
5. Bisan pa sa dugang mga panalangin ni Jehova sa Israel, unsang makauulawng dalan ang ilang gisubay?
5 Ang ika-106 nga Salmo nagahatag ug balaknong kasumahan sa gamhanang mga buhat nga gihimo ni Jehova alang sa iyang katawhan, ang Israel. Ang mga pakiglabot sa Diyos kanila maoy dugang pa sa pagkamaayo ug kasagarang mga panalangin sa kinabuhi nga iyang ginahatag sa katawhan sa katibuk-an. Ugaling, bisan pa sa maong mga kaayohan, gipunting sa salmista nga ang mga Israelinhon wala magpadayon sa pagpakitag pagpabili sa ilang talagsaong mga panalangin. Ang bersikulo 13 nagaingon: “Dali silang nahikalimot sa iyang mga buhat; sila wala maghulat sa iyang tambag.” Dili, dili ang paglabay sa panahon ang inanay nakapamenos sa ilang pagkamapasalamaton, mao nga tinagpulo ka katuigan sa ulahi sila wala na mahinumdom sa gibuhat sa Diyos alang kanila. Hinunoa, sila daling nahikalimot—sa mga semana lamang sa talagsaong mga milagro ni Jehova alang kanila didto sa Pulang Dagat. (Exodo 16:1-3) Ikasubo, ang umaabot nga mga hitabo nagpakitang ang pagkadili-mapasalamaton nahimong regular nga paagi sa ilang kinabuhi.
Kon sa Unsang Paagi Ipakita ang Pagkamapasalamaton
6. Nganong ang kinahanglanon sa paghatag ug ikapulo dili lisod?
6 Nga detalyado, gipaila ni Jehova ang tulo ka ispisipikong mga paagi nga niana ang mga Israelinhon angay magpakitag tiunayng pagpabili sa iyang pagkamaayo. Ang usa maoy pinaagi sa pagbantay sa kinahanglanon sa ikapulo pinaagi sa paghatag kang Jehova sa ikanapulong bahin sa tanang abot ug kahayopan. (Levitico 27:30-32) Kadto dili lisod, kay ang Diyos maoy responsable sa adlaw, sa tabunok nga yuta, sa ulan, ug sa milagro sa pagtubo. Busa, ang paghatag ug ikapulo ngadto sa mga saserdote sa sangtuwaryo ni Jehova maoy praktikal nga ekspresyon sa pagkamapasalamaton kang Jehova mismo.
7. (a) Unsa ang dakong kalainan tali sa paghatag sa ikapulo ug paghimog mga amot kang Jehova? (b) Kini nagtugot nga ipadayag sa mga Israelinhon ang unsa bahin sa ilang kaugalingon?
7 Ang laing kinahanglanon mao ang paghatag ug mga amot ngadto sa Diyos sa kantidad nga gitino sa tinamdan sa kasingkasing sa matag usa ka Israelinhon. Bisan tuod walay gitino nga kantidad, ang mga amot maoy sa inunahang mga bunga—ang inunahang bunga sa trigo, bino, ug balhibo sa mga karnero. (Numeros 15:17-21; Deuteronomio 18:4) Dugang pa, gibaod ni Jehova nga ang iyang katawhan ‘dili magapanuko sa paghatag’ ug magahatag “sa kinamaayohan sa inunahang hinog nga mga bunga.” (Exodo 22:29; 23:19) Kadto mihatag sa mga Israelinhon ug kahigayonan sa pagpakita sa ilang pagkamapasalamaton kang Jehova sa dayag nga paagi. Ikapadayag nila ang giladmon sa ilang pagkamapasalamaton pinaagi sa gidaghanon sa mga amot. Usa ba lang ka pungpong sa ubas ang ilang iamot? O ang manggihatagon bang kasingkasing magtukmod kanila sa paghatag sa usa ka basket nga puno? Sa ingon nga paagi, ang matag tawo o pamilya makapasundayag sa pagkamapasalamaton nga wala pugsa.
8. (a) Unsang duha ka kaayohan ang gitagana sa kahikayan sa pagpanghagdaw? (b) Sa unsang paagi ang pagkamanggihatagon ug pagkamapasalamaton ikapasundayag sa tanang nalangkit sa kahikayan sa pagpanghagdaw?
8 Ang ikatulong espisipikong paagi sa pagpakitag pagkamapasalamaton maoy maylabot sa balaod sa Diyos sa pagpanghagdaw. Sa ting-ani, ibilin ang mga bahin nga dili anihon alang sa mga kabos. Kadto wala lamang magtudlo sa pagkamaluluy-on ug pagkamahunahunaon alang sa mga kabos kondili kadto nagtino usab nga sila dili magsalig sa dili-makapadasig nga mga limos, nga walay paghago sa ilang bahin. (Levitico 19:9, 10) Kon pila gayod ang ibilin alang sa mga kabos wala tinoa. Apan kon ang Israelinhong mga mag-uuma magpakitag manggihatagong espiritu pinaagi sa pagbilin ug daghan sa daplin sa ilang mga uma ug sa ingon magpakitag kaluoy sa mga kabos, kana maghimaya sa Diyos. (Proverbio 14:31) Sila ang maghukom kon kaha ibilin ang hiktin o lapad nga luna nga wala maani. Ug ang Diyos naghatag ug kusganong mga mando bahin sa pagkamanggihatagon pinaagi sa pagbaod nga ang mga uhay nga mabiyaan sa uma ug bunga nga mabilin sa punoan o parrasan maoy alang sa mga manghahagdaw. (Deuteronomeo 24:19-22) Sa baylo, ang mga manghahagdaw makapasundayag sa ilang pagkamapasalamaton kang Jehova alang nianang balaora pinaagi sa pag-amot ug ikanapulong bahin sa ilang hinagdawan sa iyang dapit sa pagsimba.
Kinasingkasing nga Pagkamanggihatagon
9. Nganong kadtong nagpasundayag ug hakog nga tinamdan aktuwal nga nagdaot sa ilang kaugalingon?
9 Kon mohatag ang mga Israelinhon ug daghang mga amot, ang panalangin ni Jehova mahaanha sa ilang mga balay. (Itandi ang Ezekiel 44:30; Malakias 3:10.) Ugaling, bisan pa sa daghang ani kadaghanan sila wala mohatag ug mga amot. Dayon ang Diyos migamit ug mga pahinumdom pinaagi sa mga hari o mga manalagna sa pagpukaw sa ilang pagkamapasalamaton. Sa pagkamatuod, ang hakog nga mga Israelinhon mao ang alkansi, kay si Jehova dili makapanalangin niadtong naghawid sa mga amot maylabot sa iyang pagsimba o alang sa mga kabos.
10. (a) Unsa ang makalipay nga sangpotanan sa mga pahinumdom ni Haring Ezekias mahitungod sa pagkamapasalamaton? (b) Nagmalungtaron ba ang maong mga kahimtang?
10 Sa usa ka higayon, ang mga pahinumdom ni Haring Ezekias misangpot sa malipayong 14-adlaw nga pagsaulog sa Jerusalem. Ang mga tawo nadasig sa espirituwal nga paagi. Nahauna, gilaglag nila ang tanang galamiton sa pagsimbag diyosdiyos ug dayon “naghatag sa mga tinumpi. . . . Sa pag-abot ni Ezekias ug sa mga prinsipe ug nakakita sa mga tinumpi, ilang gidayeg si Jehova ug ang iyang katawhang Israel.” (2 Cronicas 30:1, 21-23; 31:1, 6-8) Ikasubo, hinunoa, tapos nianang pinanahong mga pagkadasig pag-usab, ang katawhan nahibalik ngadto sa pagkadili-mapasalamaton. Sa kataposan, naupos ang pailob sa Diyos, ug gitugotan niyang ang iyang katawhan madalang binihag ngadto sa Babilonya. Ang ilang siyudad ug ang matahom nga templo nalumpag. (2 Cronicas 36:17-21) Sa ulahi, tapos mapasig-uli, ang mga kahimtang nahimong daotan kaayo nga gipanig-ingon ni Jehova ang pagkahakogan ngadto sa pagpangawat kaniya, sa pagtulis kaniya!—Malakias 3:8.
11. Unsang prinsipyo nga nakat-onan gikan sa kasaysayan sa Israel ang makahatag kaayohan sa mga Kristohanong nagakinabuhi niining panahona?
11 Unsang prinsipyoha ang atong makat-onan gikan sa tipas-tipas nga kasaysayan sa mga Israelinhon? Kini: Samtang ang pagkamapasalamaton nagpabiling kusog sa ilang mga kasingkasing, sila malipayong nagpasundayag niini pinaagi sa paghatag sa “mga tinumpi sa mga tinumpi” kang Jehova. Apan sa dihang ang pagkamapasalamaton nahikalimtan o namenosan, ang malipayong materyal nga paghatag nahunong. Kana bang daotang tinamdan ikapasundayag sa dedikadong mga Kristohanon karong adlawa? Oo, tungod kay ania pa kanato ang tawhanong kadili-hingpit. Pagkamalipayon nato nga gipasulat sa Diyos ang iyang mga pakiglabot sa Israel mao nga kita, kinsa nagapuyo sa kataposan niining sistema sa mga butang, makakat-on ug makabatog kaayohan gikan kanila!—Roma 15:4; 1 Corinto 10:11.
12. (a) Sa unsang paagi ang katawhan ni Jehova karong adlawa anaa sa kahimtang susama sa iya sa mga Israelinhon? (b) Unsang mga pangutana ang atong igasukna?
12 Sama sa mga Israelinhon, ang katawhan ni Jehova karong adlawa dunay daghang hinungdan sa pagkamapasalamaton. Kita usab nakadawat ug daghang panalangin kay niadtong gipahimuslan sa atong isigkatawo. Ngani, kita daghag nasayran mahitungod sa mga katuyoan ni Jehova kay sa katawhan sa Israel. Atong nasayran nga kinabubut-ong gisakripisyo sa Diyos ang iyang Anak, ug kita nahibalo sa mga panalangin nga ipatungha niini alang niadtong giuyonan sa Diyos. Ug karong adlawa kita nakapribilehiyo nga anaa sa espirituwal nga paraiso, kay sukad 1919, gilalang ni Jehova ang talagsaong espirituwal nga kahimtang alang sa iyang katawhan. Oo, ang mga Saksi ni Jehova dunay daghang dugang hinungdan sa pagkamapasalamaton. Busa kinahanglang kita mangutana: Unsa ka lalom ang atong pagkamapasalamaton sa Diyos? Ug sa unsang paagi kita makapakita nga mapasalamaton niining ika-20ng siglo?
Modernong-Adlawng mga Kasamahan
13, 14. Bisan pag ang mga Kristohanon dili ilalom sa Moisesnong Kasugoan, may makuha bang kasamahan alang kanila gikan sa kasugoan sa paghatag sa ikapulo?
13 Ang mga Kristohanon dili ilalom sa Moisesnong Kasugoan nga naglaraw kon unsaon pagpasundayag sa pagkamapasalamaton sa Diyos. (Galacia 3:24, 25) Ang atong “sakripisyo” o halad sa pagdayeg kang Jehova, mao “ang bunga sa mga ngabil nga nagahimog dayag nga pagpahayag sa iyang ngalan.” (Hebreohanon 13:15) Nan, kini mao ang pangunang paagi nga ang dedikadong mga Kristohanon makapakitag pagkamapasalamaton sa Diyos. Apan ang makaiikag nga mga kasamahan mahimong makuha gikan sa mga kasugoan bahin sa paghatag sa ikapulo, mga amot, ug pagpanghagdaw.
14 Ang paghatag sa ikapulo nagkahulogan sa paghatag ug tinong gidaghanon nga ikanapulong bahin—ug walay kapilian bahin niadto. Sa susama, karong adlawa adunay tinong mga sugo nga gibutang sa tanang alagad ni Jehova, nga wala usab ing mga kapilian. Kinahanglang kita magtigom nga regular, ug kinahanglang dayag atong iwali ang maayong balita sa Gingharian ni Jehova ug tabangan ang uban nga mahimong mga tinun-an ni Kristo.—Hebreohanon 10:24, 25; Mateo 24:14; 28:19, 20.
15. Unsang mga timailhan sa manggihatagong mga kasingkasing sa modernong panahon ang susama sa gipadayag sa mga kahikayan sa amot ug pagpanghagdaw sa karaang Israel?
15 Hinumdomi, usab, ang mga kahikayan sa mga amot ug pagpanghagdaw. Ang espisipikong mga gidaghanon wala ibutang. Sa susama, ang Kasulatan wala maghatag ug tinong gidaghanon sa panahon nga gugolon sa matag usa sa mga Saksi ni Jehova diha sa sagradong pag-alagad. Ang gidaghanon sa panahong igahin sa pagtuon sa Pulong sa Diyos ug pagsangyaw sa uban anaa ra sa pagtukmod sa manggihatagon, dili-hakog nga mga kasingkasing. Sa susama, ang gidak-on sa materyal nga mga amot alang sa kauswagan sa intereses sa Gingharian anaa sa idiktar sa matag usa ka kasingkasing. Ang giladmon sa pagkamapasalamaton maoy mohukom kon kaha ang usa sa mga alagad sa Diyos karong adlawa magdalag “mga tinumpi sa mga tinumpi” o sa basta igo lamang. (2 Cronicas 31:6) Ugaling, sa kahimtang sa Israel kon mas dako ang pagpasundayag sa usa sa pagkamapasalamaton, mas daghan ang madawat nga mga panalangin gikan sa Diyos.
Mga Paagi sa Pagpakitag Pagkamapasalamaton
16-18. Sa unsang espisipikong mga paagi ang dedikadong mga Kristohanon makapakita nga sila mapasalamaton?
16 Usa sa labing direktang mga paagi sa pagpasundayag sa pagkamapasalamaton kang Jehova mao ang paghimo sa bug-os-panahong ministeryo. Ang imo bang pagkamapasalamaton dako nga igo aron ang imong kasingkasing magbaton sa maong pangandoy? Napanid-an pag-ayo nga ang malamposong payunir kinahanglan unang magbaton sa tinguha sa pag-alagad ug dayon sa hustong mga kahimtang. Kon dako ang pagkamapasalamaton, ang matukmorong tinguha sa pag-alagad sa Diyos sa bug-os pa mosugwak sa usa ka mapabilhong kasingkasing. Kana ba ang imong gibati? Bisan pag ang imong presenteng mga kahimtang dili motugot nga ikaw makig-ambit sa bug-os-panahong ministeryo, dili kinahanglang kini magpukgo sa espiritu sa pagpayunir. Makahatag kag bug-os-kasingkasing nga pagpaluyo ug pagdasig sa mga payunir.
17 Kon dili ka makapayunir karon, maka-auxiliary payunir ka ba panagsa? Adunay espesyal nga mga yugto kada tuig sa dihang ang Kristohanong kongregasyon nagadasig sa labaw-sa-kasagarang paningkamot sa buluhatong pagsangyaw. Pananglitan, ang mga bulan sa ting-init paborable alang sa daghan, ug sa Oktubre adunay dugang kalihokan maylabot sa kampanya sa suskrisyon sa magasin. Kon bahin sa mas daghang panahon alang sa sagradong pag-alagad, ang prinsipyo matuod nga ang pagkamapasalamaton nagapatunghag dagayang pagpanghatag.
18 Ang laing espisipikong paagi sa pagpakitag pagkamapasalamaton maoy pinaagi sa pagsuportar sa teokratikanhong programa sa pagpanukod nga ginahimo sa tibuok yuta. Sa daghang kanasoran, ginatukod ang bag-ong mga Kingdom Hall, ug ang nagalungtad nang mga tigomanan gipadak-an tungod sa sobrang tawo. Ang bag-ong mga Assembly Hall ginatukod, ug ang mga sumpay gidugang sa mga Balayng Bethel ug mga pabrika. Praktikal gayong paagi sa pagpasundayag sa pagkamapasalamaton kang Jehova—ang atong pag-amot sa kahago o kuwarta alang sa maong mga proyekto sa pagpanukod!
Maayong Panig-ingnan sa Kabos nga Babayeng Balo
19. Unsay labing makapahingangha kanato mahitungod sa kabos nga babayeng balo sa templo?
19 Ang usa ka iladong panig-ingnan sa Bibliya sa pagpakitag pagkamapasalamaton pinaagi sa dagayang materyal nga paghatag mao ang iya sa babayeng balo nga gibatbat ni Jesus. (Lucas 21:1-4) Nakaamgo gayod siya nga ang duha niya ka diyot makahimog diyutayng kalainan sa materyal nga kaayohan sa templo ug niadtong nag-alagad didto. Apan wala siya molantaw sa templo ug sa mga saserdote nga nag-alagad didto ug naghunahuna sa iyang kaugalingon: ‘Mas maayo pa ang ilang kinabuhi kay sa ako ug sila mas nindot pag balay kay sa akong gamayng balay.’ Matuod, ang templo labi pang maluho ug matahom. “Kadto inadornohan sa nindot nga mga bato ug dedikadong mga butang.” (Lucas 21:5) Apan kadto wala makapugong sa babayeng balo sa pag-amot. Buot niyang ipakita nga siya mapasalamaton kang Jehova, dili ngadto sa mga tawong nag-alagad sa templo.
20. Sa unsang paagi kita makapasundayag sa dalayegong mga tinamdan sama sa gipakita sa kabos nga babayeng balo?
20 Ang katawhan ni Jehova karong adlawa makakuhag leksiyon gikan niining panig-ingnana. Sama sa kabos nga babayeng balo, sila nasayod nga ang ilang mga amot, dako man o gamay, ginahatag ngadto sa Diyos. Ug sila makasalig pinaagi sa pagkasayod nga ang yutan-ong organisasyon ni Jehova nahikay sa paagi nga walay usa ka tawo ang makasapi. Ang mga pasilidad sa Soyedad gitukod ug gipalihok aron sa pagsangkap sa kugihang mga trabahante aron makabatog kinalabwang resulta sa dekalidad nga produksiyon sa mga Bibliya ug mga tabang sa Bibliya ug sa pag-alagad sa intereses sa Gingharian. Kini kasukwahi kaayo sa makauulawng sayop nga paggasto sa gidonar nga kuwarta nga bag-o pang gitaho maylabot sa pila ka magwawali sa telebisyon.
Mapuslanon ang mga Pahinumdom sa Pagkamapasalamaton
21, 22. Unsang epekto ang madasig diha sa mapabilhong mga kasingkasing sa malulutong mga pahinumdom aron ipakita nato ang pagkamapasalamaton?
21 Ang mga Israelinhon nagkinahanglag kanunayng mga pahinumdom sa ilang katungdanan kang Jehova, ilabina sa panginahanglan nga magpasundayag sa mapasalamatong espiritu. Sa linangkob, sa dihang kining mga butanga gidala sa ilang pagtagad, ang pagkamapasalamaton nahaling diha sa ilang mga kasingkasing, ug kadto misangpot sa labaw pa kay sa mga pulong lamang sa pagpahayag sa ilang mapasalamatong pagpabili. Sila kinabubut-ong naghatag sa “mga tinumpi sa mga tinumpi” nga abot kang Jehova aron magamit sa iyang balay sa pagsimba.
22 Busa hinaot kadtong sakop sa presenteng-adlawng “Israel sa Diyos” ug ang “dakong panon” sa ilang mga kauban mobati sa sama. (Galacia 6:16; Pinadayag 7:9) Hinaot ang ilang mapasalamatong mga kasingkasing magdasig kanila sa paghatag sa “mga tinumpi sa mga tinumpi” nga pagdayeg kang Jehova. Unya sila tinuod makaingon: “Kami nagapakita nga mapasalamaton ngadto sa among manggihatagon ug mahigugmaong Diyos, si Jehova.”
Nahinumdom Ka Ba?
◻ Nganong ang mga Kristohanon kinahanglan kanunay magsusi sa gidak-on sa ilang pagkamapasalamaton?
◻ Nganong ang katawhan ni Jehova kanunay may ekstrang hinungdan sa pagkamapasalamaton?
◻ Sa unsang espisipikong mga paagi ang mga Israelinhon makapakita sa ilang pagkamapasalamaton kang Jehova?
◻ Sama sa mga Israelinhon, unsang espisipikong mga butang ang atong mahimo sa pagpahayag sa pagkamapasalamaton?
◻ Unsay atong makat-onan gikan sa kabos nga babayeng balo didto sa templo?
[Hulagway sa panid 7]
Ang mga Israelinhon nagpakita sa pagkamapasalamaton pinaagi sa paghatag sa mga ikapulo ug sa inunahang mga bunga ug sa paghimog tagana aron ang mga kabos makahagdaw sa ilang mga uma.
[Hulagway sa panid 8]
Ang salmista nagpasalamat kang Jehova tungod sa Iyang kahibulongang mga buhat ug mga hunahuna sa Iyang katawhan
[Hulagway sa panid 10]
Ang mga Saksi ni Jehova karong adlawa nagapakitag pagkamapasalamaton pinaagi sa pag-apil sa pag-alagad sa kanataran ug sa teokratikanhong mga proyekto sa pagpanukod, ug usab sa paghatag materyal nga mga gasa