Ang Lunop—Usa ka Pasidaan sa Nangagi

SA HATAAS nga kasaysayan sa katawhan, dunay daghang natural nga mga katalagman nga sama ka gamhanan o mas gamhanan kay sa pagbuto sa Bukid St. Helens. Apan walay usa ang makatupong sa dakong Lunop sa mga adlaw ni Noe. Dako kaayo ug hilabihan ka malaglagon kadtong maong Baha nga nagbilin kinig dili mapanas nga impresyon sa katawhan sa tibuok globo nga sukod.

Dunay 150 ka lahi nga mga sugilanon sa Lunop gikan sa nagkalainlaing bahin sa yuta, lakip sa Babilonya, Roma, India, Australia, ug sa mga lugar sa Amerika. Bisag lahi ang mga detalye niining mga sugilanona, dunay kinatibuk-ang pagkauyon sa moral nga hinungdan sa Lunop, globonhong kalaglagan sa katawhan, ug sa kaluwasan sa usa ka pamilya diha sa arka kun barko. Usa lamang ka katalagman sa globonhong sukod ang makapabilin ug kaylap ug malungtarong impresyon.

Ang usa ka eskolar sa Bibliya misulat: “Ang panag-uyon ning tanang mga asoy maoy dili-ikalimod nga kalig-onan nga ang tradisyon dili kay usa ka imbento lamang; ang tinukodtukod nga sugilanon indibiduwal; dili unibersal; busa, ang tradisyon adunay makasaysayanhong pundasyon; kini maoy bunga sa usa ka hitabo nga tinuod nga nahitabo sa panahon sa bata pa ang katawhan.” Apan nganong kanang katalagmana nga dugay na kaayo maoy pasidaan sa kaliwatan karon nga buhi?

Hinungdanong atong tagdon ang mga kahimtang nga mitultol sa Lunop. Ang ilang kaamgiran sa mga kahimtang sa kalibotan karon nakahimo sa Lunop nga makahuloganon kanato. Mao kini ang pagkabatbat sa makasaysayanhong asoy sa basahon sa Bibliya sa Genesis niadtong mga kahimtanga: “Ug nakita ni Jehova ang pagkadaotan sa tawo sa yuta dako ug nga ang tanang pagpalandong sa mga hunahuna sa iyang kasingkasing lonlon nga kadaotan lamang gihapon. Ug nakita sa Diyos ang yuta, ug tan-awa! kini nadunot, kay ang tanang unod nagadunot sa ilang dalan sa ibabaw sa yuta.”​—Genesis 6:5, 12.

Ang kalibotan sa katawhan nag-antos sa kinatibuk-ang pagkadaot sa moral, ang tanan sa iyang mga hunahuna lonlon nga kadaotan lamang gihapon. Ingong resulta, “ang yuta napuno sa kabangisan.” (Genesis 6:11) Ang kinabuhi bug-os nga gigugol sa pagpangagpas ug materyal ug seksuwal nga mga tinguha. Gipunting ni Jesu-Kristo kini dihang miingon siya: “Kay maingon nga niadtong mga adlawa sa wala pa ang lunop, sila nanagpangaon ug nanag-inom, ang mga lalaki nanagpangasawa ug ang mga babaye nanagpamana, hangtod sa adlaw sa pagsulod ni Noe sa arka; ug sila wala magpakabana hangtod miabot ang lunop ug gianod silang tanan, maingon man usab niini ang pag-abot sa Anak sa tawo.” (Mateo 24:38, 39) Ang pagtagbaw sa unodnong mga pangibog mao ang ilang bugtong gikaikagan.

Ang abanteng pasidaan gihatag na ni Noe sa daghang katuigan, apan wala mituo kanang kaliwatana. Sila wala pa gayod sukad makaagi ug ingon nga lunop. Sanglit sama ra man sa gihapon ang mga butang, nahulog ang pasidaan sa bungol nga mga dalunggan. Sila “wala magpakabana.” Walay bili kanila nga gikan ang pasidaan sa ilang Maglalalang pinaagi kang Noe.

Apan miingon ang Diyos kang Noe: “Ang kataposan sa tanang unod ania na sa atubangan nako, kay ang yuta napuno sa kabangisan tungod kanila; ug ania karon pagalaglagon ko sila uban sa yuta.” (Genesis 6:13) Sa miabot ang Lunop, si Noe ug ang iyang pamilya natipigan tungod kay ilang gipamatian ang pasidaan ug misunod sa mga sugo sa Diyos. Apan nganong kining tanan dakog kalabotan kanato?

Managsamang mga Kahimtang

Sama sa mga adlaw sa wala pa ang Lunop, ilabina sukad sa Gubat sa Kalibotan I ang kabangisan nahimo nang naandang paagi sa kinabuhi. Ang politikal nga kabangisan sa mga nasod miresultag labing malaglagon ug mangilngig nga mga gubat sa tawhanong kasaysayan. Ang kabangisan mikaylap sa mga siyudad, sa kadalanan, ug sa mga panimalay, ug hulga bisan sa mga maglalakbay. Dugang pa, nangibabaw ang mabangisong mga tema sa telebisyon, mga pelikula, ug nobela.

Laing kaamgiran makita sa modernong paagi sa kinabuhi. Ang pagtagbaw sa sekso ug materyalistikong mga tinguha maoy bug-os nga gikaikagan sa presenteng kaliwatan. Sa tibuok yuta, atong makita ang moral nga kalumpagan nga nakapamungag mga sakit nga napasa sa sekso sa epidemiya nga sukod. Kaylap ang pagpanapaw, pakighilawas, ug homoseksuwal nga mga relasyon. Sama sa kaliwatan sa wala pa ang Lunop, ang presenteng kaliwatan mas mahigugmaon sa unodnong mga kalingawan ug materyal nga mga butang kay sa iyang paghigugma sa Diyos.

Sanglit “nasubo” ang Diyos sa hingaping daotang batasan sa katawhan sa wala pa ang Lunop, dili ba makataronganon ang pagtuo nga mao usab kanay iyang bation karon sa daotang batasan nga komun sa tibuok kalibotan? Dili ba ang gibuhat niya sa kalibotan sa mga adlaw ni Noe maoy pasidaan sa presenteng kaliwatan? Dili ba makataronganon ang pagtuo nga mohimo usab siya ug samang kalaglagan nianang atong makita sa Genesis 6:5-7? Sa nakita sa Diyos ang pagkadaotan sa katawhan, “nakapasubo kini sa iyang kasingkasing. Busa si Jehova miingon: ‘Pagalaglagon ko gikan sa nawong sa yuta ang tawo nga akong gibuhat.’” Pinaagi sa dinasig nga mga magsusulat sa Bibliya, ang Diyos mipahayag nga siya magpakanaog ug samang silot diha sa mapatuyangon sa kaugalingon nga kaliwatan nga buhi karon. Kini nagakaduol sa labing dakong katalagman sa tawhanong kasaysayan.

Ang Kataposang mga Adlaw

Nagpanan-aw sa atong panahon, ang dinasig nga magsusulat sa Bibliya sa ikaduhang sulat ngadto kang Timoteo nagbatbat sa nagkadaot nga mga kahimtang nga atong nakita karon sa tibuok kalibotan. Diha sa kapitulo 3, bersikulo 1 hangtod sa 4, siya miingon: “Apan sayri kini, nga sa kataposang mga adlaw managpangabot ang panahon nga malisod. Kay ang mga tawo unya mga mahigugmaon sa ilang kaugalingon, mahigugmaon sa salapi, tigpagawal, hambogiro, tampalasan, masukihon sa mga ginikanan, dili mapasalamaton, dili maunongon, walay kinaiyanhong pagbati, dili ikasabot, tigbutangbutang, walay pagpugong sa kaugalingon, mabangis, walay gugma sa maayo, mabudhion, gahig-ulo, magarbohon, mahigugmaon sa kalingawan inay sa Diyos unta hinoon.”

Mitagna usab si Jesu-Kristo sa kataposang mga adlaw ning sistema sa mga butang. Diha sa iyang tagna iyang gihisgotan ang grabeng kabangisan nga atong nakita sukad sa Gubat sa Kalibotan I, nga nag-ingon: “Kay managgubat ang nasod batok sa nasod ug gingharian batok sa gingharian.” (Mateo 24:7) Naghisgot usab siya bahin sa kadaotan nga kaylap karon ug sa kahadlok nga gibati sa tawo bahin sa umaabot. “Tungod kay mosanay ang kadaotan,” miingon si Jesus, “mobugnaw ang gugma sa kadaghanan.” (Mateo 24:12) Miingon usab siya nga ang mga tawo “panguyapan tungod sa kalisang ug sa pagpaabot sa mga butang nga mahitabo sa gipuy-ang yuta.”​—Lucas 21:26.

Ang ekspresyong “kataposang mga adlaw” samag kahulogan alang ning presenteng kaliwatan nga maoy kahulogan niini sa wala pay Lunop nga kaliwatan​—usa ka kataposan sa nangibabawng bahin niadtong tawhanong sistema sa mga butang. Diha sa 2 Tesalonica 1:8, 9, ang dinasig nga magsusulat sa Bibliya nga si Pablo miingon nga, pinaagi kang Jesu-Kristo, ang Diyos magpahamtang ug “panimalos diha kanila nga wala makaila sa Diyos ug kanila nga wala magmasinugtanon sa maayong balita mahitungod sa atong Ginoong Jesus. Sila mahiagom sa silot sa pagkalaglag sa walay kataposan gikan sa atubangan sa Ginoo ug gikan sa himaya sa iyang gahom.”

Nakita sa mga naluwas sa Lunop nga ang wala pay Lunop nga kaliwatan nabanlas gikan sa yuta. Ang katawhan ug ang tanan nilang nabatonan nangawagtang. Sama usab unya niana ang mahitabo dihang taposon sa balaang panimalos ang presente mabangis nga kaliwatan. “Sa dili madugay ang daotan mangawala, ug pagasusihon mo ang iyang dapit, ug siya mawala diha.”​—Salmo 37:11; Pinadayag 7:9, 13, 14.

Posible ang Kaluwasan

Ang kaamgiran sa wala pay Lunop nga kaliwatan ug sa atong kaliwatan dili sa pagkadaotan lamang sa katawhan ug sa ilang kalaglagan. Sama nga dihay nangaluwas sa Lunop, sa ingon dunay mangaluwas sa kataposan sa presenteng sistema sa mga butang. Ang nangaluwas sa Lunop maoy maaghop nga mga tawo nga wala magkinabuhi sama sa katawhan sa kinatibuk-an. Sila maoy mga mahigugmaon sa pagkamatarong nga masinundanon sa Diyos ug mapatalinghogon sa iyang mga pasidaan. Kita gisuginlan diha sa Genesis 6:8, 9: “Apan si Noe nakakaplag ug kahimuot sa mga mata ni Jehova. . . . Si Noe maoy usa ka tawo nga matarong. Iyang napamatud-an ang iyang kaugalingon nga walay kalapasan taliwala sa iyang mga katalirongan.” Mahitungod kaniya ug sa iyang kaubang nangaluwas, misulat si apostol Pedro nga ang Diyos “wala maghawid sa pagsilot sa karaang kalibotan, apan nagtipig kang Noe, nga magwawali sa pagkamatarong, nga luwas kauban sa pito sa diha nga iyang gipalunopan ang kalibotan sa dili-diyosnong katawhan.”​—2 Pedro 2:5.

Kita gipasaligan sa mga manalagna sa Diyos nga adunay dakong panon sa mga mangaluwas sa umaabot nga balaang kalaglagan sa Diyos sa presenteng sistema sa mga butang. Sila, usab, maoy maaghop nga mga tawo nga mga mahigugmaon sa pagkamatarong ug masinugtanon sa mga sugo sa Diyos sama kang Noe. Tapos nagtagna sa kalaglagan sa daotan, ang salmista nag-ingon: “Apan ang mga maaghop makapanunod sa yuta, ug sila tinuod nga makakaplag sa tuman nga kalipay diha sa kadagaya sa pakigdait.”​—Salmo 37:10, 11; Pinadayag 7:9, 13, 14.

Nagtagna si Jesus nga ang maayong balita sa Gingharian sa Diyos iwali sa tibuok kalibotan sa kataposang mga adlaw. Kini maoy paagi nga matigom ang matarong ug kasingkasing nga mga tawo sa yuta alang sa kaluwasan. Giilustrar kini ni Jesus diha sa iyang sambingay bahin sa paglain sa mga karnero gikan sa mga kanding. Ug iyang gitapos ang sambingay sa pag-ingon nga ang samag-kanding dili matarong nga mga tawo “mamahawa ngadto sa walay kataposang kalaglagan, apan ang [samag-karnero] mga matarong ngadto sa kinabuhing dayon.”​—Mateo 25:31-46.

Bisag dugay na kaayong nahitabo ang Lunop gikan sa atong panahon, kini maoy dayag nga pasidaan kanato sa pagpamati. Ang rekord niini gisulat, sumala sa gipamulong sa Bibliya, “sa pagtudlo kanato.” (Roma 15:4) Kini maoy pasidaan batok sa pagkinabuhi sa mabangis, mailibgon sa sekso, ug materyalistikong paagi sa kalibotan nga dili mapatalinghogon sa atong Maglalalang. Siya dili mausab. Gipapha sa Diyos ang wala pay Lunop nga kaliwatan tungod sa pagkadaotan niini. Sa samang katarongan, iyang paphaon kining bag-ong kaliwatan ug ang enterong sistema niini sa politikal nga kagamhanan, materyalistikong pangomersiyo, ug ang bakak nga relihiyon.

Aron maluwas sa kataposan niining sistema sa mga butang, kinahanglan mamati kita sa pasidaan sa nangagi. Atong pamatud-an ang atong kaugalingon nga mga mahigugmaon sa pagkamatarong, sama sa walo nga naluwas sa Lunop. Ug aron maluwas atong sundon ang tambag sa Sofonias 2:3: “Pangitaa ang pagkamatarong, pangitaa ang pagkamaaghop. Kay tingali kamo pagatagoan sa adlaw sa kasuko ni Jehova.”

[Hulagway sa panid 7]

Sama nga naluwas si Noe ug ang iyang pamilya sa Baha, ikaw usab mahimong usa sa malipayong maluwas sa kataposan niining sistema sa mga butang