Tinuyong Nagapakaylap sa Kamatayon

SA DILI pa ang AIDS mopatay sa iyang mga biktima, kini nagahatag kanilag makalilisang nga responsabilidad: usa ka gahom sa kinabuhi o kamatayon ibabaw sa uban. Daghang masakiton sa AIDS nagalihok sa responsableng paagi, nga nagatungina sa ilang kaugalingon sa usa ka buhat nga basin makatakod sa uban. Apan ang peligrosong pipila mihukom nga lahi.

Ang usa ka sikyatrista sa Washington, D.C., misulat mahitungod sa usa ka makalilisang nga panig-ingnan—usa sa iyang mga pasyente: “Ang nadisturbo kaayo bisexual nga biktima sa AIDS, ako nahadlok, tinuyong nagasingkamot sa pagtakod sa ubang tawo sa iyang sakit. Nasayod siya nga kini makapatay kanila. Ang lalaki misulti kaniya: “Sa sinugdan sa dihang nasayran ko nga ako may AIDS akong gihukom nga dili makigsekso kang bisan kinsa, ug unya ako nasuko lamang ug miingon: Pukanon nato ang kalibotan.” Unsay iyang gipasabot?

Ang sikyatrista mipatin-aw: “Giingnan niya ako nga usahay sa dihang siya may kasuk-an, ang usa ka tingog sa kahiladman moingon kaniya, ‘Biktimahon nato kining tawhana’ ug siya mosulay nga makigsekso kaniya. Siya miingon usab nga siya nakig-ipon sa usa ka lalaking bisexual nga mapatuyangon sa mga babaye.” Ang sikyatrista misulay sa pagdani sa opisyales nga prisohon ang maong peligrosong tawo apan nakawang. “Sa kataposan ko siyang nakita,” siya misulat, “ang iyang kagawian wala mausab, ug ako walay katarongan sa pagduhaduha nga kini mao gihapon karong adlawa.”

Usa ka linaing kaso? Ikasubo, dili. Ang usa ka tawo gianggaang Pasyente Zero sa Centers for Disease Control tungod sa iyang pangunang papel sa sayong pagkaylap sa AIDS sa Tinipong Bansa. Bisan pa tapos niya hisayri nga siya nagpameligro sa kinabuhi sa uban, mipadayon siya sa homoseksuwal nga pakigkontak sa mga 250 ka paris sa usa ka tuig. Ang mga babaye nangreklamo mahitungod sa mga kaparis nga nagtago sa ilang bisexuality o pagpakigsekso sa duha ka sekso. Ang mga tiggamit sa droga nagapadayon sa pagpakig-ambit sa ilang nagamit ug nakontaminar nga mga dagom ug busa nahimong kinadak-ang pundok sa bag-ong mga biktima sa AIDS diha sa ubay-ubayng kanasoran.

Bisan tuod makapikal kining tanan, kini dili katingad-an sa mga estudyante sa Bibliya. Kanang karaang basahon mitagna dugay na kanhi nga ang mga tawo niining gubot nga kaliwatan mahimong “mga mahigugmaon sa ilang kaugalingon . . . nga walay kinaiyanhong pagbati.” (2 Timoteo 3:1-5) Miabot na gayod ang maong panahon. Kadtong wala manumbaling sa mga balaod sa Diyos bahin sa moralidad kanunayng nagasakit sa Awtor sa maong mga balaod, ang atong Maglalalang. Kana ang pinakadaotang riyesgo nga mahimo sa usa sa kinabuhi. Apan karong adlawa ang samang pagkamasupilon kasagaran mopatunghag dugang riyesgo: pagtugyan sa kinabuhi mismo sa usa ngadto sa mga tawo nga ang ila lamang gipabilhan mao ang ilang kaugalingong kalipayan.