Gikan sa Among mga Magbabasa
Maria
Ang inyong artikulo bahin kang Maria, sa Nobyembre 8, 1988, sa akong opinyon, maoy pagsulay sa paglarawan sa mga Katoliko ingong mga magsisimbag diyosdiyos. Naghisgot kini sa makadaghan sa mga Katoliko ingong “mga magsisimba” ni Maria. Pasagdi ako sa pagtul-id sa maong butang. Ako Katoliko sulod na sa 35 ka tuig, ug wala akoy nailhang Katoliko nga “nagsimba” kang Maria. Daghan kanamo nag-ampo sa Diyos pinaagi kang Maria. Walay usa kanamo ang naglantaw kaniya nga sama o nagtanding kaniya sa Diyos.
G. A. H., Tinipong Bansa
Ang “The Catholic Encyclopedia” (1912, Tomo 15, panid 463) nag-ingon: “Kanang popular nga debosyon sa Bulahang Birhen gihimo (sa edad media) uban ang kaluho ug mga pag-abuso, dili ikalimod.” Ang pagduaw sa mga lugar diha sa kadaghanang kayutaang Katoliko karong adlawa mopamatuod kang G. A. H. nga ang maong mga paghingapin nagpadayon.—ED.
Ayaw paghukom aron kamo dili pagahukman. Kon ang mga Katoliko naghingapin sa pagsimba kang Maria, pasagdi nga ang atong Ginoo ang mohukom sa adlaw sa panudya. Hinumdomi, ang kamatuoran modaog. Isulat ang dapig ug supak sa kahimtang ug pagsagdi ang mga magbabasa nga mosabot sa inyong kabalaka.
R. W., Tinipong Bansa
Ang akong pamilya ug ako mga Katoliko ug debotado kang Maria apan nakakita, bisan pa niana, sa daghang tuig sa inyong mga magasin nga makaiikag ug mapuslanong basahon. Ang artikulo bahin kang Maria, sa tanang panahon, matumonganon ug walay pagbiaybiay. Apan, buot kaming masayod, nganong wala kamoy gihisgotan bahin sa Lourdes ug Fatima? Ang inyong katim-os sa pag-usisa sa mga ulohan ug sa pagdangat ug mga konklusyon ilado. Dili ba may nasipyatan kamo bahin sa mga butang sa Kristohanong pagtuo pinaagi sa dili pagtuo sa tapos sa panahon sa Bibliya nga mga pinadayag?
P. O., Federal Republic of Germany
Hayan si P. O. nakabasa sa among Marso 8, 1989, nga gula, nga naghisgot sa katingad-anan sa Lourdes ug Fatima sa pila ka detalye.—ED.
Kalihokan sa Babaye
Natawo ako sa 1920. Aron makasabot sa kiling sa mga babayeng nagtrabaho (Hulyo 22, 1988) angay nga mamati kamo, dili sa mga feminist, kondili sa konserbatibo, walay-gidapigan, bisag nagtrabaho, nga babaye. Dunay duha ka katarongan nganong nagtrabaho ang mga babaye. Una mao ang pinansiyal. Kon ang lalaki dili makasuportar sa pamilya, ang babaye kinahanglang motrabaho sa bug-os panahon, makataronganon niyang buhaton ang katunga sa buluhaton sa balay, ug ang problema sa nabug-atan sa trabaho nga babayeng may karera mawala dayon.
Ang laing rason nganong mipili ang babaye sa pagtrabaho mao ang kakulang sa pagpakitag apresasyon diha sa panimalay. Daghang higayon nga nakakita akog amahan ug anak nga babaye nga nag-atake sa asawa, ug iyang gibati nga giipit siya pagawas sa pamilya. O kaha mas gusto sa bana ang iyang serbisa ug ang iyang telebisyon kay sa iyang asawa. Alang niini nga katarongan nga siya nangitag trabaho diin siya may katagbawan sa pagbaton ug usa ka butang balos sa iyang mga paningkamot. Akong nakita sa kaliwatan sa akong ginikanan ang tinamdan nga wala na maglungtad. Kadtong mga lalakiha nahigugma dili lang sa ilang mga asawa kondili nagtahod ug may konsiderasyon. Wala nako makita kining tulo ka butang niining kaliwatana. Pasagdi nga ang mga lalaki mobalik sa gugma, pagkamaunongon, ug pagtahod, ug imong makita nga mobalik ang mga babaye sa panimalay.
F. K., Canada
Ang komento ni F. K. bahin “niining kaliwatana” makapahinumdom sa “kaliwatan” nga gitagna ni Jesus ug Pablo nga makasinatig pagkawala sa “kinaiyanhong pagmahal” sa pamilya. (Mateo 24:3, 34; 2 Timoteo 3:1-3.—ED.