Ang Hunahuna sa Bibliya

Pagsultig mga Dila—Gikan ba Kini sa Diyos?

“NGA laktud, miabot sa akong mga kamot ang katingalahang pagbait, ug kadto ... misugod sa pagsugwak! Kadto nahisamag usa ka libo—samag napulo ka libo—dayon usa ka milyong boltahe sa koryente ... Ako misulti sa pinulongan nga wala ko hisabti sulod sa duolag duha ka oras.”

Kining pagbatisa mahulagwayon sa usa sa labing gilantugiang mga buhat nga gilangkit sa daghan sa Kristohanong pagsimba karong adlawa: ang pagsultig mga dila. Kining butanga ilabinang may kalabotan sa Pentekostal nga mga pundok ug sa mga kalihokang karismatik sa ubang iglesya.

Si Dr. Vinson Synan sa Pentecostal Holiness Church mipasiugda sa sulirang giatubang sa mga magsisimba mahitungod sa papel sa pagsultig mga sila. Matud niya: “Ang pagsultig mga dila usa ka kaulawan namo.” Ngano? Si Dr. Synan miingong ang mga pinulongan o mga dila karong adlawa daw dili makataronganon alang kanamo. “Bisan pag kini makulaw,” siya mipadayon, “ang glossolalia [pagsultig mga dila] mao ang gasa nga gipili sa Diyos sa estratehikong mga punto sa kasaysayan sa pagpauswag ug pagbag-o sa Iglesya.”—Italiko amoa.

Usa nianang ‘estratehikong punto’ mao ang labing talagsaong hitabo mga 1,900 ka tuig kanhi.

Nganong mga Dila?

Pentekostes kadto sa tuig 33 K.P. Hapit nang mahitabo ang kausaban. Ang usa ka bag-ong tugon magpuli sa karaang Hudiyonhong tugon sa Kasugoan. Tungod sa unsang hinungdan? Sa pagbukas sa labi pang maayong paagi sa pagsimba kang Jehova nga Diyos. Sa unsang paagi masabot sa mga tawo nga ang panalangin sa Diyos diha niadtong kausaban sa pagsimba? Gamiton niya ang pagbutho sa mga milagro, apil ang pagsultig mga dila, aron tandogon ang mga kasingkasing sa katawhang mahiligon sa pagkamatarong. Sial makasabot nga ang Diyos nga makagagahom sa tanan sa ilang mga katigulangan sa maong panahon naghatag gayod sa ilang pag-uyon diha sa mga tinun-an ni Jesus.

Ang gasa sa mga dila nag-alagad ug laing katuyoan sa Pentekostes. Sa adlaw ni Jesus, ang pag-imprenta ug pagsibya wala maglungtad, ug ang sinulat nga mga rekord dili kasagaran taliwala sa ordinaryong katawhan. Busa, ang maayong balita sa kabubut-on ug katuyoan sa Diyos kinahanglang pagadad-on sa mga dila sa mga magtutuo. Ang mga magsisimba ni Jehova nangabot sa Pangilin sa Pentekostes sa Jerusalem gikan sa kapin sa dosenang yuta sa Aprika, Asia, ug Uropa, ug sila nagsultig daghang nagkalainlaing pinulongan. Mga 120 sa mga tinun-an ni Jesus nagtigom usab sa Jerusalem. Kay gihatagag gahom sa balaang espiritu sa Diyos, ang mga tinun-an misugod sa pagsulti sa nagkalainlaing dila. Pagkatagsaong kombira sa maayong balita ang gidulot ngadto sa kapid-ang magsisimba! SIla nakaarang sa “pagkabati kanila nga nagsulti sa [ilang kaugalingong] mga dila mahitungod sa halangdong mga butang sa Diyos.”—Buhat 2:5-11.

Unsa ba ka epektibo kadtong milagroha? Tulo ka libong mamiminaw nahimong mga magtutuo niadtong adlawa mismo! (Buhat 2:41) Sa pagpauli ngadto sa ilang halayong mga pinuy-anan, ang maong bag-ong mga kinabig sa maong panahon nagpamatuod mahitungod sa matuod nga pagsimba “ngadto sa labing halayong bahin sa yuta.”—Buhat 1:8.

Kapin lamag diyutay sa kawhaan ka tuig tapos sa Pentekostes, si Pablo nagpahibalo nga ang gasa sa mga dila sa kadugayan mohunong. (1 Corinto 13:8) Nganong kana makataronganon man? Kay ang milagro sa Pentekostes, ingong usa ka pamatuod sa sayong Kristiyanidad, ang-alagad nga maayo sa ilang katuyoan ug dili na kinahanglanon.

Kita susamang makaisip sa kahimtang sa Bukid Sinai kapin ug 1,500 ka tuig nga unauna. Didto gipahinabo sa Diyos ang talagsaong labaw-kinaiyanhong mga ilhanan aron sa pagpasabot sa natigom nga katawhan nga ang tugon sa Kasugoan naggikan sa Diyos. Dihang kadtong bag-ong kahikayan gidawat na sa katawhan, kadtong linaing milagrosong mga ilhanan wala na makita—Exodo 19:16-19.

Mga Dila Karong Adlawa?

Karong adlawa gibati sa daghan nga sila gitabangan sa balaang espiritu sa Diyos sa pagsultig mga dila. Sa unsang paagi atong ikapahiuyon kini sa Kasulatanhong ebidensiya nga ang gasa sa mga dila mihunong na?

Ang pagsultig mga dila kasagarang katumbas sa emosyonal kaayong mga pagbutho sa mga tingog nga walay makasabot. Busa dili mahimong kini gikan sa Diyos. Si Jesus miingon nga ang relihiyosong mga salingkapaw mosulay sa pagalngkit sa iyang ngalan nianang “mga gamhanang buhat,” apan gisalikway niya ang maong “mga mamumuhat sa kalapasan.” (Mateo 7:21-23) Ug si Pablo matagnaong angpasidaan sa usa ka umaabot nga panahon dihang aduna unyay malimbongong mga milagro, o “bakakong mga ilhanan ug mga tilimad-an.” Busa, “ang matag dili-matarong nga panglimbong” maoy batid nga buhat sa labaw nga limbongan, si Satanas nga Yawa.—2 Tesalonica 2:8-10.

Nasayod ka ba nga ang pagsuotig mga dila maoy usa ka bahin sa pila ka paganong mga relihiyon sa Gresya sa adlaw ni Pablo? Ang ilang mga rituwal nagsagol sa pagsultig mga dila uban sa mga buhat sama sa paghiwahiwa sa unod ug natarantar nga pagsayaw samtang hubo. Ang maong mga panigingnan sa kasaysayan tin-awng nagapakita nga ang pagsultig mga dila mahimong mahitabo ilalom sa mga impluwensiya nga labing dili balaan.

Ang Pangatarongan Mopahayag

Kon ikaw wala pa makapiho bahin sa sinugdanan sa makapaukyaw nga pagsultig mga dila karong adlawa, palandonga ang 1 Juan 4:1, nga nagaingon: “Mga hinigugma ... sulayi ang dinasig nga mga pahayag sa pagtino kon sila nagagikan ba sa Diyos.” Oo, sulayi pinaagi sa ugdang nga pagtuon sa Pulong sa Diyos, uban ang mainampoong hangyo sa panabang. (Buhat 17:11) Tan-awa kon ang mga relihiyon nga nagasultig mga dila karong adlawa gigiyahan ba gayod ngadto sa “tanang kamatuoran.”—Juan 16:13.

Dihan ang mga Kristohanon nagsultig mga dila sa unang siglo, kadto naglig-on sa mga mamiminaw. Ang dinasig nga balita kinahanglang tin-aw ug masabtan.—1 Corinto 14:26-28.

Kadtong si kinsa karon nagapasidungog sa kamatuoran sa Bibliya nagapahayag sa mga pamulong nga molabaw sa mga pulong nga naggikan sa dinasig nga mga dila sa adlaw sa Pentekostes dugay na kanhi. Ngano man? Tungod kay sila nagapahayag sa pagmando sa Gingharian sa Diyos pinaagi kang Kristo alang sa tanang masinugtanong katawhan ngadto sa daghan pang mamiminaw ug sa permanenteng dagway. Ang ilang mensahe maoy bahin sa nasulat nga rekord sa Bibliya, ug lahi sa pagsultig mga dila sa unang-siglong mga Kristohanon, ang Bibliya, sa tibuok o sa bahin, mabatonan sa mga 1,800 ka pinulongan.

[Letrato sa panid 21]

Ang unang-siglong mga Kristohanon gihatagan sa gasa sa pagsangyaw diha sa langyawng mga dila