Unsay Kahulogan sa Paghigugma sa Diyos?
MGA unom ka libo ka tuig kanhi, natawo ang unang tawhanong bata. Human siya natawo, ang iyang inahan, si Eva, miingon: “Nanganak akog lalaki uban sa tabang ni Jehova.” (Genesis 4:1) Ang iyang pulong nagpadayag nga, bisag gihukman na sa kamatayon tungod sa ilang pag-alsa, si Eva ug ang iyang bana, si Adan, nasayod gihapon sa pagka-Diyos ni Jehova. Sa ulahi sila nanganak ug ikaduhang anak nga lalaki. Ang mga bata ginganlag Cain ug Abel.
Samtang nagdako ang mga anak, sila sa walay duhaduha nakakat-on ug dako bahin sa gugma ni Jehova pinaagi sa pagsusi lamang sa iyang kalalangan. Natagamtam nila ang matahom nga mga bulok sa kinaiyahan ug ang panagkadaiya sa mga hayop ug mga tanom. Dili lamang sila gihatagan sa Diyos ug kinabuhi apan siya usab naghatag kanila ug katakos nga makakaplag ug kalipay sa kinabuhi.
Nakat-onan nila nga ang ilang mga ginikanan gilalang nga hingpit ug nga ang orihinal nga katuyoan ni Jehova mao nga ang mga tawo mabuhing walay kataposan. Lagmit gihubit ni Adan ug Eva ngadto kanila ang matahom nga tanaman sa Eden, ug sila sa usa ka paagi ug sa lain nagpatin-aw kon nganong sila gipalagpot gikan sa maong paraisonhong pinuy-anan. Si Cain ug Abel hayan nahibalo usab sa tagna sa Diyos nga narekord sa Genesis 3:15. Pinaagi nianang tagnaa gipahayag ni Jehova ang iyang katuyoan sa pagtul-id sa mga butang sa tinakdang panahon alang sa kaayohan niadtong nahigugma kaniya ug nagpamatuod nga maunongon kaniya.
Ang pagkakat-on bahin kang Jehova ug sa iyang mga hiyas nakapukaw gayod ug tinguha kang Cain ug Abel nga uyonan sa Diyos. Busa sila miduol kang Jehova pinaagi sa pagtanyag ug mga halad kaniya. Ang asoy sa Bibliya nag-ingon: “Sa nagairog ang panahon nahitabo nga si Cain nagdala gikan sa mga abot sa yuta ug usa ka halad kang Jehova. Apan si Abel, siya nagdala usab ug mga panganay sa iyang panon, bisan sa matambok nga mga bahin niini.”—Genesis 4:3, 4.
Ang ilang tinguha nga mabatonan ang pag-uyon sa Diyos nakahimog usa ka patukoranan alang sa usa ka relasyon kaniya. Si Cain mirebelde sa Diyos, samtang si Abel padayong napalihok sa matuod nga gugma sa Diyos. Dili unta maugmad ni Abel ang maong relasyon uban sa Diyos gawas kon siya nagbaton una ug kahibalo bahin sa personalidad ni Jehova ug sa iyang mga katuyoan.
Mailhan usab nimo si Jehova. Pananglitan, sa Bibliya imong makat-onan nga ang Diyos maoy usa ka tinuod nga persona, dili yanong usa ka walay kinabuhing puwersa nga nagpanglalang sa mga butang pinaagig aksidente. (Itandi ang Juan 7:28; Hebreohanon 9:24; Pinadayag 4:11.) Nagtudlo usab ang Bibliya nga si Jehova maoy “usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran.”—Exodo 34:6.
“Ang Pagsugot Labi Pang Maayo kay sa Halad”
Ingon sa giilustrar sa asoy ni Cain ug Abel, dili pa igo ang pagbatog kahibalo sa Diyos ug ang tinguha nga makabatog suod nga relasyon kaniya. Tinuod, ang duha ka managsoon miduol sa Diyos pinaagig pagtanyag ug mga halad. Apan, “bisag si Jehova nagtan-aw nga may pag-uyon kang Abel ug sa iyang halad, siya walay pag-uyon kang Cain ug sa iyang halad. Ug si Cain nasuko pag-ayo, ug nangil-ad ang iyang panagway.”—Genesis 4:3-5.
Nganong gisalikway ni Jehova ang halad ni Cain? May deperensiya ba ang kalidad sa iyang halad? Nasuko ba si Jehova tungod kay gitanyag ni Cain ang “mga abot sa yuta” imbes usa ka halad nga hayop? Dili kana ang katarongan. Sa ulahi, malipayong gidawat sa Diyos ang mga halad nga lugas ug ubang mga abot sa yuta gikan sa daghan sa iyang mga magsisimba. (Levitico 2:1-16) Nan, dayag nga may deperensiya ang kasingkasing ni Cain. Makabasa si Jehova sa kasingkasing ni Cain ug nagpasidaan kaniya: “Nganong nasuko ikaw pag-ayo ug nganong nangil-ad ang imong panagway? Kon maayo ang imong gibuhat, kini dili ba pagadayegon? Apan kon dili maayo ang imong gibuhat, adunay sala nga nagahupo sa ganghaan, ug ikaw ang ginatinguha niini.”—Genesis 4:6, 7.
Ang tinuod nga gugma sa Diyos nagkahulogan ug labaw pa kay sa yanong pagtanyag ug mga halad. Maoy hinungdan nga gidasig ni Jehova si Cain nga ‘buhaton ang maayo.’ Buot sa Diyos ang pagkamasinugtanon. Ang maong pagkamasinugtanon sa Diyos nagtabang unta kang Cain sa paghimog usa ka maayong patukoranan alang sa usa ka mahigugmaong relasyon sa Maglalalang. Gipasiugda sa Bibliya ang bili sa pagkamasinugtanon pinaagi niining mga pulonga: “Si Jehova may dako bang kalipay sa mga halad nga sinunog ug sa mga halad sama sa pagtuman sa tingog ni Jehova? Tan-awa! Ang pagsugot labi pang maayo kay sa halad, ang pagpamati kay sa tambok sa mga laking karnero.”—1 Samuel 15:22.
Kining ideyaha gilig-on pa sa ulahi pinaagi sa mga pulong sa 1 Juan 5:3: “Ang paghigugma sa Diyos nagakahulogan niini, nga atong sundon ang iyang mga sugo; ug gani ang iyang mga sugo dili man mabug-at.” Wala nay laing maayong paagi sa pagpakita sa atong gugma kang Jehova kay sa atong pagpasakop sa iyang awtoridad. Kini nagkahulogan ug pagkamasinugtanon sa moral nga lagda sa Bibliya. (1 Corinto 6:9, 10) Kini nagkahulogan sa paghigugma sa maayo ug sa pagdumot sa daotan.—Salmo 97:10; 101:3; Proverbio 8:13.
Usa ka hinungdanong kapadayagan sa atong gugma sa Diyos mao ang atong gugma sa silingan. Ang Bibliya nag-ingon kanato: “Kon adunay mopahayag: ‘Gihigugma ko ang Diyos,’ apan nagadumot sa iyang igsoon, siya bakakon. Kay siya nga wala magahigugma sa iyang igsoon, kinsa iyang nakita, dili makahigugma sa Diyos, kinsa wala niya makita.”—1 Juan 4:20.
Posible ang Pagpakigsuod sa Diyos
Ang uban tingali moingon, ‘Ako nagsimba kang Jehova. Gituman ko ang iyang mga sugo. Maayo ang akong pagtagad sa akong isigkatawo. Gibuhat ko kanang tanan. Apan, wala ko gayod batia nga suod sa Diyos. Wala ko batia nga adunay malig-ong gugma alang kaniya, ug kana nagpabati kanako nga sad-an.’ Ang uban tingali naghunahuna nga sila dili-takos nga makabaton sa maong suod nga relasyon kang Jehova.
Human sa halos 37 ka tuig sa dedikadong pag-alagad kang Jehova, usa ka Kristohanon misulat: “Daghang higayon sa akong kinabuhi nga bation nako nga wala sa buut ang akong pag-alagad kang Jehova, nga tingali wala gani diha niana ang akong kasingkasing. Apan nasayod ako nga ang pag-alagad kang Jehova maoy hustong butang nga buhaton, ug dili ako makatugot nga mohunong ako. Ugaling, sa matag higayon nga mabasa ko ang bahin sa usa ka tawo nga nag-ingon nga ang iyang ‘kasingkasing natugob sa paghigugma kang Jehova,’ ako nahibulong, ‘Unsay akong problema, sanglit wala ko gayod kana batia?’” Sa unsang paagi kita masuod sa Diyos?
Kon tinuod ka nga nahigugma sa usa ka tawo, kanunay ka nga maghunahuna nianang tawhana. Ikaw may kusganong tinguha nga masuod kaniya tungod kay gimahal mo siya. Kon kanunay mong makita siya, ikasulti siya, ug maghunahuna kaniya, dugang nga molambo ang imong gugma kaniya. Kining prinsipyoha usab ikapadapat sa imong pag-ugmad ug gugma sa Diyos.
Sa Salmo 77:12, ang dinasig nga magsusulat nag-ingon: “Magapalandong gayod ako sa tanan mong mga buhat, ug hunahunaon ko ang imong mga pakiglabot.” Ang pagpalandong hinungdanon aron maugmad ang gugma sa Diyos. Tinuod kini ilabina tungod kay siya dili-makita. Apan kon kanunay mo siyang hunahunaon, dugang siya nga mahimong tinuod alang kanimo. Diha lamang nga maugmad nimo ang kinasingkasing ug mabinationg pagmahal kaniya—tungod kay siya tinuod kanimo.
Ang imong kiling sa pagpalandong kanunay sa mga dalan ug mga pakiglabot ni Jehova magdepende kon unsa ka subsob ikaw nagapamati kaniya. Ikaw nagapamati pinaagi sa regular nga pagbasa ug pagtuon sa iyang Pulong, ang Bibliya. Ang salmista naghisgot sa usa ka malipayong tawo ingong usa kansang “kalipay anaa sa kasugoan ni Jehova, ug diha sa iyang kasugoan siya nagabasa sa hagawhaw nga tingog sa adlaw ug gabii.”—Salmo 1:1, 2.
Ang laing importanteng butang mao ang pag-ampo. Maoy hinungdan nga ang Bibliya subsob nga nagtambag kanato sa pag-ampo—“sa tanang higayon,” ‘magdeboto ug panahon sa pag-ampo,’ “lumahutay sa pag-ampo,” ug “pag-ampo nga walay-hunong.” (Efeso 6:18; 1 Corinto 7:5; Roma 12:12; 1 Tesalonica 5:17) Ang atong walay-hunong nga mga pag-ampo kang Jehova magpamahal kanato ngadto kaniya, ug ang pasalig nga siya nagapamati magpasuod kanato ngadto kaniya. Kini gipamatud-an sa salmista, sa dihang siya miingon: “Nahigugma ako, kay si Jehova nagpatalinghog sa akong tingog, sa akong mga pangaliyupo. Tungod kay iyang gikiling ang iyang igdulungog kanako, ug sa tibuok nakong kinabuhi ako magatawag kaniya.”—Salmo 116:1, 2.
Pagsundog sa Diyos sa Gugma
Si Jehova maayo kanato. Ingong Maglalalang sa uniberso, siya aduna gayoy daghang butang nga ginatagad ug ginaatiman. Bisan pa, ang Bibliya nagsulti kanato nga bisag siya halangdon, siya sa gihapon nagaatiman sa iyang tawhanong linalang. Siya nahigugma kanato. (1 Pedro 5:6, 7) Gipamatud-an kini sa salmista pinaagi sa iyang mga pulong: “Oh Jehova nga Ginoo namo, pagkahalangdon sa imong ngalan sa tibuok nga yuta, ikaw kansang himaya giasoy ibabaw sa mga langit! Sa magtan-aw ako sa imong mga langit, sa mga buhat sa imong mga tudlo, sa bulan ug sa mga bituon nga imong giandam, unsa ba ang tawo nga ikaw naghunahuna man kaniya, ug ang anak sa tawo nga ikaw nagtagad man kaniya?”—Salmo 8:1, 3, 4.
Sa unsang paagi kanunayng naghunahuna si Jehova sa tawo? Ang Bibliya nagtubag: “Pinaagi niini ang gugma sa Diyos napadayag sa atong kahimtang, tungod kay gipadala sa Diyos ang iyang bugtong-gianak nga Anak nganhi sa kalibotan aron atong mabatonan ang kinabuhi pinaagi kaniya. Mao kini ang gugma niining bahina, dili nga kita mihigugma sa Diyos, kundili nga siya mihigugma kanato ug gipadala ang iyang Anak ingong usa ka pangpasig-uli nga halad alang sa atong mga sala.”—1 Juan 4:9, 10.
Sa unsang paagi kining halad pasig-uli mao ang labing dakong pamatuod sa gugma sa Diyos? Tagdon nato ang nahitabo sa tanaman sa Eden. Si Adan ug Eva nag-atubang sa desisyon kon kaha magpasakop sa kasugoan ni Jehova nga may palaabotong hingpit nga kinabuhi sa walay kataposan o ang pagrebelde kang Jehova nga moresultag kamatayon. Mipili sila sa pagrebelde. (Genesis 3:1-6) Sa pagbuhat niana gihukman usab nila ang tanang katawhan sa kamatayon. (Roma 5:12) Sa kamapahitas-on sila naghikaw kanato sa kahigayonan sa paghukom sa atong kaugalingon. Walay bisan usa kanato ang makahimog desisyon.
Ugaling, mahigugmaong gihunahuna kanunay ni Jehova ang tawong mamatay, nga nakasabot sa iyang malisod nga kahimtang. Pinaagi sa masakripisyohon nga kamatayon sa Iyang Anak, si Jesu-Kristo, gitagana ni Jehova ang legal nga pasikaranan sa matag usa kanato sa pagpili alang sa iyang kaugalingon sa kinabuhi o kamatayon, pagsugot o pagrebelde. (Juan 3:16) Ingon sa daw si Jehova naghatag kanato ug atong kaugalingong adlaw sa hukmanan—usa ka higayon sa pagbalik sa tanaman sa Eden, sa mahulagwayong pagkasulti, ug sa paghimog atong kaugalingong desisyon. Kini mao ang kinadak-ang kapadayagan sa gugma nga nahimo sukad.
Handurawa ang kasakit nga giantos ni Jehova samtang nakita niya ang iyang panganay nga giinsulto, gisakit, ug gilansang samag usa ka kriminal. Ug giantos kana sa Diyos alang kanato. Ang atong kahibalo sa inisyatibo ni Jehova sa paghigugma kanato una angayng, sa ingon, magpalihok kanato sa paghigugma kaniya ug sa pagdasig kanato nga mangita kaniya. (Santiago 1:17; 1 Juan 4:19) Ang Bibliya nagdapit kanato sa “pagpangita kang Jehova ug sa iyang kalig-on. Sa pagpangita kanunay sa iyang nawong. Sa paghinumdom sa iyang katingalahang mga buhat nga iyang gibuhat, sa iyang mga milagro ug hudisyal nga mga paghukom sa iyang baba.”—Salmo 105:4, 5.
Ang personal nga pagmahal ug usa ka mahigugmaong relasyon sa Diyos, aron mahimong iyang higala, dili kay dili makab-ot. Kini posible. Tinuod, dili gayod nato ikapaamgid ang atong gugma sa Diyos uban sa tawhanong mga relasyon. Ang gugma nga gibati nato sa atong kapikas, mga ginikanan, mga igsoon, mga anak, o mga higala maoy lahi gikan sa atong gugma alang sa Diyos. (Mateo 10:37; 19:29) Ang paghigugma kang Jehova naglangkit sa atong debosyon, pagsimba, ug walay kondisyong pagpahinungod kaniya. (Deuteronomio 4:24) Walay laing relasyon ang may ingon nianang kalangkitan. Bisan pa, kita makaugmad ug malig-on ug lalom nga pagmahal sa Diyos sa matinahurong paagi, uban ang kataha.—Salmo 89:7.
Bisag dili-hingpit, sama kang Cain ug Abel ikaw may katakos sa paghigugma sa imong Maglalalang. Gihimo ni Cain ang iyang pagpili, miduyog kang Satanas, ug nahimong unang tawong mamumuno. (1 Juan 3:12) Sa kasukwahi, si Abel pagahinumdoman ni Jehova ingong usa ka tawo sa pagtuo ug pagkamatarong ug pagagantihan ug kinabuhi sa umaabot nga Paraiso.—Hebreohanon 11:4.
Ikaw usab adunay kapilian. Pinaagi sa tabang sa espiritu sa Diyos ug sa iyang Pulong, ikaw sa pagkatinuod makahigugma sa Diyos “sa tibuok mong kasingkasing ug sa tibuok mong kalag ug sa tibuok mong kusog.” (Deuteronomio 6:5) Si Jehova, sa baylo, magpadayon sa paghigugma kanimo, kay siya mao ang “tigganti sa mga matinuorong nagapangita kaniya.”—Hebreohanon 11:6.
[Hulagway sa panid 7]
Ang halad ni Abel maoy dalawaton sa Diyos