Kinahanglan Kitang Motahod sa Awtoridad ni Jehova
Sa unsang mga tinamdan imong ikalangkit ang karaang mga ngalan nga Kore, Datan, ug Abiram? Rebelyon! Batok sa unsa? Batok sa tinudlo-sa-Diyos nga awtoridad. Ang mga detalye sa ilang makapasubo nga dalan narekord diha sa Numeros kapitulo 16, ug ang sumaryo sa maong hitabo makaplagan diha sa artikulong “Maunongong Magpasakop sa Tinudlo-sa-Diyos nga Awtoridad” sa Agosto 1, 2002, Bantayanang Torre. Makaplagan nimong mapuslanon ang pagbasa niining impormasyona ug unya tan-awon ang makapahinuklog nga presentasyon niini diha sa video nga Respect Jehovah’s Authority. Imong makita ang panagbangi nga nahitabo tali sa matinumanong mga anak ni Kore ug sa ilang rebelyosong amahan, nga nakig-away sa Soberano sa uniberso. (Num. 26:9-11) Kining maong tinuod-kinabuhing drama angayng magdasig kanatong tanan sa pag-ugmad sa atong pagkamaunongon kang Jehova sa mas bug-os pa.
Samtang imong tan-awon ang video, susiha ang ebidensiya diin si Kore ug ang iyang kaubang mga rebelde napakyas bahin sa pagsulay sa pagkamaunongon diha sa unom ka hinungdanong mga bahin: (1) Sa unsang paagi wala nila tahora ang tinudlo-sa-Diyos nga awtoridad? (2) Sa unsang paagi ilang gitugotan ang garbo, ambisyon, ug pangabugho nga makaapektar kanila? (3) Sa unsang paagi ilang gipasiugda ang pagkadi-hingpit niadtong gitudlo ni Jehova? (4) Unsang bagulbolang tinamdan ang ilang naugmad? (5) Nganong wala sila makontento sa ilang mga pribilehiyo sa pag-alagad? (6) Sa unsang paagi ilang giuna ang ilang mga higala ug pamilya inay ang pagkamaunongon ngadto sa Diyos?
Susiha kon sa unsang paagi ang mga leksiyon nga nakat-onan niini nga drama sa Bibliya mapadapat sa atong personal nga panglantaw bahin sa tinudlo-sa-Diyos nga awtoridad karon: (1) Sa unsang paagi kita mosanong sa mga desisyon sa mga ansiyano sa kongregasyon, ug ngano? (2) Sa unsang paagi atong mapugngan ang bisan unsang di-hustong mga motibo sa atong pagkatawo? (3) Sa unsang paagi kita mosanong sa mga pagkadi-hingpit niadtong gitudlo nga manguna? (4) Unsay angay natong buhaton kon ang bagulbolang espiritu mosugod nga maugmad diha sa atong kasingkasing? (5) Unsay angay natong bation sa bisan unsang mga pribilehiyo nga gihatag kanato? (6) Kinsay dili gayod mangibabaw sa atong pagkamaunongon sa Diyos, ug kanus-a kini mahimong usa ka lisod nga pagsulay kanato?