Kalinaw​—Sa Unsang Paagi Kini Mabatonan?

KAY nagkinabuhi ta sa gubot nga kalibotan, kinahanglan tang maningkamot nga mabatonan ang kalinaw. Pero bisan pag malinawon na ta, sagad maningkamot ta aron magpadayon kana. Sumala sa Pulong sa Diyos, unsay makatabang nato aron mabatonan ang tinuod ug dumalayong kalinaw? Unsaon nato pagtabang ang uban aron mabatonan kana?

SA UNSANG PAAGI MABATONAN ANG TINUOD NGA KALINAW?

Aron mabatonan ang tinuod nga kalinaw, kinahanglang mobati tang luwas ug kalmado. Kinahanglang makigsuod sab ta sa uban. Labaw sa tanan, kinahanglan tang makigsuod sa Diyos. Sa unsang paagi?

Dihang sundon nato ang matarong nga mga sugo ug prinsipyo ni Jehova, atong gipakita nga misalig ta niya ug gusto natong makabatog malinawong relasyon uban kaniya. (Jer. 17:7, 8; Sant. 2:22, 23) Sa baylo, siya makigsuod nato ug hatagan ta niyag kalinaw sa hunahuna. Ang Isaias 32:17 nag-ingon: “Ang buhat sa matuod nga pagkamatarong mahimong pakigdait; ug ang pag-alagad sa matuod nga pagkamatarong, kalinaw ug kasegurohan hangtod sa panahong walay tino.” Mabatonan nato ang tinuod nga kalinaw sa hunahuna pinaagi sa kinasingkasing nga pagsunod kang Jehova.​—Isa. 48:18, 19.

Matabangan sab ta sa pagbaton ug dumalayong kalinaw pinaagi sa talagsaong regalo gikan sa atong langitnong Amahan​—ang balaang espiritu.​—Buh. 9:31.

ANG ESPIRITU SA DIYOS MAKATABANG NATO NGA MAGMALINAWON

Gihisgotan ni apostol Pablo ang pakigdait, o kalinaw, ingong ikatulong bahin sa “bunga sa espiritu.” (Gal. 5:22, 23) Tungod niini, kinahanglang magpagiya ta sa balaang espiritu sa Diyos aron mabatonan ang tinuod nga kalinaw. Atong hisgotan ang duha ka paagi diin matabangan ta sa espiritu sa Diyos nga magmalinawon.

Una, matabangan ta sa pagbatog kalinaw pinaagi sa regular nga pagbasa sa Pulong sa Diyos. (Sal. 1:2, 3) Samtang palandongon nato ang mensahe sa Bibliya, ang espiritu sa Diyos motabang nato nga masabtan ang panghunahuna ni Jehova sa daghang butang. Pananglitan, atong mahibaloan kon nganong nagpabilin siyang malinawon ug kon nganong importante kaniya ang kalinaw. Pinaagi sa pagsunod sa maong mga leksiyon gikan sa Pulong sa Diyos, mahimo tang mas malinawon.​—Prov. 3:1, 2.

Ikaduha, kinahanglang pangayoon nato sa Diyos ang balaang espiritu. (Luc. 11:13) Nagsaad si Jehova nga kon mangayo tag tabang niya, “ang kalinaw sa Diyos nga labaw sa tanang panghunahuna magbantay sa [atong] mga kasingkasing ug sa [atong] mga gahom sa pangisip pinaagi kang Kristo Jesus.” (Filip. 4:6, 7) Kon kanunay natong pangayoon ang espiritu ni Jehova, hatagan ta niyag kalinaw sa hunahuna nga matagamtam lang niadtong suod kaniya.​—Roma 15:13.

Sa unsang paagi gisunod sa pipila ang maong tambag sa Bibliya? Unsang mga kausaban ang ilang gihimo aron matagamtam ang dumalayong kalinaw​—uban kang Jehova, sa ilang kaugalingon, ug sa isigkatawo?

SA UNSANG PAAGI NABATONAN NILA ANG DUMALAYONG KALINAW?

Sa kongregasyon, may pipila nga “masuk-anon” kaniadto pero karon mahunahunaon na, buotan, mapailobon, ug makigdaiton.a (Prov. 29:22) Matikdi kon sa unsang paagi ang duha ka magmamantala natabangan sa pagkontrolar sa ilang kasuko ug nahimong makigdaiton sa uban.

Ang dili maayong kinaiya ni David nakaimpluwensiya sa iyang sinultian. Sa wala pa siya magpahinungod sa Diyos, siya hinawayon sa uban ug sakit manulti sa iyang pamilya. Ngadtongadto, nasabtan ni David nga kinahanglan siyang magbag-o ug mahimong makigdaiton. Sa unsang paagi nahimo niya kana? Siya miingon, “Gisunod nako ang mga prinsipyo sa Bibliya, ug ingong resulta, mas gitahod namo ang usag usa diha sa pamilya.”

Ang kaagi ni Rachel nakaimpluwensiya sa iyang kinaiya. Siya miingon, “Bisan karon, naglisod ko pagkontrolar sa akong kasuko kay nagdako ko sa masuk-anong panimalay.” Unsay nakatabang niya sa pagkahimong mas makigdaiton? Siya mitubag, “Ang regular nga pag-ampo kang Jehova.”

Si David ug Rachel maoy duha lang ka pananglitan nga nagpakitang magmalinawon ta kon sundon nato ang mga prinsipyo sa Bibliya ug pangayoon ang espiritu sa Diyos. Klaro nga bisag masuk-anon ang mga tawo sa atong palibot, puwede tang makabatog kalinaw sa hunahuna nga makatabang aron magmalinawon ang pamilya ug ang kongregasyon. Pero, giawhag ta ni Jehova nga “makigdinaitay sa tanang tawo.” (Roma 12:18) Posible ba nâ? Unsay mga kaayohan kon maningkamot tang magmakigdaiton?

MAGMAKIGDAITON SA UBAN

Pinaagi sa atong pagsangyaw, giawhag nato ang mga tawo nga tagamtamon ang kaayohan gikan sa atong malinawong mensahe bahin sa Gingharian sa Diyos. (Isa. 9:6, 7; Mat. 24:14) Ikalipay nga daghan ang midawat niana. Ingong resulta, dili na kaayo sila maguol o masuko sa nagakahitabo sa ilang palibot. Hinunoa, may tinuod na silang paglaom sa umaabot ug napalihok sila sa ‘pagpangita sa pakigdait, ug pagsunod niini.’​—Sal. 34:14.

Pero dili tanan ang modawat dayon sa atong mensahe. (Juan 3:19) Bisan pa niana, tabangan ta sa espiritu sa Diyos nga ipahayag kanila ang maayong balita sa makigdaiton ug matinahorong paagi. Sa pagbuhat niana, gisunod nato ang instruksiyon ni Jesus bahin sa pagsangyaw nga nasulat sa Mateo 10:11-13: “Inigsulod ninyo sa balay, paghatag ug katahoran sa panimalay; ug kon takos ang balay, ipaabot niini ang kalinaw nga inyong gipanghinaot; apan kon kini dili-takos, ang kalinaw gikan kaninyo ipabalik nganha kaninyo.” Kon sundon nato ang tambag ni Jesus, makabiya ta nga malinawon ug manghinaot nga mamati ang maong tawo sa umaabot.

Makaamot sab ta sa kalinaw kon magmatinahoron ta sa mga opisyales sa gobyerno​—apil niadtong supak sa atong buluhaton. Pananglitan, tungod sa diskriminasyon, wala aprobahi sa gobyerno sa usa ka nasod sa Africa ang pagtukod ug mga Kingdom Hall. Sa panghinaot nga masulbad ang maong problema sa malinawong paagi, usa ka brader nga misyonaryo kaniadto nianang nasora, giasayn nga mobisita sa High Commissioner (o embahador) sa maong nasod didto sa London, England. Sultian niya ang maong opisyal bahin sa malinawong buluhaton sa mga Saksi ni Jehova sa iyang nasod. Unsay resulta?

Ang brader miingon nga dihang nakita niya ang sininaan sa receptionist, nakahunahuna dayon siya nga sakop ni sa tribo nga nagsulti sa pinulongan nga iyang nakat-onan. Busa gitimbaya niya kini sa maong pinulongan. Kay nakurat, nangutana ang receptionist kon unsay iyang tuyo. Ang brader miingon: “Matinahoron nako siyang giingnan nga gusto kong makig-estorya sa High Commissioner. Gitawgan niya ang opisyal, kinsa migawas aron sugaton ko ug mitimbaya nako sa lokal nga pinulongan. Human niana, naminaw pag-ayo ang opisyal samtang gipatin-aw nako niya ang malinawong kalihokan sa mga Saksi.”

Tungod sa matinahorong eksplinasyon sa brader, nasabtan sa komisyoner ang atong buluhaton ug namenosan ang diskriminasyon. Sa ulahi, gitugotan na sa gobyerno sa maong nasod sa Africa ang pagtukod ug mga Kingdom Hall. Lipay kaayo ang mga igsoon nianang malinawong resulta! Oo, kon tahoron nato ang uban, moresulta kinig daghang kaayohan​—apil ang kalinaw.

MAGMALINAWON HANGTOD SA HANGTOD

Karon, natagamtam sa katawhan ni Jehova ang espirituwal nga paraiso nga malinawon kaayo. Makaamot ka sa maong kalinaw samtang maningkamot ka sa pagpakita niini nga bahin sa bunga sa espiritu. Labaw sa tanan, uyonan ka ni Jehova ug makatagamtam kag dumalayong kalinaw sa iyang bag-ong kalibotan.​—2 Ped. 3:13, 14.